1 عَلَتَلَ بَرَ عَ مَسٍن ﭑ بّ،

«هَلِ عَننَبِ مُنسَ نُن عَننَبِ سَمُوٍلِ

ﭑ مَشَندِ نّ يِ حَمَ شَ قٍ رَ،

ﭑ بْحّ مُ تِن نَ دُبَ سُشُدٍ.

عٍ شَ عٍ مَكُيَ ﭑ نَ، عٍ شَ سِفَ.

2 شَ يِ حَمَ عِ مَشْرِن، ‹مُشُ شَ سِفَ مِندٍن›،

عِ شَ عٍ يَابِ، ‹عَلَتَلَ نَن عَ مَسٍنشِ،

نَشَن لَنمَ عَ شَ قَشَ، نَ كَنيِ شَ قَشَ،

نَشَن لَنمَ عَ شَ قَشَ سَنتِدّفّمَ رَ،

نَ كَنيِ شَ قَشَ سَنتِدّفّمَ رَ،

نَشَن لَنمَ عَ شَ قَشَ كَامّ رَ،

نَ كَنيِ شَ قَشَ كَامّ رَ،

نَشَن لَنمَ عَ شَ شَنِن كٌنيِيَ كُي،

نَ كَنيِ شَ شَنِن كٌنيِيَ كُي.›

3 عَلَتَلَ شَ مَسٍنيِ نَن يَ؛

‹ﭑ قَمَ نّ عٍ حَشَنكَتَدٍ تْورّ نَانِ رَ.

سَنتِدّفّمَيٍ قَمَ نّ ندٍيٍ قَشَدٍ.

بَرٍيٍ قَ ندٍيٍ عِبْودٍ.

شْنِ نَشٍيٍ نَ كٌورٍ مَ نُن وُلَءِ سُبٍ نَشٍيٍ نَ بْشِ،

عٍ قَمَ نّ ندٍيٍ سْنتْدٍ، عٍ عٍ دٌن.

4 دُنِحَ مَنفّيَ بِرِن نَ نَ قٍ تٌ، عٍ لُمَ فَاشُي نَن كُي.

عٍ قَمَ نّ عَ كٌلٌندٍ يُدَيَ مَنفّ شٍسٍكِيَ شَ دِ مَنَسِ،

عَ قٍ حَاشِ نَشَن نَبَشِ دَرِ سَلَمُ،

نَ بَرَ عَ نِيَ عَلَتَلَ شَ عٍ حَشَنكَتَ.

5 دَرِ سَلَمُ، ندٍ كِنِكِنِمَ عِ مَ؟

ندٍ نْمَ دِحّدٍ عِ شَ قٍ رَ؟

ندٍ عِ شَ قٍ مَشْرِنمَ؟›

6 عَلَتَلَ شَ مَسٍنيِ نَن يَ؛

‹وٌ بَرَ ﭑ نَبٌلٌ،

وٌ بَرَ فبِلٍن ﭑ قْشْ رَ.

نَ قٍ نَ عَ رَ ﭑ قَمَ وٌ سُشُدٍ، ﭑ مُ كِنِكِنِ وٌ مَ.

7 ﭑ قَمَ نّ عٍ رَيٍنسٍندٍ عَلْ مَالٍ لَفِ،

ﭑ قَ عٍ شَ دِيٍ بَدٍ عٍ يِ رَ،

ﭑ قَ ﭑ مَ حَمَ شُن نَكَنَدٍ

بَرِ مَ عٍ مُ فبِلٍنشِ عٍ شَ وَلِ كٌبِ قْشْ رَ.

8 عٍ شَ كَاحّ فِنّيٍ وُيَمَ نّ

عَلْ مّيّنيِ نَشَن نَ بَا دّ رَ.

كَسَرَ تِ قَمَ نّ دِنفّيٍ مَ يَنيِ رَ،

عَ قَ قٍ مَفَاشُشِ رَبَ عٍ رَ.

9 نفَ نَشَن بَرَ دِ سٌلٌقٍرٍ بَرِ،

عَ قَمَ نّ تَفَندٍ، عَ قَشَ يَافِ كُي عَ شَ وَشَتِ مُ عَ لِشِ.

عِسِرَيِلَ يَشُييٍ قَمَ نّ عٍ سْنتْدٍ سَنتِدّفّمَ رَ.›

عَلَتَلَ شَ مَسٍنيِ نَن نَ كِ.»

10 «ﭑ نفَ، حَشَنكَتّ نَ ﭑ بّ.

عِ بَرَ ﭑ نَسٌ دُنِحَ

كْنْ ﭑ مَ قٍ مُ رَقَنشِ بٍكَ يٌ مَ.

ﭑ مُ دٌنِ تٌنفٌمَ، ﭑ مُ دٌنِ قِمَ،

كْنْ مِشِ بِرِن لُمَ ﭑ دَنكَ رَ.»

11 عَلَتَلَ بَرَ عَ مَسٍن،

«ﭑ مُ وٌ رَكِسِشِ شّ؟

ﭑ مُ يَشُييٍ بْنبْ شّ وٌ شَ قٍ رَ وٌ تْورْ تّمُي؟

12 وُرٍ نُن يْشُي بٌلٌنمَ؟ عَدٍ.

مِشِ نَشَن كٍلِمَ كْولَ مَ فٌ؟

13 ﭑ بَرَ وٌ شَ هَرِفٍ نُن وٌ شَ نَاقُلِ بِرِن قِ مِشِ مَ

وٌ شَ يُنُبِيٍ شَ قٍ رَ وٌ نَشٍيٍ رَبَشِ يِ بْشِ مَ.

14 ﭑ وٌ سَمَ نّ وٌ يَشُييٍ سَفٌي،

عٍ شَ وٌ شَنِن بْشِ مَ وٌ مُ دّننَشّ كٌلٌن،

بَرِ مَ ﭑ بَرَ شْنْ وٌ مَ عَ حَاشِ رَ.»

15 «عَلَتَلَ، عِ بَرَ عَ بِرِن كٌلٌن.

عِ شَ رَتُ ﭑ مَ، ﭑ مَلِ، ﭑ فبٍحْشْ ﭑ يَشُييٍ مَ.

عِ نَشَ ﭑ قَشَ، عِ تَن كِنِكِنِنتٍ،

بَرِ مَ ﭑ نَ تْورْقٍ عِ شِلِ شَ قٍ رَ.

16 ﭑ تٌ عِ شَ مَسٍنيِ مّ، ﭑ بَرَ عَ سُشُ.

عِ شَ سّرِيّ رَقَن ﭑ مَ،

بَرِ مَ ﭑ قِندِشِ عِ فبٍ نَن نَ، عِ تَن مَنفّ عَلَتَلَ.

17 ﭑ مُ لُ مِشِ يَ مَ نَشٍيٍ نُ يٌمَ عِ مَ،

بَرِ مَ عِ شَ قٍ نُ نَ ﭑ بْحّ كُي.

ﭑ نُ بَرَ لُ ﭑ كٍرٍن،

ﭑ نُ شْنْشِ يِ حَمَ مَ عَلْ عِ تَن.

18 مُنقٍ رَ ﭑ لُمَ تْورّ كُي؟

مُنقٍ رَ ﭑ مُ يَلَنيِ سْتْمَ؟

عِ نَشَ عِ شَ لَايِدِ كَنَ

عَلْ كْلْنيِ نَشَن مُ يٍ رَ مِنِمَ سْنْن.»

19 نَ نَن عَ رَ عَلَتَلَ بَرَ عَ مَسٍن،

«شَ عِ فبِلٍن ﭑ مَ،

ﭑ عِ رَفبِلٍنمَ نّ عِ وَلِدٍ.

شَ عِ بَ وْيّن حَاشِ قَلَقٍ،

ﭑ مَن عِ قِندِ مَ نّ ﭑ مَ شّيرَ رَ.

حَمَ شَ بِرَ عِ قْشْ رَ،

عِ تَن نَشَ بِرَ عٍ قْشْ رَ دٍ.

20 يِ حَمَ قَمَ نّ عِ فٍرٍدٍ،

كْنْ عٍ مُ نْمَ عِ رَ،

بَرِ مَ ﭑ عِ لُمَ نّ عَلْ تّتّ شْرْشْي عٍ يَ رَ.

ﭑ نَ عِ سّيتِ مَ، عَلَكٌ ﭑ شَ عِ رَكِسِ، ﭑ شَ عِ رَتَنفَ.

عَلَتَلَ شَ مَسٍنيِ نَن نَ كِ.

21 ﭑ عِ بَمَ نّ مِشِ حَاشِ بّلّشّ،

ﭑ عِ رَتَنفَ مَنفّ سّنبّمَ مَ.»