15
1 Ko e liʻaki ʻae kakai Siu, pea mo honau tautea lahi. 10 ʻOku lāunga ʻa Selemaia koeʻuhi ko e kakai pea kuo ne maʻu ʻae talaʻofa lelei, 12 Mo e fakaʻilo ʻoe houhau kiate kinautolu. 15 Ko e lotu ʻa Selemaia. 19 ʻOku ne maʻu talaʻofa lelei.
1 Pea naʻe toki pehē ʻe Sihova kiate au, “Kapau ʻe tuʻu ʻi hoku ʻao ʻa Mōsese mo Samuela, ʻe ʻikai teu tokanga ki he kakai ni: kapusi ʻakinautolu ʻi hoku ʻao, pea tuku ke nau ʻalu atu. 2 Pea ʻe hoko ʻo pehē, ʻo kapau te nau lea kiate koe, Te mau ʻalu ki fē? pea te ke tala kiate kinautolu, ʻOku pehē ʻe Sihova; Ko kinautolu, kuo tuʻutuʻuni ki he mate, te nau mate; pea ko kinautolu ʻoku tuʻutuʻuni ki he heletā, te nau ʻi he heletā; pea ko kinautolu ʻoku tuʻutuʻuni ki he honge, te nau ʻi he honge; pea ko kinautolu kuo tuʻutuʻuni ki he fakapōpula, te nau ʻalu ki he fakapōpula. 3 ʻOku pehē ʻe Sihova, Teu tuʻutuʻuni kiate kinautolu ʻae faʻahinga meʻa ʻe fā: ko e heletā ke tāmateʻi, ko e fanga kulī ke haehae, ko e manu ʻoe ʻatā, pea mo e ngaahi manu ʻoe fonua, ke folo hifo pea fakaʻauha. 4 Pea te u tukuange ʻakinautolu ke ʻave ki he ngaahi puleʻanga kotoa pē ʻo māmani, koeʻuhi ko Manase ko e foha ʻo Hesekaia ko e tuʻi ʻo Siuta, pea koeʻuhi ko e meʻa naʻa ne fai ʻi Selūsalema.” 5 “He ko hai ʻe ʻofa kiate koe,
ʻE Selūsalema?
Pe ko hai ʻe mamahi mo koe?
Pe ko hai ʻe afe atu ke fehuʻi pe ʻoku ke fēfē?
6 ʻOku pehē ʻe Sihova,
kuo ke fakaholomui meiate au;
ko ia teu mafao atu hoku nima kiate koe,
mo fakaʻauha koe;
kuo u fiu ʻi he kātaki.
7 Pea teu tapili ʻaki ʻakinautolu ʻae tapili ʻi he ngaahi matapā ʻoe fonua;
te u toʻo ʻenau fānau,
te u fakaʻauha ʻa hoku kakai,
ko e meʻa ʻi heʻenau taʻetafoki mei honau ngaahi hala.
8 Kuo fakatokolahi ʻi hoku ʻao honau kau fefine ʻoku mate honau ʻunoho ʻo lahi hake ʻi he ʻoneʻone ʻoe ngaahi tahi:
kuo u ʻomi ki heʻenau faʻē ha tokotaha ʻoku fakaʻauha ʻi he hoʻatā:
kuo u pule kiate ia ke fai ia fakafokifā pe,
ko e ngaahi fakailifia ki he kolo.
9 Pea kuo vaivai ia ʻaia kuo fāʻeleʻi ʻae toko fitu:
kuo ne tuku hake hono laumālie;
kuo tō hifo hono laʻā ʻi he kei ʻaho:
kuo mā ia mo puputuʻu:
pea ko kinautolu ʻoku toe te u tukuange ki he heletā ʻi he ʻao ʻo honau ngaahi fili,
ʻoku pehē ʻe Sihova.”
10 ¶ ʻA ʻeku faʻē,
ʻoku ou malaʻia,
koeʻuhi kuo ke fāʻeleʻi au ko e tangata faʻa fekeʻikeʻi pea ko e tangata fakakikihi mo māmani kotoa pē! Pea ʻoku teʻeki ai te u nō ha meʻa ki he totongi,
pea naʻe ʻikai nō kiate au ʻe ha tangata ki he totongi;
ka ʻoku nau taki taha kapeʻi au.
11 Pea naʻe pehē ʻe Sihova,
Ko e moʻoni ʻe lelei hoʻo hako;
te u pule ki he fili ke ne fai lelei kiate koe ʻi he ʻaho ʻoe kovi mo e mamahi.
12 ʻE fesiʻi ʻe he ukamea ʻae ukamea mei he tokelau,
pea mo e sitili?
13 “Pea te u foaki hoʻo meʻa mo hoʻo koloa ke vetea taʻehatotongi,
ko e meʻa ʻi hoʻo ngaahi angahala,
ʻi he ngataʻanga kotoa pē ʻoe fonua.
14 Pea te u pule ke ke ʻalu mo ho ngaahi fili ki he fonua ʻaia ʻoku ʻikai te ke ʻiloa;
he kuo tutu ʻae afi ʻi hoku houhau,
ʻaia ʻe vela ai ʻakimoutolu.”
15 ¶ “ʻE Sihova ʻoku ke ʻafioʻi:
manatuʻi au,
pea ʻaʻahi kiate au,
pea totongi kiate kinautolu kuo fakatangaʻi au;
ʻoua naʻa ke ʻave au koeʻuhi ko hoʻo kātaki ʻofa:
ke ke ʻafio kuo u kātaki ʻae manuki koeʻuhi ko koe.
16 Pea naʻe ʻiloa hoʻo ngaahi lea,
pea ko ʻeku meʻakai ia;
pea ko hoʻo folofola ko e fiemālie pea mo e fakafiefia ki hoku loto:
he kuo ui au ʻi ho huafa,
ʻE Sihova ko e ʻOtua ʻoe ngaahi kautau.
17 Naʻe ʻikai te u nofo ʻi he fakataha ʻae kau manuki,
pea naʻe ʻikai teu fiefia ka naʻaku nofo tokotaha pe koeʻuhi ko ho nima:
he kuo ke fakapito ʻaki au ʻae tuputāmaki.”
18 “Ko e hā ʻoku pehē ai pe ʻeku mamahi,
mo hoku lavea taʻefaʻafakamoʻui,
ʻaia ʻoku ʻikai fie moʻui?
Te ke ʻiate au ʻo hangē ko e meʻa loi,
pea ʻo hangē ko e vai kuo fakaʻaʻau ke maha?
19 ¶ Ko ia ʻoku pehē ʻe Sihova,
kapau te ke tafoki,
te u toe ʻomi koe,
pea te ke tuʻu ʻi hoku ʻao:
pea kapau te ke vaheʻi ʻae lelei mei he kovi,
te ke hoko ʻo hangē ko hoku fofonga;
tuku ke tafoki ʻakinautolu kiate koe kaeʻoua naʻa ke tafoki koe kiate kinautolu.
20 Pea ʻoku pehē ʻe Sihova,
te u ngaohi koe ki he kakai ni ke ke hangē ko e ʻa palasa:
pea te nau tauʻi koe,
ka ʻe ʻikai te nau lavaʻi koe:
he ʻoku ou ʻiate koe ke fakamoʻui koe,
pea ke fakahaofi koe.
21 Pea te u fakahaofi koe mei he nima ʻoe angahala,
pea teu huhuʻi koe mei he nima ʻoe mālohi.”