35
Etanai Vivivireina
1 Mutulua ma dobu poipoina ina vinuaiai,
dobu dariḡaḡa ina vinuaiai ma ina talai!
2 Berana ina numoi,
ma ina vinuaiai ma ina logologoi!
Inanana i vinualaulauna me Lebanon olai
ma ana maura me Carmel olana ma Sharon wapuna.
Kampa Bada ana boruma rava ina viatataiemi,
Bada ana vigulau ina inanai.
3 Ura vogarigarii ona vovaibagi,
ae tutu gwaḡagwaḡana ona vovaibagi;
4 Rava rovorovoi ona riwei,
“Eḡa ona rovo! Ona virewapana!
Ona inana! God ana mejina e nenei;
da ami ḡavia ina vipupui.”
5 Ma mata potapotai ina inana
ma taniḡa potapotai ina nonora
6 Gwaḡagwaḡai ina viauauepa me deer, ma gumgum ana morelanai ina vigaragararei.
Waira au dobu dariḡaḡa ina wanaiwaḡi,
ma vuvura ina raupaipairei.
7 Doa paipairana ina vitopa
vuvura ina raupaipairei
au dobu dariḡaḡa,
modu ma gonu ina gogo labalababa auou moduei ana au animae.
8 Ma kampa etanai ḡaeḡaena e ḡoreḡorei Etanai vivivireina, ina mae.
Etanaina lamna taui God ana babara e nenaeni, taui ava aubaii,
Rava orai miramirai eḡa ina babarani.
Bubuai weka eḡa ina babara dadana.* Bo avena da ai nota i aburu, taui eḡa ina kwako.
9 Eḡa lion bo raviuru kampa ina babara.
Eḡa ḡamoḡamo ḡaiḡaiawai kampa ina mae
Bada rava i vivilawania,
taui ava kampa ina babara.
10 Bada aiavoi i gimara-melei wenanare ina nememei
ana welawelai ina rui au Zion
Nuaiai maemaena ina vikunuteiei,
nuaiai ma morelana ḡaeḡaena ina peu au tepai,
nuabola ma iniviara ina amoa.