Psalm
Wela ma Pari
Pariverena
Mara manamanaina i netawanana rava maḡamaḡaui taputapunei ava wela ma pari i girumi wei au bukana. Mai Israel wei welai ma pari i tami ma i teretagogiei da lamnei God i viviborumei.
Wei au bukana wela ma pari tapuna ma tapuna. Ḡelaui God e viviborumei ma e vovoepaepai ma ana iviaiai aubaina e viviegualauei. Ḡelaui e vivibaḡa agu ma gagalo aubaina, bo notatawanana aubaina. Wela au ḡelaui, rava e raraupari ai gulau aubaina ma god e vivibaḡai da ai ḡavia ita kovoḡi. Ma wela au ḡelaui tauamgiruma ana apoapoe ma ana nuabola aubaii God awarina i beubeura.
Ma maraḡela Iesu riwa wei au parii i vaia da i viararamana. Kerisiana wei welai ma parii i welewelei ai au viboruma ma i jimajima.
Wela vinevinei
Psalm 1, 10, 23, 27, 34, 51, 67, 90, 95, 1-11, 100, 103, 110, 103, 110, 119, 9-16 ma 139.
Buka Tagogi
1
Nuaiaii ririwa-kauana
1 Rava viaiainana, lamna eḡa ḡoʼapoapoe ravai ita votaḡotaḡoi,
ma ponai eḡa ita rarautaniḡanei;
ma vivijiboḡai eḡa awarii ita kiakiala.
2 Wate Bada ana tarawatu i vinuaiaiei,
aupom ma marai e notanota-vaitetei.
3 ✡ Jer 17:8Tauna me ai, waira au adana gogogona,
ana au mara e rarauano;
ma rugurugui eḡa ita poipoi.
Wei ravanana, aiwai anatapuna e kaukauana-kauei.
4 Wate ḡoʼapoapoe ravai eḡa nanare!
Taui me rugurugu, ive i kapupuana-naiei;
5 Lamna aubaina ḡoʼapoapoe taukauei Bada ana au etera ita mairi ava,
ma nanare ḡoa apoapoei ta kauei rava jijimani ai au dam ita mae ava.
6 Bada ḡoa aiaii ravai e rarauetaraveni ma e paipaini;
wate ḡoʼapoapoe ai etanai au damona, pupui.