9
Job
1-2 Errogon, gubin e pin’ir ma go’ kug rung’ag ko som’on.
Machane bu uw rogon ba girdi’ ni nge togopluw ngak Got u ba pa’ i oloboch nge gel ngak?
3 Bu uw rogon me yag rok be’ ni nge tugthin ngak?
Rayag ni de’eriy bbiyu’ e duwer
ni dariy be’ nrayag ni pi’ e fulweg riy.
4 I Got e rib gonop ma rib gel gelngin;
dariy be’ nrayag ni nge chugur ni nge ta’reb gelngirow.
5 Yira gin ma ke mithmitheg e pi burey
mu fithik’ e damumuw me thirif e pi burey nem u but’.
6 I Got e ma pi’ e durru’ nge rurug e but’;
ma rurug e yuley i duga’ nma dunubiy e fayleng.
7 Rayag ni taleg e yal ni dabki yib ngalang,
nge t’uf ndabki mat ra’en nep’.
8 Dariy be’ ni ayuweg Got i pithig radan e tharmiy
ara yotyot keru’ fare kan nu maday.
9 Got e the’ e t’uf ngalan e lang — fare Dipper,
Orion, Pleiades nge pi t’uf nu yimuch.
10 Dabiyag ni ngad nanged fan e pin’en nib thum’ ngaru’ nma rin’,
nge pi maang’ang rok ni dabi mus.
11 Ra yan Got u chireg, ma dabyag ni ngguy.
12 Ma fek e tin ba’adag, ma dariy be’ nrayag ni taleg;
ma dariy be’ ni m’ath dugwan rok ni nge fith ngak ni nge ga’ar, “Ba mang e ga be rin’?”
13 Damumuw rok Got e dar ma thil. Ke pirdi’iy e pi to’ogor rok
nra ayuweged Rahab* RAHAB: Ba kan nu maday ni bay ko yat ni be yip’ fan gelngin e wagagey nge kireb. ni fare kan nu maday ngar togopluwgad ngak.
14 Ere bu uw rogon ni gu ra pir’eg e thin ni nggu fulweg lungun Got?
15 Yug aray rogon nde buch e rog, ma kemus ni n’en nrayag
ni nggu rin’ e ngug wenig nigeg ngak Got ni ir e tapufthin rog nge runguyeg.
16 Ma yug aram rogon, ma fa’anra pageg ni nggu non,
ma dabi mich u wun’ug nra motoyil ngog.
17 Ke pi’ e yoko’ ni nge gadeg nge maad’ad ngog
nri dariy tapgin.
18 Dabi pageg nggu fil e fan rog;
ke suguy e yafos rog ko buchbuchan’.
19 Gur nggu motogel? Nggu motogel ngak Got?
Gur nggu fek nga tafen e puf oloboch? Rayag rok be’ ni nge suruy nge yan ngaram?
20 I gag e bfel’ e rog ma gu ba yul’yul’, machane lingan e thin rog e gawa bbuch e rog,
ma gubin ban’en ni gu ra yog e gowa be sul nge togopluw ngog.
21-22 I gag e bfel’ e rog, machane dakriy fan u wun’ug.
Ke chuwan’ug ko par. Dakuriy ban’en ni bay fan;
demturug ko bfel’ e rog ara ba kireb e rog; ma Got e ra thirifdad u but’.
23 Nap’an nra yim’ be’ nib tomgin ni be’ ni bfel’ e rok,
me minmin Got.
24 I pi’ Got e fayleng ngak e pi’in kireb.
Me ma’ewnag gubin e pi tapuf oloboch.
Ma fa’anra gathi Got e rin’, me’ere mini’ e rin’?
25 Be yan e rran u dakenag nib machrag, ma dariy reb e rran riy ni bfel’.
26 Par rog e be thumur ni bod rogon e bin th’abi machrag e bawoch,
ni bod payngin ba eagle nike ngalol i yib nga daken ba usangi.
27-28 Fa’an gu ra siminmin ngguy rogon ni nggu pagtalin e amith rog,
me sul gubin e gafgow rog ngog nge k’ar marus ngog;
Gu manang ni Got e ke yuluy e kireb nga dakenag.
29 Ere fa’anra aram rogon nike mudugil nib buch e rog, ere mangfan ni ngku’ug athamgil?
30 Dariy bmit e sop nrayag ni nge chuweg e denen rog.
31 Ke yin’eg Got ngalan ba low nib to’ar ma ba sonogor,
ma mus ko mad rog ma be sonogor ngog.
32 Fa’an mang e ba girdi’ Got, ma rayag ni nggu fulweg lungun;
rayag ni gu warow nga kort nge mudugil e aromow nib kireb e rok.
33 Machane dariy be’ nra yib nga thilmow —
dariy be’ nra pufthin nagmow, I Got nge gag.
34 Got, mu tal i gechig nigeg!
Mu tay urngin e pi morus rom u orel rog!
35 Dagur tamdag. Arme nggu non
ni bochan e gumnang e n’en ni bay u lanin’ug.
DRAFT VERSION — Proofreading in progress