37
Gin be sor e pi’in kireb nge pi’in fel’ ngay
1 Kireb ni be ngongliy e girdi’ ni kireb e dab mpag nge wagageynag lanin’um;
dabi awan’um ngak e pi’in yad be ngongliy e kireb;
2 ya bayi math owcherad ni bod e pan ni mororoy;
bay ram’ad ni bod rogon e woldug ni mororoy.
3 Um par ni SOMOL e ke pagan’um ngak ma ga rin’ e tin ni bfel’;
mu’um par u daken e nam rom u fithik’ e gapas.
4 Mu gay e felfelan’ rom rok SOMOL,
me pi’ ngom e tin ir e kari t’uf rom.
5 Mu pi’em ngak SOMOL;
mu pagan’um ngak, me ayuwegnem;
6 me gagiyegnag pangim nib mat’aw nge gal ni bod ram’en e yal’ ni misiw’.
7 Mu gum’an ngam sonnag SOMOL ni ir e nge maruwel;
dabi awan’um ngak e pi’in ke yo’or ban’en rorad,
ara pi’in kefel’ rograd ni bochan e sasalap.
8 Dab mu pagem nge magafan’um ara mu damumuw;
ya kemus ni oloboch e ra yib riy.
9 Pi’in nib pagan’rad ngak SOMOL e yad ra tafnay e nam,
ma pi’in kireb e bay ni tulufrad nga wuru’ e nam.
10 Dabki n’uw nap’an me chuw e pi’in kireb;
ra mu gayrad, ma dab mu piri’egrad;
11 machane pi’in ba sobut’anrad e bay ra pired u daken e nam,
nge felan’rad nike yo’or ban’en rorad ma yad ba gapas.
12 En nib kireb e ma makath nib togopluw ngak e en ni bfel’,
ni be gatfiy lan mit ngak u fithik’ e fanenikan.
13 Ma SOMOL e be minmin u wan’ ngak e en nib kireb,
ya manang ndabki n’uw nap’an me math e fan rok.
14 Pi’in kireb e kar girngiyed e saydon nge gating rorad
ni ngar li’ed e pi’in gafgow nge pi’in dariy ban’en rorad,
miyad thang e fan rok e pi’in yad bfel’;
15 machane saydon rorad e ir e bay nli’rad ngay,
min t’et’ar e gat’ing rorad.
16 Chu’uw ni bay rok be’ ni bfel’
e kabfel’ boch ko machaf rok urngin e pi’in kireb;
17 ya SOMOL e bayi chuweg gelngin e pi’in kireb,
machane me yoror rok e pi’in bfel’.
18 I SOMOL e ma ayuweg e pi’in yad be fol rok,
ma binaw e bayi par ni taferad ndariy n’umngin nap’an.
19 Mra yib e gafgow nga daken e nam ma dab ra gafgowgad;
ra yib e uyongol ma ba gaman e ggan rorad.
20 Ma pi’in kireb e yad ra yim’;
pi to’ogor rok SOMOL e yad ra chuw ni bod e floras u fithik’ e pan;
bay rm’aygad ngabang ni bod e ath.
21 En nib kireb e ma ning ni ku ra fulweg, machane der ma fulweg,
ma en ni bfel’ e ba gol ma de si’in.
22 Pi’in ke fal’eg Got wa’athrad e bay rtafned e binaw,
machane pi’in ke bucheg wa’athrad e bay ntulufrad nga wuru’ e binaw.
23 I SOMOL e ma pow’iy be’ ngi i yan ko kanawo’ ni nge yan riy,
ma be yororiy e en ni bfel’ u wan’.
24 Ra chey ni dol’, ma dabi magach u but’,
ya SOMOL e ra ayuweg nge sak’iy ngalang.
25 U gu moy ni ku gub pagel, ma chiney e ku gu pilibthir;
ma dawor gguy be’ nib mat’aw nike n’ag SOMOL,
ara gguy pifak ni yad be man ggan.
26 Gubin ngiyal’ nib gol ngak e girdi’, ma yira ning ban’en ngak ni ku yira fulweg me pi’,
ma pifak e ma fel’ rogoy u puluwrad.
27 Mu pithigem ko kireb ngam rin’ e tin bfel’,
ma pi’in owchem e gubin ngiyal’ ni yad e bay ra pired u daken fare gi but’.
28 Ya SOMOL e ba t’uf rok e tin bmat’aw,
ma der ma n’ag girdi’en;
ma yoror rorad ni dariy n’umngin nap’an’,
ma pi’in owchen e girdi’ nib kireb e bay ni tulufrad ngar chuwgad u daken fare but’.
29 Pi’in yad mmat’aw e bay ra pired u daken fare but’,
me par ni taferad ni dariy n’umngin nap’an.
30 Thin rok be’ ni bfel’ e bay e gonop riy,
ma tin ma weliy e bmat’aw.
31 Ma tay e motochiyel rok e Got rok u laniyan’,
ma dariy e ngiyal’ ni yow ma puf.
32 En nib kireb e ma yip’ owchen ngak e en ni bfel’,
ni be guy rogon ni nge thang e fan rok;
33 machane SOMOL e dabi pag fa’anem ni bfel’ nga pa’ fa’anem nib kireb,
ara pag fa’anem ni bfel’ u gil’ e pufthin nge m’ing e thin nga daken ni nga ni gechignag.
34 Mpar ni SOMOL e ke l’agan’um ngak mu’um fol ko tin keyog;
me tolang nigem ngam tafnay e binaw,
ma bay mu guy e pi’in kireb ni kan tulufrad.
35 Kug guy be’ nib kireb nib gel e gafgow ni i tay ngak e girdi’;
i changar nga but’ nga daken gubin e girdi’,
ni bod ba ke gek’iy nu Lebanon ni cedar;
36 ma bayay ni gu wan u rom, ma daki moy;
mu gu changarnag, ma da gu pir’eg.
37 Mu tay fanamyan ko en dariy thibngin, ma ga yaliy e en nib yal’uw;
be’ ni ba gapas e ra yib e pi’in owchen.
38 Ma pi tadenen e yira thangrad,
min thirif e pi’in owcherad u but’.
39 I SOMOL e ra thapeg e pi’in yad mmat’aw,
me yororiyrad ko ngiyal’ nike yib e oloboch ngorad.
40 I SOMOL e ma ayuwegrad nge lufrad u pa’ e pi’in kireb,
ni bochan e ranod ngak ni nge mang manaf rorad.
DRAFT VERSION — Proofreading in progress