31
Lemuel e lawknaw
1 Siangpahrang Lemuel lawk,
a manu ni a cangkhai e naw teh:
2 Bangtelane ka capa, bangtelane ka khe e capa,
bangtelane ka lawkkam capa.
3 Siangpahrangnaw patenghai karaphoekung napui koe
na thaonae poe hanh.
4 Aw Lemuel, misurtui nei e hoi yamu nei e teh
siangpahrangnaw hane nahoeh.
5 Hoehpawiteh, net awh vaiteh
kâlawk pahnim awh vaiteh mathoenaw hanelah
kalanhoehe lah lawkceng awh langvaih.
6 Meimei kadout e hah yamu pânei awh nateh,
lungrei ka thai e hah misurtui pânei awh.
7 Net awh naseh, a reithainae hah pahnim awh naseh,
a lungmathoenae pahnim totouh net awh naseh.
8 Lawkanaw hanlah dei pouh nateh,
due hanelah lawk tâtueng pouh e naw hane hai dei pouh.
9 Kalan lah lawkceng nateh tamimathoe hoi
tamikavout hanlah kâhet pouh.
Yu kahawi
10 Yu kahawi apinimaw a hmu thai han.
Bangkongtetpawiteh talung phukaawm hlak hai aphuohnawn.
11 A vâ ni a lungthin hoi a kâuep teh hawinae awm laipalah
awm mahoeh.
12 A hring nathung thoenae laipalah
hawinae dueng doeh a sak pouh.
13 Tumuen hoi pahla hah a tawng teh
a kut hoi amahmawk ouk a tawk.
14 Hno ka yawt e long patetlah ao teh,
ahlanae koehoi rawca ouk a thokhai.
15 Amom a thaw teh a imthungnaw hah rawca a paca teh,
a sannunaw hah thaw rip a boun.
16 Lawhmuen hah a khet teh a ran,
a tawkphu hoi misur takha a sak.
17 A keng dawk tha a kâyeng teh,
a kuttha hai a patung.
18 Hno a yo e a mek tie a panue dawkvah
tangmin patenghai hmaiim dout hoeh.
19 A kut hoi rahakut a kuet teh,
avanglae kut hoi yâcung a kuet.
20 Tamimathoe hanelah a kut a kâyap,
bokheiyah kavoutnaw totouh a kut ni koung a pha.
21 Tadamtui ka bawt nakunghai
a imthungnaw hanelah taki hane awm hoeh,
bangkongtetpawiteh a imthungnaw ni
dikpalingca e khohna kabet e a khohna awh.
22 Ama hanlah hni a kawng teh,
loukloukkaang e hoi pu doeh a khohna.
23 A vâ hai kho longkha koe khobawinaw hoi
a tahung toteh mithmaiben e lah ao.
24 Loukloukkaang e hni a kawng teh a yo,
hno kayawtnaw koe taisawm hah a yo.
25 A kawng e khohna teh a khaw,
ahawi dawkvah ahni teh hmalah a konawm han.
26 Lungangnae hoi lawk a dei,
a lawk teh pahrennae kâlawk lah ao.
27 A imthung khosaknae kahawicalah koung a khetyawt,
rawca hai pamda laihoi cat boihoeh.
28 A canaw a thaw awh teh a manu koe a lunghawi awh.
A vâ ni hai a oup van,
29 napui kapap ni kahawicalah a tawk awh toe,
hatei nang ni ahnimanaw na tapuet toe, atipouh.
30 Raimonae teh dumnae doeh,
meihawinae hai a yawmyin doeh.
Hatei BAWIPA ka taket e napui teh oup lah ao han.
31 A kut hoi a tawk e a paw hah poe awh nateh,
longkha koe ama roeroe hah a tawk e ni oup naseh.