1 Ta na7au, neeni ta giyoogaa ekka; ta azazuwaakka ne giddon minjja. 2 Aadhdhida eratettaa ezgga; ne wozanaappe akeeka. 3 Eratettaa xeesa; akeekaassikka xoqqu oottada alaaha. 4 Asi biraa woikko qosido miishshaa koyiyoogaadan, neeni eratettaa koya. 5 He wode neeni GODAASSI yayyiyoogaa giyoogee aibakko akeekana; Xoossaakka loittada erana. 6 Aissi giikko, GODAI aadhdhida eratettaa immees; appe eratettainne akeekoi beettees. 7 I suuretussi maaddiya zoriyaa minjjees; boree bainnan hemettiyaageetassikka i gonddalle. 8 Tumaa pirddiyaageetu ogiyaa naagees; ba ammanettiyaageetu ogiyaakka naagees.

9 He wode neeni xillotettaa, suure pirddaa, suuretettaanne lo77o ooso ubbaa erana. 10 Aissi giikko, neeni aadhdhida eranchcha gidana; ne eratettaikka nena ufaissana. 11 Nena adussi qoppiyoogee naagana; akeekaikka nena saro ashshana. 12 Aadhdhida eratettai nena iita asatu balaappe naagana; geellabaa haasayiyaageetuppekka ashshana. 13 Eti nagaraa xuman de7anau, xillotettaa ogiyaa aggoosona. 14 Iitaa oottiyoogan ufaittoosona; geellaban hashshu goosona. 15 Eti oottiyoogee mirqqetta; eta de7oikka geella.

16 Aadhdhida eratettai shaaramuxa maccaaseeppenne sheleeshshiya qaalan haasayiya laggetteeppe nena ashshana. 17 A ba naatettaa azinaa aggaagausu; ba Xoossaa sinttan maacettido maachchaakka dogausu. 18 I soo biyoogee haiqqanau biyoogaa; ikko biyoogee haiqqida asai biidosaa kaalettees. 19 Ikko biya oonikka guyye simmenna; de7uwaa ogiyaakka demmenna. 20 Hegaa aggada, neeni lo77o asatu leemisuwaa kaalla; xillo asatu de7uwaakka qulla. 21 Aissi giikko, suure asatinne boree bainna asati biittan gam77idi de7ana. 22 SHin iitati biittaappe xoqollettana; ammanttennaageetikka shodettidi xayana.