1 ሞዓኣቤ ዓጮም ኬኤዚንቴ ፆኦሲ ቃኣላ ያዺኬ፤

ዬይያ፦ ዔኤሬና ቂሬ ካታማ ፔቴ ዋኣንቴይዳ ባይቄሢሮ ሞዓኣቤ ዓጫ ጬዊዮ ጌዔኔ። 15፡1—16፡14 ዒሲ. 25፡10-12፤ ዔር. 48፡1-47፤ ሂዚ. 5፡8-11፤ ዓሞ. 2፡1-3፤ ሶፖ. 2፡8-11።

2 ፂቦኦኔ ዴራ ዔያቶኮ ሜሌ ፆኦዞ ካኣሽኮ ማኣሮይዳ ዬኤካኒ ሌካ ጌሜሮ ኬስካኔ፤ ሞዓኣቤ ዴራ ዔያቶኮ ኔኤቦና ሜዳባ ካታሞናሮ ሚርጌ ዖዪ ዬኤካኔ፤ ዬያ ዖዪፆና ፔኤኮ ቶኦኮ ጋሞና ቡኡጮዋ ሜኤዲ ጉኡሊንቴኔ። 3 ጎይፃ ጴዻ ዓሳ ሲዬ ፓቲሌ ማይንቴያኬ፤ ዔያቶኮ ኩቦ ማኣሮ ዑፃ ዓኣ ቤዞና ዓሳ ቡኪንታ ጶኦካ ቢያ ዓቢቲ ዓቢቲ ዔያታ ዬኤካኔ። 4 ሃሴቦኦኔንታ ዔልዓሌ ዴራ ዒላታኔ፤ ዔያቶኮ ዒላታ ያሃፄ ጌይንታ ቤዞ ሄላንዳኣና ዋይዚንታኔ፤ ሞዓኣቤ ፖኦሊሳኣ ዓቱዋዖ ጫርሹማ ዔያቶኮ ባይቂ ዒጊቹሞና ጎጋይቄኔ። 5 ሞዓኣቤ ዓጮ ዛሎ ዒናፓ ታ ዬኤኬኔ፤ ዴራ ዒዞኮ ፆዓሬና ዔጊላቴሼልሺያ ቤቴኔ፤ ዛሎንሢ ሌካ ሉሂቴ ሴኤሮ ኬስኬኔ፤ ዒማና ዔያታ ኬዞ ኬስካዖ ዬኤካኔ፤ ዛላ ሃሣ ዑኡዞ ፔኤሲ ዼጊዲ ፔኤኮ ባይሲንቶ ዛሎ ዬኤኪ ዬኤኪ ሆሮናይሜ ጌይንታ ቤዞ ቶሊ ዓኣዻኒ ማሌኔ። 6 ዒማና ኒምሪሜ ዎራ ሚጬኔ፤ ዓይጎዋ ዓኣዔ ባኣዚ ዓቱዋዖ ዓጮይዳ ዓኣ ማኣታ ቢያ ሜሌኔ። 7 ዴራ ቡኩሴ ቆሎ ዔኪ ዓሃያ ጌይንታ ሚፃ ዓኣ ዶኦጮና ፒንቂ ዓኣዼኔ፤ 8 ሞዓኣቤ ዓጮኮ ዛጳኣ ቢያ ቤዛ ዒላቲ ዋይዚንታኔ፤ ዬይ ዒላታ ዔጊላይሜንታ ዴንዲ ቢዔርዔሊሜያኣ ሄሌኔ። 9 ዲቦኔ ጌይንታ ካታሞ ዎራ ዓሲ ሱጉሢና ኩሜኔ፤ ጋዓንቴ ዲቦኔይዳ ፆኦሲ ዬያይዳፓ ባሼ ባኣዚ ዔኪ ሙካንዳኔ፤ ሞዓኣቤይዳፓ ፑኒንቲ ቶላዞንሢና ሃይባፓ ዓቴንዞንሢያ ቢያ ዞቢ ዳኪ ዒ ባይዛንዳኔ።