8
1 Iehova na e tomu, Una negana ai Iuda pavapavadia bona Iuda lohiadia turiadia, bona hahelaḡa taudia bona peroveta taudia turiadia, bona Ierusalem inoholaina taudia turiadia, garadia amo bae lasilai; 2 bena bae atodia rohoroho, dina bona hua bona hisiu iboudiai, e ura henidiava bona isiaidia e lao heniva ḡaudia, e ḡavadiava bona e tahudiava bona e toma henidia dihova ḡaudia, vairadiai. Basie haboudia bona basie guridia; a tano kopina ai bae mia, boromakau tagena e atoa rohoroho na heto. 3 Iehova Sabaota na e tomu, Ina kara dika oreana kwabukwabudia iboudiai ese mase bae ura henia bada, mauri bae ura henia maraḡi, vada na luludia lao gabudia iboudiai Ialodiai.
Kara Dika bona Hahemaoro
4 Ba hamaorodia, baoto,
Iehova ini e gwau tomamu:
Taunimanima e ketomu negadia ai e tore isi loumu ani?
Ta bema raka siri, bena ma bema lou, ani?
5 Matona, dahaka dainai ina bese taudia vada e raka siri,
vada e raka muri dabudabu?
Koikoi e badinaia tarika-tarikamu,
asie uramu bae kerehai.
6 Vada na hakala, vada na kamonai,
a idia na asie hereva maoromaoro;
asi tauna ta na ena kara dika amo e helalo kerehaimu,
e tomu “Dahaka vada na karaia?”
Iboudiai na ta ta ena dala ena dala ai e laomu,
hosi na tuari gabuna e heau lalo-dika heniamu na heto.
7 Boḡe na atai ai e nohomu,
bona ena nega dibana,
bona pune bona aibisi bona noko na
edia mai negadia na dibadia;
a lauegu bese taudia na.
Iehova ena taravatu asi dibadia.
8 Edeheto o herevamu, o tomu
“Ai na mai aonegamai
bona Iehova ena taravatu na ai emai ai” a?
A itaia, itorena taudia edia puri koikoina ese
hereva koikoina ai vada e halaoa.
9 Aonega taudia na bae hahemaraidia;
daradia bae doko, bena vada bae abidia.
A itaia, Iehova ena hereva vada e dadaraia,
daka aonega na idia lalodiai?
10 Taunabunai lau ese adavadia na haida baina henidia,
bona edia uma na kwalimu taudia baina henidia;
badina be maragina ela bona badana,
iboudiai ese mata-ganigani karadia e gugulaimu;
bona peroveta tauna ela bona hahelaḡa tauna,
iboudiai e kara koikoimu.
11 Egu orea taudia berodia vada e haḡoevadia lamai-lamai,
eto “Maino, maino”,
maino do lasi negana ai.
12 Kara dika-rohorohona e karaia negana ai,
idia na e hemarai a?
Idia na asie hemarai, lasi ona lasi vaitani;
hemarai mamina na asi dibadia.
Taunabunai vada e keto taudia bogaragidiai bae keto;
baina hadava henidia negana ai vada bae darere.
Iehova na e hereva nu.
13 Iehova na e tomu:
Iburukidia na urava negana ai,
vine audia na asi vinedia,
bona suke audia na asi sukedia;
rau danu vada e marai,
bona na henidia ḡaudia na ediai vada e boio.
14 Dahaka dainai ta helai kavamu?
Aita hegogo, hanua mai maḡudia lalodiai baitala,
unuseni ai baita mase;
badina be Iehova, eda Dirava, vada e revada mase,
e imoraia ranuna vada e henida, baita inua,
badina be Iehova enai vada ta kara dika.
15 Maino ta naria, a ḡau namona ta asinema;
hahemauri negana ta naria, to, a itaia, hahegari mo e hedinarai.
16 Edia hosi edia hakoko na Dan amo e kamonaimu;
edia hosi mamaruanedia e tubebemu negadia ai na tano idoinai e tabubumu.
Idia na e maimu, tano mai anina idoinai ida e ani oremu,
hanua badana danu, mai inoholaina taudia ida.
17 Badina be gaigai na bogaragimui ai na siaidia vasimu,
duba, basie hamanadadia diba ḡaudia;
bena idia ese bae korimui.
Iehova na e herevamu.
Rohe-ahu Iuda bona Ierusalem latadiai
18 Egu lalo-hisihisi na asi ihamarumaruna,
lalogu na e manoka-manokamu.
19 A hakala, egu bese kekenina e taitaimu,
tano ena lata bona ena lababa amo,
e tomu, Iehova na Siona lalonai se nohomu a?
Pavapavana na ia lalonai se nohomu a?
Badina be dahaka vada e habadugu,
e koro laulaudia bona idau taudia edia kaivakuku amo?
20 Taboro negana vada e ore, lailai huana vada e kau,
bona ta ese do se hamaurida;
21 badina be egu bese kekenina berona dainai lalogu na e hisihisimu,
na taitaimu, bena gari ese e butugu taomu.
22 Gilead na asi ena dahudahu muramurana a?
Asi gorere ihanamona tauna ta unuseni ai a?
Matona, dahaka dainai egu bese kekenina
ena gorere na se namomu.