4
1 Egu lalokau e, oi na hane namo;
momokani, oi na hane namo.
Matamu na pune,
vairamu iḡovalaina dabuana murinai.
Huimu na nani serina,
Gilead ororona amo e hekei dihomu na heto.
2 Isemu na mamoe serina huidia vada e utu
bena digu gabuna amo e daemu na heto;
iboudiai na mai natudia vara-hekapa,
ta se raka edeamu.
3 Udumu bibinadia na varo kakakakadia na heheto;
udumu na mai hairaina.
Vahamu ruaosi na rimono*“Rimono” na Heberu taudia edia au huahua ta. huahuana e ivaia parara na heto,
vairamu iḡovalaina dabuana murinai.
4 Aiomu na David ena kohoro na heto,
ena tuari ḡaudia e haboumu gabuna;
unuseni ai kesi daha-ta hetau dadae,
iboudiai na tuari taudia edia kesi.
5 Ratamu ruaosi na uda nanidia natudia rua na heheto,
uda nanina hahinena natuna vara-hekapa,
sosana bogaragidiai e anianimu ḡaudia.
6 Lau na muro ororona bainala,
lebona†“Muro” bona “lebona” na Heberu taudia edia muramura mai bonadia ladadia. ororona baina lao henia,
ela bona dina baine keruma,
bona hanua baine boi.
7 Egu lalokau e, oi na hane namo;
oi na asi bebeka-bebekamu.
8 Adavagu e, Lebanon amo baita raka hebou,
Lebanon amo baita raka hebou.
Amana bona Seniri bona Heremon ororodia doridia,
bona leona edia kohua bona taiga edia ororo,
ba rakatanidia.
9 Taihugu e, adavagu e,
lalogu vada o hamanokaia.
Matamu ena halari tamona ai,
aiomu agevana ena herahera nadina tamona ai,
lalogu vada o hamanokaia.
10 Taihugu e adavagu e,
emu uraheni na daka gaiho!
Emu uraheni ese vine ranuna e hereaiamu,
emu dehoro bonana ese muramura iboudiai bonadia e hereadiamu.
11 Adavagu e, bada-ranuna na udumu bibinadia amo e hetuturumu,
bada-ranuna bona rata na malamu henunai;
emu dabua bonadia na
Lebanon bonana na heto.
12 Taihugu, adavagu, na e hekou kunuka-kunuka umana;
e hekou kunuka-kunuka umana,
e hekou ahu ranuna.
13 Emu uma ai e varamu ḡaudia na
rimono‡“Rimono” na Heberu taudia edia au huahua ta. audia mai huahuadia herea-daedia,
bona kofere bona nerede;
14 oibe, nerede bona karakomo,
bona kane bona kinamomo,
bona lebona audia iboudiai;
bona muro bona aloe,§Kofere; nerede; karakomo; kane; kinamomo; lebona; muro; aloe. Ini na Heberu taudia edia muramura mai bonadia haida ladadia.
bona muramura hereadia iboudiai.
15 Hari uma na mai ranu-lohilohi gabuna,
bona mai mauri-ranuna gurina,
bona mai sinavai-sinavaina,
Lebanon amo e arumu.
*****
16 Lai mirigini e, a noga!
Diho e, a toa! Egu uma ba toa henia,
ena muramura bonadia ba oda rohoroholai.
Egu lalokau tauna na ena uma ai baine raka vareai
ena huahua herea-daedia baine ani.
*****
*4:3: “Rimono” na Heberu taudia edia au huahua ta.
†4:6: “Muro” bona “lebona” na Heberu taudia edia muramura mai bonadia ladadia.
‡4:13: “Rimono” na Heberu taudia edia au huahua ta.
§4:14: Kofere; nerede; karakomo; kane; kinamomo; lebona; muro; aloe. Ini na Heberu taudia edia muramura mai bonadia haida ladadia.