1 Iau o Pol, ra o God i kabo pas iau, elar ut nam anun a nemnem sur an aposel anun o Karisito Iesu. Mir nam o Sostenes a tisindat, mir tumtumus 2 torom mot a taro na lotu anun o God ra mot kis tiro o Korin. Mot ra o Karisito Iesu i utalapor pas mot, ma i kabo pas mot sur mot a taro anun o God. Mot a taro anun o God tomo nama taro rop una kum tamon rop ra det lotu una risan anundat a Labino o Iesu Karisito, i ra a Labino anundet ma anundat kai.

3 A marmaris ma a malmal tan o God a Tamandat ma a Labino o Iesu Karisito, in kis torom mot.

4 A ser watung wakak torom o God un mot, kibino una nun a marmaris ra i pitar tari torom mot un o Karisito Iesu. 5 Uni una numot a kinkinis tomo nama Karisito, o God i udan mot nama kum utna rop. Mot dan uni i warut mot sur mot in wasiso puaso uni, ma i pitar tar a mananos torom mot. 6 I pami lenra uni a wasiso talapor una Karisito, ra met sa inanos tar mot uni, i sa wanpat talapor una numot a nilaun. 7 Ra i lenra, ka mot in sibo sur tu etabor anun a Tokodos na Nion torom mot, ra mot kiskis langlang nama gasgas sur anundat a Labino o Iesu Karisito ra in nanpat talapor. 8 I ut in udekdek mot tuk una tintinip na bung, sur katu utna ra din takun mot uni una bung anun anundat a Labino o Iesu Karisito. 9 Ma a utna ri ra o God i watungi in pami ut. Ra i kabo pas mot sur mot in lason tomo nama Nutunu o Iesu Karisito anundat a Labino.

10 A kum tistising, a saring mot nama risan anundat a Labino o Iesu Karisito, sur mot rop mot in tur tomo, ma gong mot wan sarara. Ma in takai kut a nuknukimot, ma anumot a nemnem kai. 11 A kum tistising, ara taro ra det kis una rumu anun o Kloe, det inanos iau lena mot ser engaras etetalai. 12 An palos a kukurain a wasiso ri lena: Ara taro tagun mot det watungi lena, “A mur o Pol,” ara taro det watungi lena, “A mur o Apolos,” ara taro det watungi lena, “A mur o Pita,” ma ara taro kai det watungi lena, “A mur o Karisito.”

13 Pepetlai, o Karisito i sa taptapagol? Pepetlai, di sak wat o Pol un in nanai kutus un mot? Pepetlai, di baptaiso mot nama risan o Pol? 14 A watung wakak torom o God uni ka baptaiso tar taio tagun mot. O Krispus kut ma o Gaius ra a baptaiso der. 15 I lenra, katutaio tagun mot in pet lar pasi sur in watungi lena, di baptaiso i nama risang. 16 A lingmulus, a baptaiso det kai ra det kis una rumu anun o Stepanas, ma ka tasmani ra a sa baptaiso tar taio kai o awu. 17 Uni o Karisito ke tulu iau sur an baptaiso, awu. I tulu iau sur an warawai nama Wakak na Wasiso. Ma ausur an warawai nama wasiso na mananos anun a taro, surko in lakro ru a dekdekin in nanai kutus anun o Karisito ra in utna oros kut.

18 Uni a wasiso un in nanai kutus, a longlong na wasiso kut torom det ra det wan sur a iniru. Ikut, torom dat ra o God i ulaun dat, a wasiso un in nanai kutus, i a dekdekin o God. 19 Uni o God i sa watung tari una Buk Tabu lenri,

20 Asau dat in watungi un tu tene mananos? Asau dat in watungi un tu tene mananos una kum Warkurai anun o Moses? Asau dat in watungi un tu tene mananos ra in balu rop pas a kum iting? O God i ese i lena, a mananos tagun a rakrakon bual i a longlong na mananos kut. 21 Uni, una mananos anun o God, i pami sur a taro una rakrakon bual ka det in pet lari sur det in tasman o God una mananos anundeti ut. A wasiso ra met warawai nami, a taro det nuki lena a longlong na wasiso, ikut, una wasiso ra, o God i gas sur in ulaun det ra det nurnur.

22 A lingmulus, a taro Juda det nem na tama lako kum ukinalong, ma a taro Grik det sisio sur tu mananos. 23 Ikut met, met warawai kut un o Karisito, i ra di sak wati un in nanai kutus. A warawai ri, a taro Juda det ngeti, ma torom det, i elar nama wat ra det puku taru uni, ma i elar kut nama longlong na wasiso torom a taro ra ausur a taro Juda. 24 Ikut, o Karisito a dekdekin o God, ma a mananos anun o God, torom a taro ra o God i kabo pas det. A taro ra, tagun a taro Juda ma tagun a taro Grik. 25 A mananos anun o God ra a taro det nuki lena a longlong na mananos kut, i ra i labo taun a mananos anun a taro. A dekdekin o God ra a taro det nuki lena ke dekdek, i ra i dekdek sakit taun a dekdekin a taro.

26 A kum tistising, mot in nuki lena mot asi na ngas na taro ra o God i kabo pas mot. Ausur a susut tagun mot a kum tene mananos umatan a taro. Ausur a susut tagun mot, mot utur ukai a dekdek sur mot in mugu a taro. Ma ausur kai a susut tagun mot tagun a kum kabotaro ra det labo umatan a taro. 27 Ikut o God i pilok pas a utna ra a taro det nuki lena a longlong na utna sur in ban umaimai a kum tene mananos. Ma o God i pilok pasi kai a kum utna ra a taro det nuki lena ke dekdek sur in ban umaimai det ra det dekdek. 28 O God i pilok pas a kum utna ra a taro tagun a rakrakon bual det unatino pasi, ma a kum utna ra det ngeti, ma a kum utna ra det nuki lena a kum utna oros kut, sur a kum utna ra i labo torom det in utna oros mukut. 29 I pami lenra sur gong taio i warango pasi ut umatan o God.

30 O God ut i sa pam tar a kisapi sur mot in laun tomo nama Karisito Iesu, ma i pitar tari sur i a kimkibin anundat a mananos. Un o Karisito, o God i watung dat lena dat tokodos umatano, ma dat anun a taro. Ma una pinapam anun o Karisito, o God i kul ulangolango pas dat gusun anundat a kum sakino petutna. 31 Dat in pami elar nami ra di sa tumus tari una Buk Tabu lena, “Osi ra i nemi sur in warango pasi, i wakak sur in warango pas a utna ra a Labino i sa pam tari.” Jeremaia 9:24