1Morarame Ritonõpo omihpyry ẽ tapoise ahtao pirixteu tomo a, tarose eya xine Epeneze poe tosaka xine pata Axitote pona. 2Mame tyneponãmarykõ tapyĩ taka tarose eya xine, Takõ eahmatoh taka. Tyneponãmarykõ Takõ myhtokoxi moro kaxo tyrise eya xine, Ritonõpo omihpyry eny. 3Yrome yrokokoro typakase ropa Axitote põkõ ahtao tyneponãmarykõ, Takõ tonese eya xine, nono pona toepukase, Ritonõpo omihpyry ẽ ẽpataka. Mame tyneponãmarykõ tanỹse ropa eya xine esaka tyritohme ropa. 4Yrome yrokokoro typakase ropa toto ahtao tonese ropa eya xine, tyneponãmarykõ toepukase ropa Ritonõpo omihpyry ẽ ẽpataka. Zupuhpyry toetohkase, apory tõ asakoro ro toetohkase, nono pona toepukase tapyi taka omõtoh po; zoko rokẽ tõxinamase. 5Morara exiryke seroae ro Takõ poko oturuketõ, eahmananõ roropa moroto onutũmara mã toto.

6Mame mokaro Axitote põkõ tuãnohse Ritonõpo a yronymyryme ipatary zomye exiketõ roropa. Tyrohsẽ tonehpose eya itamurume jetũ exikety. 7Mame morara eneryke tyya xine, ynara tykase Axitote põkomo:

— Moro kaxo, Izyraeu tõ Esẽ omihpyry ẽ taro ehsaromepyra mana, kymaro xine. Taro ahtao kuãnohtorỹko Ritonõpo mana. Kyneponãmary, Takõ wãnohnõko roropa mana, tykase toto.

8Mame omi aronanõ tonyohse pirixteu tõ kowenatu 5me oehtohme oximõme enetupuhtohme moro poko.

— Oty rĩko sytatou moro kaxo poko, Izyraeu Esẽ omihpyry ẽ poko? tykase. Mame imehnomo a tozuhse toto:

— Isyryhmako pata Kate pona, tykase toto.

Morara exiryke Ritonõpo omihpyry ẽ taropose eya xine Kate pona. 9Yrome moro pona tarose ahtao orẽpyra morotõkõ tuãnohse roropa Ritonõpo a. Tõserehse toto ipunaka. Tyrohsẽ konõto tapoise morotõkomo a, poetohti a te, tamuhpomãkomo a roropa, emero. 10Naeroro Ritonõpo omihpyry ẽ taropose eya xine pata Ekorõ pona. Yrome Ritonõpo omihpyry ẽ oepyry eneryke morotõkomo a, tykohtase toto:

— Kuorihmapotohkõme moro kaxo tonehse xiaro. Oriorihnõko sytatose kuekyrykõ maro. 11Mame pirixteu esẽkõ tykohmase tyya xine. Ynara tykase toto:

— Izyraeu Esẽkõ omihpyry ẽ aropotoko ropa mya, esaka ropa kuorihmaporykõino kuekyrykõ maro, tykase toto.

Tuhke orihnõko toh nexiase, tyrohsẽ ke moro pata po, tuãnohse toto yronymyryme exiryke Ritonõpo a. 12Mokaro orihpyra exiketõ tynyrohke rokẽ toh nexiase. Toetuarimarykõke xitãko toh nexiase Ritonõpo netaryme moro pata punero.