1“Otara ahtao poti tõ ypy tõ po exiketõ enurũko nae?

Zuaro hma? Kapau tõ enururu meneahse?

2Toto nunory tõ kukuru waro hma aroporyhtao eya xine enurutohme?

Zuaro roropa hma otara ahtao enurũko toh nae?

3Ãtykyry kuehme exĩko tumũkuru enururuhtao;

poa, sam kakehnõko mana.

4Imũkuru tõ wãtãko,

jamihme exĩko ona po;

imeĩpo mya ytõko mã toto oehpyra ropa ehtohme.

5“Onoky a jumẽtu tõ ona põkõ tymyhpokase tamoreme xine toto ytotohme, tosẽke pyra exiketomo?

6Ona tonorẽ ekaroase eya xine esarykõme ehtohme.

Nono sãme aexityã ekaroase roropa eya xine, esarykõme.

7Panaikato kõ etary se pyra mã toto pata tõ myhto;

toto onukuremasaromepyra mã toto, omoxinety puimatohme.

8Otuhnõko mã toto ypy tõ po,

emero rokẽ otyro ahtaryhtao enahnõko mã toto.

9“Pui orutua itu htaõ toerokuru se exĩko nae oekyme?

Oehnõko mokyro nae oeky tõ esaka nyhse?

10Mokyro myhnõko mah eary tõ ke nono ahkatoh pokona, raxiteru pokona roropa nono poro itywyhmatohme?

11Jamihme mana ajohpe pyra.

Yrome onyriry tupime exikety onyripyra mana, aerohtohme tyripose ahtao oya.

12Tiriiku tõkehko anapoihpyry enehpõko mah eya atapyĩ taka?

Õmiry omipona mokyro ehtoh enetupuhnõko mah? Naary!

13“Awexituruze aporiry tõ pohpoh ãko mã toto axĩ sã repe.

Yrome onuhsaromepyra mã awexituruze tomo, sekonia sã pyra mana.

14Mokyro awexituruze ehmokãko mana nono pona rokene,

ihmo axihnanohnõko isawã mana toto atahtohme.

15Wenikehnõko mana pupu a akurihmory poko, onokyro tomo a itũtũmary roropa.

16Ehmokãko mana yrome tuhmo a wenikehnõko

mana. Oty kara mana tyhmose ahtao.

17Ya ro mokyro tyrise tuaro pyra exiketyme, tuaro ehtoh onekaropyra jexiryke eya.

18Yrome tururume toytoryhtao axĩ ytõko mana.

Kawaru eunohnõko sã mana, epo ytokety maro.

19“Jo, omoro hma kawaru rihpõme jamihme?

Ipymyry pokona irehkyxĩ tyripose oya?

20Mokyro pyhseky kamexipõko mahno taparara samo, ahno erehtohme aryrykatoh ke?

21Typenekehse ahtao nono ahkãko mã toto tupupurukõ ke toytorykõ se toexirykõke tururume etonatoh pona tyjamitunurukõke.

22Enaromyra mã toto.

Oserehpyra roropa mã toto.

Tapema tõ eneryhtao eramara ropa mã toto toorikyry zuno pyra toexirykõke.

23Epozakuroko xine etakinakety sã pyrou ytõko mã kehko, warata tõkehko zemime mã kehko xixi ao.

24Tywyh tywyh ãko toytorykõ se toexirykõke,

tururume ytõko mã toto, axiny.

Rue etoryhtao etypohsaromepyra mã toto.

25Opore rueimo totose ahtao, aryrykatoh ke ezuhnõko mã toto;

moino etonatoh pohnõko mã toto,

soutatu tõ tuisary kohtary etãko roropa mã toto.

26“Piano ytõko nae,

pohpoh ãko nae tamorepase oya exiryke,

aporiry tõ pohpoh ãko mana aytoryhtao ikurenaka?

27Õmiry eraximãko pianoimo nae tymỹ ritohme kaetokõ po?

28Esary topu tõ po, kaetokõ po.

Moroto topu kae ehtoh po tymỹ rĩko mana jamihme samo.

29Moro poe tykarimory enẽko mana,

enurukõ moino enẽko.

30Onokyro toorihse ahtao, moroto oximõnõko

piano tomo, munu ẽnõko ipoenõ mã toto.”