1Sinpangan na, myan asa a propīta no Dyos a komnaro a yapo do Joda a kominwan do Betel a maynamot do bilin dya ni ĀPO. Do nakawara na, madama si Jeroboam a maypasngen do altaraw tan maysosoh so insinso. 2Inyagagay naw kakontra na so altaraw a maynamot do chirinaw ni ĀPO a kāna, “O altar, altar, nyaw bata ni ĀPO: ‘Maiyanak anchiw asa mahakay do kapotōtan ni Dabid a mayngaran so Josyas. Do hapot mo, idāton nanchiw papādi saw a yapo dyirad pagdaydayāwan a mangidāton dyimo. As do hapot mo, masosohan anchiw tohatohang no tawotawo.’ ” 3Do dāwri met lang a araw, nanoroh iyaw propītaw no Dyos so pangilasīnan a kāna, “Nyaw pakaboyan so naibahey ni ĀPO: ‘Mabhak anchiw altaraya, kan iyaw ahbek naw do rabaw naya, ki maipoha anchi do tana.’ ”

4Do nakadngey naw ni Āri Jeroboam so inyagayaw no propītaw no Dyos a maikontra do altaraya do Betel, tinongdo naw propītaw, kan inmandar na a yapo do altaraw a kāna, “Tiliwen nyo!” Ki iyaw tanoro naw a linonat na, ki tomnigser kan mahokot na paba. 5(Nabhak altaraw, kan iyaw no ahbek naw, ki naipoha do tana a akmas pangilāsinanaw a intoroh no propītaw no Dyos a maynamot do chirinaw ni ĀPO.)*

6Do dāwri, binata no āryaw do propītaw no Dyos a kāna, “Pangdaw mo yaken do ĀPO a Dyos mo, kan paydasal mo yaken tan mapyan tanoro kwaya.” Dawa, pinangdaw no propītaw no Dyos di ĀPO, kan napyan tanoro naw no āryaw, kan nayparin dana akmas sīgodaw.

7Binata no āryaw do propītaw no Dyos a kāna, “Machangay ka dyaken do bahay kan mangmamabaw ka, as torohan konchi imo so rigālo.”

8Ki tinbay no propītaw no Dyos si Āri Jeroboam a kāna, “Aran itoroh mo pa dyaken kagodwa no dyira mo a warawara, machangay akwaba dyimo. Koman akwaba so tināpay mana minom so ranom do dyaya a logar. 9Ta naibilin dyaken a maynamot do chirin ni ĀPO a kāna, ‘Koman kaba so tināpay mana minom so ranom, mana maybidi kaba do rarahan a nakayapwan mo.’ ” 10Dawa, komnaro danaw propītaw a nayam do matarek a rarahan, kan naybidi paba do nakayapwanaw a rarahan a mangay do Betel.

11Do dāwri, myan malkem a propīta a omyan do Betel. Siraw pōtot naw, somnabat sa a nangibahey dya so tabo a pinarin no propītaw no Dyos do dāwri a araw do Betel. Inbahey da pa di āmang da an āngo inbahey na do āryaw. 12Inyahes ni āmang da dyira a kāna, “Dino a rarahan no nayaman na?” Inpaboya dan pōtot na saw iyaw rarahanaw a nayaman no propītaw no Dyos a nakayapo do Joda. 13Binata na dyirad pōtot na saw a kāna, “Mangpasanga kamo pa so asno a para dyaken.” Dawa, pinarin da. Sinakayan na, 14kan inonotan naw propītaw no Dyos. Nasarakan na a myan a maydiydisna do sīrok naw no logwaw a kayo. Inyahes no malkemaw a kāna, “Imoriw propītaw no Dyos a yapo do Joda?”

“Yakenaw,” initbay na.

15Dawa, binata no malkemaw dya a kāna, “Machangay ka dyaken do bahay kan may ka koman.”

16Binata no propītaw no Dyos a kāna, “Maparin ko pabaw maybidi a machonot dyimo mana machakan so tināpay mana machinom so ranom do dyaya logar. 17Ta naibahey na dyaken a maynamot do chirin ni ĀPO a kāna, ‘Koman kaba so tināpay mana minom so ranom, mana maybidi kaba do rarahan a nakayapwan mo.’ ”

18Inatbay no malkemaw a kāna, “Yaken met, ki propīta akma dyimo. As inbahey no asa a anghil dyaken maynamot do chirin ni ĀPO a kāna, ‘Paybidi mo a kayrayay do bahay mo tan makakan so tināpay kan minom so ranom.’ ” Ki binayatawan no malkemaw. 19Dawa, nachipaybidiw propītaw no Dyos dya, kan komninan kan mininom do bahay na.

20Do kayan daw a maydisna do lamisaanaw, inpakatoneng dana ni ĀPO chirin naw do malkemaw a propīta a napaybidi sya, 21kan inagayan naw propītaw no Dyos a nakayapo do Joda a kāna, “Nyaw bata ni ĀPO, ‘Tinongpal mwabaw chirin ni ĀPO, kan inonotan mwabaw bilin ni ĀPO a Dyos mo a inbilin na dyimo. 22Naybidi ka kan komninan so tināpay kan mininom so ranom do logaraw a inbahey na dyimo a dyi mo a kanan kan inoman. Dawa, iyanchiw bangkay mwaya, ki maitābon abanchi do aschip a tanem dan aāmang mo.’ ”

23Do nakatayokaw a komninan kan mininom no propītaw no Dyos, iyaw malkemaw a propīta a napaybidi sya, ki pinasangaan naw asno naw a intoroh dya. 24As do kayam naw, dinarop no asa a lion do rarahan kan diniman na. Nainonolay bangkay naw do rarahanaw, kan myan asnwaw kan lionaw a maytēnek do bīt naw. 25Myan saw tawotawo a homnabas daw a nakaboya so bangkayaw a nainonolay do rarahanaw, kan myan paw lionaw a maytēnek do bīt naw. As yangay da inpadāmag do Betel a pagyanan no malkemaw a propīta.

26Do nakadāmag naw no malkemaw a propīta a napaybidi sya, binata na a kāna, “Iyaw nawriw tawowaw no Dyos a dya nagtongpal so chirin ni ĀPO. Dawa, intoroh ni ĀPO do lionaw a nanghagahagay kan nangdiman sya. Naparin nya sigon do inchirin ni ĀPO dya.”

27Binata no malkemaw a propīta dyirad pōtot naw a kāna, “Mangpasanga kamo pa so asno a para dyaken.” Ki pinasangaan da. 28Minohtot malkemaw kan nasarakan naw bangkayaw a nainonolay do rarahanaw, kan myan asnwaw kan lionaw a maytēnek do bīt naw. Iyaw lionaw, ki kinan nabaw bangkayaw mana hinagahagay nabaw asnwaw. 29Dawa, inahap naw bangkayaw no propītaw no Dyos, kan pinasakay na do napasangaanaw a asno a insabat do bōkod na a syodad tan dong-awan na iya kan itābon na. 30Pinosek naw bangkayaw do dyira naw a aschip a tanem. Dinong-awan na kan siraw pōtot naw, kan binata na a kāna, “Ayya, mo kakteh ko!”

31Do nakatayoka no nakaitābon daw sya, binata no malkemaw dyirad pōtot naw a kāna, “Anchan madiman ako, itābon nyonchi yaken do tanemaw a aschip a nakaitabōnan no propītaya no Dyos, as pangayen nyonchiw tohatohang ko do bīt no tohatohang na. 32Ta iyaw inyagay na a maynamot do chirin ni ĀPO a maikontra do altaraw do Betel kan tabo logaraw a pagdaydayāwan do idiidi no Samarya, ki matongpal anchi.”

33Aran do nakatayoka no nya a naparin, nagbalbāliw aba si Jeroboam do marahet saw a kaparin na. Basbāli a nanongdo dana so papādi sa a yapo dyirad tabo tawotawo a para do logar saw a pagdaydayāwan. No aran sino a makey a mayparin a pādi, ki intatārek na iya a magpādi dyirad logar saw a pagdaydayāwan. 34Iyaw nyayaw gatos ni Jeroboam, ki mangyangay anchi dyirad kapotōtan na a magāri so kaopas kan pakarārayawan da do hapotaya no tanaya.