No Kawara ni Esra do Jerosalem
1Do nakahabas no āro a tawen, do kapagāri ni Artaekserses a impirador do Persya, myan tawo a mayngaran so Esra a kapotōtan ni Serayas a kapotōtan ni Asarya a kapotōtan ni Hilkiah 2a kapotōtan ni Sallom a kapotōtan ni Sadok a kapotōtan ni Ahitob 3a kapotōtan ni Amarya a kapotōtan ni Asarya a kapotōtan ni Merayot 4a kapotōtan ni Sera a kapotōtan ni Ossi a kapotōtan ni Bokki 5a kapotōtan ni Abiswa a kapotōtan ni Pinehas a kapotōtan ni Eleasar a kapotōtan ni Aaron a iyaw katohosanaw a pādi. 6-7Iyaw nya Esra, ki asa sikritaryo a bisādo do Linteg ni Moyses a intoroh ni ĀPO a Dyos no Israel. Maynamot ta myan dyaw bindisyon ni ĀPO a Dyos na, tinorohan no impirador so tabo inakdaw na. Do chapapitwaw a katawen no kapagāri ni Artaekserses, komnaro si Esra yapo do Babilonya a mangay do Jerosalem, as nachirayay saw kadwan a tawotawo no Israel a nakairamānan no kadwan saw a papādi kan Lebita, taga-kansyon, maggwardya do rowangan no timplo, kan siraw magsirsīrbyaw do timplo.
8-9Insiknan naw nanakey a yapo do Babilonya do manōmaw a araw do manōma a bohan, as nakarapit do Jerosalem do manōmaw a araw do chadadima naw a bohan do chapapitwaw a katawen no kapagāri ni Artaekserses, maynamot ta myan dyaw bindisyon no Dyos. 10Ta si Esra, ki inpasnek na a adalen kan tongpalen iyaw Lintegaw ni ĀPO, as kan inanawo na saw pangeddeng kan linteg dyirad tawotawo no Israel.
No Tolas ni Impirador Artaekserses di Esra
11Nyaw kopya no tolas a intoroh ni Impirador Artaekserses di Esra a pādi kan sikritaryo a diādal do bilbilin kan linlinteg saw ni ĀPO dyirad tawotawo no Israel:
12“Yapo di Artaekserses a āri dan āri, mangay di Esra a pādi kan sikritaryo no Linteg no Dyos no hanyit. Kablāawan ko imo.
13“Yaken mangikeddeng a aran sino a Israelita do pagāryan ko karāman saw papādyaw kan Lebita a makey a mangay do Jerosalem, maipalōbos sa a machirayay dyimo. 14Ta yapo dyaken kan papito saya a mamagbaga, toboyen namen imo a mangay a manyideb so kayayan do Jerosalem kan Joda tan mapatakan mo an maypāngo katongpal da so Linteg no Dyos a naitalek dana dyimo. 15Asa pa, imo danaw mangyangay so pirak kan balitok a chakey ko kan siraw mamagbaga kwaya a itoroh namen a yapo do pōso namen a idāton do Dyos no Israel a omyan do Jerosalem. 16Iyonot mo paw tabo pirak kan balitok a mahap mo do intīro a probinsya no Babilonya kontodo nainpapōswan saw a dāton dan tawotawo kan papādi para do timplo no Dyos da do Jerosalem. 17Ipasnek mo a osaren iyaw pirak kan balitok a panggatang siras tōro a bāka, malloko a karniro kan malloko a orbon karniro kontodo maikosto a dāton a irek kan inomen. Idāton mo sa do altaraw no bahayaw no Dyos mo a myan do Jerosalem.
18“Aran āngo a iktokto nyo a maganay kan kakakteh mo saw a Jodyo do kaosar no panda saw a pirak kan balitok, nawriw parinen nyo, sigon do chakeyaw no Dyos nyo. 19Siraw warawara a naiparawat dyimo a para do kapagsīrbi do bahay no Dyos mo, imo pakono mangiparawat do Dyos do Jerosalem. 20As kan aran āngo pa a machita mo a iparawat a para do bahay no Dyos mo, mapalobōsan ka a manghap a yapo do pangapyanaw so kinabaknangaw no āri.
21“As kan yaken a Impirador Artaekserses, ikeddeng ko dyinyo a tabo a trisoriro do probinsya a Laōden no Oksong a Oprates a bebelan nyo manoroh so aran āngo a akdawen dyinyo ni Esra a pādi kan diādal do Linteg no Dyos no hanyit. 22On, torohan nyo so manda do 3,500 a kakīlo a pirak, 500 a rarakoh a kaalat no trīgo, 550 a kagalon a palek, 550 a kagalon a lana no olibo, kan tabo asin a machita na. 23Aran āngo a inmandar no Dyos no hanyit, komplīto pakono a matongpal para do bahay no Dyos no hanyit, ta āngwan pabtaken naw soli naw do pagāryan no impirador kan pōtot na saw a magāri anchi. 24Ipakatoneng namen pa dyinyo a abaw kalintegan nyo a mangipapīlit so kapagbwis do aran āngo dyirad papādi, Lebita, taga-kansyon, maggwardya do rowangan no timplo, siraw magsirsīrbyaw, mana kadwan saw a maytarabāko do dya bahay no Dyos.
25“As imom Esra, sigon do sīrib no Dyos mo a myan dyimo, manongdo ka so opisyalis kan hwis saw a mangokom siras tabo tawotawo do probinsya a Laōden no Oksong a Oprates. Siraw bisādo saw do linlinteg no Dyos mo. As imo, ki nanawhen mo saw dyi saw a makapatak siras nya linteg. 26Aran sino a dya magtongpal so linteg no Dyos mo kan linteg no āri, sigorādo a machita a madōsa a madiman, mapaksyat, masamsam no warawara na, mana mabahod.”
No Kaidaydāyaw ni Esra so Dyos
27Madaydāyaw pakono si ĀPO a Dyos no aāmang ta a komwan pinarin na do nakasalid naw so pōso no impirador tan mangiyangay so dāyaw para do bahay ni ĀPO do Jerosalem. 28Inpaboya naw no dya mabdibdis a kadaw na dyaken do salapen no impirdor kan siraw mamagbaga na kan dyirad tabo matotoray saw a opisyalis na. Maynamot do kāsi dyaken ni ĀPO a Dyos ko, intortored ko a inakpeh saw mabigbigbig saw a tawotawo no Israel a machangay dyaken a maybidi do Jerosalem.