No Libro A Haggeo
No Pakatonngan so Paytābwan no Nya Libro
Iyaw libro a Haggeo, ki ipakatoneng na saw minsāhi ni ĀPO di propīta Haggeo a nangay dyirad āro saw a tawotawo na a naybidi dana do Jerosalem a yapo do nakaakawan daw do Babilonya. Aran minyan dana sa do Jerosalem so papere a katawen, nāw na pa a nakabakabaw Timplowaw. As dawa, intedengateng ni propīta a Haggeo dyirad tawotawo saw a patneken darana mirwaw Timplowaw. Asa pa, maynamot ta naybidi dana sa do tanan Israel, naybidi danaw karyaw ni Āpo dyira a maypaypaganay sa kan myan kaydamnayan no kapangtokto da.
No Naychakarwan no Nya Libro
Pakatoneng (1:1-2)
No manma a minsāhi
No bilin ni ĀPO a mirwa a kapatnek so Timplo (1:3-11)
No katongpal dan tawotawo so bilin ni ĀPO (1:12-15)
No chadadwa a minsāhi
No kapintas anchi no Timplo (2:1-9)
No chatatdo a minsāhi (2:10-19)
No kapangdaw ni Haggeo dyirad papādi (2:10-14)
No kaikari ni ĀPO so bindisyon na (2:15-19)
No chapat a minsāhi
No kapangahwahok di Serobbabel (2:20-23)
Haggeo
No Bilin ni ĀPO a Mirwa Kapatnek so Timplo
1Do chadadwa naw a katawen a nakapagtoray ni Āri Daryos do Persya, do dāmwaw a araw do chanem naw a bohan, inpakatoneng ni ĀPO minsāhi naw di propīta Haggeo. Iyaw nya minsāhi, ki para do gobirnadoraw do Joda a si Serobbabel a pōtot ni Salatiel. Masaw di Joswe a pōtot ni Jehosadak a iyaw katotohosanaw a pādi.
2Nyaw batahen ni ĀPO a Manakabalin do Tābo di Haggeo a kāna, “Batahen daw no nya tawotawo a kon da, ‘Ari na pad chimpo iyaw mirwa a kapatnek so Timplo.’ ”
3Sinpangan na, inpakatoneng ni ĀPO minsāhi naw di propīta Haggeo para dyirad tawotawo saw a kāna, 4“Inyo a tawotawo ko, āngo ta omyan kamo do magaganay a bahabahay nyo, ki tori dana makabakabaw Timplo kwaya?”
5Nyaw inpakatoneng pa ni ĀPO a Manakabalin do Tābo a kāna, “Kapyahen nyo a iktokto pariparinen nyowaya. 6Kināro nyo naymohamoha, ki dēkey naāpit nyo. Koman kamo, ki chabsoy nyo aba. Minom kamo, ki makaywaw kamwaba. Maylaylay kamo, ki makakekeh aba dyinyo. Naytarabāko kamo a myan so tangdan, ki tod nyo a kinapya do botbot a pitāka nyo.”
7Nyaw inpakatoneng ni ĀPO a Manakabalin do Tābo a kāna, “Kapyahen nyo a iktokto pariparinen nyowaya. 8Somonget kamo do paytoytokonan saya, as manongeh kamo so kayokayo. Iyosok nyo saw toroso, kan patneken nyo Timplo kwaya a mirwa tan mahwahok ako kan maidāyaw ako,” batahen ni ĀPO. 9Tinongtong ni ĀPO a kāna, “Āro hinahaw nyo a āpit nyo. Ki chiban nyo, nayparin a dēkey. As do kaisabat nyowaw sya, pinasayaw ko pa. Āngo ta pinarin ko nya?” batahen ni ĀPO a Manakabalin do Tābo. Batahen na pa a kāna, “Maynamot ta nakabakaba danaw Timplo ko, as katakatayisaya dyinyo mangigodegodes so bōkod na bahay. 10As dawa, maynamot dyinyo, pinenpen no kahanyihanyitan iyaw apon, as kan pinenpen no tana iyaw mohamoha a tomobo. 11Pinagtīkag ko tana kan paytoytokonan tan pahayohen nanchiw paray, asin ōbas kan olibo kan tabo a tomobo do tana. Maynamot do tīkag, maglak-am anchiw tawotawo, binyay, kan tabo nayhohopagan nyo a inmoha.”
No Katongpal Dan Tawotawo so Bilin ni ĀPO
12Do dāwri, si Serobbabel a pōtot ni Salatiel, si Joswe a pōtot ni Jehosadak a katotohosan a pādi, kan tabo tawotawo saw a nakapaybidi yapo do nakaakaw daw do Babilonya, ki tinongpal daw bilinaw ni ĀPO a Dyos da. On, do nakadngey daw so minsāhyaw ni propīta Haggeo a tobotoboyen ni ĀPO a Dyos da, ki chinamo da si ĀPO kan tinongpal da.
13Sinpangan na, inpakatoneng ni Haggeo a tobotoboyen ni ĀPO iyaw minsāhi ni ĀPO dyirad tawotawowaw a kāna, “Yaken, ki myan ako dyinyo, kāna ni ĀPO.”
14Sinalid ni ĀPO gobirnadoraw do Joda a si Serobbabel a pōtot ni Salatiel. Masaw di Joswe a pōtot ni Jehosadak a katotohosan a pādi. Masaw sinalid na a tabo tawotawo saw a nakapaybidi yapo do nakaakaw daw do Babilonya. Nangay sa kan inrogi daw maytarabāko do Timplo naw ni ĀPO a Manakabalin a Dyos da, 15do chadadwa naw a poho kan apat a karaw, do chanem naw a kabohan, do chadadwaw a katawen no nakapagāri ni Āri Daryo.