Kœshe á gerœ dopanœ
1Mbœrœ tœnœ ataa, œ li adœke a shi gbɨ lœ o'o á a dji œdœ a kœyindœ nœ adœke a djingili awa nene. 2Gbambanœ nene, œdœ o'o á aandjelu pa lima ndœ nœ kœmatœ ye adœke œtœnœ kœdœ adja o'o, yé œdœ azu á endje ndɨ lima tshelœnœ, œdœ azu á endje vwara lima tœ endje tœ kœlɨsœ o'onœ asœmœ kœgbɔ lima djofele á li dœ endje, 3azœ dœ tœ azœ a kpa lœ manœ kotoo œdœ a kœsœ kœmbœrœtœ mara kœshe ataa? Gbozu dá yi lima sœ œrœ tœ upu nœ utshunœ, manda nœ á azu á endje dji lima she ma kɨkɨlɨnœ fœ azœ. 4Ndjaba to ndje gbɔgbɔ nœ ye ga lœ kœmarœ nœ endje lœ awa nœ ambárá ndjoro, ogboro œrœ dœ tshelœ áká afá kɔ, œ ga ndœ lœ awa nœ kœto œrœ nœ Ɔtshɔ Ɨshirɨ fœ azu lindœ œneke á lɔsu ye yindœ nœ.
Yisu kœdœ ayi kœza kœshe fœ azu
5Gbambanœ nene, Ndjaba zaza tshapashɔ nœ tshambatsha á a sœ kœpa tœnœ, fœ aandjelu nene. 6Andaa, anga uzu bale su o'o ala Buku nœ Ndjaba adœke: «Uzu kœdœ ɗe yeka á ɓœ kœsœ kœgbe dœ she a?
Too gbolo nœ uzu kœdœ ɗe á ɓœ kœko ala zœ ga pa ye a?
7Ɓœ za she teasho ga tshakudu aandjelu,
ɓœ za mokɔ œdœ kœlɨsœtœ fœ she.
8Ɓœ ko œrœ kɔ ga tshada ye.»
Ɓata á Ndjaba za she tœ gbozu tshapa œrœ kɔ, anga œrœ bale á tshapu kœsœ ga tshakudu ye gugu nene. Andaa, a wuwu damba nene adœke Ndjaba ko œrœ para ga tshakudu ye. 9Kashe œrœ á a sœ kœwu tœnœ dœke: Yisu á Ndjaba za lima she teasho ga tshakudu aandjelu, gbɔ mokɔ œdœ pe kœlɨsœtœ lœ kumu kœwu œrœ kanga nœ kuzu á tshe tshu. Ataa lœ awa nœ ɔtshɔ lɔsu nœ Ndjaba, tshe tshu kuzu tœ upu nœ azu kɔ. 10Gbambanœ nene, œ li adœke Ndjaba á tshe mbœrœ œrœ kɔ, á sœ kœmbœrœ adœke œrœnœ sœ zœ asœmœ, za Yisu tœ uzu á tshe li lœ awa nœ kœwu oyo mbœrœ adœke agbolo ndjoro kœwu mokɔ nœ ye. Gbambanœ nene, Yisu kœdœ uzu á tshe sœ kœyisœ awa kœshe fœ endje.
11Andaa Yisu á tshe sœ kœmbœrœ adœke azu wuta yerœ lœ ekperœ nœ endje dœ pe endjeneke á endje wuta yerœ, endje sœ dœ Aba bale. Mbœrœ tœnœ ataa dá Yisu sœsœ dœ tshula kœ'e endje adœke aaya œne nene. 12Yé tshe pa adœke:
«Uu Ndjaba, mœ pa bala o'o tœ upu nœ ɨ'ɨrɨ zœ fœ aaya mœ,
yé mœ ɓi itshi kœdonga dœ ɓœ ugurutœ ukpulu azu lœ angbɔtœ.»
13Tshe kpa pa adœke:
«Mœ za bala lɔsu mœ djigi fœ Ndjaba.»
Yé ga pa nœ:
«Wu mœ, œmœ œdœ agbolo á Ndjaba ko endje fœ mœ dœke.»
14Ataa, ɓata á agbolo kœdœ azu á endje sœ dœ songba œdœ dœ indji, Yisu wuta ndje awa bale ɓata endje, tshe mbœrœ œrœ kɔ nœ mara nœ endje dœ azu. Lœ awa kuzu nœ ye, tshe ropa djaboro á tshe sœ lima dœ gbɔgbɔ nœ kuzu, 15œdœ dœ œnœ kœvwara azu á awa kuzu fa lima endje tœ akanga lœ soro endje djigi. 16Gbambanœ nene, tshe nana mbœrœ kœtɨ kane aandjelu nene, kashe tshe na mbœrœ aata Abrayamo. 17Mbœrœ tœnœ ataa, œ li lima adœke tshe wuta awa bale ɓata aayanœ lœ áká œrœ kɔ yeka á kœte egerœ nganga Ndjaba nœ lɔsu kœwu oyo, á tshe sœ ndjii utshu Ndjaba mbœrœ kœdjerœndœ ekperœ nœ azu. 18Gbambanœ nene, ɓata á tshe wu lima oyo dœ tœ ye lœ kœwu lɔsu nœ Satana, tshe li ndje kœtɨ kane endjeneke á Satana sœ kœwu lɔsu endje ye.