1Yesu nakenjila kahi mng'handa ya kusalila nakwali na munhu yawele na moko uziliche. 2Wanhu wamwe wali wopala chinhu cha kumvilizila Yesu, wali wamlola kodita choni kwa ayula munhu yawele na moko uziliche, komlohola au hebu vyoiwele zuwa lya kwesela. 3Yesu kamlonjela ayula munhu yawele na moko uziliche, “Uye hano hamwando.” 4Hamba Yesu nakawauza wanhu wala, “Malajizo ga hetwe gangutukundiza ndaze kudita zuwa lya kwesela? Kudita mbuli inojile au kudita mbuli yihile? Kulohola ukomu wa munhu au kukopola?” Ila hewo nahawalonjile chinhu. 5Aho kawalola weng'ha yazudile, kawa na masinzo kwa vila lowawele na nhumbula zihile. Hamba nakamlonjela ayula munhu yaweli na moko uziliche, “Ugolole moko wa hegwe!” Na heye kagolola moko na baho uwa mkomu kahi. 6Baho Mafalisayo walawa kunze, walongasa hamwe na wanhu wa chilundo cha Helodi vila vyo womdumya Yesu.

7Yesu nakoka aho hamwe na walanguswa wa heye, nakaluta hafungo mwa ilamba, na lung'hongola lwa wanhu lumuwinza. Wanhu awo wali walawile kuli isi za Galilaya na Yudeya, 8na miji ja Yelusalemu na Idumea, na mwambu mwa lwanda lwa Yolodani na Tilo na Sidoni. Lung'hongola alo lwa wanhu nawamlutila Yesu kwa vila nawahulika mbuli nyinji zoyali yakolile. 9Yesu kawalonjela walanguswa wa heye wamngongomanyile itumbwi limwe, leka lung'hongola lwa wanhu waleche kummemelela. 10Yali yawosile matamwa wanhu wenji, na watamwa weng'ha wali wofyela wogana wamdolize. 11Na wanhu wali na vijeni vihile lowamuwene, nawetoza kumwando kwa heye na kuchemeleza lizi, “Hegwe kwa Mwana wa Nguluwi!” 12Ila Yesu nakawalonjela kwa kuwang'hanuchila waleche kuwalonjela wanhu kota heye kawhaani.

13Yesu nakoka kakwina kuchidunda nakawachema wala yawaganile. Na hewo nawamlutila, 14kawahagula kumi na weli, nakawachema watumigwa. Nakawalonjela, “Ndiwahagulani hemwe muwe hamwe na heni, hamba ndowalajiza mlute kuwadamlila wanhu Mbuli Inojile. 15Namowa na ludali lwa kuwinga vijeni.” 16Awa ndo kumi na weli yawahagule, Simoni yula Yesu yampele itagwa lya Petili, 17na kahi Yakubu na Yohani wanage Zebedayo. Yesu nakawapa awa wana weli itagwa Bonegesi, izeleche “Wanalubumo.” 18Na kahi Andeleya na Filipo na Batolomeo na Matei na Tomasi na Yakubu mwanage Alufayo na Simoni yalawile Kanani na Tadei 19na Yudasi Isikalioti yamhinduche Yesu.

20Hamba Yesu nakaluta hakaye hake, kahi wanhu nawamema mbaka Yesu na walanguswa wa heye, nawalemwela ne mhela wa kulya. 21Wang'holoze vyo wahuliche ago, nawaluta kumhola kwa vila wanhu nawalonga kota kapunganika.

22Walangusa wa hewo wa malajizo ga Musa walawile Yelusalemu nawalonga, “Kana chijeni chihile chilinguchemigwa Belizebuli! Ayo ndo mkulu wa vijeni, na heye yalingumpa ludali lwa kusa vijeni vihile.” 23Yesu kawachema kaluka kuwalonjela kwa nhelo, kalonga, “Yowa ndaze Limazoga limuwinje Limazoga muyage? 24Wone undewa umwenga ugawanuche vilundo vilingitwanza, undewa awo hauweza kikala. 25Kahi, wone ivyazi ligawanuche keli, lilingitowa, ivyazi alyo halichikala lyosumigwa. 26Wone undewa wa Limazoga ugawanuche chilundo, hauchikala, leka wokwaga ng'hatu.

27“Kuduhu munhu kwinjila mng'handa ya munhu yawele na mong'ho kumsukula vinhu vyose mbaka wamuwope ayo yawele na mong'ho na ng'wego hafungo, aho ndo koweza kumsukula vinhu vya heye.

28“Ena ndanguwalonjelani ndikomya, Nguluwi kowosela gehile gawo geng'ha na kukovula kwa hewo kweng'ha, 29ila yalingumkovula Muhe Yelile, ayu hokusilwa gehile ga heye ng'o, kwa vila kawifya, kana wihe wa mazuwa gose.” 30Yesu nakalonga ago, kwa vila wali womlonga “Kana vijeni vihile.”

31Hamba mayake Yesu na wang'holoze nawoya ahala honhu, hoyali yolangusa Yesu, wema kunze, wamlajiza munhu yenjile mng'handa yakamcheme. 32Wanhu wammemelela heye. Lelo, wanhu nawamlonjela, “Mayako na wang'holozo na walumbuzo wa kunze wangukupala hegwe.” 33Yesu nakamlonjela, “Mayangu na wang'holozangu ndo whaani?” 34Aho kawalola awala wekale ahala honhu, kalonga, “Loleni! Awa ndo mayangu na wang'holozangu. 35Munhu yoneche yawele kudita goyalingugana Nguluwi ayo ndo mng'holozangu na lumbulyangu na mayangu.”