1Yesu nakaluka kuwalangusa wanhu hafungo mwa ilamba. Wanhu wenji nawammemelela mbaka naimgana yenjile mitumbwi na kikalisa. Wanhu weng'ha nawali wekale musangalaza hafungo mwa ilamba. 2Yali yowalangusa menji kwa nhelo, na kuli malanguso ga heye nakawalonjela, 3“Mhulichize, mnyalaji nakaluta kunyala nyhadikwa. 4Loyali yonyala nyhadikwa, zinji nazigwa mnzila, videje vyuya vidobola vilya. 5Zinji nazigwa honhu hawele na ng'ongwa, hawele hela misanga minji. Nazota himahima kwa vila misanga najali michefu. 6Lusanya lolulawile, zilakala na kwa vila mizabi jali mchanyamchanya hela, zikala. 7Zinji nazigwa hali migodi ja miwa, na jila miwa jikula zipilinjila zila nyhadikwa nazo hazilelile nhyule. 8Ila zinji nazigwa hali misanga jinojile, zota zikula zilela imwe mala makumi gadatu, na imwe mala makumi sita na imwe mala miya.” 9Yesu nakawalonjela, “Yawele na makutu ga kuhulika na yahuliche.”

10Yesu vyoyaponile yeka, wamwe wa wala wamhuliche nawamlutila hamwe na wala kumi na weli, wamuuza mbuli ya awu nhelo. 11Na heye kawalonjela, “Hemwe mpegwa kuuzela uviso wa Undewa wa Nguluwi, ila wanji wala wawele kunze wolonjelwa chila chinhu kwa nhelo, 12leka,

13Hamba Yesu kawalonjela, “Ndaze, hemwe hamuizelele nhelo ayi? Modita ndaze lelo, kuizela nhelo yoneche yila? 14Mnyalaji kangunyala ulonzi wa Nguluwi. 15Wanhu wanji ndo kota zila nyhadikwa zinyaligwe mnzila ulonzi hounyaligwe. Ila bahala du loyohulika, Limazoga lyuyaga na kusa ulonzi awo unyaligwe mgati mwa hewo. 16Wanhu wanji ifanda kota nyhadikwa inyaligwe hali italawe. Baho du lowouhulika awo ulonzi, hubochela kwa kusangalala ng'hatu. 17Ila hambe uwenjile na kuwa na mizabi mgati mwa hewo, hulutilila kibatilila hado hela, na mhela wa ugayo au wihe houlawila kwa mbuli ya ulonzi awo, baho wangugozola. 18Wanhu wanji ndo kota zila nyhadikwa zigwile hali migodi jiwele na miwa. Ahyo ndo kiwhana na wanhu wala wawele hulika awo ulonzi, 19ila lunhwinhwi lwa isi ino, kunojezwa na lufufu, maya ga chila mbuli kuwenjila na kubananga ulonzi awo, nawo haulela mafuza. 20Ila wanji ifanda kota zila nyhadikwa zinyalilwe kuli misanga jinojile. Awa wohulika ulonzi awo, woubochela, wolela mafuza, wanji mala makumi gadatu, na wanji mala makumi sita, na wanji mala miya imwe.”

21Yesu nakalonga kahi, “Ndaze, wanhu hawawesaga chenje na kigala mng'handa na kugubika na chidoto au kuwika mluvungu? Hebu! Huwikaga honhu ha kuwichila chenje. 22Chila chinhu chivisigwe chowichigwa hazelu na chila chinhu chigubikwe chogubuligwa. 23Ahyo, yawele na makutu ga kuhulika yahuliche.”

24Nakawalonjela kahi, “Mhulichize goya chomhulika! Chipimilo chichila chomulinguwapimila wanhu wanji ndo chicho Nguluwi kowapimila namwe, kahi mokonjezelwa ng'hatu. 25Yawele na chinhu kopegwa na chinji. Heye yawele hela chinhu, na achila chidodo choyawele nacho choholigwa.”

26Yesu nakalonga, “Undewa wa Nguluwi ufanda kota hino, munhu nakanyala nyhadikwa kumgunda. 27Nechilo kanguwasa, na nemisi kangulola na nyhadikwa zangulutilila kukula, ila heye havizelele chilingukoleka. 28Misanga jangudita mihale kukula na kulela mafuza, mwaluko kuzuka mahamba madeche, hamba liso na mwiso nhyule mgati mwa liso. 29Aho wone nhyule ipye, munhu ayo kokwaluka kuhola chimaje cha kebenela kwa vila mhela wa mbena ufika.”

30Yesu nakawauza, “Tuuwhanize Undewa wa Nguluwi na chinhu chachi? Tudamle kwa nhelo yachi? 31Ufanda kota hino, munhu nakahola nyhadikwa iwele ndodo ng'hatu ya haladali kusinda zeng'ha na kuinyala mmisanga. 32Mhela udo hela, yokota na kuwa igodi likulu kusinda migodi jeng'ha kumgunda. Nhagala ziwaga ng'hulu videje vya kuulanga vyuyaga kuzenga vivulila vyawo mlubehelo lwa nhagala za alyo igodi.”

33Yesu nakawadamlila usenga wa heye kwa nhelo nyinji, nakadamla na hewo kota vila vyowaliwovizela. 34Heye Yesu nahayali yolangusa chinhu ne kuwika nhelo, ila wone yawe yeka na walanguswa wa heye, kowa yowagubulila goyalonjile.

35Lusanya vyo luswele, Yesu kawalonjela awala walanguswa wa heye, “Tuloche kumwambu kwa ilamba.” 36Lelo, nawawaleka wanhu wamemile, walanguswa nawenjila amo mu itumbwi, kwali na mitumbwi jinji aho. 37Baho du nakwali na mbeho, na kutiguka kwa mazi mu ilamba, itumbwi na lyaluka kumema mazi. 38Heye Yesu nakawasa yawichile mutwi mchegamo, awala walanguswa wamwinula wamlonjela, “Mlangusa, ndaze hulingona kota hetwe tobagama kwa mazi?” 39Lelo, nakenuka kailonjela ila mbeho “Nyamalile!” Vivila kailonjela nhigu ya ilamba, “Tulu! Nyamalile!” Baho mbeho nainyamalila na kwali tulu. 40Yesu nakawalonjela awala walanguswa wa heye, “Leka choni mwangudumba? Ndaze, mng'hali hela makundo?” 41Nahewo nawadumba heko walonga, “Ayu munhu wachi lelo, mbaka nhigu na mbeho vyangumuhulika?”