1Mafalisayo wamwe na walangusa wa malajizo ga Musa, nawalawile Yelusalemu, nawating'hana kumwando kwa Yesu. 2Nawawona kota wamwe wa walanguswa wa heye wali wolya chilyo na moko gakokomoche, ne kuhovuga moko kota vila Mafalisayo navyoiganigwe na Malajizo gawo. 3Mina Mafalisayo na wawele Wayahudi wanji weng'ha, nawebatililaga gowalangusigwe na wasekulu wawo, hawalyaga chinhu ne kuhovuga moko gawo goya. 4Kahi, hawalyaga chinhu choneche kulawa kuli soko, mbaka wawe wachihovuje tandi. Kahi nawalangusigwa kulawa katali kota vila mbuli ya kuhovuga nego na vizombe na vinhu vya kupulika.

5Lelo, Mafalisayo na walangusa wa malajizo ga Musa, nawamuuza Yesu, “Lekachoni, walanguswa wa hegwe hawalingwijiza kota ulanguso wotubochele kwa wasekulu, wangulya na moko gakokomoche?” 6Yesu nakedichila, “Wahadi hemwe! Mloli wa Nguluwi Isaya nakalagula goya mbuli za hemwe vyoyandiche,

8“Hemwe mwanguleka ilajizo lya Nguluwi, na mwangibatilila gomlanguswe na wanhu.”

9Yesu nakalutilila kulonga, “Hemwe mna nzila ya usugu kwa kuleka malajizo ga Nguluwi, kwa mbuli ya kuwinza mabochelo ga hemwe! 10Mina Musa nakalajiza, muwatogole wahaza na mai za hemwe, na yawele ngumliga mhaza au mayake, imgana yabagame. 11Ila hemwe, mwangulangusa, kota, munhu yawe na chinhu cha kumtanza mhaza wa heye au mayake, ila yolonga kota chinhu acho ndo Kobani izeleche ndolendole kwa Nguluwi, 12lelo, hailinguganigwa kahi kumtanza mhaza wa heye au mayake. 13Ahi ndo vyomlingubeza ulonzi wa Nguluwi kwa mbuli ya ulanguso womlingibochelela. Kahi mwangudita mbuli nyinji kota zino.”

14Hamba Yesu nakaluchema lula lung'hongola lwa wanhu, kawalonjela, “Mnyhulichize mweng'ha, namvizele. 15Kuduhu chinhu chilingwinjila mgati mwa munhu kulawa kunze chilingumdita munhu mwavu. Ila chilingulawa mgati mwa munhu ndo chilingumdita munhu mwavu.” 16Nayawele na makutu gakuhulika, nayahuliche!

17Loyalulechile lula lung'hongola lwa wanhu nakwinjila mng'handa, walanguswa wa heye nawamuuza yawagubulile nhelo ila. 18Yesu, nakawalonjela, “Ndaze, na hemwe hamvizelele? Ndaze, hamvizelele kota chinhu chilingumwinjila munhu kulawa kunze, hachimdita munhu yawe mwavu. 19Kwa vila hachilingumwinjila munhu mnhumbula, ila kumunda, na hamba cholavigwa kunze kucholo?” Kwa kulonga hino Yesu nakavikundiza vilyo vyeng'ha.

20Nakalutilila kulonga, “Chilingulawa mgati mwa munhu ndo vilingumdita munhu yawe mwavu. 21Mina kulawa mgati, mnhumbula ya munhu mwangulawa majesa gehile, ung'hondwa na uhizi, na kuboka, 22ubuhu na wihe na udesi na upoka na maya na kidaya na uhesi na maligo. 23Aga gesa, gangulawa mgati mwa munhu, ndo galingumdita munhu mwavu.”

24Hamba Yesu nakoka aho, nakaluta wilaya ya Tilo. Ako nakenjila hali ng'handa imwe na haganile munhu yavizele, ila nahawezile kivisa. 25Mdala yumwe yali na mwana mhinza yawele na chijeni chihile, kahulika mbuli za Yesu. Lelo, nakoya kamfugamila nakitoza kumwando kwa magulu ga Yesu. 26Mdala nayali Mgiliki yaleleche Silofoinike muisi ya Siliya, nakamlanda Yesu yamlavye mwanage chijeni chihile. 27Yesu nakalonga, “Tandi wana wegute, kwa vila hainojile kuhola chilyo cha wana na kutozela mibwa.” 28Ila ayula mdala kedichila kalonga, “Kukomya, Mkulu, ila na mibwa wone jikale hasi ha chisaga jiwaga jilya usanyangwa wa wana.” 29Yesu nakamlonjela ayula mdala, “Kwa mbuli ya ulonzi awo, ulute kaye. Chijeni chimlawa mhinza wa hegwe!” 30Lelo, nakaluta kaye, kamfika mwanage yawasile mchinhanda mkomu, chijeni chimlawile.

31Yesu nakoka wilaya ya Tilo, nakakolela Sidoni, nakafika kuli ilamba lya Galilaya, kakolela Mji wa Dekapoli. 32Wanhu nawamigala munhu yohambe yalonje na kuhulika, wamlanda Yesu yamuwichile moko gake mtamwa. 33Yesu kamhola kaluta naye kutali na wanhu, kahola chidole kenjiza mu makutu, nakatema mite kamibata umyango. 34Hamba Yesu kalola kilanga, yolanda kwa Nguluwi aku yogugumila, nakamlonjela ayula munhu “Efata,” Mina “Ugubuche.” 35Baho du makutu ga heye gagubuka na umyango wa heye ugonzoka na kaluka kulonga goya hela. 36Yesu nakawalonjela wanhu waleche kumlonjela munhu. Ila vyoyawalemeze kuwalonjela wanhu hewo ndo kota kawasonza kuwalonjela wanhu goyodita. 37Wanhu weng'ha nawahuliche nawali wabubuwale, wolonga, “Kangudita geng'ha goya, kanguwagubula meho wohambe walole, na wohambe walonje, wangulonga!”