1Yesu navyoyaliyolawa mluga lwa Ng'handa ya Nguluwi, yumwe wa walanguswa wa heye nakamlonjela, “Mlangusa, ulole ng'handa vyoizenjigwe goya na maganga aga vyoganojile mlukanzi!” 2Yesu nakamlonjela, “Ndaze, kwanguzona ng'handa azi ng'hulu? Kuduhu iganga ne limwe lipona mchanya mwa liyage, chila chinhu chobomoligwa.”

3Yesu loyali yekale mchanya mwa chidunda cha Mzeituni yolola kuli Ng'handa ya Nguluwi, Petili na Yakubu na Yohani na Andeleya nawamuuza kwa uviso. 4Nawamlonjela, “Utulonjele mbuli azi zolawila nili? Chilajilo chachi chitulajila kota mbuli zabehi kulawila?”

5Yesu nakawalonjela, milolele, mleche kuhadigwa na munhu. 6Mina wenji wokuya wochitumbila itagwa lya heni, chila yumwe yolonga heye ndo heni! Na hewo wowajiliza wanhu wenji. 7Lomhulika mbuli ya ngondo na uhesi wa ngondo, mleche kisinza. Mbuli azo zolawila, ila kuduma kung'hali. 8Isi imwe yochitowa na iyage, undewa umwe wochitowa na undewa uyage, chila honhu kowa na jimachinyina na nzala. Mbuli azi ndo kota vila usungu wa mwaluko wa kulela mwana.

9Ila hemwe milolele. Mina wanhu wowahilikani kuli utaguso, na kuwatowani kuli ng'handa za kusalila. Mohilikwa kwa vilingozi na wandewa kwa chiwalo cha heni, leka mlavye ulolezi kwa hewo. 10Ila mwiso haunafika, Mbuli Inojile yodamligwa tandi kwa wanhu weng'ha. 11Na hewo howowawikani mmoko na kuwahilikani kuli utaguso, mleche kuwa na lunhwinhwi kwa gala gomlonga, mhela ula houfika, mlonje choneche chompegwa, mina ulonzi womlonga haulawa kwa hemwe, ila wolawa kwa Muhe Yelile. 12Walume wowahilika wang'holozawo wakopoligwe, na wahaza wodita hihyo kwa wana wawo. Na wana wowagaluchila wawalelile wakopoligwe. 13Wowazudileni kwa mbuli ya heni, ila munhu yula yokwimilila mbaka kuduma ndo heye yoloholigwa.

14“Lomkona ‘Izudizo lilinguwifya likwima honhu hohawele hake. Yalingusoma yavizele vyoilinguzeleka, aho wawele Yudeya wabilimile kuchidunda. 15Yawele kuchindwiko cha ng'handa, yaleche kidulika kwinjila mng'handa ya heye kuhola chinhu. 16Yawele kumgunda yaleche kuhiluka kaye kuhola igwanda lyake. 17Yowa ngondo kwa wachimai wawele na himila na walingonyeza zuwa azo! 18Mumlande Nguluwi leka mbuli azo zileche lawila mhela wa mbeho. 19Mina mhela awo kowa na kugaya kohakunalawila kulawila Nguluwi loyalumbile isi mbaka lehano, na hailawila kahi. 20Wone Mkulu nahawapunguzile zuwa azo kuduhu munhu yahawele yoloholigwa. Ila kwa mbuli ya wahaguligwe na Nguluwi, nakapunguza zuwa azo.

21“Lelo munhu yowalonjelani, ‘Mlole, Kilistu Mlohozi kahano,’ ama ‘Mlole ka ahala,’ mleche kukunda. 22Mina wokuya Kilistu wa udesi na waloli wa udesi. Wodita ulajilo na vinduzanduza wojeza kuwajiliza wala wahaguligwe na Nguluwi, 23ila hemwe milolele. Heni ndiwalonjelani mbuli yeng'ha ing'hali lawila.

24“Lelo, zuwa azo, hokumala kugaya ako, isanya lowichigwa jiza na nyelezi halibunguzuka. 25Nhondwe zolagala kulawa kilanga na mong'ho ubatilile vinhu avyo vyeng'ha wotigaswa! 26Aho wanhu wombona heni Mwana wa Munhu yokuya kuli ng'hungugu kwa ludali lwinji na ukulu. 27Hamba kowalajiza wahilisi wa kilanga wa heye wawakungajize wahaguligwe na Nguluwi kulawa nzingo zeng'ha zine, kulawila isi yeng'ha na kilanga kweng'ha.

28“Kwa ikuyu milanguse nhelo ayi, hala nhagala lozikwaluka kutitima na kubahula, mwanguvizela kota mhela wa nhonya wa habehi. 29Hihyo namwe homkona mbuli azo zilawila, mvizele kota kahabehi kuya. 30Ndanguwalonjelani ndikomya, lulelo alu halubagama vinhu avi vyeng'ha havinalawila. 31Ulanga na isi zopuluta, ila ulonzi wa heni haupuluta hebu.

32“Ila, mbuli ya zuwa au saa ayo kuduhu ne yumwe yavizelele kokuya nili, ne wahilisi wa kilanga, ne Mwana, ila Mhaza yaliyeng'ha ndo yavizelele. 33Milolele na kikala meho, mina hamvizelele mhela awo wokuya nili. 34Yowa kota munhu yalinguka hakaye na kwinula majendo kuwalechela vitumagwa wa heye ludali, chila yumwe na mijito ya heye, nakamlonjela mwamizi wa chihindilo yawe meho. 35Lelo, mikale meho, mina hamvizelele mkulu wa ng'handa kohiluka nili, hanji yowa matinazo au hamihe, lufuku au mitondo. 36Milolele leka hoyokuya hemwe ne kuvizela, yaleche kuwafika muwasile. 37Ndilinguwalonjela hemwe, ndanguwalonjela weng'ha, mikale meho!”