1Nagapona mazuwa meli ifiche mnvina ya Pasaka na Mibumunda galihela usaso. Watambika wakulu na walangusa wa Malajizo ga Musa wali wopala nzila ya kumibata Yesu kwa chinyele wamkopole. 2Ila nawalonga, “Tuleche kumibata mhela wa mnvina ya Pasaka, wanhu wotulemela.”

3Yesu yali Besania hakaye ha Simoni nayawele na uswema. Loyali mchisaga yolya chilyo, mdala yumwe yawele na alyo libuli lya alabasta liwele nguguzigwa kwa sendi nyinji na mafuta galingununyhilila ga nado inojile iwele nguguzigwa kwa sendi nyinji nakoya, nakaichumula ayo chupa, nakumjidila Yesu mafuta ago kumutwi. 4Wanhu wamwe nawawele aho nawazudila, welonjelela, “Lekachoni kanguwifya mafuta aga? 5Gahaguzigwe kwa sendi denali miya zidatu zilinguhega kwa mwezi umwe ng'hatu, nakupegwa wazunwa!” Nawamng'hanuchila ayo mamo.

6Ila Yesu nakawalonjela, “Mumleche, lekachoni mwangumgaza? Nakanditila mbuli inojile. 7Wazunwa mwahamwe na hemwe mazuwa gose, ila heni siwa na hemwe mazuwa gose. 8Heye kadita vyoyawezile, kalujidila lukuli lwangu mafuta galingununyhilila kuuwika goya kutiligwa mchilaga. 9Ndanguwalonjelani ndikomya, koneche kweng'ha muisi Mbuli Inojile hoidamligwa, chinhu chino choyaditile ayu mdala chodamligwa kumkumbuchila heye.”

10Hamba Yudasi Isikalioti, yumwe wa awala kumi na weli, nakaluta kwa watambika wakulu, leka yamgalamche Yesu. 11Watambika wakulu lowahuliche mbuli ayo, nawasangalala, nawalagana na heye wompa sendi. Lelo, Yuda nakaluka kupala ndaze vyoyomhinduka.

12Zuwa lya mwaluko lya mnvina ya mibumunda jilihela usaso, mhela ula mwanaing'holo wa Pasaka hukopoligwa, walanguswa wa heye nawamuuza, “Kwangugana kohi tukuwichile goya ndiya ya Pasaka?”

13Lelo, Yesu nakawalajiza walanguswa wa heye weli yowalonjela, “Mlute kuli muji, na amo moting'hana na munhu yumwe yedwichile chiya cha mazi. Mumuwinze, 14mbaka mng'handa yoyokwinjila, mkamlonjele yali na ng'handa kota, mlangusa kangulonga, chakohi chihengo cha heye choyodila ndiya ya Pasaka hamwe na walanguswa wa heye? 15Na heye kuwalajila chihengo chikulu chizenjigwe mchanya ha chiyage chiwichigwe goya na kunoligwa. Tugongomanyileni mumo ndiya ya Pasaka.”

16Walanguswa nawoka, nawaluta kuli muji, nawafika chila chinhu goya kota Yesu vyoyawalonjele. Nawawika goya ndiya ya Pasaka. 17Loifichile matinazo, Yesu nakoya hamwe na walanguswa wa heye kumi na weli. 18Lowawele wekale mchisanya wolya, Yesu nakalonga, “Ndanguwalonjelani ndikomya, yumwe wa hemwe yalingulya hamwe na heni kongalamka.” 19Aho walanguswa wa heye nawaluka kisinza, nawamuuza yumweyumwe, “Ndaze, nda heni?” 20Yesu nakawalonjela, “Yumwe wa hemwe kumi na weli, yalingudiliza ibumunda hamwe na heni mchisaye. 21Ndangukomya Mwana wa Munhu kobagama kota Maandiko Matakatifu vyogawele longa mbuli ya heye, ila mane yuye munhu ayo yalingumgalamka Mwana wa Munhu! Nayahawele goya munhu ayo wone nahaleleche!”

22Nalowali wolya, Yesu nakahola ibumunda, katambichiza, nakaumogola, kawapa walanguswa wa heye yolonga, “Mhole, alu ndo lukuli lwangu.” 23Hamba kahola chizombe, kalonga malumbo kwa Nguluwi, kawapa, weng'ha nawang'hwa weng'ha mchizombe acho. 24Yesu kawalonjela, “Ayi ndo danda ya heni ilingulajila ilagano lya Nguluwi, danda ilingubohoka kwa mbuli ya wanhu wenji. 25Ndanguwalonjela ndikomya, siwila kung'hwa divai kahi na hemwe, mbaka zuwa honding'hwa divai inji kuli undewa wa Nguluwi.” 26Lowasindile kwimba lwimbo, woka, nawaluta kuli chidunda cha Mizeituni.

27Yesu nakawalonjela walanguswa wa heye, “Hemwe mweng'ha mobilima mondeka ndiliyeka, mina Maandiko Matakatifu gangulonga,

32Lelo, nawafika kuli kamgunda kalinguchemigwa Getisemane. Yesu nakawalonjela walanguswa wa heye, “Mikale baha, mhela heni ndimlanda Nguluwi.” 33Hamba nakawahola Petili na Yakubu na Yohani, nakaluka kuwa na masinzo na kugaya. 34Nakawalonjela, “Ndina masinzo lukami mnhumbula behi nakubagama. Mikale hano na muwe meho.” 35Nakaluta hamwando, ketoza hasi, nakalanda kwa Nguluwi, wone ilinguganigwa, yaleche kukolela saa ayo ya kugazigwa. 36Nakalonga, “Mhaza wa heni, hegwe kuna ludali lwa vinhu vyeng'ha. Umbusile achi chizombe, ila ileche kuwa kota vyondilingugana heni, leka kota vyougana hegwe.”

37Hamba nakahiluka kwa walanguswa wala wadatu, nakawafika wawasile. Lelo, nakamuuza Petili, “Simoni, ndaze kuwasa? Kulemwela kikala meho ne saa imwe?” 38Hamba nakawalonjela, “Mikale meho na kulanda leka mleche kwinjila kuli kujezigwa. Muhe wa munhu wangugana kudita ganojile, ila lukuli lwa ng'hochele.”

39Nakaluta kulanda Nguluwi kahi yohiluchila ulonzi wuwula. 40Hamba nakahiluka kahi kwa walanguswa, nakawafika wawasile. Meho gawo nagali gebatigwe na usinjizi. Nahawalizelele lya kumwidichila.

41Loyoyile lwa kadatu nakawalonjela, “Mng'hali muwasile na kwesela? Lelo itosa! Saa ifika, Mwana wa Munhu kanguwichigwa mmoko mwa wanhu wawele na gehile. 42Mwinuche, tucheni. Mlole, kanguya yula munhu yalingunyinduka kahabehi.”

43Yesu naloyang'hali yolonga, Yudasi yumwe wa wala kumi na weli, nakafika hamwe na likugusi lya wanhu wawele na mipanga na nyimbati. Wanhu awo nawalajizwe na watambika wakulu, na walangusa wa Malajizo ga Musa na wasekulu. 44Yuda yamgalamche nakawapa ulajilo, “Yula munhu yondimnonela ndo heye, mibateni na kumuhilika hali wamizi.”

45Yuda loyafichile du, nakamlutila Yesu nakumlonjela, “Mlangusa!” Hamba kamnonela. 46Lelo, awo wanhu nawamibata Yesu, wamuwika mmoko. 47Yumwe wa wala wawele wemile aho hamwe na Yesu, nakasomola ipanga, nakamtowa nalyo chitumagwa wa mtambika mkulu, nakamdumula ikutu. 48Yesu nakawalonjela, “Ndaze, muya na mipanga na nyimbati kota heni nda mbokaji? 49Chila zuwa nandali hamwe na hemwe ndilangusa mluga lwa Ng'handa ya Nguluwi, mbona hamundibate. Ila sambi igana Maandiko Matakatifu genele.”

50Aho walanguswa weng'ha nawamleka, nawabilima.

51Kwali na msongolo yumwe yali yomuwinza Yesu yawele yavalile mgolole. Nawo nawajeza kumibata. 52Ila heye nakasulupuka, nakauleka ula mgolole, nakubilima mwazi.

53Lelo, nawamhilika Yesu kwa mtambika mkulu kuwele na watambika wakulu weng'ha, wasekulu na walangusa wa Malajizo ga Musa kowali watig'hane. 54Petili nakamuwinza Yesu kwa kutali, nakenjila mgati mwa luga lwa mtambika mkulu, nakekala hamwe na wamizi yokota chiwambilo. 55Watambika wakulu na balaza lyeng'ha nawaliwopala ulolezi wa kumtagusa Yesu leka wamkopole, ila hawauwene.

56Wanhu wenji nawalavya ulolezi wa udesi kwa Yesu, ila ulolezi wa hewo hauwiwhanile. 57Hamba wanji nawema, na kulavya ulolezi wa udesi wolonga, 58“Natumhulika munhu ayu yolonga, ‘Ndogwisanga Ng'handa ayi ya Nguluwi izenjigwe kwa moko ga wanhu, na kwa mazuwa gadatu ndolizenga linji lohalizenjigwe kwa moko ga wanhu.’ ” 59Ila leka ahyo, ulolezi wa hewo nahawiwhanile.

60Mtambika mkulu nakema hagati hawo, nakamuuza Yesu, “Ndaze, hulingwidichila ne chinhu? Wanhu awa wangulavya ulolezi wachi kwa hegwe?” 61Ila heye nakanyamalila tulu! Nahalonjile ne chinhu. Mtambika mkulu nakamuuza kahi Yesu, “Ndaze, hegwe ndo Kilistu Mlohozi yatambichizwe na Nguluwi, Mwana wa Mwenyegawa yelile?” 62Yesu nakedichila, “Ena, nda heni. Kahi, momona Mwana wa Munhu yekale kudilo kwa Nguluwi yawele na mong'ho, yalinguya kuli ng'hungugu kulawa kilanga.” 63Aho mtambika mkulu nakadadula ivalo lyake kulajila kota nakazudila ng'hatu, nakulonga, “Twangugana ulolezi wachi kahi? 64Mumhulika vyoyalingumkovula Nguluwi! Hemwe mwangona ndaze?” Weng'ha nawamula kota imgana yabagame.

65Lelo, wamwe wa hewo nawaluka kumtemela mite, nawamgubika kumeho, nakumtowa nakumlonjela, “Tulagulile lelo, yalikohi yakutowile!” Na vitumagwa nawamhola, na kumuwamba mizeze.

66Petili loyang'ali hasi kuluga, yumwe wa vitumagwa wadala wa mtambika mkulu nakoya. 67Naloyamuwene Petili yokota chiwambilo, nakamlola, na kumlonjela, “Nahegwe wali hamwe na Yesu Nazaleti.” 68Ila Petili nakabela, “Mane, sigazelele goulonga!” Hamba Petili nakoka, nakaluta kunze kuluga. Aho izogolo nalika. 69Yula chitumagwa loyamuwene kahi Petili, nakaluka kahi kuwalonjela wanhu nawawele wemile aho, “Munhu ayu ndo yumwe wa hewo.” 70Petili nakabela kahi. Hado hela, wanhu nawawele wemile aho nawamlojela Petili, “Twangukomya hegwe kwa yumwe wa hewo, mina hegwe kwa Mgalilaya.” 71Ila Petili nakaluka kipanjila na kilaha yolonga, “Heni simzelele munhu ayu yomlingulonga mbuli za heye.” 72Baho du, izogolo nalika lwa keli. Lelo, Petili nakakumbuchila vila Yesu navyoyamlonjele, “Izogolo halineka lwa keli, kombela kadatu.” Petili nakagwa chifunama nakalila lukami.