Ri nabꞌe carta xutzꞌibꞌaj ri Pablo che riglesia kꞌo Tesalónica
1
Ri Pablo kuya pan rutzil kiwach ri hermanos e kꞌo Tesalónica
Riꞌin Pablo kukꞌ ri wachbꞌiꞌil Silvano y Timoteo kaqataq bꞌi wa carta che alaq, ri alaq re riglesia kꞌo Tesalónica, alaq re ri Qaqaw Dios y re ri Qanimajawal Jesucristo. Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.
Ri Pablo katioxin chwach ri Dios ruma riglesia kꞌo Tesalónica
Lik xaqi kojtioxin chwach ri Dios uma onoje alaq echiriꞌ kaqaꞌan orar pawiꞌ alaq. Xaqi e kꞌo alaq chiqakꞌuꞌx chwach ri Qaqaw Dios ruma ri katajin alaq che ukꞌutik rukꞌ ri kubꞌulibꞌal kꞌuꞌx alaq y ri rutzil kꞌuꞌx alaq, yey ruma na oqꞌotam ta kꞌana alaq ri kubꞌul pan kꞌuꞌx alaq che rukꞌunibꞌal ri Qanimajawal Jesucristo.
Hermanos, ri lik kꞌax kanaꞌ alaq ruma ri Dios, riꞌoj qetaꞌam ralaq alaq chaꞌtal ruma Rire. Ma echiriꞌ xqatzijoj ri Utzilaj Tzij che alaq, na xqatzijoj ta xa rukꞌ qachꞌaꞌtem riꞌoj, ma e xqatzijoj rukꞌ ruchuqꞌabꞌ ri Santowilaj Ruxlabꞌixel ri Dios; yey ekꞌu riꞌ Rire xujikibꞌaꞌ uwach lik qatzij ri xqatzijoj. Ralaq etaꞌam alaq chi utz saꞌ ri qabꞌinik qasilabꞌik echiriꞌ xojopon chixoꞌl alaq, ma ronoje ri xqaꞌano, xqaꞌano re toꞌbꞌal e alaq.
Ekꞌu ralaq e lik xkꞌam alaq re ri qabꞌinik qasilabꞌik riꞌoj y rubꞌinik usilabꞌik ri Qanimajawal. Yey tobꞌ ne xkꞌul alaq ri Utzilaj Tzij chupa unimal kꞌaxkꞌobꞌik, chupa ri animaꞌ alaq kꞌo ri kiꞌkotemal kuya ri Santowilaj Ruxlabꞌixel ri Dios. Waꞌ wa xꞌan alaq e jun kꞌutubꞌal chikiwach konoje ri hermanos kikojom rubꞌiꞌ ri Cristo, ri e kꞌo chupa taq ri luwar re Macedonia y re Acaya. Ruma kꞌu ri xꞌan alaq xeꞌek utzijoxik Ruchꞌaꞌtem ri Qaqaw pa taq ronoje luwar, na xew ta Macedonia y Acaya. Ma pa ukꞌiyal luwar katataj wi ri kubꞌulibꞌal kꞌuꞌx alaq rukꞌ ri Dios, y jekꞌulaꞌ na kajawax ta chi kaqatzijoj chikiwach ri jujun chik ri xuꞌan ri Dios ukꞌ alaq. Ma e ne rike kakitzijoj ri utzilaj qakꞌulik xꞌan ralaq yey suꞌanik xoqꞌotaj kan alaq ri kiloqꞌnimaxik taq ri tiox chaꞌ e kaloqꞌnimaj alaq ri Jun paqatzij wi e Dios kꞌaslik. 10 Yey kakitzijoj e oyeꞌem alaq ri Jun kape chilaꞌ chikaj, waꞌ e ri Jesús Rukꞌajol ri Dios, ri xkꞌastaj lo chikixoꞌl ri ekaminaq. Yey Rire kojukolobꞌej che ri qꞌatbꞌal tzij re ri Dios katajin loq.