PORI MA ESÉ ARAÍEN KORINÍ NANIN BANTA UVAMAN AMEIN BOMPON MINO
(1 Korini)
Korinii Esé Bompon Ma Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Pori ino.
Uvarein orana ino.
AD fifti-siksi (56) fin nafi áa fifti-seveni (57) fin nafin uvanten mino. Mai maen Pori ma kanú manaú dádasí en ma monó doraríen eúkiyain pimpá ino.
Ma vompon ma uvantein baru ino.
Taréa ma Téki e siyain barafin ma áau orun perápá bain baru Efesasíi kanú manaú oranará o váken ma vompon uvanten mino.
Ma vompon ma uvaman amikhein kéká ino.
Pori ma kan dádasí en ma monó doraríen eúkiyaren ma Ákaiá barai ánon baru váken ma inká bisinisí impin o aní ukhein baru Koriní ma ena anan nanin banta ano ma monó tin avúavápin ma mo kokhoní iyain kékái uvaman amikhen mino. (Aposeri 18:11 fin ná onano.) Béi mana orana ifo afápá mana un kádan biyontái váken uvanten mino.
Nái ana vará ma vompon uvanten nafino.
Koriní baru ráké ma eriyain bompon má inká mai fáké ma erein arona kéká bái vaya Pori afová en iníkan monó nanin bantafin kampun afová amin banta kéká ano oriven uman maman dákó uran monó tin avúavá mo ampiren peyan ineine rá oriyan ne seimpin mino. Ma ma esé uvantein bompompin ída fura sen mai uman afová inton paran manáarái kampun afová amin banta kayo van tikhen mino. (Kan dádasí ma en uvanteimpin mi fura sen tian amá ukhen mino). Inká kiafosí in avúava safi man baya fi Bafani ká dunan nan nafi fúaren orun mantan nafi inká Koriní nanin bantai ábasuí in má dunan nan ma safi Kantá Aunan mano ma amusin amiyain má monó tin avúavá ba safi ano ma Koriní nanin banta uman amiyain maman bararasí ino van Pori ída o úku e úku inton puntáden tian amá ukhen mino. Sapta 13 fin ma avábá í pákena ma sikhein ma san deren tian ákona ukhen mino.
1
Pori Ma Amusin Bompon Uvaman Koriní Nanin Banta Amein Baya Ino
Yisas Karaisini kama vaya varen mo vanasi siamino van ma Tiyarafenu ano vei anunurá tivíká ein banta séi Porin má mumunan tifá tiváe Sostenesin má anon ma vompon uvaré uno.
Tiyarafenu ano vei vanasií uveya kantasí ukhe vano van ma avíkein kéká ma Koriní barurá banan ma inká Yisas Karaisini yorantá ma avíden maman kantasí ura ma minó akhempá baona nanin banta ano ma Yisas Karaisin nan ma setisi Bafan má betíi Bafan má ino ma siyaona mai kékái ma vompon berasan mano uvaman amé uno.
Teti Sifóe Tiyarafenu vá tetisi Bafan Yisas Karaisin má pinte sarisari vá ará kusin má ano kanaíen tiretin má banten mino.
Pori Ma Susu Siantein Baya Ino
Tiyarafenu ano ma vei sarisari siretin amira ma saréa Yisas Karaisin ninaí ukheona van mi séi ena ena véin tusu sianté iyá uno. 5-6 Para vara seyo, mai ma ara ara afova váka ma ákona e vaya siyaona mai Tiyarafenu anon Yisas Karaisin pinté uaren mai afova amikhái Yisas Karaisin nan ma siamiyá erun mai inka siretí ankan pinté afoká en mino. Máan tukhanti setisi Bafan Yisas Karaisi ma ovaránen erin nain nan ma ave ukhe ma Kantá Aunani ara ara amusin barano van ma iyaré eona mai inka saréa vare ono. * 1Te 3:13; 5:23Inká béi ano mai amusin kayo fóké tiretin maman ákona uantádanti oriyare setisi Bafan Yisas Karaisi ma ovaránen erin nain damú ída mana aau vanti ven avorá o mantan nono. * 1Te 5:24; 1Yn 1:3Tiyarafenu ano veyan ma sirein daná bariyain mi vákan be Anin ma setisi Bafan Yisas Karaisi vain má manafin bano van mi siretin arakhen mino.
Monó Nanin Bantafin Ma Yaimin Avúavá Bain Baya Ino
10  * Fir 2:2Mumunan tiyofi sifá tiváeyan noe, ída vá aruve asive iyáke setisi Bafan Yisas Karaisin avíká kama e manafin báke vá eraran ma aúban daimin avúavá ída vanti vá manafin ma vaya sire ma varanona yaná ano vá mai kama ino. 11 Mumunan kéka soe, siretí ankan ma aruve asive iyaona vaya mai Karoen amápin ma vain kéká anon me sisimí iniréi ma vaya siyá uno. 12  * Apo 18:24-28; 1Ko 3:4Tiretí ankan máa mi siya ono. Manáa kéká ano Porin mi yakhafiyá uno siyáka inká manáa ano Aporosin mi yakhafiyá uno síka manáa ano Pitan mi yakhafiyá uno síka manáa ano Karaisin mi yakhafiyá uno siya ono.
13 Kanaí eyá Yisas Karaisin maman aúban daiminte fono. Téi Pori anó tiretin nan pukékuyá inká ten tivíkasá monó non mante fono. 14  * Apo 18:8; Rom 16:23Téi ma Krispusin má Kaiusin má monó non péantádé ma siretin ída féantákeruna van mi Tiyarafenun tusu siantiyá uno. 15 Máan tukhé umpo ída vá mana ano sen nan ben avíkái monó non péké uno vá teno. 16  * 1Ko 16:15(Stefanasini kéká bá deren monó non péan tákékun ban mifo mai oyampáké ena kéká bá péke rafu ída afová ukhé uno.) 17 Yisas Karaisi ano monó non péantano vara séin tisinten naino. Tiyarafenui kama vaya siamino van mi sisinten mino. Mai fara va ino vara ráke afova ma mantein banta kayo ano ma siyain avúaváká baya siyaré Yisas Karaisini yaa unkamádan maman paen danasí onuna van mino.
Yisas Karaisi Mai Tiyarafenui Kama Afova Vá Ákona Vá Ino
18  * Rom 1:16Mai fara vara seyo, Yisas Karaisini yaa unkamádan nan ma siyain baya ano varará ma o afeyoriyain kéká avorá paen danasíi ukhá afová ukhé umpo mai ma inarufá orono van ma útakhé tiferuna kéká ano ma oniyá tiferuna mai Tiyarafenu ano ma setin tiviriyain ákonan ban mino. 19 Mai fara vara seyo, vanasi ano ma vetiyantá betiyan ayain nain nan Tiyarafenui vompon dóki ano máa sikhen mino.
“Bantai afova mádé asuse uré
betíi ineine finte kama afova yo varanté uno.” Ais 29:14
20  * Yop 12:17; Ais 19:12; 33:18; 44:25Máa sikhen mifo mai ma kama ineine vain kéká bá kama afova variyain kéká bá inká be afova van ma fura fura sin kéká bá mai intesá ukhen nafino. Tiyarafenu ano máan ineine vá ma vain kékái afova maman paen danasí ukhen mino. 21  * Mat 11:25Mai fara va ino, vantai ineine ano Tiyarafenui ineine vá ída manaí ukhan ída kanaíen beni vaya ineren ukhan mi setí ankan ma asuse aa fáké monó baya siamiyaruna anon banasi aya iyákan Tiyarafenu ano amusin iyan mai kéká aviriyan mino. 22 Yutan kayo ano enará ukhein avúavá aní intí ódaré mumunan ono van iyákan inká ena anan nanin banta kayo ano vetí ankan ma afová ukhein avúaváká ma siamintin iniren mumunan in nain nan mi yosiyan mino. 23  * Rom 9:32; 1Ko 2:14Máan tiyan mifo Yisasi ma yaa unkamádantá purein nan ma setí ankan tiamiyákun Yutan kayo ano mai vaya inian paen danasí iyan maen inká ena anan nanin banta kayo ano iniren asuse vaya ino siyan mino. 24  * Kor 2:3Máa siyan mifo mai ma Tiyarafenu ano Yutan kayo vá ena anan nanin banta kayo vá ma evaránen avíkein mai Yisas Karaisi maen Tiyarafenui ákonan báken beni kama ine inen ban mino. 25  * 2Ko 13:4Mai fara vara seyo, varará banta ano Tiyarafenui ineine van asuse ukhen mino siyan mifo vetíi kama ineine esantakhen mino. Inká Tiyarafenui avúava san ída ákona van ne siyan mifo vantai ákona esantakhen mino.
26  * Mat 11:25; Yem 2:5Mumunan kéka soe, afova sá ono. Manáa kéká ano ída afova váka ída aví bain nanin banta akhafanan báke ída ona vain kayon baré en nan mi Tiyarafenu ano siretin arakhen mifo ovare vá me ineno. 27 Mai ma kama ineine vákái vá uno ma siyain kéká ayave ameno van mi mai ma asuse ineine vain kéká Tiyarafenu ano aní uren doran amen mino. Inká mai ma ákona vain kéká ayave ameno van mi mai ma ída ákona vain kéká aní uren doran amen mino. 28 Kama ineine ma vain kékái afova mádé asuse ono van mi ma ma vanasi ano namuen púta ukhen mino siyá ein kéká Tiyarafenu ano aní uren doran amen mino. 29  * Efe 2:9Máan turantin Tiyarafenu avorá ída mana ano séi mai yaná manté uno sen be amo sino van mino.
30  * Yer 23:5-6Yisas Karaisin pinté uaren tetin tiya ono van mi Tiyarafenu ano veyantá mai aa maman asamana uran ban mino. Mai fara va ino, Tiyarafenu ano setin evaránen tivirano van mi Yisas Karaisimpó tetin afova simiren maman puntákein kékasí uren inarufá orino van tetin kantasí urá bá tiféuno. 31 Máan tukhein nan mi Tiyarafenui vompon dókifin tikhen mino. “Mana nanin banta ano ma amo seno van Bafan mana vá amo sino.” Yer 9:24

*1:8: 1Te 3:13; 5:23

*1:9: 1Te 5:24; 1Yn 1:3

*1:10: Fir 2:2

*1:12: Apo 18:24-28; 1Ko 3:4

*1:14: Apo 18:8; Rom 16:23

*1:16: 1Ko 16:15

*1:18: Rom 1:16

*1:20: Yop 12:17; Ais 19:12; 33:18; 44:25

*1:21: Mat 11:25

*1:23: Rom 9:32; 1Ko 2:14

*1:24: Kor 2:3

*1:25: 2Ko 13:4

*1:26: Mat 11:25; Yem 2:5

*1:29: Efe 2:9

*1:30: Yer 23:5-6