JA' AN CARTA TET EB CREYENTE HEBREO
1
Ja' Dios Jix K'anbalne Sc'aal Yet Jix K'anab E On
Ja' yet peyxa tu', cu Mam Dios jix k'anab el yin eb naj profeta, ja' ton eb ẍejab Dios tet eb kichmam. Yin tx'ial el c'al tx'ial tujan jix k'anab el cu Mam Dios yin eb profeta. Jal pax tinani' xin, yin slawubal tiempo chi k'anab el cu Mam Dios yin Sc'aal e on. Ja' yet jix swa'nen Dios masanil tzettaj yetal yet peyxa tu', ja' ton naj Sc'aal jix sk'anbalne yet jix swa'neni. Catu' jix sic'le pax can el naj yu Dios yu yak'le pax c'al can masanil tzettaj yetal yul sk'ab naj C'aale tu'. Chi x'ox el swatx'il Dios naj C'aale yutol ja' c'al oc naj yetoj Dios. Ja' c'al oc naj chi teynen masanil tzettaj yetal yetoj sk'ane, yutol ja' wan k'ane tu', caw miman yipal. Ja' yet jix lawi sjo'cha can el cu penail tu' yu naj xin, catu' jix ey chotan naj bey sdespacho bey swatx' k'ab cu Mam Dios bey satcan tu'.
Yel Miman Yel Oc Apnoj Naj Sc'aal Dios Yintaj Eb Ángel
Caw miman jix yun yel oc apnoj naj Sc'aal Dios yintaj eb ángel, yutol ja' jun yopiso jix ak'le tet naj yu cu Mam Dios, caw miman yel oc apnoj yintaj yet eb ángel. Yutol c'am junel oj chi yal cu Mam Dios tet junoj ángel jaxca ti':
Jin C'aal jaach an.
Ja' yet jun c'u ti', jix wak' ja k'inal an.
Man ẍi oj cu Mam Dios tet junoj ángel.* Salmos 2:7
C'am pax chi yal yin junoj ángel:
Oj jin oc Smam oj an,
catu' oj oc jin C'aal oj an.
Man ẍi oj cu Mam Dios tet junoj ángel.* 2 Samuel 7:14
Ja' yet jix aletej naj C'aale yu cu Mam Dios yul yiban k'inal ti', catu' jix yalon tet eb ángel:* Deuteronomio 32:43
Sowalil chex ey kaan tet jin C'aal an, ẍi Dios tet eb ángel.
Catu' jix yalon Dios yin eb ángel jaxca ti':
Chi oc eb ángel jaxca ka'e',
catu' chi oc pax eb chejabwomal jaxca ẍaw xaj k'ak', ẍi Dios.* Salmos 104:4
Chi yal pax yul An Juun tet naj C'aale jaxca ti':
Jaachti', Dios jaach. Ey c'al ta' can masanil tzettaj yetal yul ja k'ab yin tobal k'inal.
Caw jichan ja wak'on yin ja wopiso.
Ja' sjichanil cha woche, catu' caw c'am cha woche spenail.
Yuxan Dios, ja Diosal, jix ak'on jun miman tzala c'ulal e ach.
Yel miman ja tzala c'ulal jix sec'le oc ja wiban yintaj eb ja wetbi, ẍi yul An Juun tet naj C'aale.* Salmos 45:6, 7
10 Catu' chi yalon pax yul An Juun:
Jaach Kaawil, jix ja wa'ne jun yul yiban k'inal ti' yet yichbanil, catu' jix ja wa'ne satcan yetoj ja k'ab.
11 Ja' wan tu' oj q'uey el oj, pero jal pax jaachti' xin, oj jaach ey ec' yin tobal k'inal.
Masanil eb oj xilboj el jaxca chi yun xilbi el an pichile.
12 Ja' wan tu', oj ja wuch' ey oj jaxca junoj pichile xil xa.
Oj quexchatoj jaxca junoj pichile.
Jal pax jaachti' xin, ey jaach c'al ta' ec' yin tobal k'inal.
Catu' ey ja k'inal yin tobal k'inal, ẍi yul An Juun tet naj C'aale tu'.* Salmos 102:25-27
13 Manaj tet junoj ángel, pero tet naj C'aale jix al-le jaxca ti' yu cu Mam Dios:
Eyan chotan bey jin watx' k'ab, masanta' c'al oj can wan ja cajat ja walan wu an, ẍi Dios tet naj C'aale.* Salmos 110:1
14 Pero masanil eb ángel, espíritu eb. Chi yak' servil cu Mam Dios eb. Chejbil eb yin colwal yin eb oj ẍa' scolbanil.

*1:5 Salmos 2:7

*1:5 2 Samuel 7:14

*1:6 Deuteronomio 32:43

*1:7 Salmos 104:4

*1:9 Salmos 45:6, 7

*1:12 Salmos 102:25-27

*1:13 Salmos 110:1