Jon Uqa Jaqec Je Osoldoc
Jaqiaden
Aqunec Je
Jaqec je i uqana gug lecis nijia. Gug oso eu Kristen cunug age Memega Anutca uqa Melah, Jisas Kraisca wawaga osol biluqagannu cesuladena. Gug oso eu Kristen age uhulec je tuna toodu cobimeig agena wawaga osol bilec wagalowainnu ulauladena.
Uhulec je tuna eu odi madena, “Ceteteh cunug mahana bilegina eu me qee. Odocob Jisas uqa Anut Melah. Eunu uqa dana bahic caleceb uqa ege dana gami mahana bilecnu ihoc qee,” ena. Odi mamadi madena, “Dana age cebac bilec ocnu gale adena eu age mahana bilecnu cain cisdowain. Mahana bilec eu ceteh gauc eunu dana age Anutna kobol me toodu odocnuca, age cotogailnu nalunuga mecnuca eu qee nijel,” ena.
Eunu Jon uqa jaqec je ina Kristen age uhulec je tuna eu cain dah mowain ec madena. Uqa madena, “Jisas uqa dana bahic calen. Odocob dana cajaca age Jisas Kraisnu wawaga meleena eu age Anutnu nalug moqagan, odimeig age Kristen cotogailnu nalunuga moqagan,” ena.
Je Dunuhnu Dado Mec
1. Aqunec je: Anut Melah uqa dana calen (1.1-4)
2. Fulacdocna cobocca tuna cobocca (1.5-2.28)
3. Anut melahulca Seten melahulca (3.1-24)
4. Mele jeca uhulec jeca (4.1-6)
5. Ege Anut melahul eunu ege nalug mecebmeceboqale (4.7-21)
6. Egena Jisas Kraisnu wawige meleec eu mahana gagadic odoc wooldugian (5.1-21)
1
Cebac bilecnu je camasac men
1 Ege cebac bilecnu je eunu je qasali madoqona. Cebac bilecnu je eu gug qoc saennadec bibili li qila bilina. Cebac bilecnu je ege dah mom, odocob ege amigena fom, odocob ege fimeb ebenigena qududom. 2 Cebac bilec eu camasac meceb ege fom eunu ege mele je qasali madoqona. Ege cebac bilec catanec eunu je qasali maadoqona. Cebac bilec catanec eu wele Memige Anutca bilen, odocob eu camasac meceb ege fom. 3 Age ege gami osoben gabandu bileqannu gale gena. Eunu ceteh eu ege fom, ceteh ege dah momca eunu ageha qasali maadoqona. Odocob egeca Memige Anutca uqa Melah Jisas Kraisca gabandoc biluquna. 4 Egena ceelec eu am bigiannu je i jaqiadoqona.
Ege Anutna fulacdocna biluqale
5 Anut Melahna je dumeb qasali maadoqona. Uqana je eu odi, Anut uqa fulacdoc, odocob uqana naha nag oso tuca qee. 6 Ege odi madoqona, “Ege uqa gami osoben gabandu biluquna,” oqona ege tuna coboqonafi ege uhulec je madoqona, odocob ege mele je eu qee toodu odoqona. 7 Euqa ege fulacdocna cobifeb eu odi uqa fulacdocna bilinawe ege gabandocobdocobimeb biluquna. Odocob uqa Melah, Jisas uqa golac eu egena silail cunug cagasigeceb soidoc biluquna.
8-10 Ege silail oso qee molom oqonafi ege Anutnu uqa uhulec dana ec madoqona, odocob uqana je ege dunuh qee bilina. Ege silailca qee oqonafi eu egedodoc qaudoqona, odocob mele je eu ege dunuh qee bilina. Euqa ege egena silailnu qasali madoqonafi Anut uqa uqana je maden eu tutuc toodu odigian, odocob uqa egena silail cagasigimei egena cahuldoc cunug soidugigian.