Pol Uqa Jaqec Je Osoldoc
Timoti Jaqiton
Aqunec Je
Timoti uqa Kristen dana haun oso, uqa Listra taundec. Listra eu Galesia hatuna nijen. Uqa anag eu Juda, uqa memeg eu Juda qee, eu Grik. Pol uqa Timoti ehudeceb uqa Pol gami hatuhatu cocobosi me je qasali maadesin. (Age Aposel 16.1-3 feiga.) Pol uqa uqana cabi coboc 4-peladocna Masedonia hatuna nunuei uqa Timoti Efesas tamanec cofadigiannu madon. Hibna uqa mahuc Efesas ono qee ceseli nuiaun ec cisdumei uqa Timoti jaqec je i jaqiton.
Ceteh osonu Pol uqa Timoti jaqiton eu odi. Dana leih tamanecna bilegina agena cisdoc eu tutuc qee. Age ceteteh cunug maha ina bilegina eu me qee ec iwaladegina. Odimeig dana uqa cebac bilec catanec ocnu gale dona eu uqa sab leih cain jeiaun, uqa caja cain oiaun ec iwaladegina. Eunu dana eundec age tamanecna wawaga meleec me qee meiaundainnu Pol uqa dana eundecnu Timoti ulauldona.
Ceteh osonu ha Pol uqa jaqiton eu odi. Uqa tamanec age cuha fec tutuc odoqagannuca, tamanecna cabi me oqagannuca Timoti jaqiton. Odimei uqa cel dana tamanec cofadecfo, cesuladec cabi danafo caligiannu jaqiton.
Cit qoc jena Pol uqa Timoti Jisas Kraisna cabi dana me bahic biligiannuca, Timoti uqa tamanec dana cajaca cofadi cuhadugiannuca jaqiton.
Je Dunuhnu Dado Mec
1. Feele adec je (1.3-11)
2. Pol uhulec iwaladec dananu ulauldona (1.3-11)
A. Uqa uhulec iwaladec gug silditona (1.3-7)
B. Mosesna loo je gug (1.8-11)
3. Pol uqa Anut uqanu waug qon eunu hetaga dona (1.18-20)
4. Timoti uqa me je hewimei Anutna cad gami han cadec me bahic cadigiannu je jaqitona (1.18-20)
5. Tamanec cofadecnu je (dac 2-3)
A. Tamanec agena cuha fec (dac 2)
1. Age dana cajaca cunugnu Anut inondoqagan (2.1-8)
2. Caja age tamanecna adi biluqagan (2.9-15)
B. Tamanec cofadec age ititom kobol coboqagan (3.1-13)
1. Tamanec cofadec matu agena coboc (3.1-7)
2. Tamanec cesuldoc cabi dana agena coboc (3.8-13)
C. Anutna kobolnu je gug (3.14-16)
6. Uhulec je iwaladec (dac 4)
A. Uhulec je iwaladec uqana gug (4.1-5)
B. Timoti uqa uhulec je iwaladec adi cilehdugian (4.6-16)
7. Timoti uqa tamanecna am filfil adi cofadigian (5.1-6.2)
A. Dana toiaca dana haunca adi cofadigian (5.1-2)
B. Caja wij adi cofadigian (5.3-16)
C. Tamanec cofadec matu adi cofadigian (5.17-25)
D. Cabi dana bega meh adi cofadigian (6.1-2)
8. Ceteh filfil (6.3-19)
A. Uhulec iwaladec dana (6.3-5)
B. Meen qaig ocnu gawec kobol (6.6-10)
C. Timoti uqa cebac bilec catanec gagadic hewigian (6.11-16)
D. Dana cehewanagaca (6.17-19)
9. Timoti uqa uqana cabinu cofdu cuhadugian (6.20-21)
1
Ija Pol, ija Krais Jisasna aposel. Anut uqa egena Cahahagec. Ege Krais Jisas cahahagecnu sumuduquna. Ale madecebil ija aposel calem.
Timoti, hina wawi meleec melami bahic, ijana jaqec je i jaqihigina. Anut ege Memigeca egena Tibud Jisas Kraisca ale eelhec uum ihecca, waug qocca, malol bilecca ihesiale.
Ele uhulec je cunug cilehdowale
Ija wele Masedonia ono nuige bili cuculihi cesushihi mahem, hina Efesas ene biliga hem, eu odi haun cesushihi mahigina. Ija mahem, “Hina Efesas ono dana leih age me je cuculdi faninadec je filfil dana cajaca iwaladegina eu gagadic maadaga, ‘Age faninadec je filfil cain iwaladowain, age me je bahic iwaladeiga. Ageha dodo gauc saadecca, agena sihul sanijecca, age asagail ijanagana je eu mamadi fee dadanec cali hona eu cunug culeiga,’ adaga,” odi mahem. Eetanu? Je euna dih fee dadaneginanu. Iwaladec eu age adi Anutna ititom coboc odocnu qee iwalgegina. Ege ititom coboc eu wawaga meleecna himec odoqona. Euqa ititom coboc Anut magen uqana sis qoc eu nalug mec. Ege wawige silailca qeefi, ege wawige catanieccafi, ege Jisas Kraisnu wawige mele bahic enafi, ege wawige meleec cotigeilnu nalunuga moqona. Dana leih age kobol i culein. Odocob age je gauc dihnu mamadi ilag gad fahalegina. Age Mosesna loo jenu iwaladec dana caloqagannu odogina qa je inu age madeginaca, uqana gug egena je i mele bahic eginaca eu agedodoc qee fogo adena.
Ege doqona, oso uqa loo jena jic tutuc cobonafi loo je eu me. Euqa egeha doqona, loo je gug eu odi. Loo je eu dana tutuc coboginanu je oso qee madena. Euqa dana age loo je wooldudu bisalu qee bilegina eundecca, dana age Anut hibemdudu silail kobol odogina eundecca, dana age Anutna kobolnu odi fena imeig mahanadec kobol toodogina eundecca, dana uqa anag memegca qagaalena eundecca, dana uqa oso qagadona eundecca, 10 dana age cajaca wal kobol odogina eundecca, dana age danaca Sodom agena kobol odogina eundecca, dana age dana cajaca heje cedegina eundecca, uhulec danaca, dana age uhulimeig mele ohis ec madegina eundecca, dana cunug age ititom cobocnu mele je iwalgena eu tefacdogina eundecca, dana eundec cunugnu loo je niniji je maadena. 11 Mele je i eu me je Anut uqa ija maadecnu iten euna bilia. Me je i uqana gug eu binan benca, eu Anut ege binan suluqale uqana me je.
Anut Polnu waug qon eunu hetaga don
12 Jisas Krais egena Tibud uqa cabi i ocnu gagadic iten. Uqa ija uqana cabi ihoc ugian imei cabi euna miten. Eunu ija hetaga dugina. 13 Mele, wele ija gaid uqa ijannu je me qee madolig, odocob ija uqa jabudi tootoodolig, odocob uqa deweg tudolig. Euqa ija uqana gug qee du cuhadolom, ija wawi qee meleecebnu eu odi oodi bilem eunu uqa ijanu waug qona. 14 Odocob egena Tibud uqana eelgec uum igec ben eu basecdumei wawi meleecca uqanu nalug mecnuca iten eu egena Krais Jisasca gabangec.
15 Krais Jisas ege silail dana cajaca cahahagecnu maha ina toni nen ec madec eu mele bahic. Je madec eu dana cajaca cunug dumeig wawaga meleigiannu ihoc nijia. Ijaha silail dana, ija silail dana cunug wooladec. 16 Euqa Jisas Krais uqa silail dana cajacanu waug qona eu cunug du cuhadocnu waug nijia. Odocob uqa ijanu waug qon, ija silail dana cunug wooladec. Ija wa dodwe, odocob dana cajaca cunug Jisas Krais uqa adi ija oditen eu fimeig age uqanu wawaga meleeceb age cebac bilec catanec eu oqagan. 17 King saensaen cunug cal mecwe qee, eu uqa fecwe qee, uqadih Anut bilia eu binan sulocomun cataneiale, uqa kobolkobolca bileceb cataneiale! Mele.
Timoti uqa ceteh me qee cilehdugiannu gagadic meiale
18 Ija melami Timoti, hina eeta odocnu je i mahigina. Je i eu je hahun madec dana age wele hinanu madein eu toodoga. Hina je i hewimeg Anutna cad gami han cadec me bahic cadagale. 19 Hinana cadec eu odi. Hina wawin meleec gagadic hewagale. Hinana cisdoc silec eu hina silail magana ec qee madeiale. Dana leih age agena cisdoc silec qee dah mimeig age wawaga meleec wagalein. 20 Dana eundec gemonadec oso Haimeniasca Aleksandaca. Dana eu ale ulaulaleceb ale Anutnu je me qee madesina eu culuwasannu ija Seten ulaulaligiannu ebenna culalitom.