Jems Uqa Jaqec Je Oso
Anutna Dana Cajaca Jaqiaden
Aqunec Je
Jems i uqa Jisas waliag eu odi fena. Jaqec je i Jems jaqen euna Anutna dana cajaca age kobol me bahic odocnu iwaladec je mati nijina. Uqa dana cajaca age cisdoc meca, doc meca umeig agena je madec eunu cisdu cuhadoqagannu eu cesuladecnu galolo je mati jaqen.
Jems uqa odi gagadic maden. Oso uqa Jisasnu waug meleena uqa gauc cain biliaun. Euqa uqa dana cunug kobol me odadigian. Uqa odi odocobfi uqa waug meleec eu gagadic tawena eunu ihacena.
Je Dunuhnu Dado Mec
1. Feele adec (1.1)
2. Temgec eu ege duuec tawecnu odona (1.2-18)
A. Wawaga meleec temdoc (1.2-12)
B. Temdoc uqana gug (1.13-18)
3. Ege je dah mimeb toodu ha odoqan (1.19-27)
4. Ege dana cunugnu wawige qoc eu ihocihoc nijiale (2.1-13)
5. Wawige meleecca egena odocca (2.14-26)
6. Ege conige cofdu cuhadoqale (3.1-12)
7. Doc silecca lecis nijesia (3.13-18)
8. Mahanadec kobol eu Anutna cad (dac 4)
A. Gonagona mec kobol (4.1-3)
B. Dana mahana kobol gawena eu odi dana uqa aideg culdina (4.4)
C. Binani sulecnu kobol (4.5-10)
D. Osonu je me qee madec (4.11-12)
E. Culaec je madec (4.13-17)
9. Dana cehewanagaca age dana leih cilehadegina agenu dahiniga hewec je (5.1-6)
10. Age wawaga gagadic mudimeig culumen gahidudu Tibud sumudeiga (5.7-20)
A. Age wawaga sosogoei culumen gahidoigale (5.7-11)
B. Je cagoc oso cain madowain (5.12)
C. Wawaga meleeceb inondoqagan (5.13-18)
D. Leih age jic ceja qogina eunu je (5.19-20)
1
1 Ija Jems, ija Anutca Jisas Krais Tibudca alena cabi dana.
Ija Isrel sihul 12-pela age bilisadoc bilegina ageca huga feele aadi maadigina. Age ceeli bileigale adigina.
Temgec eu ege duuec tawecnu odona
2 O cotiel, deweneganu temadec filfil ageca hocobfi age eu ceelecna ceteh himec eigale. 3 Ceteh oso humei agena wawaga meleec temdocob temdoc eu wooldocobil euna gagadic tatawi culumen gahidoc kobol camasac mudina eu age dogina. 4 Odoc me bahic duman eu age cunugnu ihoc ligiannu, odocob age euna me bahic ititom cobocnu biluqagannu age saen cunug gagadic tataweig culumen gahidoigale.
Dana uqa cisdoc sileccanu qaqaguldufei uqa gad inondoia
5 Anut uqa dana cunug ceteteh adecnu waug nijina, uqa qee gagalena. Eunu age oso uqa cisdoc sileccanu qaqaguldufei uqa Anut eu utigiannu inondoiale, Anut uqa eu utigian. 6 Euqa dana eu Anut uqa utecnu ihocfo, qeefo odi cain cisdoiaun, uqa waug meleecca Anut inondoiale. Dana uqa odi cisdona eu uqa fufu macas fuludocob qahimei ehi li heli ahu helienawe. 7-8 Dana odi odoc eu uqa cisdoc lecisca. Cisdoc oso Anutnu cisdona qa cisdoc oso ceteteh mahanadecnu cisdona. Uqana jic cobocnana cunug luculacaena. Dana odi odoc eu Tibud ceteh oso utigian ec cain cisdoiaun.
Dana sawen dana cehewanca
9 Cotige uqa cehewanca qee bilina eu uqa ija Anut amegna binanica biligina, isi Anut suli u mitigian imei eunu culaeiale. 10 Euqa cotige cehewanca bilina eu uqa ija Anut amegna binanica qee biligina eunu wawi jogoi cobigina imei eunu culaeiale. Ge, gigi sal qoc qaisenawe odi dana cehewanca uqaha qaisi cal migian. 11 Ge, cam bimei agagca tawimei gigi hoodona, odocob sal qoc tonena. Wele galeca tawen qila eu qee mena eu ege doqona. Eu odiwe dana cehewanca uqa uqana cabi cunug oodi gemona qee migian.
Ceteh dana temdocnu uqana je
12 Dana uqa gagadic tatawi temdoc cunugna culumen gahidona uqa ceelecca. Uqa temdoc cunug wooldocobfi Anut demico bilec eu utigian. Anut dana cunug uqanu nalug megina eu age ameg i adecnu wele maden. 13 Dana uqa ceteh oso temdocob waug cajenafi eu Anut temteceb wawi cajena ec cain madeiaun. Eu odi qee. Silail uqa Anut temdocwe qee. Odocob Anut dana silail moqagannu qee temadena. 14 Euqa ege cunug abesabes wawige cajeceb euna digena. Egedodoc egena gale gec me qee eu ninigena. Odimei qisol mecnu ehi li megina. 15 Gale gec me qee kobol eu waugna fagdocob silail mec eu mel basecwe camasac mena. Hibna silail mec eu ben meceb cal mec cali hona.
16 O cotiel bahic, fefeig age kobol eu culdecebil qauadeiaun. 17 Kobol me ceteteh um igec bagol igec me bahicca eu cunug sao culnadec nena. Fulacdoc cunug memige uqa suladeceb egeca nena. Memige eu uqa uqana kobol qee falicfulucdona. Uqa eu ceteh osona salu camna calena dodolog cecelac mimei haun gohic mena odi qee. 18 Qeeo. Uqa uqadodoc uqana cisdocna gale doc eu toodumei basigen, uqa uqana mele je euna basigen. Ceteteh cunug Anut ifanen euna ege sab magah age casac cabinadec umeig Anutnu ihanegina eu odiwe uqana mel matu bileqannu maden.
Ege je dah mimeb toodu ha odoqan
19-20 O cotiel bahic, age ceteh eunu du cuhadoigale. Age abesabes oso je madeceb docnu waug nijecebfi age mahuc dahiniga ceheigale. Age je madecnufi mahuc fecwe cain madowain. Odocob dana gemag becna Anutna kobol tutuc odoc eu qee odona. Eunu gemanaga ha mahuc cain beiaun. 21 Eunu wawaga cisdoc gegehinca cunug qisol mec kobol cunug geh bahic calena eu age ititacdoigale. Odimeig age jogoi wawaga lal qocna Anutna je wawagana cehen eu oiga. Je eu age dolonoga cahahaadecnu ihoc.
22 Euqa age je doc dana himec cain biluwain. Age je eu toodu odoc dana bileigale. Age gauc himec dah mifeig eu agedodoc qauadegina. 23 Ge, dana oso uqa Anutna je gauc himec dah mimi qee toodu odifei eu uqa dana uqadodoc ola dodna fenawe. 24 Uqadodoc ola dodna fimei nui cocobi uqa ola adec eu mahuc bahic dahig celena odiwe. 25 Euqa loo je eu silailna gihacdocnadec besigena eu tutuc bahic. Dana oso uqa loo je eu mecii cuhadudu toodu odifei uqa gauc dah mimei dahig celec dana qee. Anut uqa dana eu uqana odocna eeldugian.
26 Dana oso uqa odi cisdona, “Ija Anutnu wawi meleecca me bahic Anut binan suligina,” qa uqadodoc co qee cofdona eu uqadodoc waug qaudona. Eunu uqana waug meleec cuha fecca eu gauc himec. 27 Cuha fec eu ege memige Anut amegna eu soidoc bahic nijeceb odocob gegehinca qee eu odi bilina. Age mel leih anagail memegailca cal mein eundec caja wij cuhanuc bilegina eu ageha culumen gahidocnu cesuladeigale. Ceteh osoha. Maha inadec kobol wawaga gegehin cain qoiaun. Odocob age agena jic coboc cofdu cuhadudu coboiga.