Pol Uqa Jaqec Je Oso
Taitas Jaqiton
Aqunec Je
Taitas eu Juda dana qee. Euqa uqa Kristen calenna uqa Polna aposel cabi euna cesuldon. Pol uqa Taitas wawaga meleec dana cajaca age Krit nuina bilein eu cofadecnu culdon eu odi fena. Pol uqa Taitas jaqec je i jaqiton.
Pol ceteh cijednu jaqen, eu odi. Dana Krit nuina bilegina mati agena kobol eu me qee. Eunu Pol uqa tamanec cofadec matu adi biligiannu jaqen (1.5-16). Odimei Pol uqa Taitas tamanecna cam filfil adi iwaladigiannu jaqen. Cam oso eu dana toiatoia, cam oso eu caja toiatoia, cam oso eu caja haunhaun, odocob cam oso eu cabi dana cajaca bega meh (2.1-15). Cit qoc jena Pol uqa Taitas Kristen cobocnu jaqen. Kristen cunug age fee dadanecca, mam cadecca, gonagona mecca eu qisacdu biluqagan. Euqa age malol bibileig me odocnu gaid gagadic cisdoqagan (3.1-11).
Je Dunuhnu Dado Mec
1. Feele adec je (1.1-4)
2. Tamanec cofadec matunu je (1.5-9)
A. Pol uqa Taitas Krit nuina culdon eu uqana gug (1.5)
B. Tamanec cofadec matu agena gadac (1.6-9)
3. Uhulec iwaladecnu je (1.10-16)
4. Tamanecna cam filfilnu je (dac 2)
A. Cam filfil agena je maadec (2.1-10)
B. Kristen agena bilecca, agena cobocca eu uqana gug (2.11-14)
C. Ceteteh Taitas odigian (2.15)
5. Wawaga meleec dana caja cunug agena je (3.1-8)
A. Age dana caja me bahic biluqagan (3.1-2)
B. Eetanu dana caja me bahic biluqagan (3.3-8)
6. Kristen age je madec eu cesuladecnu ihoc qee eu qisacdu biluqagan (3.9-11)
7. Cit qoc je (3.12-15)
1
1 Ija Pol, ija Anut cewel utoc dana, ija Jisas Kraisna aposel. Anut uqa ija dana cajaca Anut uqa ijana imei nesili cedaden eu cesuladecemin age Kraisnu wawaga meleec gulucdoqagannuca, Anutna kobolna cobocnu mele je eu iwaladecemin doqagannuca cabi eunu aposel miten. 2 Mele je uqana gug eu ege cebac bilec catanec oqannu susumudi biluquna. Eu Anut, uqa qee uhulina, uqa wele bahic sao mahaca qee ifanec saenna ege cebac bilec catanec i igigian ec maden. 3 Odocob saen euna Anut wele maden uqana jena odocob ceteh i camasac men. Eu ege me je qasali maadoqona euna dana cajaca dogina. Me je qasali maadec cabi i Anut ebenina men. Odocob Anut egena Cahahagec uqa maten eunu ija dana cajaca qasali maadigina.
4 Ija Taitas hina jaqihigina, hina ija melami bahic. Ele wawile meleec gabanlec biluwuna.
Anut ege Memigeca Krais Jisas ege cahahagecca alena eelgec uum igecca malol bilecca hina ihesiale.
Pol uqa Taitas cabi Krit nui ono ogan ec madon
5 Ija hina culihecemin hina Krit nui ono bilem uqana gug eu odi. Cel ceteh eu tutuc qee nijina hina eu tutuc mudegannu, odimeg hina tamanec cofadec matu age jobon cunugna nesili ehadegannu culihem. Eu ija je wele mahemnu cisdoga. 6 Tamanec cofadec matu uqa cahuldoc osoca qee eu odi biligian. Uqa caja osol gemug himec biligian. Odocob uqana mel mel aidca age wawaga meleecca biluqagan. Age kobol me qee odogina, age anagail memegailca jejenega qee toodu odogina ec um qoc jeca qee nijigian. 7 Ge, tamanec cofadec matu eu Anutna cabi cofdona. Eunu uqa cahuldoc osoca qee odi biligian. Uqa cain deboeiaun, uqa mahucwe gemag cain beiaun, uqa ceu jeceb dalul cain qoiaun, uqa olohon cain beiaun, uqa meen qaig ocnu himec cain cisdoiaun. 8 Tamanec cofadec matu uqa loo cahulecca, uqa ceteteh menu nalug migian. Uqa gesili fecca, uqa ititom cobocca, uqa dana gun cobocca, uqadodoc duman cofdugian. 9 Uqa dana cajaca wawaga meleena eu adi cobocnu iwaladecnu ihoc odi biligiannuca, odocob uqa dana age mele je iwaladecnu uqa agena cahuldoc ihacadecnu ihoc odi biligiannuca uqa mele je ege iwaladoqona eu hewi daugdugian.
10 Ge, dana mati ono Anutna mele je qee toodu odogina. Age je gauc mamadeig dana cajaca agena cisdoc faninduadegina. Dana mati eundec age dewenega cagu qoc sihulnadec. 11 Age je madecnana ege wawige meleec dana leih aidagailca talaculunugail gami cunug agena wawaga meleec eu besiadegina. Age je madec i cain iwaladowain. Odocob age je i iwaladecna meen qaig ogina eu age majanagaca. Eunu hina agena je eu cahacadegan. 12 Dana eundec agedodoc oso, uqaha Krit dana, uqa agenagul je hahun madec dana oso, uqa maden, “Krit nuidec age gaid uhulec dana, age dool cus me qee. Odocob age sab geh bahic jimeig gaid alal adena,” en. 13 Je madec eu mele bahic. Eunu hina dana eundec age uhulec je iwaladegina, age wawaga meleec me caligiannu age cain iwaladowain ec ulauladaga. 14 Odocob age haun Juda agena dodo gaucca, loo je eu dana mele je hibemdoin eu conoganadecca qee dah mowain.
15 Dana age cataniec bilegina eu agenu ceteteh cunug cataniec bilia. Euqa dana agena cisdoc wawaga eu gegehinca, age wawaga qee meleena eu agenu ceteh oso cataniec qee bilel. Agena cisdoc silecca, agena wawagaca eu wele gegehin qon eunu. 16 Age madi, ege Anutnu doqona, egina qa agena odoc age Anutnu qee dogina ec madena. Anut uqa agena odoc sagagdona, age Anutna je qee toodu odogina. Age odoc me oso odocnu ihoc qee.