JONONE PEPÁ YOPOKO TOPA SIRIMU BOKUMA
Jonone Topa Sirimu Pepámanga Ungu-Pulu Mare
I pepá yopoko topa sirimu yemonga imbimu pepá senga naa molemo, aku-na-kolo ‘Semane peangamo kinia i pepá yopoko kinia Jonone sika torumu.’ ningu pilielemele. Akumunga pulumu i-sipa: U i boku ambolkonomonga yakondo boku JONO semane peangamonga ungu- pulumu gomo 424 kanani. Pe semanemo kinia ya pepá yopoko kinia anju yando ungu mare selu-sipa mele i-siku mimi siku kanani:
Semanemo........... Jono Kumbi-Lepamo...Talo-Sipamo..... Yopoko-Sipamo
1:1,14 ...........................1:1
1:14,18, 3:16 ...............4:9
3:19-21 .........................1:6-7
3:36 ...............................5:12
5:24 ...............................3:14
5:32,37 ..........................5:9
8:44 ...............................3:8
8:47 ...............................4:6
13:34-35 .......................2:7.................................5
14:23 ............................5:3..................................6
15:11, 16:24 ................1:4 ...............................12
......................................4:2-3 ..............................7
.............................................................................1 ...........................1
.............................................................................4 ...........................4
Jono Kumbi-Lepamo kinia Jono Talo-Sipamo -tolo pepá topa sirimumunga ungu-pulumu i-sipa:
Ye mare andoko Karasinga yomboma mane siku ninguli: “Kangimu méle kiri akumunga kangimuni ulu peanga se paa manda naa semolo. Ulu peanga se selemolo kinia aku ulumu ulu kirila. Akumunga, ulu peangama selemolo molo ulu kirima selemolo aku uluma pali kiri. Minimu mindi peanga. Pulu Yemo yu minimu akumunga yu peanga. Yesusi yu Pulu Yemo molopale paa sika mana-kangi senga naa orumu. Yu Pulu Yemo molopili yu ye peanga. Sika mana-ye se molkanje ye kiri se molka akumunga yu sika mana-ye se au naa lierimu.” niringi. “Molo sika mana-yombo kangi senga omba molorumu liemu kangina sukundu molorumu yombomo lupa, yu lupala. Kangimu kinia minimu kinia yombo selumu mólo.” niringi. “Ono i-sipa i-sipa pilipa kondoli mare kuru mondongi liemu molko kondonge aulkana pungí.” niringi. Pe Karasinga yombo marene kanu unguma pilku likuli ‘Pilipa kondoli awisili konopuna pepili.’ ningu konopumuni pilingindu kála seko molko, kangimane paa ulu kirima mindi seko moloringi. Jonone onondo nimbale: “Kanu ye kolo toko simbulu tolina molemele yomboma ononga talapena ono-kinia paa naa molangi, toko makorangi.” nimba sika sumbi siku molko, molko kondonge aulkana pungí mele ungu mare kelepa mane sirimu.
‘Jono ye-andamo molopa Epesasi taono molopale, Epesasi taono lierimu kolea Esia poropinji koleamanga Karasinga yombo talapema i pepámo topa sirimu.’ ningu pilielemele.
Ya ungu-pulumu pora nikimu.
JONO KUMBI-LEPAMO
JONOne KUMBI-LEPA Pepá Topa Sirimu Bokumu
Jonone I Pepá Topa Sirimumunga Ungu-Pulu Mare
Ungu-pulu mare inia yakondo nondopa gomo 1179 molemomo paa kanani.
Ungu paa tondolo se 1:5—2:2 molopa, se 3:1-2, se 5:11-12 molemo.
Ungu-pulu mare boku ambolkonomonga pealemekondo “24. laip”, “31.3. pikinini bilong God”, “32.2. Pikinini Bilong God”, “42.4. wanpela samting nogut” molemo.
Ya ungu-pulumu pora nikimu.
1
1:1—3:10
Olio Pa Selina Andopo Molopo, ‘Simbulu Tolina Molemele Yombomane Olio Kondi Naa Tangi.’ Nimbu Molamili Ungu Se
1:1-4
“Konde Molopa Kondoli Ungu Akumu Yesusi.” Nirimu Ungumu
1 Konde molopa kondoli ulu-pulumu-kinia molemo yemo ono nimbu siemili. Yu u-pulu-pulu molorumu yemo; yu olio pilierimulu yemo; yu mongone kanorumulu yemo; yu neme-neme nimbu kanorumulu yemo; yu kini ambolorumulu yemo; akumu Pulu Yemonga Ungu Yesusindu nikimulu. 2 Konde molopa kondoli ulu-pulu kanumu wendo omba mona molorumu, olione yu kanopole paa sika kanorumulu mele nimbu sikimulu. Molopa mindi puli ulu-pulumu Lapa kinia molopale olio molorumuluna omba mona molorumu kanorumulu mele ono nimbu sikimulu. 3 Ono olio kinia pea kopu sepo molamili.’ nimbu olione kanopo pilierimulu mele ono kepe nimbu sikimulu. Kopu sepo molemolomonga pulu kanumu i-sipa: Olio Lapa kinia yunga Malo Yesusi Karasi kinia pea kopu sepo molemolo akumu. 4 Ono pea olio konopu kamu siemili.’ nimbu i ungumu nimbu pepána tokomolo.
1:5-10
“Pa Sélina Andopo Molamili.” Nirimu Ungumu
5 Pulu Yemonga Malone olio nimba sirimu ungumu ono nimbu sikimulu akumu i-sipa: Pulu Yemo pa sélimu. Yu-kinia simbulu toli se paa naa pelemo. Ulu-pulu-kiri se kepe kalaro se kepe yu-kinia naa pepa, yu ye pilipa kondoli pepa kake sepa molopa kondoli yemo. 6 Olio ‘Pulu Yemo yu-kinia manda kopu sepo molemolo.’ nimbuli simbulu tolina andopo molomulu liemu kolo topo, “Selemolo.” nilimulu mele naa selemolo. 7 Aku-sipa na-kolo yu pa selina molemo mele olio pa selina andopo molomulu liemu olionga genupili kinia manda kopu sepo molemolo kinia yunga Malone yunga meme olionga nimba ondondorumumuni olio ulu-pulu-kiri selemolo konopuna pelemoma pali kulu tondolemo.
8 Olione nimbuli: “Ulu-pulu-kirima naa selemolo, se naa pelemo.” nímulu liemu kolo tolemolo, ungu sikama olio-kinia naa pelemo. 9 Aku-sipa na-kolo ulu-pulu-kiri selemolo semoloma nimbu para símulu liemu Sumbi Sipa Selemo Pulu Yemone “Sembó.” nimba panjerimu mele pilipale sembando olionga ulu-pulu-kirima nimbu para simulúma ‘Mania pupili.’ nimba siye kolopa, olionga konopuna kalaro mele molemo molombama kanopale ‘Kelepa kake sepili.’ nimba kulumiye tondolemo tondomba. 10 Aku-sipa na-kolo olione nimbuli: “Olione ulu-pulu-kiri se paa naa selemolo, paa naa serimulu.” nímulu liemu aku ungu nilimulumuni “Pulu Yemo yu kolo toli yemo.” nilimulu, yunga ungumu olio-kinia naa pelemo.