PULU YEMONGA BOKUNA IMBI MOLEMO MARENGA UNGU-PULUMA
1. aposel
I ungumu Giriki-ungumu, akumu kongono-imbi mele. Akumunga ungu-pulumu “lipa mundolimu”. Akumu i-sipa mele: Papua Nu Gini gapomanomone ye molo ambo se nimba taltopa, Asitaralliya molo Amerika molo Japane lipa mundupa nimbale: “Nu akuna pungu olionga keremo nindiku, olionga kongonomo sendeko, molani pu.” nilimili yombo akumu “yombo aposollo” mele.
Yesusi u ye mare nimba taltopale “Na lombili waa.” nirimu ye akuma “lombili andoli yema” nilimulu. (Akumunga pulumu inia anju-kundu 10. disaipel molemo.) Pe Yesusini kanu yemando nimbale: “Nanga kongonomo sendangi pangi.” nimba lipa mundorumu kinia ono Giriki-unguna imbi leko “aposolloma” niringi. Akumunga i Pulu Yemonga bokuna Kewa-unguna naa topo, Umbu-Unguna kanu kongono-imbimu lemolondo ‘Yesusini “Nanga kongonomo sende-paa.” nimba lipa mundorumu yema’ nimbu bokuna torumulu molemo.
Ono pali Yesusi kanokole yu pea andoringi yema (LLuku 6:12-16, Lipa Mundorumu Yema 1:12-26). U ye engaki rurepo moloringi. (Akumu Kewa-unguna “tuwellepo” kanumu.) Pe Pollo yu Yesusini nimba taltopa “Nanga kongonomo sende-pu.” nimba lipa mundorumu ye se molorumula. Juda yombo naa moloringi ultukundu yomboma moloringina ‘Ungumu piliangi.’ nimba lipa mundorumu (Lipa Mundorumu Yema 9:15, 26:17-18, Romo 11:13, U-Korini 9:1-2). Ungu mare Romo 1:1, U-Korini 1:1, Pe-Korini 1:1, Gallesia 1:1, Epesasi 1:1 molemo. Banapas akula niringi (Lipa Mundorumu Yema 13:2-3, 14:14).
Aku imbimunga ungu mare U-Korini 12:28-29, Epesasi 2:20, 4:11, Lipa Ora Sirimu 21:14. Yesusi yu kepe “aposollo ” se, yu Pulu Yemone “Nanga kongonomo sende-pu.” nimba lipa mundorumu yemo (Ipuru 3:1).
2. arapela lain
Pisini-unguna “ol arapela lain” kinia “ol manmeri bilong ol arapela lain” kinia inia anjukundu 15. haiden kinia, aku unguma wale awisili Giriki-ungu selumu, aku Giriki-ungumunga pulumu “ol arapela lain”, Umbu-Unguna “yombo talape lupa lupama” molo “koleamanga lupa lupa yomboma”. Aku-sipa na-kolo Juda yombomane i ungumu niringi akumu Juda yomboma naa moloringi yombo-lupama ndo niringi. “ultukundu yomboma” molo “Kewa yomboma” ninguli aku siku niringi. ‘Ono onono Pulu Yemonga yomboma, yombo paa peangama. Yombo talape lupama yombo kirima, yombo ulu-pulu-kiri selima.’ ningu pilkuli aku siku niringi. “arapela lain” nimba molemo ungu mare Umbu-Unguna Mateyu 4:15, 12:18,21, 20:19,25, Lipa Mundorumu Yema 4:25, 9:15, 13:44-48, 14:1,2,5 15:3,5, mare awisili pea, Pe-Korini 11:26, Romo 1:13, 2:14,24, 9:24, Gallesia 1:16, 2:2,8,9,12, 3:8, Epesasi 3:1 molemo.
Juda yombomane pilkuli, ‘Yombo-lupama kalaro mololi yomboma .’ ningu pilieringi-na-kolo Pulu Yemone “Mólo.” nirimu (Lipa Mundorumu Yema 10:14,19,29,34-35, 11:5). Pollo yombo-lupama Pulu Yemonga ungumu nimba sirimumu kanoko kirila pilieringi (Lipa Mundorumu Yema 22:21-22). Karasinga Juda yombomane Karasinga yombo-lupama umbuna singí seringimunga ungumu Lipa Mundorumu Yema 15:1-31 molemo. Gallesia 2:11-21 kananila.
Wale mare “arapela lain” bokuna molemo akumunga ungu se inia anjukundu 14. Grik molemo mele kananila.
3. baim bek
Ingillisi-unguna “ransom” .
Yesusini olionga nimba senderimumunga ungu tondolo talo molemo, se “baim bek”, se “kisim bek” . Aku-sipa na-kolo Giriki-unguna pondeanga selu-sipala. ‘Yesusini olionga nimba senderimu mele paa piliambo.’ ninguli Pulu Yemonga bokuna i ungu talo pea mimi siku kanoko piliayo. Pisini Baipelena kinia Umbu-Unguna kinia kanokole U-Timoti 2:6 (“baim bek”) molopa, Taitasi 2:14 (“kisim bek”) molemo mele mimi siku kanani. Giriki-unguna pondeanga selu-sipamo. U-Pita 1:18-19 (“baim bek”) akumunga Giriki-ungumu kinia Taitasi 2:14 kinia (“kisim bek”) paa nondopa selu-sipa mele.
Giriki-ungumunga ungu-pulumu Pisini-unguna “lusim”. Umbu-Unguna “ ‘Wendo pupili.’ ningu liku ultu mundulimili”, molo “ ‘Wendo pupili.’ ningu kuna llokomo wendo limilinje”. Gallesia 3:13 (“kisim bek”) kinia 4:5 (“baim bek”) kinia Giriki-ungumu selu-sipamola, aku-na-kolo akumunga pulumu “baim na lusim” .
U i-siku mele seringi: Yombo sene Yombo se ‘Yunga kongonomo sendepili.’ nimba topo topa lipa yunga ulkana memba ombale, kou- mone se naa sipa méle naa kalopa, ka-kongono mele serimu. Kanu kendemande-yombomo ultu pumbá aulka se paa naa lierimu. Kamu alieli-alieli kanu yemonga kongono sendeli kendemande-yombomo mindi molorumu. Yuyu ultu pumba kowa pulkanje nokoli yemone kelepa lipale ‘Paa mindili nopili.’ nilka. Pe yombo sene kanu kendemande-yombomo kála sepa kongono sendepa manda naa molorumu mele kanopa kondo kolopa ‘Wendo omba pumba we molopili.’ nimbale, kendemande-yombomonga ye nokolimu kou- mone molo mélse sirimu kinia ye nokólimuni ‘Kendemande-yombomo we omba pupili.’ nimba ultu lipa mundorumu. Kendemande-yombomo kelepa yando limba aulka se mólo. Yombo sene yunga wendo pumbá aulkamo topo topa liltimumunga yu ultu ombale kamu manda we molorumu. “baim na lusim” akumunga ungu-pulumu aku sipa mele.
kisim bek akumunga ungu-pulu se inia anjukundu 21. molemo-na-kolo Ingillisi-unguna kinia Pisini-unguna kinia apuruku boku tongendo pereko topele-mapele toko tolemele. Ingillisi-unguna we-yombomane “ransom” nilimili akumunga pulumu i-sipa: Ye marene yombo se wa liku mengo pungu lopi seko mondokole, ungu se yando ningu munduku, “Ono kou paip anderete tausini kina siku mundungí kinia i yombomo ‘We pupili.’ nimbu ungu se naa semolo. Molo “Naa simulú.” níngi liemu yu topo kondomolo.” ningí. Aku selemele kinia kou-monemondo Ingillisi-unguna “ransom” nilimili. Kou-monema kinia, wa liku mondolemele yombomonga konde mololi ulu- pulumu kinia, selu-sipa mele none selemo. Kou-monema anju siku mundungí kinia kolali seko likuli “Yombomo we pupili.” ningu yando siku mundulimili. Molo kou-monema kolali seko naa síngi liemu yombomo sika toko kondongenje. Pundu mele tolemele-na-kolo paa sika pundu mólo.
Pulu Yemonga bokuna aku sipa melela. Aku-na-kolo “Yombomo topo topa lipa wendo liltimu” mele Umbu-Unguna naa nilimolá. Mélema sitoana topo toko limili. Akumunga Mateyu 20:28, Mako 10:45 akuna Yesusini olionga nimba senderimu akumu Umbu-Unguna “baim bek” nimulúndu ungu sumbi nili se naa pilierimulu. Akumunga Mateyu 20:28 i-sipu mele molemo: Yesusini nimbale: “Mania Omba Mana-Ye Au Lierimu Yemone ‘Ulu-pulu-kirimane yomboma kelepa ka sipa nokolemo mele naa sepili, manda molangi kene na yombo awisilinga nimbu pundu tondopo nanga kangimu sipu, ononga kolali sepo kolondambo.’ nimba orumu.” nirimu. U-Timoti 2:6 paa selu-sipamo. LLuku 21:28 (“kisim bek”), Ipuru 9:12,15 (“baim bek”). Romo 8:23, U-Korini 1:30, Epesasi 1:7,14, 4:30, Kollosi 1:14, U-Pita 1:18-19, Kambu Toringi 18:16 kananila. Lipa Ora Sirimu 5:9, 14:3,4 Giriki-unguna “yunga mememone topo topa liltimu” mele, akumu Pisini-unguna “baim bek” molemo. Umbu-Unguna “topo topa liltimu” nilimolá-na-kolo pilku sundulimolánje? Ingillisi-unguna mare “purchase” molopa, mare “redeem” molemo. Lipa Ora Sirimu 5:9 kinia 14:4tolo Giriki-unguna sika “ ‘Pulu Yemonga molangi.’ nimba mememone topo topa liltimu.” molo “Pulu Yemo simbando topo topa liltimu.” mele nimbu tolemolá.
4. Belsebul
Pisini Baipelena aku sipa molemo, Pisini-ungu Nupella Testamen umunga “Bielsebul” molemo. Akumu Setenenga imbi se. Imbimunga pulumu ‘kurumanga nokoli awilimu’ (Mako 3:22-23). Juda ye awilimane Yesusi-kinia konopu kiri panjiku yundu “Nu Belsipuli.” niringi (Mateyu 10:25, 12:22-28, 9:32-34, LLuku 11:14-22). Mateyu 12:28 kinia Mako 3:28-30 kinia paa kanani. Ungu-pulu se Lluku 11:18 molemóla.
5. bikman
“bikman” kinia “bikpela” kinia kanga-kolte lupa lupa. Yesusindu “Bikman” niringi Umbu-Unguna “Ye Nokolimu” molemo. “Nokoli Yemo” manda nilimolála. Pisini-unguna “Bos” molo “Bosman” nilimilila. Kanu yema yomboma nokongendo namba molemo mele. ‘Yomboma yunga kongono kendemande yema.’ ningu pilkuli Yesusindu “Bikman” niringinje. Boku LLuku mindi molemo (5:5, 8:24,45, 9:33,49, 17:13). (Ingillisi-unguna “master” .)
6. bikpela
“bikpela” kinia “bikman” kinia kanga-kolte selu-sipa. Yesusindu “Bikpela” niringi, akumu ‘Yu ononga imbi mololi yemo. Ono mania, yu ola.’ ningu yu aku siku niringi mele. Imbi talo pea Umbu-Unguna “Ye Nokolimu” nilimolá-na-kolo “Bikpela” Pisini-unguna lombili pungu manda manjiku “Ye-Awilimu” niringi mele pilipuli bokuna torumulu molemo. Ingillisi-unguna wale awisili “Lord” molopa (Mateyu 7:21, 8:25, 15:22, Mako 5:19, LLuku 5:8, 6:46, Jono 6:68, Lipa Mundorumu Yema 2:36, Romo 1:3), wale mare “Master” molemo (Mateyu 6:24, Mako 13:35, LLuku 14:21, Romo 14:4). Wale mare “Ye-Awilimu” nilimú kinia Pulu Ye Yawendo nilimú (Mateyu 1:20-24, Mako 12:11,29-30, LLuku 1:6,9,11, 19:38, Lipa Mundorumu Yema 2:34, Ipuru 7:21, 8:8-11).
7. bikpris
(Inia anjukundu 34. pris 34.2. kanani.)
8. bilip
Akumunga ungu-pulumu nambolkaye? Mimi siku naa pilkuli, yomboma mane siku Kewa-unguna nilimili mele manda manjiku “bilip sangi.” nilimili akumu manda naa sekemo. Ungu-pulumu mimi siku pilkuli yomboma Umbu-Ungu mindi leko ningu silimolánje papu. “bilip” akumunga pulumu i-sipa mele:
Se Kango se unjuna ola molomba kinia lapane nimbale: “Nu po ningu mania oni kinia nu naa topili kangulupu limbu.” nimbá kinia kangomone ‘Sika nikimu.’ nimba kuru mondopale mini-wale naa mundupa walu po nimba mania ombá. Aku sembá kangomone “bilip” sepa aku sembá.
Se Yombo sene nimbale: “Opali ye nokoli poraminisamo ombá kene ya maku tamili wangi.” nimbá kinia “Sika nikimu.” ningu pilkuli yu ombá kanongendo pungu maku toko nokoko molonge. “Bilip” sekole aku siku senge.
Se Yombo sene Pulu Yemonga Bokuna kanomba kinia ‘ ‘Nu mindili naa nani.’ nimba Yesusi nunga nimba kolali sepa kolondorumu.’ nimba bokuna molomba kanopale, ‘Sika aku serimu.’ nimba kuru mondopale yu konopu pe nipili ‘Kolea-kirina pumbu mindili naa nombo.’ nimba pilimba molo kuru mondomba.
Akumunga, Kewa-unguna “bilip” Umbu-Unguna topele topo bokuna tomolondo walu naa torumulu. Ungu-pulumu mimi sipu pilipuli topele topo bokuna torumulu. Wale mare “ ‘Sika.’ ningu kuru mondoringi.” torumulu-na-kolo wale mare “Sika.” mindi we molomba kinia pilku sundungí kinia ungu-pulu se torumulu molemo. Jono 3:16 “manmeri i save bilip long en” akuna “long en” akumunga pulumu nambolkanje? “long” akumu paa ungu-pulu se pelemola. I-sipa melenje: “ ‘Yu Pulu Yemone sika lipa mundorumu yemo. Sika olio lipa tapondopa mindili nolemolá aulkana wendo limba yemo.’ ningu kuru mondonge yomboma”, aku sipa mele. Jono 11:27 kinia 20:31 kuru mondomolo-monga ungu-pulu tondolo se molemo. Akumunga, wale mare “bilip” topele topo bokuna tomolondo ungu-pulumu mimi sipu pilipuli bokuna torumulu molemo.
Giriki-unguna kinia Ingillisi-unguna kinia ungu talo “believe” kinia “faith” kinia molemo. Aku ungu talonga ungu-pulumu Umbu-Unguna nimulúndu manda mólo. Giriki-unguna imbi talo paa nondopa selu-sipa mele, aku-na-kolo “believe” akumu ulu se selemolo; “faith” akumu mélsenga imbimu. “faith” konopuna pelemo kinia manda “believe” selemolo. Aku-na-kolo Pisini-unguna kinia Umbu-Unguna kinia ungu selumu mindi bokuna toringi molemo.
Ingillisi-unguna “believe” ungu mare: Mateyu 8:13, 9:28, 27:42, Mako 5:36, 9:23,24, LLuku 1:20, Jono 1:7,12,50, 3:12,15,16,18,36, 4:39,41,42, 6:29-47, 12:44-46, 20:8,25,27-31, Lipa Mundorumu Yema 5:14, 9:42, 16:31, 17:12, 18:8, Romo 1:16, 3:22, 10:9-11, U-Timoti 4:12, Pe-Timoti 1:12.
Ingillisi-unguna “faith” ungu mare: Mateyu 8:10, 14:31, 21:21, Mako 2:5, 5:34, LLuku 7:50, 18:42, Lipa Mundorumu Yema 3:16, Gallesia 2:16 wale talo, 2:20, 3:wale awisili, U-Timoti 1:4,5,14,19, 2:15, Ipuru 10:22,38, 11:pali.
9. devil
I ungumu Giriki-unguna kinia Ingillisi-unguna kinia molemo. Akumu Setene nga ungu-pulu se pelemo imbi se (Mateyu 4:8-11). Inia anjukundu 42. Seten kananila. “Devil” akumunga ungu-pulumu “kote kolo topa sendélimu” kinia “ungu bulkundu nindelimu” kinia. Yu Pulu Yemonga kumbikerena yombomanga kolo topa kondi tolemo yemo. Jopo 1:6-12 kanani. Akuna “Setene” nimba molemo.
Ingillisi-unguna “devil” ya molemo lupa, Pisini-unguna “tewel” akumu Umbu-Unguna “mini”, akumu paa lupa. “Devil” akumu Umbu-Unguna“depele” molemo. Pisini Baipelena “devil” naa toringi, naa molemo. “Satan” mindi toringi molemo. Lipa Ora Sirimu 12:9 mindi ungu-pulumu tongendo Pisini Baipelena “Man I Save Kotim Olgeta Manmeri” toringi molemo.
Giriki-unguna kinia Umbu-Unguna kinia Mateyu 4:3 “kondi tólimu” molopa, Mateyu 4:5,8, LLuku 4:2,3,5,6,13 “depelemo” molopa, Mateyu 4:10, LLuku 4:8 “Setene” molemo. Kurumanga nokoli “depelemo” yu molemo mele Jono 8:44, Pe-Korini 11:14, U-Pita 5:8, Jono Kumbi-Lepamo 3:8 molemo. Lipa Ora Sirimu 12:9,10, 20:2, U-Pulu-Pulu 3:1,2,14, Mateyu 25:41, Lipa Ora Sirimu 20:10 kananila.
Yu ma-koleamonga ye-nokoli kingimu Mateyu 4:8-9, Jono 12:31, 14:30, 16:11, Pe-Korini 4:4, Epesasi 2:2, Jono Kumbi-Lepamo 5:19), aku-na-kolo yunga tondolomo mania, Pulu Yemonga tondolomo olandopa mele nilimú ungu mare pea Mateyu 4:8-11, Epesasi 6:11, Ipuru 2:14, Jemisi 4:7, Jono Kumbi-Lepamo 3:8, 4:4 molemo. Pe-Timoti 3:3 kinia Taitasi 2:3 kinia Giriki-unguna paa selu-sipa mele molemo-na-kolo akuna Pollone depele mondo naa nirimu, we-yombomando nirimu pilkuli Pisini-unguna kinia Ingillisi-unguna kinia ungu-pulumu topele toko bokuna toringi.
Ingillisi-ungu pilku imbi kanolemele yombomando i-sipu nikimulula: Giriki-unguna “dimon” akumu “kuru” mindi, aku-na-kolo wale mare Ingillisi-unguna lawa seko “devil” toringi molemo. “devil” paa selumu mindi molemo, akumu Setene. Pulu Yemone kurumanga nokoli “depelemo” kinia kuruma pali sepe nomba mindi pelemo pembamonga ‘mindili nongo molko mindi pangi.’ nimba sepa mimi sepa kalorumu akuna Karasinga yombo naa molko ultu molemele yomboma lipa mundumbala (Mateyu 25:41). Akuna kurumando “angelloma” nimba molemo. Pe-Pita 2:4 kepe. Kanu angelloma kepe depelemo yu kepe u mulu-koleana angelloma moloringi ungu talo LLuku 10:18, Lipa Ora Sirimu 12:7-12 molemo. Aisaya 14:12-15 yundu nirimulanje.
10. disaipel
Giriki-ungumunga ungu-pulumu “mane sili ye se lombili pungu unguma pilielemele yomboma” (Mateyu 10:24,25). Pisini-unguna u kumbi leko toringina ya “skulboi” molopa, pe toringimunga “sumatin” molemo. (Yesusinga semane peangamo molemo bokumanga Giriki-ungumundu Ingillisi-unguna wale awisili “disciple” molopa, wale mare “student” molopa, “pupil” molemo.) Kewa anjukundu Imbo-Unguna “yunga ki-sipi kanoli yema” nilimili, akumu peangala. Akumu Ingillisi-unguna “aperendisi (apprentice)” mele. “Yesusi lombili andoko yuni serimu mele wamoko kanoringi yema” nilimolá-lanje.
Umbu-Unguna “Yesusinga lombili andoli yema” bokuna torumulu molemo akumunga pulumu Mateyu 4:18-22 molemo. Wale mare bokuna “lombili andolima” nimba molemo kinia ye rurepondo nilimú. Aku-na-kolo yombo mare pea yu paa alieli lombili pungu yunga ungumu pilku liltingila, akumando wale mare bokuna“lombili andolima” molo “lombili andoli yomboma” nimba molemóla. Mare amboma (Lipa Mundorumu Yema 1:14, LLuku 23:49, 8:1-3). We-yomboma yuni uluma sepa unguma nirimu mele ‘Kanamili. Piliamili.’ ningu yu wale marenga lombili puringila, na-kolo we mele, kamu mólo (Mateyu 4:25, Jono 6:60,61,66-69). No Lindeli Jononga lombili andolimanga ungu talo Mateyu 9:14, 11:2 molopa (Yesusinga lombili andolima 11:1 kanumu), Parisimanga lombili andolima Mateyu 22:16 molopa, Mosisinga lombili andolima Jono 9:28 molemo. Olio pali Yesusinga lombili andolima molemolo mele Jono 8:31 molemo. Aku-na-kolo Yesusini nimbale: “Na we lombili naa wangi.” nirimu (LLuku 12:49-53, 14:25-27,33, Mateyu 10:17-18,21-25,32-33,34-39). Yesusinga lombili andoli ye rurepo nga imbima Mateyu 10:1-5a molemo.
11. Farisi-“na Sadyusi” (Mateyu 16:1) (Inia anjukundu 38. Sadyusi kananila.)
Yesusi mana molorumu kinia Parisi yema kinia Sadusi yema kinia Pulu Yemonga ungu-manema nokoringi ye talape talo moloringi. Onone pali Pulu Yemonga ungu-manema pilku sengena panjiku sengendo kála- seko seko moloringi-na-kolo yombomane ‘kangikundu mindi kanangi.’ ningu aku seringi. Konopumanga sukundu ono ye sumbi nilima naa moloringi-na-kolo ‘Ye sumbi nilima molemolo. We-yomboma seko kinjeli yomboma molemele.’ ningu we-yomboma kinia seluna kopu seko naa moloringi. We-yomboma kanoko kiri pilku ono onono aku-siku konopu talo pepa topele-mapele toli yema moloringimunga No Lindeli Jono kinia Yesusi kinia olone kanu yema iri toko “Kolo toli kongi-ka-wambiyemonga waloma molemele.” niringili (Mateyu 3:7 (Parisima kinia Sadusima kinia), 12:34, 23:33). Onone “Yombo ulu-pulu-kiri selima” niringi yomboma Yesusi kanu yomboma-kinia molopa ga norumu-kulu kanokole ‘Yesusi yu kepe ye kirimu.’ ningu pilieringi (Mateyu 9:9-13, LLuku 7:36-50, 18:9-15).
Yesusi-kinia konopu kiri panjiku ‘Yu nimba kinjimba kinia ‘Yu mongo likimu kene pundu topa umbuna mepili.’ nimulú.’ ningu yu alieli-alieli ungu mare mangilieringi mele ungu-pulu se Mateyu 16:1 molemo. Yesusindu “Nu sika Pulu Yemonga Malo molenonje kanamili liku ora si.” niringi ungu mare Jono 2:11 molemo. Yesusini ono kanopa kiri pilipa, wale awisili ono iri torumu. Iri torumu mele ungu se seluna mindi kanoni liemu yuni “Ono topele-mapele toli yema.” nirimu mele Mateyu 23:1-36 molemo kanani. Se LLuku 11:37-54. Topele-mapele tolimunga ungu-pulumu inia anjukundu 47. tupela maus molemo.
Parisima ne Pulu Yemonga ungu-manemanga ungu-mane awisili olandopa olandopa ono onono pilku ningu panjeringila. ‘Parisima kinia Sadusima kinia onone seko kinjilimili mele paa aku siku naa sangi.’ nimbando Yesusini ungu-iku topa “Kanu yemanga pellawana mundulimili méle isi akumu paa naa liengi.” nirimu (Mateyu 16:6,11-12). Inia anjukundu 49. yis kananila. Onone Mosisini Pulu Yemonga ungu-mane sirimuma paa kála-seko pilku seringi-na-kolo yomboma konopu naa mondoringi. ‘Yesusi Pulu Yemone mana naa lipa mundorumu.’ ningu yu toko kondoringila. Ungu mare Mateyu 21:28-32, LLuku 5:27-31, 7:29-30,33-35,36-50, 18:9-14, Jono 8:1-11, Mateyu 21:33-46, 22:1-14,15-22,34-40,41-46.
Ono Juda yombomanga tapu-yema moloringi (Mateyu 21:23,45). Mare Juda yombomanga kanjollo yema moloringi (Lipa Mundorumu Yema 5:34).
Nikodimasi yu Parisi yemo molopa, konopu topele topa ‘Yesusi sika.’ nimba kuru mondorumu ungu mare Jono 3:1, 7:50-51, 19:39 molemo.
Pollo yu Parisi yemola. U yu we-ye Parisi se molopale, ‘Yesusinga ungumu sika.’ ningu kuru mondoringi yomboma torumu (Lipa Mundorumu Yema 8:1,3, 9:1-2, 23:6, 26:5), aku-na-kolo pe Parisi yemane pilku seringi mele yu mundupa kelierimu (Pillipai 3:5-11).
Parisima kinia Sarusima lupa lupa ningu pilku kuru mondoringi mele ungu se Lipa Mundorumu Yema 23:6-10 molemo.
12. Giaman, “man bilong giaman
(Inia anjukundu 47. tupela maus kanani.)
13. God, god giaman
“God” akumu yombo senga sika imbimu mólo. Akumu yunga kongono mele, molo yu molemo mele imbimu. “poraminisa” molo “peremia” nilimulu akumu yombo senga imbi mólola. Yunga kongonomo. Aku-na-kolo pe yu yuyula imbi lepo “Poraminisa” molo “Peremia” nilimulu. Ungu “god” aku sipa melela. Aku ungumunga pulumu i-sipa mele: ‘Yombo sene molo mélsene olio mana-yomboma kinia mélema pali nokolemo yombomo.’ nimbu pilipuli, yu popo topo mélema kalopo silimulu yombomo. Yombo talape lupa lupamane “god” lupa lupala nilimili. Marene “Enamo olionga god” nilimili; marene “Olimu olionga god” nilimili; marene “Opa selemolo kinia god sene olio lipa tapondolemo” nilimili; marene “god sene kaliama nokolemo” nilimili. Marene “Olionga ye nomi kingimu olionga god .” nilimili. Paa awisili. Awisili “ye” ningu, mare “ambo” niringi (Wendo Oringi 32, Josua 24:2,14-18,23-24, Nokoli Yema 16:23-30, U-Samuele 5:1-5, U-Kingima 18:16-40, Jeremaya 2:11, Konane 115, Lipa Mundorumu Yema 19:23-28). ‘Olio nokolemo pulu yemo .’ molo ‘Olio nokolemo pulu ambomo .’ ningu yombo molo kongi méle mare toko kondoko popo toko siringi. Umbu-yombomane kurumando ‘Olio nokolemele.’ ningu popo toko koyoringimunga ungu se U-Korini 10:14-22 molemo. U-Korini 8:1-13, Lipa Mundorumu Yema 19:23-28,35-37 kananila.
Aku-na-kolo olione “God sikamo yuni mélema pali sepa wamopa, yomboma kinia mélema pali nokolemo. Naa nokolkanje naa lelka.” nimbuli ‘Yu mélemanga pali pulu yemo .’ nimbu yu imbi lepo “Pulu Yemo” nilimulu (Jono 1:1-4, Lipa Mundorumu Yema 14:8-17, 17:16-31). Yombo marene yundu “Ola Yemo” nilimili mandala. Miti yombomane nomuna yombomanga imbi se mengo ongole “Anutu” niringi nilimili. Ye selumu.
Kanu Pulu Yemo yunga sika imbi nawe? Yu uluma selemo mele pilkuli yunga imbi lupa lupa lemele, aku-na-kolo se sika yunga imbimu “Yawe”. Akumunga pulumu Wendo Oringi 3:14-15 molemo (Pisini Baipelena ungu-pulumu molemo).
14. Grik
Romo-yombomane koleamanga pali opa selko andoko yomboma toko mania munduku gapomano molko yomboma naa nokangi u Giriki-yombomane aku seringi. Giriki-yombomanga ye Allekesanda yu paa opa tondolo mundupa seli yemo, yuni koleamanga pali yunga ele-yema memba andopa koleama topa kalopa mundupa nokorumu. Kanu-kinia, ya Papua Nu Gini u Kewa-yomboma gapomano moloringi kinia Pisini-ungu kinia Ingillisi-ungu kinia anju anju purumu kinia yombo awisili pilku lieringi mele, Allekisanda Giriki-gapomano ye awilimu molopili koleamanga pali Giriki-ungumu pilku lieringi (Jono 19:20, Lipa Mundorumu Yema 21:37). Pulu Yemonga Ungu Kondemo molemo bokuna (Nupella Tesamene) u-pulu-pulu Giriki-unguna toringi. Pe Romo-yomboma gapomano moloringi kinia koleamanga pali yombomane Giriki-ungu niringi. Yesusi mana andopa molorumu kinia aku siku niringila.
Pulu Yemonga bokuna wale mare Giriki ye molo Giriki yomboma nimba molemo kinia paa sika Giriki yombomando nirimunje, mimi sipu naa pilielemolo (Jono 12:20).
Aku-na-kolo ya umbu-yombomane ultukundu yombomando “Kewa-yomboma” nilimili mele aku sipa wale awisili Juda yombomane Juda yombo naa moloringi yombo-lupamando ungu-iku mele toko “Giriki-yomboma” niringi. Pisini-unguna wale mare “Grik” molopa, wale mare “arapela lain” molemo (Lipa Mundorumu Yema 11:19-20 14:1, 16:1,3, 17:4, 18:4, Romo 1:14,16, 2:9,10, 10:12, Gallesia 3:28, Kollosi 3:11). Wale mare Pisini-unguna “Nupela Testamen” u-pulu-pulu toringi kinia pe toringi kinia yandopa Boku Baipelena toringi lupa lupa. Akumu unguri mólo.
Inia yakondo 2. arapela lain nimba molemo aku sipa mele.
15. haiden
Pisini Baipelena i ungumu Mateyu 6:7,32, 18:17 molemo. Giriki-ungu selumunga Pisini-unguna ungu talo bokuna molopa, Ingillisi-unguna ungu yopoko molemo. Giriki-ungumunga ungu-pulumu inia yakondo 14. Grik, 2. arapela lain nimba molemo.
16. hetman
Kanu yemo yombo talape se nokolemo yemo. Akuma Umbu-Unguna “tapu-yema” nilimulu. Pulu Yemonga Ungu Konde Molemo Bokuna “tapu-yema” nimba molemo akumanga kongono talo pelemo.
16.1. Juda yombomanga ye nokolima, ono Juda yombomanga “kanjollo” sukundu moloringi ye mare (Mateyu 21:23, 26:3, LLuku 9:22, 22:66, Lipa Mundorumu Yema 4:5). Inia anjukundu 19. kaunsil kananila.
16.2. Karasinga yombo talape lupa lupama nokoringi yema (Lipa Mundorumu Yema 14:23, 20:17, U-Timoti 5:17). U-Timoti 3:1,2 Pisini-unguna “wasman” molemo, Ingillisi-unguna aku sipala, aku-na-kolo Umbu-Unguna ungu talo naa pelemomonga ‘Ungu-pulumu selumu. Kongono selumu.’ nimbu Umbu-Unguna “tapu-yema”-la torumulu molemo. Taitasi 1:5-7 kinia U-Timoti 3:1,2 kinia paa ungu selumu mele na-kolo Giriki-unguna Taitasi 1:5hetman” mele molopa, Taitasi 1:7wasman” mele molemo. Karasinga yombo talapema nokonge tapu-yema ningu ‘tapu-yema molangi.’ ningíndu kanoko apurungí mele ungu mare Lipa Mundorumu Yema 20:28-31, U-Timoti 3:1-7, Taitasi 1:5-9 molemo.
(Karasinga yombo talapemanga kongono sendenge yema, Kewa-unguna “diken” nilimulu, kanu yema aku sikula molonge mele ungu mare Lipa Mundorumu Yema 6:1-6, U-Timoti 3:8-13 molemo.)
17. hetpris
(Inia anjukundu 34. pris, 34.3. kanani.)
18. katim skin bilong pikinini man
U-pulu-pulu, Isirele yombomanga pulu-pulu anda-kolepa Eporayamo, yunga imbi Eporamo liepili, yu molorumuna Pulu Yemo omba yu sewi anjipa kamu alieli-alieli pulu lemba mele ungu se nimba, nimba panjipa mi lierimu. Eporamonga imbimu topele topa “Eporayamo” nimba imbi sipa, ‘Eporayamo kinia yuni kalopa limba yomboma kinia nane “Ono-kinia sembó.” nimbu, nimbu panjipu mi lierindu ungumu kamu pepa mindi pupili kene,’ nimba yundu “Kangomanga kangi se kopisangi.” nirimu. Aku semanemo kinia ungu-manemo U-Pulu-Pulu 17:pali molemo (17:10-12). Akumunga ungu mare U-Pulu-Pulu 34:14-17, Wendo Oringi 12:48, 4:24-26, LLipai 12:3 molemóla. Kanu ungu-manemo pilkuli Isirele yombomane yandopa- yandopa, kiniá kepe, kangomanga kangi se kopisilimili.
Kangi se kopiseringi mele i-sipa: Ombe punduna kangi se we gilimú akumu kopisiku makapu seko wendo liku toko eltoringi. Kanu ungu-manemo pilkuli No Lindeli Jono keme Yesusi keme Pollo keme kango kikima molangi aku sikula sekole imbi siringi (LLuku 1:59, 2:21, Pillipai 3:5). Kangoma kanoko liltingi kinia pe koro se omba pumba wale engaki sipamo wendo orumu kinia aku siku seringi. Wale engaki sipa akumu Sambate Walemo liemu kanu ulumu munduku naa kelko we seringila (Jono 7:22-23).
Isirele yombomane aku siku seringimunga ononga imbi leko “kangi kopisilimili yomboma” niringila. Isirele yombomane Isirele yombo naa moloringi yomboma konopu kiri panjikuli imbi kiri mele lengendo “kangi naa kopiseli yomboma” niringi. Aku mele ungu mare U-Pulu-Pulu 34:14, Nokoli Yema 14:3, 15:18, Lipa Mundorumu Yema 7:51, Romo 2:25,29, U-Korini 7:18,19, Gallesia 5:2-6 molemo. Gallesia 2:7,8, Pillipai 3:3, Kollosi 2:13, 3:11 akuna Giriki-unguna “kangi kopiselima” kinia “kangi naa kopiselima” nimba molemo-na-kolo Pisini-unguna kinia Umbu-Unguna kinia Ingillisi-unguna boku mare kinia ungu-pulumu sumbi sipa molemo. Gallesia 2:12, Kollosi 2:11 akuna Giriki-unguna molemo mele sumbi sipa molemo.
Isirele yombomando pe imbi talo leko “Juda yomboma” niringila kanumane pilkuli, ‘Olio ungu-manemo pilipuli kangomanga kangi se kopisilimulumunga Pulu Yemone olio yombo sumbi nilima nimba kanolemo.’ ningu pilieringi. Aku-na-kolo Pollone “Mólo!” nirimu. “Pulu Yemone kangimu kanopa yomboma naa apurulimú. Konopuna sukundu kanopa yomboma apurulimú.” nirimu (Romo 2:25-29, 3:20-30).
Juda ye mare ‘Yesusi Karasi sika.’ ningu kuru mondoko Karasinga yomboma molkole, i-siku mele niringi: “Juda yombo naa molemele yombo-lupama ‘Karasinga yomboma molamili. Pulu Yemone olio yombo sumbi nilima nimba kanopili.’ ningu i ungu-manemo pilku kangimu naa kopisengi liemu Karasinga sika-yomboma paa manda naa molonge.” niringi (Lipa Mundorumu Yema 11:1-4, 15:1,5, Gallesia 6:12-13). Aku-na-kolo Pollone nimbale: “Nikimili mele paa mólo! ‘Karasinga yomboma paa sika molamili.’ ninguli Karasini olionga nimba senderimu mele olandopa ungu-mane sene pilku liku seko molonge kinia paa seko kinjingí. Paa unguri manda naa sepa naa lipa tapondomba.” nirimu (U-Korini 7:19, Romo 4:9-12, Gallesia 6:15). Akumunga ungu-iku se Romo 2:29 molemo.
19. kaunsil
Juda yombomanga kanjollomonga ungu mare LLuku 9:22, 22:66, 23:50, Lipa Mundorumu Yema 4:5-6, 5:21,27,34, 22:30, 23:1-9,15,20,28 molemo. Romo gapomanomone Juda yomboma nokorumu, yunga ungu- manema olandopa na-kolo Juda yomboma onono ononga ungu-manema pilkuli seringila. Juda yomboma seringi mele kinia moloringi mele kinia ononga kanjollo yema ne nokoringi. Ye tere paono tene wane (71) kanjollo yema moloringi. Se Pulu Yemo popo tondoringi ye awili olandopamo, yu kanjollo yema nga nokorumu ye peresidenemo. Kanjollo sukundu Pulu Yemo popo tondoli ye awili mare Sadusi yema moloringi; ungu-manema pilku mane siringi ye mare Parisi yema moloringi. Kanu yemane Yesusi kinia Pita Jonotolo kinia Pollo kinia ononga kotema sendeko pilieringi. Kanoni ungu mare Mateyu 26:57-67, Lipa Mundorumu Yema 4:1-22, 5:17-42, 22:30, 23:6-9, Jono 3:1,10 molemo. Ungu mare inia 11. Farisi kinia 38. Sadyusi kinia 16. hetman molemóla.
20. kingdom bilong God, kingdom bilong heven
I ungu talonga Mateyuni alieli “kingdom bilong heven” nimba bokuna torumu molemo (3:2, 4:17, 5:3,10, 10:7, 11:11, 25:1,34 molemo mele). 6:33, 12:28, 21:43 mindinje Mateyuni “kingdom bilong God” nimba torumu molemo. Mako kinia LLuku kinia Jono akumane alieli “kingdom bilong God” ningu toringi molemo (Mako 1:15, 4:26, 12:34, LLuku 4:43, 7:28, 21:31, Jono 3:3,5 molemo mele.) Aku-na-kolo ungu talonga ungu-pulumu selumu. “kingdom bilong Pulu Yemo” lupa, “kingdom bilong” mulu-koleamo” lupa mólo.
Talo pea bokuna toringi molemo ungutolonga ungu-pulu se i-sipa: Juda yombomane imbi leko “Pulu Yemo” ningíndu wale awisili pipili serimumunga “mulu-koleamo” niringi kanumu. “Mulu-koleamo” Pisini-unguna “heven” nilimili kanumu.
“kingdom” akumu Lapangala (Mateyu 6:10, 13:43), Yesusingala (Mateyu 16:28).
No Lindeli Jono kinia Yesusi kinia olone “akumu nondopa wendo ombá sekemo.” niringili (Mateyu 3:2, 4:17).
“kingdom” (king-dom) akumunga ungu ekendo “king” kana! Kewa-unguna “king” akumu Umbu-Unguna ungu se mólo, aku-na-kolo yu ye nokoli paa awili, kolea-awili nokopa, yombo awisili tondolo mundupa nokolemo. Akumunga, Umbu-Unguna “ye nokoli kingimu” nimbu bokuna torumulu molemo (Mateyu 27:37, Lipa Ora Sirimu 17:14, 19:16).
Umbu-Unguna “kingdom bilong God” kinia “kingdom bilong heven” kinia selu-sipa mele bokuna torumulu molemo-na-kolo sumbi sipu manda naa torumulumunga Pulu Yemo ye nokoli kingimu molopa nokolemo akumunga, bokuna wale mare “kolea” topo, “yomboma kinia mélema” topo, “walemo” molo “enamo” bokuna torumulu molemo. Wale mare “kiniá wendo okomo” bokuna topo, wale mare “pe wendo ombá” torumulu. “Kingdom” akumu limulúla. Akuna sukundu pulimulula. Mimi sipu pilipuli ungu-pulumu bokuna torumulu molemo. Mateyu 13:11,24,31,33,44,45,47, 20:1; LLuku 9:60,62, 10:9,11, 11:20, 16:16, 17:20-21, 18:29, 21:31, 22:16, Jono 3:3,5.
Mateyu 18:1,3 akuna “koleana pungí” nímulu liemu mandala, molo “yombo talapena sukundu pungí” mandalanje. Kolea Arimatia ye Josepo ‘Kanu walemo wendo opili.’ nimba nokopa molorumu (LLuku 23:50-51). Yombo mare ungu selu-sipa melela seringi (LLuku 2:25,38, 24:21). Ungu mare Lipa Mundorumu Yema 1:3,6, 8:12, Romo 14:7, U-Korini 6:9, Gallesia 5:21, Epesasi 5:5, U-Tesallonaika 2:12 molemo.
21. kisim bek
(Inia yakondo 3. baim bek kananila.)
“kisim bek” lupa, “baim bek” lupala. Aku-na-kolo Pisini-unguna “kisim bek” ungu-pulu talo pepa, “baim bek” ungu-pulu talola pelemo. “kisim bek” Giriki-unguna kinia Ingillisi-unguna kinia ungu talo molemo. Ingillisi-unguna se “redeem” (ya 21.1. ), se “save” (ya 21.2. ). Ungu-pulumu nambolkanje? Umbu-Unguna nambolka nimulú, nambi sepa molombanje? 21.1. Ingillisi-unguna “redeem” akumunga pulumu i-sipa:
Se Opa-toumane yombo talape se topa mundupa kolea sepe mundungí molo kolea kamu liku molonge kinia kowa pungí yombomanga opa-geramemane ‘Lipu tapondamili.’ ningu ongo opa-touma kinia opa seko toko mundunduku koleamo ‘kolea pulu yomboma kelko molangi.’ ningu liku singí. Opa-geramemane kowa pungí yomboma “kisim bek” senge.
Romo yombomane Juda yomboma tondolo munduku nokoringimunga Juda yomboma ono onono we manda naa moloringimunga Juda yombomane pilkuli, ‘Pulu Yemone nimba taltopa ‘ono molongena lipu mundumbu.’ nimba, nimba panjerimu ye nokoli Karasimuni ono lipa tapondombando Romo yomboma topa ononga koleana ultu mundupa ono onono ‘Manda molangi.’ nimbá.’ konopu lieringi. ‘Yuni ono “kisim bek” sembá.’ konopu lieringi (LLuku 1:68-75, 24:21).
Se: Ya u nirimulu ungumu kinia i ungumu kinia selu-sipamo. Isirele yomboma kolea Isipi moloringi kinia Isipi yombomane ono ka-kongono siringi, Isirele yomboma paa mindili awili-seko nongo moloringi kinia Pulu Yemone nimbale: “Ono lipu tapondopo, ono ka-kongono silimili yombomanga kína wendo lipu, senga manda we molangi, membo pumbu mondombo.” nimba sika aku sipa serimu (Wendo Oringi 6:6). Aku sipa nirimumu “Ono “kisim bek” sembó.” nirimu.
Se: Yombo sene sepa kinjimba kinia yu “LLo sepili.” ningí. Kou-mone naa pemba kinia yu ka singí. Kanu-kinia yombo sene yu kondo kolopale ‘Wendo omba pumba we molopili.’ nimba kote pilieli yombomo kou-mone ningíma sindimba. Aku sipa mele, Pulu Yemone olio “Pundu tangi.” nimba mindili lipa simba aulkana pulimulu kinia Yesusini yuyu yunga kangimu kinia mememo-tolo (“baim bek” méletolo) olionga nimba Pulu Yemo sinderimu. Aku sipa serimu ulumuni olionga pundu tondopa Pulu Yemone olio mindili lipa silka nolemolá aulkana wendo liltimu. “Kisim bek yumi ” serimu (Mako 10:45, U-Pita 1:18-19).
Imunga ungu awisili kinia ungu mare Pulu Yemonga bokuna molemo unguma kinia inia yakondo 3. baim bek molemóla. 21.2. Ingillisi-unguna “save” akumunga pulumu i-sipa:
Se: Yombo se nona wangolemo kinia ‘Yu nona naa wangopa kolopili.’ ningu liku tapondoko nona pungu yu wendo limili (Lipa Mundorumu Yema 27:20).
Se: Yomboma ulka suluminiana uru peangi ulkamo sepene nombá kinia ‘Ono sepene naa nopili, naa kolangi.’ ningu liku tapondoko ulkana sukundu pungu yomboma toko makisiku wendo limili (U-Korini 3:15).
Se: Bolango se aulka-baresena andopa molopili karo se ombá kinia kanokole ‘Tomba.’ ningu liku tapondoko lisiku pungu yu liku aulka lapulapuna mengo pulimili.
Kanu ungumunga Umbu-Unguna ungu ponjili naa pelemomonga Pulu Yemonga bokuna Ingillisi-unguna “save” kanopo, ungu-pulumu pilipu topo, Yesusi ye “Saviour” kanopole ungu-pulumu pilipu torumulu. Pisini-unguna “Helpim” molo Umbu-Unguna “Lipa tapondomba” molo “Lipa Tapondólimu” manjipu tomolo manda mólo. Aku ungumu pange selemo. Yombomane yomboma we liku tapondolemelela. Ulka takolemele kinia liku tapondolemele. Kalia kepe liku tapondoko selemele. Kou-mone sene liku tapondolemele. Akumu we-uluma.
Wale mare we-mana-umbunamando Ingillisi-unguna “save” nimba molemo. Juda yombomane pilkuli, ‘Pulu Yemone ye se sipa mundumba, yuni olio lipa tapondopa Romo yombomane tondolo munduku nokolemelemanga kína wendo limba.’ ningu pilieringi. Giriki-unguna kinia Ingillisi-unguna kinia ungu talo nimba molemo, se “redeem”, se “save ”, aku-na-kolo ungu-pulumu paa selu-sipa mele pelemomonga Pisini-unguna kinia Umbu-Unguna kinia ungu selu-sipa mele torumulu molemo. LLuku 1:68 akumu inia yakondo nondopa ungu-pulu 21.1. “redeem” akumunga ungu se, aku-na-kolo LLuku 1:69,71 akumu ya ungu-pulu 21.2.save” akumunga ungu se.
LLuku 1:71 “kisim bek” kinia 1:74 “tekewe” kinia sika Giriki-unguna ungu lupa lupa, aku-na-kolo ungu-pulumu paa selumu. Akuna ‘opa-touma Romo yomboma’ ningu pilieringinje, aku-na-kolo kiniá ‘opa-tou kurumanga nokoli Setene’ nimbu pilielemolo kinia mandala.
Wale awisili olio Pulu Yemo kinia konopu seluna pupili manda naa molemolomondo nilimú. Olione Pulu Yemonga ungumu pilipu naa lipu, yu bulu sipu, ulu-pulu-kiri aku sipu mele selemolomonga mindili nomolo aulkana pulimulu. Aku-na-kolo Yesusini olio “save” molo “kisim bek” sembando ulu mare serimu. Mateyu 1:21, LLuku 1:47 (Pisini-unguna ya “Helpim” molo “Lipa Tapondólimu” mindi molemo), LLuku 2:11,30, Jono 10:9, LLuku 19:10, Romo 10:1,9, Epesasi 2:5,8, U-Timoti 1:15, 2:4, Taitasi 2:13, U-Pita 1:9. Yombo talape talo molemelemonga ungu tondolo se Mako 16:16. U-Pita 3:18 akuna “kisim bek” nimba naa molemo-na-kolo “kisim bek” akumunga ungu-pulu se sika molemo.
I-siku piliangila: Yesusini olio “kisim bek” selemomonga ungu-pulu talo mele. Se: Yomboma lipa tapondopa mindili nolemolá aulkana wendo limú. Se: Molopo kondopo mindi pumulú aulkana lipa mondolemo. Aku pilipuli Umbu-Unguna aku sipu bokuna torumulu molemo. Jono 3:17 “kisim bek” akumunga ungu-pulumu 3:16 kinia 3:18ekendo kinia molemo (Jono 3:16-18 ungu mare molemóla). Ungu mare i-siku kananila: Lipa Mundorumu Yema 2:21, 4:12, Ipuru 9:12,15. 21.3. Man Bilong Kisim Bek Yumi
Akumunga ungu-pulumu ya 21.1.redeem” kinia 21.2.save” pea lipa sere lepa i imbimunga pelemo. LLuku 2:11, Jono 4:42, Epesasi 5:23, Taitasi 1:3, Pe-Pita 1:1, 2:20, 3:18 kanani. LLuku 1:47 akuna Pisini- unguna “Helpim bilong mi ” mindi molemo, Umbu-Unguna “nanga Lipa Tapondólimu” mindi naa torumulu. Torumulu molemo mele i-sipa: Olio Lipa Tapondopa Mindili Nolemolá Aulkana Wendo Lili Yemo . LLuku 1:47 kinia 2:11 kinia Giriki-unguna kinia Ingillisi-unguna kinia talo pea selu-sipamo. Yemo mindi lupa lupa. LLuku 1:47 akumu “Pulu Yemo” nilimú, 2:11 akumu “Karasi” nilimú.
22. kontrak
Akumunga pulumu i-sipa melenje: Yombo se kinia yombo se kinia anju yando ninguli: “Nuni i-siku sení kinia nane i-sipu sembó.” ningu, ningu panjikuli, “Ungumu mania naa pupili. Paa kamu alieli-alieli pepa mindi pupili.” ningu mi leko olonga imbitolo pepána tolembele. Pulu Yemone u Eporayamo kinia Eporayamo yuni kalopa liltimu Isirele yomboma kinia aku sipa mele serimula-na-kolo yombomane ungu se naa niengi Pulu Yemo yuni yuyu nimbale: “Onone i-siku i-siku seko molonge kinia nane ono-kinia i-sipu i-sipu sepo kondombo.” nimba, nimba panjipa mi lierimu. U-Pulu-Pulu 15 akuna Pulu Yemone kongi yopoko kinia kera talo kinia Eporayamondo “Tou.” nirimu-kulu torumu kinia yuni Eporayamo-kinia sembá mele nimba panjipa mi lierimu. Pe U-Pulu-Pulu 17:1-14 akuna ‘kamu pemba mele lipa ora simba mako se pepili.’ nimba ungu-mane se sirimu (17:11-14). Aku makomo i-sipa: “Kangomanga kangi se kopisangi.” nirimu; akumunga ungu mare pea inia yakondo 18. katim skin bilong pikinini man kananila.
Pe Mosisi molopili Isirele yomboma kinia ungu se nimba panjipa mi lierimu ungu umunga ungu mare Wendo Oringi 31:16, Ungu-Manema 4:13,23, 5:2, 29:1, 9:11, Kambu Toringi 10:33 molopa, akumunga ungu tondolo se Wendo Oringi 24:3-8 molemo. Wendo Oringi 24:8 paa kanou! Ungu-manema sipale “Senge kinia i-sipu i-sipu ono sepo kondombo.” nirimu mele Ungu-Manema 28:1-14 molopa, “Naa senge kinia i-sipu i-sipu ono sepo kinjimbu.” nirimu mele Ungu-Manema 28:15-68 molemo. (U Pulu Yemone Isirele yomboma mindili noringi aulkana wendo limba sepale, pe-pe-kepe pilku molonge mele ungu-mane se nimba panjerimu ungumu Wendo Oringi kolomongo-awili 14-20 molemo. Akumu kananila.) Ungu umu kinia kondetolonga ungu se Gallesia 4:24-26 molemóla.
Yesusi mana naa opili Pulu Yemone u aku sipa serimu mele molopa, yunga Isirele yomboma nokorumu mele unguma molemo bokumu Kewa-unguna “Olpela Testamen” molo “Olpela Kontrak” nilimulu. Akumu Umbu-Unguna “Pulu Yemone Nimba Panjipa Mi Lierimu Ungu Umu” nimbu, ponjipu “Ungu Umu” nilimulu. Pe Yesusi mana mania ombale ‘Pulu Yemone ungu konde se nimba panjipa mi lierimumu kamu wendo omba pepili.’ nirimumunga yunga semanemo kinia yunga unguma kinia molemo bokumu imbi lepo “Pulu Yemone Nimba Panjipa Mi Lierimu Ungu Kondemo” nimbu, ponjipu “Ungu Kondemo” nilimulu. Kewa-unguna “Nupela Testamen” molo “Nupela Kontrak” nilimulu. Aku ungutolo bokuna torumulu molemo. Pulu Yemone “Ungu konde se nimbu panjipu mi lembo.” u nirimu mele ungu talo Jeremaya 31:31-34 kinia Ipuru 8:6-13 kinia molemo (Esikiele 37:26 kananila).
U-yombomane ungu se ningu panjiku mi lekole, ‘Kamu wendo omba pepili.’ ningu wale mare mélsenga mememo ondondoringi. Aku sipa mele pilipale Pulu Yemone olio yunga yombo molomoloma-kinia ungu se nimba panjipa mi lemba serimumunga ungu se nirimu mele i-sipa: “Na ononga ulu-pulu-kiri selemele sengema naa pilipu siye kolopo akumanga ono ungu se naa sepo, ono konopu kake sepili kelepo kopu sepo konopu seluna pupili manda selu sipu molamili kene nanga Malo ononga nimba yunga mememo ondopa kolali sepa kolondopili.” nimba yunga Malo mana lipa mundorumu. Akumunga, Yesusi kolomba walemo wendo orumu kinia yu kolopa meme olionga nimba ondondombamonga ungu kondemo kamu wendo omba pemba mele ungu-pulumu yu lombili andoli yemando nimba para sirimu. Kanu ungumu Mateyu 26:28, Mako 14:24, LLuku 22:20, U-Korini 11:25 kinia molemo. “Pe-pe-kepe pilku molangi.” nirimu ungu-manemo U-Korini 11:25-26 molemo. Yesusinga mememonga ungu mare pea Ipuru 7:18-22, 9:11-28 molemo. Mememonga ungu talo pea LLipai 4:1-5:10 kinia Wendo Oringi 24:8 molemo.
23. Krais
“Krais” akumu Giriki-ungu. Ipuru-unguna “Mesaya” niringi. Ungu-pulumu selumu. Akumu Yesusi (Mateyu 1:1,17,18,25, Jono 20:31, Lipa Mundorumu Yema 5:42, 8:12). Karasi munga pulumu inia anjukundu 27. Mesaia molemo, akumu u inia anjukundu gomomo wendo liku kanokole, pe kelko yakondo i gomomo i ungumu wendo liku kanani.
Ye Mesaya Karasimu nga kongono sembá orumu talo i-sipa mele: Se: Ye nokoli kingimu molopa yomboma nokopa kondombando orumula. Aku pilkuli Yesusindu wale mare “ye nokoli kingimu” sumbi siku niringila (LLuku 1:32-33, Mateyu 2:2-6, 21:5, 27:11,37,42, Mako 15:26,32, Jono 1:49, 11:27, 12:13, 18:33-37, 19:12,14-15,19-22, Lipa Mundorumu Yema 17:7). Se: ‘Olio kinia Pulu Yemo kinia kelepo konopu seluna pupili seluna sere leko molamili.’ nimba olionga Pulu Yemo popo tondoli ye paa awili olandopamo molombando orumula (Ipuru 7:21-28, 9:11-15, Mateyu 27:51. Inia anjukundu 34.3. hetpris kananila.).
Ingillisi Baipelena kinia Pisini Baipele kondena kinia wale awisili ungu-pulumu naa toko, we “Krais” mindi sumbi siku toringi (Mateyu 1:1,17,18), aku-na-kolo wale mare Pisini Baipelena ungu-pulumu toringi (Jono 3:28, 1:41, 4:25,42, Mateyu 16:16, 22:42, 24:23, 27:17, Mako 13:21, LLuku 2:11, 9:20). Jono 4:29 kinia 7:31 kinia ungu-pulu sela toringi. Mateyu 1:16 Pisini Baipelena imbi kinia ungu-pulumu kinia toringi molemo. Yu meringi molemo mele ungu se Romo 9:5, 1:3-4 molopa, orumumunga ungu-pulu se Lipa Mundorumu Yema 3:18, 2:31-36 molemóla.
Yesusindu “Karasimu” niringi we imbi leko naa niringi, ungu-pulumu pilku niringi. Akumu pilipuli Umbu-Unguna semane peanga toringi bokumanga alieli imbimunga ungu-pulumu torumulu. ‘Sumbi siku piliangi.’ nimbu ungu-pulumu kinia Kewa-ungu “Karasi” kinia lipu sere lepo torumulu molemo. Aku-na-kolo ‘Pe pepáma siku mundungíndu toringi pepámanga “Karasi” wale awisili we walu mele imbi toringinje.’ nimbu pilipuli imbi “Karasi” sumbi sipu torumulu. Pasemanga wale koltalo mindi ungu-pulumu torumulu.
Ye Nokoli Karasimu” kinia “Pikinini Bilong Devit” kinia “Pikinini Bilong God” kinia “Pikinini Bilong Man” kinia ye selumu. Kanu imbi Pikinini manga ungu mare inia anjukundu 32. molemo. Karasimu nga kongono-imbi se inia anjukundu 35. profet molemóla.
24. laip
Yombo marene Pulu Yemonga ungumu yomboma ningu singíndu Kewa-unguna “laip” nilimili paa manda naa sekemo. Ungu-pulumu pilkuli Umbu-Unguna niengi. We ungu-pulu akumu konde mololi. “i stap laip” akumu “konde molemo” (U-Pulu-Pulu 2:7, Gallesia 2:20).
Aku-na-kolo wale awisili Pulu Yemonga bokuna “laip” molemo akumunga ungu-pulumu we ya mana konde molomolomondo mindi naa nilimú. Mulu-koleana molopo kondopo mindi pumulúmundu nilimú (Mateyu 7:14, Mako 9:43,45, 10:17,30, LLuku 12:15, Jono 1:4, 3:15,16, 6:27-68, 8:12, 10:28, 14:6, 17:2,3, 20:31, Lipa Mundorumu Yema 3:15, 11:18, 13:48, Romo 6:4,22,23, Gallesia 6:8, Lipa Ora Sirimu 2:10).
Umbu-Unguna ungu-pulumu torumulu molemo mele i-siku kanoko piliani:
Se: “bret bilong laip” Jono 6:35,48,51.
Se: “buk bilong laip” Pillipai 4:3, Lipa Ora Sirimu 3:5, 13:8, 20:12,15, 21:27 (LLuku 10:20 kananila).
Se: “diwai bilong givim laip” akumu Pulu Yemone pulu-pulu ambo yetolo mondorumu kaliana panjerimu unjumu, akumu mulu-koleana gilimúla (U-Pulu-Pulu 2:9, 3:22-24, Lipa Ora Sirimu 2:7, 22:2,14,17,19).
Se: “wara i gat laip”, “wara bilong givim laip” Ungu talo peatolonga ungu-pulu selumu. “wara i gat laip” Jono 4:10-15, 7:37-39, Lipa Ora Sirimu 7:17 molopa, “wara bilong givim laip” Lipa Ora Sirimu 21:6, 22:1,17 molemo. No nonowalene kololemolo-monga ungu se Aisaya 55:1 molemóla.
25. lepra
Umbu-Unguna “kuru-laká nolemo” nilimili kanumu. U Isirele koleana kuru-laká norumu akumu kinia ya umbu-koleana nolemomo kinia selu-sipa melenje? Mimi sipu naa pilielemolo. ‘Wale mare aku sipa mele sikanje, aku-na-kolo wale mare erili katekate selemo akumundu kinia pea niringinje.’ ningu pilielemele. Isirele yombomanga kimbu kimanga mongoma, aku mele kamu wendo purumu molo erili serimuma we serimunje. Naa pilielemolo.
Isirele yomboma kangina kuru-laká norumumunga kangi se kake serimu molo kondoli serimu kanokole i-siku mele seringi: Pulu Yemonga ungu-mane se Mosisini Isirele yomboma mane sirimu akumu LLipai 13:1-46 molemo, akumu pilkuli, Pulu Yemo popo tondoli yema moloringina pungu ononga kangimu liku ora siringi. Pulu Yemo popo tondoli ye sene kangina mimi sipa kanopale, “Unguri mólo. Kangimu kalaro se naa molemo.” nirimu kinia manda. Aku-na-kolo kangina uluri serimu mele kanopale kamu “Nu kangina kalaro mololi yombo se.” nirimu kinia pilipale kuru-laká norumu yombomo we-yombo peringi koleana ultukundu pumba perimu. Aulkana andombando ungu se tondolo mundupa nimbale: “Kalaro mololimu! Kalaro mololimu!” nilipa andorumu. ‘We-yomboma olio kuru-laká noli yomboma molemolona nondoko naa wangi.’ ningu aku seringi. Kuru-lakámo nomba kelierimu kinia kanokole kelko Pulu Yemo popo tondoli ye se molorumuna pungu ononga kangimu liku ora siringi kinia yemone kanopale “Kelepa umbu kangi gilimú.” nimbale “Kangi kake seli molemo.” nirimu kinia pilkuli kuru-laká nomba kelierimu yomboma ononga pulu koleana kelko pungu peringi. ‘U ulkando naa pangi Pulu Yemo popo tondoli yemone mélse kalondopa Pulu Yemo popo topa simba mélse kanu yemo sikuli ulkando pangi. We mólo.’ nirimu mele LLipai 14:1-32 molemo.
Yesusini aku sipa seli ye mare sepa peanga sirimu kinia LLipai 14 molemo ungu-manema pilkuli seringi mele semane talo LLuku 5:12-16, 17:11-19 molemo. Ungu pokore pea Mateyu 10:8, 26:6, LLuku 4:27 molemo. (LLuku 4:27 nilimú semanemo Pe-Kingima 5:1-14 molemo.)
26. lo
Akumu Umbu-Unguna “ungu-manema” nilimulu. Akumu we nilimulula. Romo gapomano llo molo Papua Nu Gini gapomano llo mando “ungu-manema”-la nilimulu. 26.1. Aku-na-kolo Umbu-Unguna Pulu Yemone u Mosisi ungu-umbu tondopa tenpela lo sirimumando we “ungu-manema” mindi naa torumulu. ‘Ungu-pulumu sumbi siku piliangi.’ nimbu “⸤Mosisini sirimu⸥ ungu-manema” torumulu bokuna molemo (Mateyu 5:17,18, LLuku 10:26). Kanu ungu-manemanga ungu awisili boku Romo molemo (Romo 2:pali, 3:pali, 10:4, 13:10, awisili pea). Wendo Oringi 20:1-17 sirimu ungu-mane rureponga talondo Miti yombomane “mi unguma” nilimili, yombo awisilini we Kewa-unguna manda manjiku “tenepella llo” nilimili.
Pulu Yemonga Ungu Kondemo molemo bokuna wale mare Pisini-unguna “lo” molemo kinia sika we “ungu-mane rureponga talo ndo nilimú (LLuku 18:20), aku-na-kolo wale awisili Mosisini Pulu Yemonga ungu-mane sinderimuma ndo pali nirimu. U-Pulu-Pulu, Wendo Oringi, LLipai, Kambu Toringi, Ungu-Manema, kanu boku se-pakara pali Mosisini torumu, aku bokuma liku sere leko “Mosisini torumu bokuma” niringila; “Ungu-Manemo” niringila. (Mosisini torumu bokumanga ungu se inia anjukundu nondopa 26.2. “Lo” nimba molemo.)
Juda yombomane pilkuli ‘Mosisini sirimu ungu-manema semolo kinia Pulu Yemone olio kanopa peanga pilimba.’ ningu pilieringi. Juda yombo mare Yesusini yombomanga nimba senderimu mele pilkuli kamu ‘Sika nanga nimba senderimu.’ ningu yunga yomboma molkole ungu-manema pea pilku moloringi. Ungu-mane se aku siku pilkuli niringimunga ungu se inia yakondo 18. katim skin akuna molemo. Kanu yombomane ninguli: “Yesusinga mememo mindi manda mólo. Yesusini olionga nimba kolali sepa kolondorumu akumu mindi manda mólo. Akumu ‘Sika.’ nimbu kuru mondopo, ungu-manema kepe pilipu lipu semolo kinia Pulu Yemone olio kanopa ‘yombo sumbi nilima’ nimba kanomba.” niringi. Aku-na-kolo akumu paa mólo. Romo 3:19-31, 4:1-8, 9:30-33, Gallesia 2:14-21, 3:1-25, 5:1-12 kanani. Romo 3:20-22, Gallesia 2:16, 3:24 paa mimi siku kanani. 26.2. Wale mare “Lo” molo “Lo na Profet” molo “Mosis na Profet” bokuna molemo akumunga ungu-pulumu paa lupa. Ungu-manema ndo molo Mosisindu we naa nilimú. Pulu Yemone ungu-umbu tondorumuma pilku yomboma ningu siringi yemane toringi bokumando mindi naala nilimú. Yesusi mana naa omba molopili, yunga semanemo u naa tangi, Isirele yombomane Pulu Yemonga Bokumu liku sere leko imbi lengendo “Lo” molo “Lo na Profet” niringi. Kewa-unguna “Olpela Testamen” akumundu niringi. Akumu pilkuli LLuku 24:27,44,45-46 paa mimi siku kanani. LLuku 24:44 mindi Konane Bokumu pea nimba molemo. (Romo 3:21 ungu talo pea molemo. Se: Mosisini Pulu Yemonga ungu-manema sirimuma; se: Pulu Yemonga Boku Umunga pali. Akumu kanani.) Boku palinga ungu mare i-sipala: Mateyu 5:17, 7:12, 11:12-13, 22:40, LLuku 16:16,29,31, Lipa Mundorumu Yema 24:14, 26:22, 28:23. Wale mare “Lo” mindi bokuna molemo Mosisini torumu bokuma ndo sika nilimú (Jono 8:17 kinia Mateyu 18:16tolo Kambu Toringi 35:30 kinia Ungu-Manema 17:6 kinia molemo), aku-na-kolo Jono 10:34 kinia 12:34 kinia ungu niringitolo Mosisini torumu bokuma nga naa molemonje. Jono 10:34 mele Konane 82:6 molopa, Jono 12:34 mele Konane 110:4, Aisaya 9:7, Esikiele 37:25, Deniele 7:14 kinia molemo.
27. Mesaia
Akumu Isirele yombomane Ipuru ungu lieringi akumunga ungu se. Pe Giriki-unguna “Krais” niringi akumu ungu-pulu selumu. Yesusi mana omba naa molopili Ye Mesayamo pe ombá kinia toko kondonge ungumu Deniele 9:25,26 mindi molemo. Deniele 9:25,26 akuna Pisini Baipelena imbi “Mesaia” tongendo “Mesaia” naa toringi, ungu-pulumu mindi toringi. Ingillisi Baipele marenga akula imbi toringi molemo. Pisini-unguna “dispela bikman God i bin makim” molemo.
U Isirele yombomane yombo se “i bin makim” seringi akumu “makim” we naa seringi. Aku seringimunga pulu talo i-sipa mele: Se: Ye se ‘Ye nokoli kingimu molopili.’ ningu, ningu taltoko namba singíndu wambola se yunga pengena ondoko kandondoringi (U-Samuele 9:15-16, 10:1, 16:1,12-13, Pe-Samuele 2:1-4). Se: Ye se ‘Pulu Yemo popo tondoli ye awili olandopamo molopili.’ ningu, ningu taltoko namba singíndu akula seringi (Wendo Oringi 29:5-7, LLipai 8:10-12). Ungu “Mesaia” akumunga pulumu akumu mindi. “Ye se ningu taltoko wambola pengena ondoko kandondoko kongono sembá namba se singí” yemo.
Wale talo mindi Giriki-unguna “Krais” bokuna naa toko, Ipuru ungumu manda manjiku “Mesaia” ningu toringi. Aku ungutolo Jono 1:41 kinia 4:25 kinia mindi. Akumu Pisini-unguna ungu-pulumu naa toringi, “Mesaia” ningu we imbi toringi. Ungu-pulumu tongendo Jono 1:41 kinia 4:25 tolonga “Karasi” molemóla, akumu tongendo ‘Mesaya kinia Karasi kinia ye selumu, ungu-pulumu selumu.’ ningu ungu Karasi munga ungu-pulumu toringi. Imbi “Krais” akumunga ungu-pulu mare inia yakondo 23. molemo kananila.
28. nem
“Em i gat nem” akumu “yu imbi molemo” molo “yu imbi ola molemo” sumbi siku nilimili. Aku-na-kolo wale mare “nem” bokuna molemo kanumu aku sipa mólo. Ungu marenga ungu-pulumu pilipuli torumulu bokuna molemo. Imbi lieringi molo imbi mangilieringi kinia ye imbi molorumumunga tondolomo pilkuli imbimu lieringi. Imbimu yuyu unguri mólo. Yemo yuyu tondolo perimu mele pilkuli yunga imbi lieringi molo mangilieringi.
Se i-sipa mele: “Mi i kam long nem bilong en.” nimulúndu “Yuni na lipa mundomu-na okoro.” nilimulu (Konane 118:26, Mateyu 21:9, 23:39, LLuku 19:38, Jono 12:13).
Se: i-sipa mele: “baptaisim long nem bilong Papa na Pikinini na Holi Spirit” nimulúndu yomboma no lindipu, “Lapa kinia Malo kinia Mini Kake Sélimu kinia mangilipu imbi lepo nu no lindikiru.” nilimulu (Mateyu 28:19, Lipa Mundorumu Yema 2:38, 8:16). Olione oliolio pilipu we naa selemolo. Ononga kongonomo sendepo, “Sendaa.” nilimili mele pilipu, ‘Ononga tondolomo yomboma-kinia pepili.’ nimbuli ononga imbima lepo ono mangilipu yomboma no lindilimulu.
Se: “bilip long nem bilong en” : Lipa Mundorumu Yema 3:16, Jono 2:23, 3:18 kinia kanani. (Jono 8:30,31, Lipa Mundorumu Yema 2:21 selu-sipa mele).
Se: “askim long nem bilong en” : Jono 14:13, 15:16 kanani. Jono 15:16 akumu Kewa-unguna pilipuli i-sipu mele bokuna tolemolánje: ‘Nanga imbi leko Tata mawa senge mele simba.’ nimbu tolemolá-na-kolo ‘Nanga imbi leko’ akumunga pulumu nambolkanje? Ungu-pulumu sulu sepo i-sipu mele tolemolá: ‘Tata kinia ungu ninguli: “ ‘Nunga Marena Yesusi nanga nimba kolondorumumunga nuni na liku tapondoni aulkamo yuni lipa taltondorumu.’ nimbu pilipuli nu mawa sekero.” ningu mawa sayo.’ aku sipu tolemolá.
Se: “tokaut long nem bilong en” : Lipa Mundorumu Yema 4:17,18, 5:28,40, 9:27,29 kanani.
Se: “sik i ken pinis long nem bilong en” : Lipa Mundorumu Yema 3:6,16 kanani.
Ungu mare i-sipa: Mateyu 7:22, 12:21, 28:19, Mako 9:37-41, 11:9-10, 13:6,13, 16:17, Jono 1:12, 2:23, 17:6,11,12,26, 20:31, Lipa Mundorumu Yema 5:40, 8:12, Romo 9:17, 10:13, U-Korini 1:2,10,13,15, 6:11, Epesasi 5:20, Pillipai 2:9,10, Kollosi 3:17, Jemisi 5:10,14, U-Pita 4:14, Jono Yopoko-Sipamo 7, Lipa Ora Sirimu 2:3,13, 3:8.
29. olpela bel
Akumunga pulumu i-sipa mele: U konopu topele naa topo, Mini Kake Sélimu konopuna naa molopili Yesusinga yomboma naa molamili olionga konopu pelemoma paa umbu-konopu kirima mindi. Kanu konopumane ‘olio sepo kinjamili.’ mindi nirimu mele we walu pilipuli serimulu. Yesusi olionga konopumanga omba topele tondolemo kinia olionga u-we-konopu-kirima kololemo none selemo. Pe olio konopu konde Yesusini topele tondopa silimúma pelemo, akumane nilimú pilielemolo mele lupa. Aku-na-kolo umbu-konopu-kirimu kamu mania naa pulimú. Akumuni ‘Yu paa piliamili!’ nimba ta nilimú. Akumu bokuna imbi lepo “u-we-konopumu” nimbu torumulu molemo. Akumunga ungu mare Romo 6:1-14, 7:5, 8:1-12, 13:14, U-Korini 3:3, Gallesia 5:19-21,24, Epesasi 2:3, Jemisi 3:15 kinia molemo.
30. Pasova
Ingillisi-unguna “pass over” akumu Umbu-Unguna “olakondo omba puli” mele. Kera molo ballosi mangopa olionga pengena olakondo muluna omba pulimú akumu “pasova” selemo. Aku-na-kolo Ipuru-unguna ungu-pulu se pelemo, akumu “naa topa mundupa kelepa olakondo we omba puli” .
“Pasova” aku walemonga ungu yopoko pelemo.
Se: Pulu Yemone ‘Yomboma kinia kongima kinia mélemanga pali komolayema topo kondambo.’ nirimu kinia yunga angellomo kolea Isipi andopa Isipi yomboma kinia mélemanga komolayema topa kondorumu. Aku-na-kolo Pulu Yemone “I-siku i-siku senge kinia kanopole yombo se naa tombo.” nirimu mele pilkuli Isirele yombomane kongi sipisipi walo senga meme ulka kere-puluna ape kandoringi yombomanga komolayema naa torumu. Pulu Yemone lipa mundorumu angellomone mememo ulka senga senga kerepuluna molorumu kinia kanopale kanu ulkamanga sukundu naa pumba ola we omba purumu . Aku semanemo kinia ungu-manema kinia Wendo Oringi 12 molemo. Pe kalia-ingimanga pali oli se kinia wale se kinia nimba sipa, wale yopoko-pakara ‘Pulu Yemonga wale kake selima.’ ningu koro molko “Ono lipu tapondorundu mele pilku molangi.” nimba mane sirimu mele Wendo Oringi 12:2-3,14-16 kinia Ungu-Manema 16:1-8 kinia Ipuru 11:28 kinia molemo. Aku ungu- manemo pilkuli yandopa yandopa kalia-ingi senga senga aku siku seringi. Paa kiniá kepe Isirele yombo marene aku siku selemelela. Yesusi mana molopili i walema bokuna “Pulu Yemone Isirele Yombomanga Anda-Kolepalima Naa Topa We Omba Purumu Mele Pilieringi Walemo” nimba molemo (LLuku 2:41-43, Jono 2:13,23, Mateyu 26:2,17).
Se: Pulu Yemone Juda yombomanga komolayema naa torumu walema pilingindu pulu-pulu walemo wendo orumu kinia kongi sipisipi walo se toko nongo, “ ‘Pellawa se kalopo namili.’ ningu pellawana mundulimili kinia akolemo méle isimu naa mundukuli pellawa we kalko nangi.’ nimba mane sirimu (Wendo Oringi 12:3,5,8,17,18; 23:14-15 kanani). Aku walemo pe kiniá bokuna “Pellawa Akoli Méle Isimu Naa Munduku Pellawa We Kalko Noringi Walemo” nimba molemóla (Mako 14:1, Mateyu 26:17, LLuku 22:1-2,7-16, Lipa Mundorumu Yema 12:3, 20:6).
Se: Pulu Yemone we omba pumba olio naa topa kondombamonga kongi sipisipi walomo Yesusi yu. U-Korini 5:6-8 kanani. Akumunga, Juda yomboma Pulu Yemone ononga anda-kolepalimanga komolayema naa torumu mele semanemo pilieringi walemanga Yesusi naa tolemolá naa kolkanje paa manda naa selka. Akumunga, ‘kanu walemonga kolambo.’ nirimu (LLuku 9:51). Pe paa sika sipisipi walo se toko nongo u Pulu Yemone serimu mele pilieringi walemonga Yesusi toko kondoringi (Wendo Oringi 12:21 mele Mako 14:1-2,12,22-25,63-64; 15:1,6-15, LLuku 22:7,14-16, Jono 18:28).
Yesusi yu “Pasova” kongi sipisipi walo paa kake sélimu, Wendo Oringi 12:5 mele (Mateyu 27:4, Jono 18:38, LLuku 23:47, U-Korini 5:7, Ipuru 4:15, U-Pita 1:19). Yesusi sipisipi walomo molorumu mele ungu mare inia anjukundu 44. sipsip, 44.3. molemo.
31. pikinini
Pulu Yemonga bokuna “bolango” nimba molemo akumu wale mare sika bolangomando nilimú. Aku-na-kolo wale mare Kewa-unguna “pikinini” molemo kinia kanopole ungu-pulumu pilipuli torumulu.
(Yesusi yuyu “Pikinini Bilong Devit”, “Pikinini Bilong God”, “Pikinini Bilong Man” molorumu mele inia anjukundu nondopa 32. nimba molemo.) 31.1. pikinini bilong Abraham
Akumu “Eporayamone kalopa liltimu yomboma” nimbu torumulu molemo (Mateyu 3:9, Jono 8:39). Aku-na-kolo akumunga ungu-iku mare toringi molemóla. ‘Yesusi sika.’ ningu kuru naa mondoringi yomboma kurumanga nokoli depelemonga bolangoma molemele; ‘Yesusi sika.’ ningu kuru mondolemele yomboma Eporayamone sika kalopa liltimu yomboma molemele (LLuku 3:8, 9:9, Jono 8:33-44, Romo 4:pali, 9:6-8, Gallesia 3:5-14). 31.2. pikinini bilong Isrel
Akumu “Isirele yomboma” (LLuku 1:16, Lipa Mundorumu Yema 5:21, Romo 9:3-5, Mako 7:27nje). Ungu-pulu se LLuku 22:30 molemóla. 31.3. pikinini bilong God
Wale marenga Giriki-unguna Pulu Yemonga kangoma molo bolangoma nimba molemo akumu olio ‘Yesusi sika.’ nimbu yunga yomboma molemolo, sika Pulu Yemonga bolangoma molemolola (Mateyu 5:9, Jono 1:12-13, 8:41-47, LLuku (8:19-21), 6:35, 20:36, Romo 8:13-17,23, 9:24-26, Pe-Korini 6:18, Gallesia 3:26, 4:5, Epesasi 1:5, 5:1, Ipuru 2:10-17, 12:5-6, U-Pita 1:14, Jono Kumbi- Lepamo 3:1-6, Jono Talo-Sipamo 1). Mare pea selu-sipamo ima: Jono 3:3-8, Taitasi 3:5, U-Pita 1:23, Jono Kumbi-Lepamo 3:9-10, 4:7, 5:1-2,4,18-19. Isirele yombomanga ungu se Romo 9:4 molemo.
(Yesusi yu “Pikinini Bilong God” molemomonga ungumu inia anjukundu 32.2. molemo.) 31.4. tok bokis bilong pikinini
Yesusini ungu-iku topale, bolango kangamane anupili lapalimanga unguma taka leko pilku liku karaye naa selemele mele yombo aku siku Pulu Yemonga ungumu taka leko pilku selemelema mindi yu ye nokoli kingimu molemo mulu-koleana manda pungí (Mateyu 18:1-6,10-14, Mako 9:33-37, 10:13-16). Imu pílie: Mateyu 18:2,3,4,5 Giriki-ungu se molemo, akumunga ungu-pulumu sumbi sipa “bolango kanga”. Aku-na-kolo Mateyu 18:6,10,14, 10:42 Giriki-ungu sela molemo, akumunga pulumu sumbi sipa “bolangoma” mólo. Ungu-pulumu lipa sere lepa “nanama” kepe, “kangama” kepe, “imbi naa mololima” kepe aku sipa mele. Imbi naa mololi manga ungu talo LLuku 22:24-27 kinia Jono 13:12-17 kinia molemo.
Giriki-unguna imbi sela molemo. Akumu “bolango kiki” molo “bolango pame, ungu naa nili”. Sika ungu se Mateyu 21:16 molemo. Ungu-iku topa, “konopu tondolo naa puli yomboma” molo “umbu-konopu naa peli yomboma”ndo nilimú ungu mare Mateyu 11:16, LLuku 10:21, Romo 2:20, U-Korini 3:1, Epesasi 4:14, Ipuru 5:13 kinia molemo.
U-Korini 14:20 akumunga ungu-pulumu i-sipanje: Bolango pamemanga konopu tondolo se naa pepili molkole ulu-kirima walu seko, mimi siku naa pilielemele akumu ya naa nikimunje. Bolango pamemane ‘Ulu-pulu-kirima samili.’ ningu konopu kimbu siku naa molko, ‘Bolango pamemane ‘Yomboma mindili nongo, molko kinjangi!’ ningu naa pilku walu molemele mele ono yombo yuma aku siku molangi.’ nimba nirimunje?
32. Pikinini
Yesusi, yunga imbi se “Karasi” ningu kanumunga imbi mare “Pikinini Bilong Devit”, “Pikinini Bilong God”, “Pikinini Bilong Man” ningu lieringila. 32.1. Pikinini Bilong Devit
Devit - Yu u Isirele yombomanga ye nokoli kingi awilimu. Yombomane yu konopu siringi. Pulu Yemone yu konopu sirimula (U-Samuele 13:14, U-Kingima 15:5, Jeremaya 3:15, Lipa Mundorumu Yema 7:45-46, 13:22).
“Pikinini Bilong Devit” - Akumu Yesusindu niringi.
Yu “Pikinini Man Bilong Devit” .
Depitini sika Yesusi kalopa liltimu (Mateyu 1:1,17, LLuku 3:31). Aku-na-kolo pe walte Mateyu 9:27 ye talone niringili imbimunga pulumu sela, aku ungu-pulumu Mateyu 22:41-44 molemo. ‘Depitini kalopa limba ye se Pulu Yemone ‘Ono nokopa kondomba ye se lipu mundumbu.’ nimba, nimba taltorumu ye nokoli kingi Mesaya Karasimu molomba.’ ningu pilku, ‘Yesusi yu aku yemo omba molemo.’ ningu pilkuli Yesusi yundu “Depitini Kalopa Liltimu Yemo” niringi. Depitini kalopa limba yemo kamu alieli ye nokoli kingimu molopa mindi pumbá. Pe-Samuele 7:11ekendo-16, Aisaya 9:6-7, 11:1, Jeremaya 23:5-6, Mateyu 12:22-23, 21:9, LLuku 1:32-33,68-69, Lipa Ora Sirimu 22:16, (Mateyu 1:1,6,16,17, 9:27, 15:21-22, 20:29-31, LLuku 2:11). Inia yakondo “23. Krais” kananila. 32.2. Pikinini Bilong God
(I imbimunga ungu se inia yakondo 31.4. molemóla.)
Pisini-unguna Yesusi ndu “Pikinini Man Bilong God” nilimolánje papu. Umbu-Unguna “Pulu Yemonga Malo” torumulu molemo. Yesusi yu paa sika Pulu Yemonga Kandi Malo.
Pulu Yemone Yesusindu “Nanga Kangomo” nirimu (Mateyu 3:17, 17:5, Lipa Mundorumu Yema 13:33, Pe-Pita 1:16-18). Yesusini Pulu Yemondo “Tata” nirimu (Mateyu 11:25-27, Jono 5:19-27; LLuku 22:70-71 kananila).
No Lindeli Jonone “Yesusi yu Pulu Yemonga Malo” nirimula (Jono 1:34).
Yu aku sipa molorumu mele kurumanga nokoli Setene kinia kuruma kinia onone ningu para siringila (Mateyu 4:3,6, Mako 3:11, 5:7, LLuku 4:41).
Yesusi lombili andoli yemane yu aku sipa molorumu mele ningu para siringila (Mateyu 14:33, 16:16, Jono 11:27, 1:49) aku-na-kolo we-yombo awisilini ‘Yu Pulu Yemonga Malo naa molemo.’ ningu pilieringi (Mateyu 26:63-66, 27:40,43).
‘Yesusi yu sika Pulu Yemonga Malo.’ ningu kuru mondolemele yomboma konde molko mindi puli ulu-pulumu limili (Jono 20:31).
Yesusi Pulu Yemonga Malo molemo ungu mare pea i-sipa: Mateyu 11:27, 27:54, Mako 1:1, LLuku 1:35, 9:35, Jono 1:14,49, 3:16,36, 5:17-26, 6:40, Lipa Mundorumu Yema 9:20, Romo 8:3,29,32, Gallesia 2:20, U-Tesallonaika 1:10, Ipuru 1:1-8, 3:3,6, 4:14, 5:5 (Konane 2:7, Lipa Mundorumu Yema 13:33), Ipuru 7:3, Jono Kumbi-Lepamo 1:3,7, 2:23, 3:8, 4:9,14, 5:5,11. 32.3. Pikinini Bilong Man
Akumunga Umbu-Unguna “Mana Ye Senga Malo” molo “Mana Yombo Senga Malo” bokuna tolemolá-na-kolo ‘Yombomane we walu kambu toko, akumu ye senga imbi tondolo se naa pilinginje.’ nimbu, ‘Kanu yemo we-mana-ye se naa molorumu sumbi siku ningu piliangi.’ nimbu “Mulu-Koleana Molopa Mania Omba Mana-Ye Au Lierimu Yemo” nimbu bokuna torumulu. Pe ponjipu “Mania Omba Mana-Ye Au Lierimu Yemo” torumulu akumu bokuna molemo.
Aku imbimu u-pulu-pulu niringi mele Deniele 7:13-14 molemo. Akuna nimba molemo kanu yemo yu Isirele yombomane pilkuli, ‘Yu Pulu Yemone nimba taltopa, “Ono nokopa kondomba ye se lipu mundumbu.” nimba, nimba panjerimu ye nokoli awili Mesayamo.’ ningu ‘Yu ombá.’ ningu nokoko moloringi-na-kolo Yesusi yu kanu yemo omba molorumu mele Juda yombomane naa pilieringi. Mako 14:62, Lipa Ora Sirimu 1:7,13 kanani. “Mania Omba Mana-Ye Au Lierimu Yemo” kinia “Pulu Yemonga Malo” kinia “Pulu Yemone nimba taltopa mana lipa mundorumu ye nokoli Karasi Mesayamo” kinia ye selumu mele ungu talo Mateyu 16:13-17, 26:63-64 molemo (LLuku 22:66-71). Yesusini wale awisili “Pulu Yemone nimba taltopa mana lipa mundorumu yemo na.” nimbando “Mania Omba Mana-Ye Au Lierimu Yemo i-sipa i-sipa sembá.” nirimu (Mateyu 12:8,32,40, 13:37,41, 20:18,28, 24:30,44, Mako 8:38, LLuku 9:22,58, 19:10, Jono 3:14, Lipa Mundorumu Yema 7:56). Inia yakondo 23. Krais kinia 27. Mesaia kinia kananila.
33. pikinini sipsip
(Inia anjukundu 44. sipsip, 44.3. kanani.)
34. pris
“pris” kinia “profet” kinia ye lupa lupama. Kongono seringi mele lupa lupala. Sika talo pea yomboma kinia Pulu Yemo kinia awi-suku-singi yema moloringi-na-kolo “pris” yema yomboma kinia Pulu Yemo kinia awi-suku-singina molko yombomanga unguma kinia umbunama kinia Pulu Yemonga kumbikerena mengo puringi; “profet” yema Pulu Yemo kinia yomboma kinia awi-suku-singina molko Pulu Yemonga unguma yombomanga kumbikerena mengo oringi. “profet” yemanga ungumu inia anjukundu 35. molemo. 34.1. pris yema onone ‘Pulu Yemone yomboma kanopa kiri naa piliepili. Pulu Yemo kinia seluna sere leko konopu seluna pupili molangi.’ ningu awi-suku-singi yema molko yombomanga ningu mélema kalko Pulu Yemo popo toko sinderingi. Aku seringimunga Umbu-Unguna u “Pulu Yemonga ala-yema .” nimbu bokuna torumulu. Pe i bokumu topele toli tapu-yemane ninguli: “Akumu paa manda naa sekemo. Mólo.” niringi. “Yombomane kuruma mindi ningu pilingí.” niringi. Kanu-kinia kongono seringi mele imbi sulu sepo bokuna torumulu. Pe ponjipu imbi lepo “Pulu Yemo popo tondoli yema” nimbu bokuna torumulu molemo.
Pulu Yemo popo tondoli yema nga ungu mare i-sipa molemo: Se: U-Pulu-Pulu 14:18 (Yesusi yu mele, Konane 110:4, Ipuru 5:6, 7:1-17). Se: Wendo Oringi 28:1, 29:9. Onone kongono seringi mele boku LLipai nimba silimú (1:5, 4:3, 6:24-26, 7:31-36, 21:pali). Kambu Toringi 4:46-48, 18:1-7, Josua 3:3,6,14, Mateyu 8:4, 12:5, Mako 2:26, LLuku 10:31, Jono 1:19. Kanu yemane paa alieli Pulu Yemo mélema kalko popo tondoringi-na-kolo Yesusini waltikele kamu olionga nimba yuyu yunga mememo Pulu Yemo popo topa sinderimu (Ipuru 10:8-14). Yu olionga Pulu Yemo popo tondoli yemo (Ipuru 7:11-25).
Olio Karasinga yomboma pali Pulu Yemo popo tondoli yomboma molemolola (U-Pita 2:5,9). 34.2. bikpris
Akuma Umbu-Unguna “Pulu Yemo popo tondoli ye awilima” nimbu bokuna torumulu molemo. Kanu yemane Yesusi-kinia paa konopu kiri panjiku, yu toko kondonge aulka se koroko kanoko likuli yu toko kondoringi (Mateyu 2:4, 16:21, 20:18, 21:15,23,45, 26:3,47, Mako 14:1,10, 15:1,3,10,11,31, LLuku 23:4,10, Jono 7:32,45). 34.3. hetpris
Paa selu mindi Pulu Yemo popo tondoli ye awili olandopamo molorumu. Se kolorumu kinia mindi se topele toko mondoringi. U-pulu-pulu Mosisi genu Erono kanu yemo molorumu (Wendo Oringi 28:1, 29:1,10,15,44, LLipai 8:pali, 16:pali, 21:10-17). Pe yunga malo se yu kolali sepa molorumu (Kambu Toringi 20:22-29). Mare: Mako 2:25-26, Akai 1:12,14, 2:2,4.
Yesusi mana omba molopili Anasi yu Pulu Yemo popo tondoli ye awili olandopamo molorumu, aku-na-kolo Romo gapomanomone yu toko mania munduku se lupa liku mondoringi, kanu yemo Kayapasi. Aku seringi-na-kolo Juda yombomane Anasinga unguma mindi pilieringi. Romo-Gapomanomone aku sipa serimumunga wale awisili Anasi kinia Kayapasi olonga imbi talo pea liku sere leko bokuna toringi (LLuku 3:2, Jono 11:49-51, 18:13-14,24, Lipa Mundorumu Yema 4:6). Pulu Yemo popo tondoli ye awili olandopamo yu Juda yombomanga kanjollo makumunga nokoli yemo (Kewa-unguna “peresiden”) (Jono 18:12-14,19-24, Mateyu 26:57,62,63,65, Lipa Mundorumu Yema 23:1-5).
Pe Yesusi yu kamu Pulu Yemo popo tondoli ye awili olandopamo molorumu (Ipuru 2:17-18, 3:1, 5:1-5,10, 6:20, 7:26-28, 8:1-6, 9:6-15, 13:11-12). Pulu Yemo popo tondoli ye awili olandopamanga pali yu ye paa awili olandopamo molorumu molemo (Ipuru 4:14-16).
35. profet
“Profet” yombomanga ungu se inia yakondo nondopa 34. pris molemo. “Pris” yemane yombomanga kongonomo Pulu Yemonga kumbikerena senderingi. “Profet” yombomane Pulu Yemonga kongonomo yombomanga kumbikerena senderingi. “Poropetema ne” kongono seringi mele i-sipa: Pulu Yemone Mosisi ungu-umbu tondorumu mele pilipale Mosisi Erono nimba sirimu. Mosisini ungu-umbu tondorumu unguma Eronone pilipale Isipi ye nokoli kingimu nimba sirimu. Mosisi Pulu Yemonga keremo, yunga “poropet emo” (Ungu-Manema 18:15). Erono yu Mosisinga keremo, yunga “poropet emo”-la (Wendo Oringi 6:28—7:2). Imbi bokuna torumulu molemo akumu i-sipa mele: “Pulu Yemone ungu-umbu tondorumuma pilku yando yomboma ningu siringi yomboma”.
Pulu Yemonga keremo moloringi yombomanga kongonomo kinia kolo toli yombomanga unguma kinia pilingí mele ungu mare Ungu-Manema 13:1-5, 18:15-22 (Wendo Oringi 20:18-22) molemo. Jeremaya 1:1-5, 2:1-5, 7:1-3, Jona 1:1-3, 3:1-3, Akai 1:1-13, 2:1-2, Wendo Oringi 15:20, Nokoli Yema 4:4 kananila.
Kanu yemanga ye mare imbima alieli pilielemolo i-sipama: Illainja, Illaisa, Aisaya, Jeremaya, Esikiele, Deniele, Osia, Joele, Emosi, Opadaya, Jona, Maika, Neyame, Apakake, Sepenaya, Akai, Sekaraya, Mallakai.
Yesusi paa pe wendo omba molopa sembá mele Pulu Yemone nirimu ungu-umbu tondorumu awisili u pilku bokuna toringi. Pe Yesusi kamu orumu kinia yunga yomboma kanu unguma pilieringi. Aisaya 7:14 mele Mateyu 1:22-23 molopa; Maika 5:2 mele Mateyu 2:3-6 molopa; Osia 11:1 mele Mateyu 2:14-15 molopa; Jeremaya 31:15 mele Mateyu 2:16-18 molopa; Aisaya 40:3-5 mele LLuku 3:2-6 molopa; Sekaraya 9:9 mele Mateyu 21:1-5 molopa; Konane 22:18 mele Jono 19:23-24 molopa; Konane 22:1 mele Mateyu 27:46 molopa; Wendo Oringi 12:46, Kambu Toringi 9:12, Konane 34:20, Sekaraya 12:10 mele Jono 19:33-37 molemo. Ungu talo LLuku 24:25-27, Lipa Mundorumu Yema 8:30-35 molemóla.
Yesusi kamu omba Pulu Yemonga kongono sendembando No Lindeli Jono kamu Pulu Yemone ungu-umbu tondorumuma pilipa yomboma nimba sirimu yemo wendo omba Yesusi ombá aulkamo akisinderimu (LLuku 1:76, 3:2-3, 7:24-28). Jono yu omba kongono sembá mele Mallakaini u nimba sirimula (Mallakai 3:1).
Yesusi yu kepe Pulu Yemone ungu-umbu tondorumu unguma pilipa yomboma nimba sirimu ye se (Mateyu 21:46, LLuku 7:16, 13:33-34, 4:24, Mako 6:4, Jono 4:19,44, 7:40, 9:17, 15:15). Mosisini Ungu-Manema 18:15,17-19 nirimu yandopa yandopa ye mare yu-mele-mele aku kongono senge yemando nimba nirimu-na-kolo Juda yombomane ‘Ye selu ombá.’ ningu pilku nokoko moloringi. ‘Yu kinia ‘Pulu Yemone nimba taltopa sipa mundumba.’ ningu nokoko moloringi yemo kinia ye selumu.’ ningu pilieringi (Jono 1:21,25,45, 5:46, 6:14, Lipa Mundorumu Yema 3:17-24, 7:37).
Yombo marene kolo toko “Pulu Yemone ungu-umbu tondomu se pilipuli nikiru.” ningí yombomanga ungu mare Mateyu 7:15, 24:11,24, Lipa Mundorumu Yema 13:6, Pe-Pita 2:1, Lipa Ora Sirimu 16:13, 19:20, 20:10 molemo.
36. Rabai, Rabonai
(Akumunga ungu-pulumu Jono 1:38 molemo.)
37. Sabat
Wale talo-pakara Pulu Yemone mulu ma mélema sepa wamopa molopale wale yopoko-sipamonga we mulu pilipa koro molorumu (U-Pulu-Pulu 2:1-3). Pe Mosisini Isirele yomboma aku siku pilku sangi nirimu mele Wendo Oringi 16:21-30 molemo. Akuna imbi “Sambate” nimba pulu polopa molemo. Kanu imbimunga ungu-pulumu “mulu pilku koro mololi”. Pe Pulu Yemone Isirele yomboma kinia ulu mare senge kinia yuni ono nokopa ononga Pulu Yemo molomba ungumu (Kewa-unguna “kontrak” nilimulu) nimba panjipa mi lembando ungu-mane rureponga talo sirimu kanu ungu-manemanga sene nimbale: “Wale se ‘Sambate’ ningu ‘Pulu Yemonga wale kake sélimu’ ningu kongono naa seko koro molangi.” nirimu (Wendo Oringi 20:8-11, 31:12-17).
Mateyu 24:20, Lipa Mundorumu Yema 1:12: Juda yomboma Sambate walemonga aulka sulu senga manda naa andoko, wane killomita mele mindi manda pungímunga ungu-mane se perimu, akumunga ungu-pulu mare Wendo Oringi 16:29, Kambu Toringi 35:5, Josua 3:4 molemo. Aku-na-kolo Pulu Yemone aku ungu-manemo sumbi sipa nirimu ungu se Pulu Yemonga bokuna naa molemo. Juda yombomane ono onono kanu ungu-manemo ningu panjeringinje. Onono pilku seringi mele pilipale Yesusini Mateyu 24:20 molemo mele nirimunje.
Juda yomboma Sambate walemonga koro moloringi ungu mare Jono 19:31,41-42, LLuku 23:54-56, 24:1 molemo. Sambate walemonga ono maku toko Mosisinga ungu-manema kinia Pulu Yemonga ungumu kinia pilku, Pulu Yemo-kinia ungu niringi. Yesusi ono pea maku toringi ungu se LLuku 4:16 molemo. Pollo pea maku toringi ungu mare Lipa Mundorumu Yema 13:5,14-15, 14:1, 17:1-3 molemo.
Kiniá walemanga imbima nimbu walema kambu tolemolo mele olio sepa sembambu silimú. Kiniá “Koro Awili” molo “Sande” nilimulu aku walemo Juda yombomanga kongono wale selumu. “Sarere” molo “Koro Kanga” nilimulu wale akumu Juda yombomane “Sambate Walemo” niringi. Akumunga, Umbu-Unguna “namba wan de bilong wik” nimbu bokuna tomolondo ungu se sumbi sipu pilipu nimulú ungu se naa pilierimulu. Yesusi kolopale, “namba wan de bilong wik ” lomboropa ola molorumu (Mateyu 28:1, Mako 16:1-2, LLuku 24:1, Jono 20:1).
Kiniá Karasinga yombo mare kanu ungu-manemo pilkuli Sarere kinia “Koro Awili” molo “Sambate” ningu kanu walemonga koro molko maku toko Pulu Yemo popo toko imbi ambolko paka tondoko yunga ungumu pilielemele. Ya Papua Niu Gini sukundu Sepende yombomane aku siku pilku selemele-na-kolo kolea marenga Karasinga yombo mare pea akula pilku selemele.
Aku-na-kolo Karasinga yombo awisilini ‘Yesusi lomboropa ola molorumu walemo ‘olionga Sambate walemo’ ningu kanu walemonga koro molko maku toko Pulu Yemo popo toko imbi ambolko paka tondoko yunga ungumu pilielemele. Koro konde senga pulu-pulu wale, Kewa-unguna “Sande” nilimili, akumu “Sambate” ningu “Ye-Awilimunga Walemo” ningu koro molemelemonga pulumu i-sipa mele: ‘Yesusi Juda yombomanga koro konde senga pulu-pulu walemo kinia lomboropa ola molorumu kene Sande kinia maku topo yuni serimu mele semanemo pilipu yunga ungumu pilielemolo kinia peanga.’ nilimili. ‘U-pulu-pulu Karasinga yomboma moloringimane aku sikula seringi.’ nilimili. Lipa Mundorumu Yema 20:7 koro kondemonga pulu-pulu walemonga Karasinga yomboma maku toko Yesusini “berete kinia no-waene kinia nangi” nirimu mele pilkuli seringi. U-Korini 16:2 kinia Lipa Ora Sirimu 1:10-tolonga ungu se molemóla. Pe yandopa yandopa Sande kinia koro molko, Pulu Yemo popo toko yunga ungumu pilingindu maku tolko oringi. Aku-na-kolo “Sande-kinia koro molaa.” nimba ungu-mane aku-sipa se bokuna naa nimba molemo.
Yesusi mana molopa andopa yunga kongonomo serimu kinia wale awisili Juda yombomanga ye awilima kinia angelema niringi. Onone ‘Sambate walemonga manda semolo.’ ningu pilieringi mele lupa, yuni Sambate walemonga pilipale serimu mele lupa. Walte yu lombili andolima witi-mongoma inie toko nolko puringi kinia (Mateyu 12:1-8) Juda yombomanga ye awilimane ono iri toringi kinia yuni onondo “Na Sambate walemonga nokoli yemo.” nirimu (Mateyu 12:8). Yesusini Sambate walemonga yombo kuru torumuma sepa peanga sirimu kinia kanoko kiri pilieringi mele LLuku 6:6-11, 14:1-6 molemo. Sambate walemonga semane mare i-sipa mele manda kanonila: LLuku 6:1-5, 13:10-17, Jono 5:1-15,16-18, 7:21-24, 9:pali.
38. Sadyusi
Sadusi” yema ono Juda yombomanga ye awilimanga ye talape se. Onone ‘Pulu Yemonga ye sumbi nilima molemolo.’ ningu pilieringi-na-kolo Yesusi mana andopa molorumu kinia Sadusi yema kinia Parisi yema kinia yuni serimu mele paa kanoko kiri pilieringi. Onone pali pilku seringi mele ungu mare inia yakondo 11. Farisi kanani.
Sadusi yema i-siku ningu pilieringi: “Yomboma kolkole lomboroko ola naa molonge.” ningu pilieringi (Mateyu 22:23,(29-32), Lipa Mundorumu Yema 23:8, (U-Korini 15:12-20)). “Angelloma kinia kuruma kinia naa molemele.” ningu pilieringila. Parisi yemane “Kolopole sika lomboropo ola molomolo. Angelloma kinia kuruma kinia sika molemele.” ningu kuru mondoringi.
39. Sameria
Yesusi mania naa opili paa koronga-u, Isirele yomboma kolea Isipi ka-kongono seringi kinia Pulu Yemone ono lipa tapondopa kolea Kenane memba pumba kanu koleamo sirimu, akuna peringi. Pe Isirele yombomanga talapemo pulua tokole ekendo yombo talape se molko ye nokoli kingi se mondoko, ekendo yombo talape se molko ye nokoli kingi se mondoringi. Yombo talape se imbi Isirele ningu, se Juda niringi. Ekendonga kolea-awili, Mosipi mele, kingimu molorumu kolea-awili Jerusalleme, ekendonga kolea-awili Sameria . Pe yombo talape se, Asiria nili, kolea-awili Sameria ongo Sameria yomboma-kinia opa seko yombo awisili ka siku mengo punguli yombo lupa mare yando siku munduku “Kolali seko Sameria akuna peangi.” niringi. Kanu semanemo Pe-Kingima 17:24-34 molemo. Kolea pulu yombo koltalo moloringima kinia ongo peringi yomboma kinia anju yando ambo liku ye pungu, Pulu Yemo kinia we-mélema kinia ‘olio nokolemele pulu yema’ ningu liku sere leko popo toringi. Kanu yombomane bolango meringima paa sika Juda yomboma naa molko meme kangi lupa lupa moloringimunga Juda yombo sikamane ono paa kanoko kiri pilieringi. Kanu yombomando “Sameria yomboma” niringi. Sameria yomboma ne Pulu Yemo popo tongendo ononga ma-pangi senga aku seringi. Pulu Yemone ‘kolea-awili Jerusalleme mindi ongo na popo taa.’ nirimu-na-kolo Jerusalleme pungu naa seringi. Pe Yesusi mana mania omba andopa molorumu kinia Juda yombomane Sameria yomboma lakoko konopu kiri panjiku seluna paa naa moloringi. Sameria yomboma kolea Sameria disiriki peringi, disirikinga kolea-awili akumu Sameria niringila. Juda yomboma winju mendo pungíndu Sameria disiriki makaye seko puringi-na-kolo Yesusi aku sipa naa serimu. Jono 4:1-42, LLuku 9:51-55, 10:25-37, 17:11-19, Mateyu 10:5-6 molemo semanemanga ungu-pulumu akumu mindi.
40. Satan
(Akumu inia anjukundu nondopa 42. Seten kanani.)
41. saveman bilong lo
Pisini-unguna ungu selumu mindi bokuna toringi molemo, aku-na-kolo Giriki-unguna ungu talo molemomonga Umbu-Unguna ungu talola bokuna torumulu molemo. Kanu yemane ‘Ye paa sumbi nilima molemolo.’ ningu pilieringi. Aku siku ningu pilieringimunga Yesusini Parisi yema iri torumu mele ono kepe iri torumula. Parisi yemane Yesusi kanoko kiri pilku, iri toringi mele kanu “saveman bilong lo” yemane kepe aku siku seringila (LLuku 5:30, 9:22, 19:47, 20:19, 22:2, 23:10). “Yesusini Pulu Yemonga ungu-manema pulua tolemo.” niringi. Moloringi ungu-pulu mare inia yakondo 11. Farisi kinia 38. Sadyusi kinia molemo.
“Saveman bilong lo” akumunga ungu-pulu talo i-sipa:
Se: Wale paa awisili “Pulu Yemonga ungu-manemanga puluma pilku mane siringi yema” nimba molemo. Kanu yema Juda ye awili Parisi yema pea Yesusi molorumuna ongo ungu niringi (Mateyu 2:4, 5:20, 7:29, 9:3, 12:38, 15:1, 16:21, 17:10, 20:18, 21:15, 23:2,13, (14),15,23,25,27,29, 26:57, 27:41, Mako 2:6-7, 12:28,32,35,38, 14:1, LLuku 9:22, 20:46). Mare sika Parisi yema moloringi (LLuku 5:30, Lipa Mundorumu Yema 23:9).
Se: Wale koltalo mele Pulu Yemonga ungu-manema pilku kondoringi yema nga unguma molemo. Ingillisi-unguna “lloya” nilimili (Mateyu 22:35, LLuku 7:30, 10:25, 11:45,46,52, 14:3, Lipa Mundorumu Yema 24:1,2-3).
42. Seten, Satan
Pisini-unguna u nomi-ka lemolo mele pilkuli “Seten” toringi-na-kolo kiniá Ingillisi-unguna boku tolemele mele manda manjiku “Satan” tolemele.
Yu molorumu mele ungu awisili bokuna naa molemo. Angellonje? Mateyu 25:41, Pe-Korini 11:14, Lipa Ora Sirimu 12:9. 42.1. Seten
Kanu imbimunga pulumu “opa-toumu” kinia “kote kolo topa sendélimu” kinia. Yu kurumanga nokolimu (Mateyu 4:10, 12:26, 16:23, LLuku 10:18, 22:3, Romo 16:20, Pe-Korini 11:14, U-Tesallonaika 2:18, Lipa Ora Sirimu 12:9, 20:2,7).
Setene” yunga tondolomo kinia kurumanga tondolomo kinia mania, Yesusinga tondolomo olandopa mele ungu mare inia yakondo 9. devil nimba molemona molemo. Akumunga ungu mare ya niemilila:
Se: Mateyu 4:11, LLuku 4:13, Ipuru 4:15 Setenene Yesusi kondi torumu kinia yunga ungumu naa pilipa liltimu.
Se: Kuruma yombomanga konopumanga moloringima Yesusini topa makororumu semane awisili molemo. Mare i-sipa molemóla: Mako 1:23-27, 3:11-12,14-15, 5:1-20, Mateyu 12:22-23, LLuku 4:41.
Se: Kollosi 2:10,15, Epesasi 1:21, 6:10-13.
Se: Setenenga imbi se Giriki-unguna “Belliele” molemo (Pe-Korini 6:15), Pisini-unguna “Seten” nimba molopa, Ingillisi-ungu Baipele marenga “devil molopa”, marenga “Belliele” molopa, marenga “mélema anjiku “pulu yemo” ningu popo tolemele mélema” nimba molemo. 42.2. devil
Akumu Setenenga kongono ungu-pulu peli imbi se, akumunga pulumu inia yakondo 9. devil paa kananila. 42.3. Belsebul
Akumu Setenenga imbi sela, akumunga pulumu inia yakondo 4. Belsebul kananila. 42.4. wanpela samting nogut
Akumu Setenenga imbi sela. “wanpela samting nogut” yu “Setene” kinia “depelemo” kinia molemo mele Mateyu 13:19, Mako 4:15, LLuku 8:12 molemo. Aku unguma semane selumu.
Giriki-unguna “kirimu” mele mindi molemo. Pisini-unguna“Satan” toko, “man nogut” toko, “man nogut Satan” toko, “ol samting nogut” toko, “Man bilong mekim ol pasin nogut” ningu toringi molemo. Umbu-Unguna topele topo bokuna torumulu molemo mele i-sipa: “ulu-kirimanga pali ulu-pulumu pelemo ⸤kuru nokolimu ⸥” nimbu torumulu (Mateyu 5:37, 6:13, 13:19,38, Jono 17:15, Epesasi 6:16, Pe-Tesallonaika 3:3, Jono Kumbi-Lepamo 2:13,14, 3:12, 5:18,19).
43. sios
Kiniá Karasinga yomboma maku tolemele ulkama “sios” nilimulu-na-kolo Pulu Yemonga bokuna “sios” nimba molemo akumu ulkamando naa nirimu, yombomando nirimu. Giriki-ungumunga ungu-pulumu i-sipanje: “Yomboma ungu se pelemo kinia pilkuli ningíndu maku tolemele.” Umbu-Unguna “yombo talape” nilimulu. Karasinga yombo talapemando pali liku sere leko ningíndu “yunga sios” niringi (Mateyu 16:18, Lipa Mundorumu Yema 2:47, Epesasi 5:23-32, Pillipai 3:6, Kollosi 1:18,24). Akumu Pulu Yemongala (U-Timoti 3:15). Karasinga yomboma kolea yu-mele-mele maku toringi yombo talapemando yu-mele-mele “sios” niringila (Lipa Mundorumu Yema 9:31, 20:17, Romo 16:5,16, U-Korini 1:2, Pillipai 4:15, Kollosi 4:15,16, Lipa Ora Sirimu kolomongo-awili 1-3).
Olio Yesusi Karasinga yombo talapemo olio yunga ambomo molemolo mele Epesasi 5:25-32 molemo. Olio kangi selumu, yu olionga pengemo, molemolo mele ungu mare Epesasi 1:22-23, 4:12,15-16, Kollosi 1:18,24, 3:15, U-Korini 6:13-20 molemo.
44. Sipsip, pikinini sipsip, man i save lukautim sipsip
44.1. Olio ‘Sika.’ nimbu kuru mondolemolo yomboma olio Yesusinga kongi sipisipima, yu olionga tapu-yemo (Jono 10:pali, Mako 14:27, Ipuru 13:20, Jono 21:15-17, Konane 23).
44.2. Sipisipi yu walu molopa aulka lo lipa pulimú mele olio yomboma aku sipu selemolo. Tapu-yemane sipisipima nokoko naa kondolemele kinia manda naa molemo (Mateyu 9:36, LLuku 15:1-7, U-Pita 2:25, Lipa Mundorumu Yema 20:28).
44.1. kinia 44.2. kinia ungu se Pisini Baipelena Esikiele 34:pali molopa, boku ambolkonomonga Mateyu 2:5-6 molemóla.
44.3. Pikinini Sipsip
No Lindeli Jonone nimbale: “Yesusi yu Pulu Yemonga sipisipi walomo.” nirimu (Jono 1:29,36). Aisaya 53:7-8 kinia, Lipa Mundorumu Yema 8:31-35 kinia kananila. Yesusi yu “sipisipi walomo” molorumu mele ungu-pulu talo pelemo.
Se: Yesusi mana naa opili Isirele yomboma Pulu Yemone mane sirimu mele pilkuli sengendo ‘Ulu-pulu-kirima mania pupili.’ ningu kongi sipisipi molo kao molo meme paa peanga se toko kalko Pulu Yemo popo toko siringi (LLipai 1-7). Kongi peangama mindi, kirima paa mólo (Wendo Oringi 12:15, LLipai 22:18-25). Kongimanga meme monga pulumu ungu mare U-Pulu-Pulu 9:4-6, LLipai 17:11,14, Mateyu 26:28, Ipuru 9:22 molemo. Yesusini yu yuyu yunga kangimu kinia mememo-tolo olionga nimba Pulu Yemo popo topa sinderimu.
Se: Isirele yomboma kolea Isipi wendo pungíndu ‘Pulu Yemone olionga bolango komolayema kinia kongimanga komolayema topa naa kondopili.’ ningu sipisipi walo paa peanga se liku toko kondoko meme mone ungu se seringi. Kiniá Yesusinga meme ondondorumumuni aki tolemo yomboma Pulu Yemone naa tolemo. Imunga ungu awisili inia yakondo “30. Pasova” molemo kananila.
Sipisipi walo kinia meme kinia aku méletolonga ungu mare niringi molemo akuma ulu talo pea pilkuli niringinje. Nuni nunu mimi siku kanoko piliani: Jono 1:29,36, Romo 3:25, 5:9, Epesasi 1:7, 2:13, Kollosi 1:20, Ipuru 9(:14,22), U-Pita 1:18-19, Jono Kumbi-Lepamo 1:7, Lipa Ora Sirimu kolomongo-awili 5(:6,9), 6, 7, 12, 13(:8), 14, 15, 17, 19, 21, 22 molemo.
45. stretpela man o meri
Ungu-pulu mare i-sipa:
Se: Yombomane yombo se molemo mele kanokole “yombo sumbi nílimu” molo “yombo peangamo” nilimili (Mateyu 1:19, Mako 6:20, LLuku 2:25, 23:50, Lipa Mundorumu Yema 10:22).
Se: Pulu Yemone yomboma aku sipa naa kanopa nilimú. Yuni olio ‘yombo sumbi nilima’ nimba kanomba ulu se oliolio manda naa semolo. Kangikundu kanopa naa nilimú. Konopuna sukundu kanopa nilimú. Akumunga ungu awisili boku Romo molemo: 2:13, 3:5,9-10, 4:3, 9:30-32 kanani.
Se: Ungu se Giriki-unguna selu-sipa mele molemo-na-kolo ungu-pulumu kanga-kolte lupa mele perimu kinia kanga-kolte lupa mele imbi torumulu molemo. Akumu Pisini Baipelena selu-sipamo toringi-na-kolo Umbu-Unguna ungu-pulumu mimi sipu pilipuli torumulu (mare Romo 3:30, 4:25, 5:1). Pulu Yemone yombo konopu sumbi nimba pelima nimba kanombando ononga ulu-pulu-kirima mundupa kelielemóla. Aku-na-kolo we naa selemo. ‘Karasi sika.’ ningu kuru mondolemele yomboma-kinia aku sipa selemo (Gallesia 2:16 paa kanani). Imunga ungu mare inia yakondo 26.1. lo molemóla.
46. tisa
(Akumunga imbi talo inia yakondo kanani.
Se 36. Rapai, se 41. saveman bilong lo. )
47. tupela maus
Yomboma aku siku molemelemando Giriki-unguna kinia Ingillisi-ungutolone ungu selu “hypocrite” mindi Pulu Yemonga bokuna nimba molemo. Ungu selumu na-kolo Pisini-unguna kinia Umbu-Unguna kinia ungu selumu sumbi siku naa nilimili. Ungu-pulumu bokuna tomolondo pererimulu. Pisini Baipelena ungu talo molo yopoko mele molemo.
Se: man bilong tupela maus - (Mateyu 6:2,5,16, 7:15, 16:3, 23:13,15,23,25,27). Mateyu 23 pali mimi siku kanokole ungu akumunga pulumu pilinginje. Mare Mako 7:6, LLuku 6:42, 11:44, 12:56, 13:5 molemóla. Pulu Yemonga ungu-manema pilku yomboma mane siringi yema kinia (akuma inia yakondo 41. saveman bilong lo ), Parisi yema kinia (inia yakondo 11. Farisi ), Sadusi yema kinia (inia yakondo 38. Sadyusi ), onone pilku konopu kimbu siringi mele lupa, kerena niringi mele lupa. Andoko seringi mele yombomane kanokole ‘Ono ye peanga sumbi nilima’ ningu kanoringi-na-kolo konopu sukundu kalaro molorumu (Mateyu 23:25-26, 15:1-20). Akumunga ungu tondolo se Gallesia 2:6 molemo (U-Samuele 16:6-7 kepe). Yombo se naa kanopa molopili ono onono molkole nambolka uluma seringinje. Kanu yema konopuna perimu mele lupa, kangina molko seringi mele lupa, yombo selu yombo talo mele moloringimunga pilipale Yesusini wale awisili ono imbi lengendo iri topa “man bilong tupela maus” nirimu.
Se: man bilong giaman - Yesusini yombomando aku sipa nirimu ungu mare Mateyu 6:16, 7:5 kinia LLuku 6:42 selu, 12:56, 20:20-23, (boku marenga LLuku 11:44 kepe) molemo. Yesusini Pulu Yemonga ungu-manema pilku kondoko yomboma mane siringi yema kinia Parisi yema onondo nirimu mele Mateyu 15:1-9 (Mako 7:5-15) molemo, akuna ungu-pulu tondolo se molemo. Se Mako 12:15 molemo. U-Timoti 4:2, U-Pita 2:1 kananila.
Se: Mateyu 24:51 ungu talo lipa sere lepa molemo, “man bilong giaman em ol man bilong tupela maus”.
Se: Mateyu 6:2, “Ol dispela man i laik giamanim ol manmeri”, kanu yema sepe-koleana pungí lémo (Mateyu 24:51).
Se: LLuku 12:1 kanga-kolte selu-sipa mele (“giaman pasin bilong ol”). Yesusini Sadusi yemando aku sipa nirimula (Mateyu 16:6; Gallesia 2:13 kananila).
Akumanga pali Ingillisi-ungumu kinia Giriki-ungumu kinia “hypocrite” mindi nimba molemo. Gallesia 2:13 mindi Ingillisi boku lupa lupamanga ungu laye-kolte lupa lupa toringi molemo.
“tupela maus” molo “man bilong giaman” akumu Umbu-Unguna u bokuna i-sipu torumulula: “ ‘Yombomane olio kanokole ‘Pulu Yemonga ye sumbi nilima molemolo. Sika-unguma nilimulu.’ ningu kanangi.’ ningu kolo toko konopu talo seko kimbu silimili yema.” nimbu bokuna torumulu-na-kolo akumu ungu paa sulu. Kiniá ponjipa, “topele-mapele toli yema” kinia “topele-mapele toli yomboma” kinia Pulu Yemonga bokuna molemo-na-kolo kanu ungumu wallo-kolte pange selemonje. Wale mare ‘Ungu-pulumu paa sumbi siku piliangi.’ nimbu kanga-kolte sulu sepo torumulu molemo. “topele-mapele toli yema” bokuna Mateyu 23:pali, Mako 7:1-14 kanokole ungu-pulu sikamo paa mimi siku piliangi. Olio yombomane pali konopumane pilielemolo mele kinia, lopi sepo selemolo uluma kinia, kiyongo nimbu nilimulu unguma kinia, walte mona lemba (LLuku 12:3, 16:14-15). Olio papu molomolo mele ungu se LLuku 14:9-14 molemo. Olio naa molamili mele ungu talo LLuku 6:39-42, 20:45-47 molemo.
48. wasman
(Inia yakondo 16. hetman kanani.)
49. yis
Pellawa sikono molo berete ‘kalamili.’ ningu pellawa awisilina isi paa koltalo mundulimili kinia pellawa akolemo, akumunga ungu-iku mare Pulu Yemonga bokuna molemo. Ungu-iku peanga se Mateyu 13:33 molemo. Isi akumu mele peangamo, aku-na-kolo ungu-mane sikuli ungu-iku awisili tongendo ‘isi niringi akumu ulu-pulu-kiri molo ungu-mane kirimando niringi. Ungu kiri molo ulu kiri koltalo anju anju pulimú kinia ulu kiri awisili wendo wendo olemo molo yombo awisili ambolopa sepa kinjilimú. Akumunga ungu talo U-Korini 5:6-8 kinia Gallesia 5:7-10 kinia molemo. Pollone kanu isimu “wendo wendo liku toko eltaa!” nirimu akumu Wendo Oringi 12:8,15,17-20 akuna Pulu Yemone Isirele yombomando “sangi” nirimu mele pilipale aku sipa ungu-iku topa nirimunje. Parisi yema kinia Sadusi yema kinia ononga isimunga ungu talo Mateyu 16:6,11-12, LLuku 12:1-3, Mako 8:15 molemo. (Kanu yemanga ungu-pulu mare inia yakondo 11. kinia 38. kinia molemo.)