1 ꞌBa jaskan nde kuatsejen nganire Jesús xutare ndai ndachikun Tiberias. ꞌBa ꞌbitsaꞌen kuatsejenre: 2 Ñatjen tjindu Simón Pedro, ko Tomás xi ꞌba nde xuta ꞌñú ꞌmi, ko Natanael xi Caná tseꞌe, ngaꞌnde xi tijña ngajinre nangi Galilea, ko nistire Zebedeo, ꞌba ko kjaꞌe ngisa jó xutare. 3 ꞌBa ꞌbatsaꞌen Simón Pedro kitsure xi yaka:

—Tjiuti tefikꞌengi_ra̱.

ꞌBa nchja xi yakꞌa kitsure:

—ꞌBa=nde kuangikori̱ ji̱n.

ꞌBa ꞌbatsaꞌen ꞌetju ꞌba jaꞌasꞌen jngu barku, tunga kui nistjenbiu nijnguú tjiuti kitsuba. 4 ꞌBa kionga je mején tjisꞌe isen, Jesús jaꞌekasen ndai ndachikun, tunga xutare bi tsabexkun. 5 ꞌBa Jesús kitsure:

—Jun naꞌen, ¿a kje xuntsjajíun tjiuti?

ꞌBa nchjabiu kitsingojore:

—Junjun.

6 ꞌBa Jesús kitsu nganire:

—Ngate kixire barku chanikjoꞌo naꞌyanu ꞌba sa̱kunu.

ꞌBa ꞌba kitsaꞌen nchjabiu, ꞌba ninga bi nde ma kjenijinni naꞌyo, ngatꞌa ne nkjin tjiuti kiskaya naꞌyare. 7 ꞌBa ꞌbatsaꞌen xutare xi Jesús ꞌñu tsimején kitsure Pedro:

—¡Naꞌenna kibiu!

ꞌBa kionga Simón Pedro kjintꞌe nga ꞌba kikꞌinre: “Naꞌenna kibiu”, tsakaja ngani najñure (ngatꞌa tsꞌaxje) ꞌba kiskijin ndachikun. 8 ꞌBa jaskan xutare xi yakꞌa echuko barku nga inyaꞌbefe naꞌya xi kitse tjiuti, ngatꞌa bi kjin mare nangi kixiu ña kui inya, jeru mején jngu sientu metro. 9 ꞌBa kionga nchjabiu ꞌetukajen barku, tsabe ndiꞌi xꞌi, ꞌba jngu tjiuti kjijñajin ko niñuxtila. 10 ꞌBa Jesús kitsure:

—Ndeko masion tjiuti xi kisakunu.

11 Kui kjuañu tsijunni Simón Pedro barku ꞌba ꞌefe ña nangi naꞌya xi kitse tjiuti yaꞌe, xi jngu sientu masen ko ján mani. ꞌBa ninga tsa ꞌbatsaꞌen nkjin mani tjiutiu, tunga bi ꞌejnda naꞌyo. 12 ꞌBa Jesús kitsure nchjabiu:

—Ndechino.

ꞌBa nijnguú xutare kuán kakun nga tsiningiyare: “¿ꞌYá= ni ji?”, ngatꞌa be= nga Naꞌenna kibiu. 13 ꞌBa ꞌbatsaꞌen Jesús kitsitiñatꞌare ꞌba kiskjebe niñuxtilo ꞌba kitsjare nchjabiu, ꞌba ꞌba nde kitsaꞌen ko tjiutiu. 14 Kibi= xi majánni ndiya nga Jesús kuatsejenre xutare, jaskan nga je jaꞌaya nganire ngajinre mikꞌen.

15 ꞌBa kionga je tsakjen, Jesús tsiningiyare Simón Pedro:

—Simón, kiꞌndire Jonás, ¿a ngisa= ꞌñu nimejénnaa̱ ji nga ko mare nchjabi?

ꞌBa Pedro kitsingojore:

—Jun naꞌen, ꞌyani nga tsimejénra̱ ji.

ꞌBa Jesús kitsu nganire:

—Tikuendai chutsangana̱.

16 ꞌBa tsiningiya nganire xi majóni ndiya:

—Simón kiꞌndire Jonás, ¿a nimején=naa̱?

ꞌBa Pedro kitsingojo nganire:

—Jun naꞌen, ꞌyani nga tsimejénra̱ ji.

ꞌBa Jesús kitsure:

—Tikuendai chutsangana̱.

17 ꞌBa tsiningiya nganire xi majánni ndiya:

—Simón kiꞌndire Jonás, ¿a nimején=naa̱?

ꞌBa Pedro kuabare nga kichjaningiyare xi majánni ndiya: “¿A nimején=naa̱?”, ꞌba kitsure:

—Naꞌen, ꞌya yejeni xi tjin. ꞌYa=ni nga tsimejénra̱ ji.

ꞌBa Jesús kitsure:

—Tikuendai chutsangana̱. 18 Kjuakixi= xi texinra̱. Kionga saꞌe kiꞌndi, kichaja tajngu=ni najñuri tuxi kꞌuinni nituña ña kuamejénri. Tunga kionga je ku̱achingai, kjuente=ni ndsai ꞌba tjin= xi sikajari najñuri ꞌba kuekori ña ji bi mejénri kꞌuin.

19 Nga ꞌbi kitsu Jesús, kitsuyatitjuun jótsaꞌen kueya Pedro nga kuakutsejen kjuajere Naꞌenchana. ꞌBa jaskan kitsure ngayeje:

—Ndetjenngina.

20 ꞌBa ꞌbatsaꞌen Pedro kiskutsejen ngastun ꞌba tsabe nga tjenngire xutare xi Jesús ꞌñu tsimején, xi tijñatꞌa tiñare Jesús kionga kiskine xichine sꞌi pascua ꞌba xi jaꞌba je tsiningiyare: “Naꞌen, ¿ꞌyá xi singantsjari?” 21 ꞌBa kionga Pedro tsabe xutabiu, tsiningiyare Jesús:

—Naꞌen, ꞌba kui xutabi, ¿mé= xi ku̱anre?

22 ꞌBa Jesús kitsure:

—Tsa mejénna̱ nga janda kꞌuejña kaꞌnda nga kjuaꞌe ngañaa̱, ¿mé= kuendari? Ji ndetjenngina.

23 Jaskan kiya enbi ngajinre xi makjainre ngatꞌare Jesús, nga bi kueya xutare kibiu. Tunga bi ꞌba kitsu Jesús, tsa bi kueya xuto. Tu kitsu sani: “Tsa mejénna̱ nga janda kꞌuejña kaꞌnda nga kjuaꞌe ngañaa̱, ¿mé= kuendari?”

24 ꞌBa ndekuini xutare xi tsuyakixi ngatꞌare kibiu ꞌba kui kitsiꞌindu kibi. ꞌBa ꞌya=ni̱ nga kjuakixi= en xi kinchja.

25 ꞌBa tjin= ngisa kjaꞌe tsajmi xi kitsaꞌen Jesús. ꞌBa tsa jngu jngu sꞌe̱tꞌa ngayéje xi kitsaꞌen, biru sꞌe̱n ngayéje ngasunꞌndio xujun xi sꞌe̱tꞌa kibiu.