Kaheba Katilallasam natuli' Matius
Bätäna Issinna
Inde suha' natuli' mesa passikolanna Puang Yesus isanga Matius. Illaam inde suha', natuli' Matius diona Kaheba Katilallasam naua: Puang Yesus-um too indo To dilanti' la mepasalama' to puha nadandi Puang Allataala. Anna illaam inde suha', Puang Yesus si disa'bu'pi duka' “pessubunna tomahaja Daud” (1:1; 9:27; 12:23; 15:22; 20:30-31; 21:9, 15; 22:41-45). Deempi duka' natula' illaam inde suha' diona pa'palakoanna Puang Yesus ungganna'i ingganna indo Battakadanna Puang Allataala to puha napayolo lambam nabi (batai: 1:22-23; 2:5-6, 15, 17-18, 23; 3:3; 4:14-16; 8:17; 12:17-21; 13:35; 21:4-5, 16; 26:31; 27:9-10).
Indo Puang Yesus nadadiam mesa to Yahudi anna lobo' illaam peadasanna to Yahudi. Moi anna susi, sapo' indo Kaheba Katilallasam nababa, battu diua kasalamasam, tä' angga mandi lu lako to Yahudi, sapo' mala asam natahima ingganna hupatau illaam inde lino.
Illaam inde suha'na Matius, pembuda ma'tula' Puang Yesus diona la ma'pahentam Puang Allataala. Deem duka' napomasiä' Puang Yesus diona kalembasanna indo Pepaondonganna Musa.
Deem lima too'na tula'na Puang Yesus dilambi' illaam inde suha'na Matius: (1) Pepatuduanna Puang Yesus yabo mesa tanete. Illaam pepatuduam ia too natula' Puang Yesus indo la sihatanna napogau' mesa to untuhu'i si'da-si'da Puang Allataala (hondongam 5-7); (2) Pepakahi'dinna Puang Yesus lako passikolanna anna mala napalako manappa indo pengkähängam nabeem Puang Yesus (hondongam 10); (3) Sanaka-naka pehapangam napalao Puang Yesus diona ke ma'pahentam Puang Allataala (hondongam 13); (4) Pepatuduam diona la diaka susi ma'palako ke mendadim tau pentuhu'na Puang Yesus (hondongam 18); anna (5) Pepatuduam diona allo ma'katampasanna anna kasuleanna Änä' Mentolino, battu diua Puang Yesus (hondongam 24-25).
Lesoanna issinna
1. Kalohonganna anna kadadianna Puang Yesus (1:1-2:23)
2. Pengkähänganna Yohanes to si mantedo' (3:1-12)
3. Puang Yesus ditedo' anna napa'sändä'i tomahajanna setam (3:13-4:11)
4. Pengkähänganna Puang Yesus lako hupatau dio Galilea (4:12-18:35)
5. Pa'lao-laona Puang Yesus mengkalao dio Galilea sule längäm Yerusalem (19:1-20:34)
6. Ma'katampasanna pa'palakoanna Puang Yesus dio Yerusalem anna lako sikahuku'na (21:1-27:66)
7. Katuboanna sule Puang Yesus anna umpa'paitaam kalena (28:1-20)
1
Kalohonganna Puang Yesus
1:1-17
Luk. 3:23-38
Susi inde kalohonganna Yesus Kristus peampoanna tomahaja Daud, peampoanna Abraham.
Keänä' Abraham undadiam Ishak,
keänä' Ishak undadiam Yakub,
keänä' Yakub undadiam Yehuda anna ingganna solasubunna.
Keänä' Yehuda undadiam Peres anna Zerah nasibalii Tamar,
keänä' Peres undadiam Hezron,
keänä' Hezron undadiam Ram,
keänä' Ram undadiam Aminadab,
keänä' Aminadab undadiam Nahason,
keänä' Nahason undadiam Salmon,
keänä' Salmon undadiam Boas nasibalii Rahab,
keänä' Boas undadiam Obed nasibalii Rut,
keänä' Obed undadiam Isai,
keänä' Isai undadiam tomahaja Daud,
keänä' Daud undadiam Salomo nasibalii indo bainena to mate Uria,* to mate Uria, 2Sam. 11:3-26.
keänä' Salomo undadiam Rehabeam,
keänä' Rehabeam undadiam Abia,
keänä' Abia undadiam Asa,
keänä' Asa undadiam Yosafat,
keänä' Yosafat undadiam Yoram,
keänä' Yoram undadiam Uzia,
keänä' Uzia undadiam Yotam,
keänä' Yotam undadiam Ahas,
keänä' Ahas undadiam Hizkia,
10 keänä' Hizkia undadiam Manasye,
keänä' Manasye undadiam Amon,
keänä' Amon undadiam Yosia,
11 keänä' Yosia undadiam Yekhonya anna ingganna solasubunna. Wattu eta too dipassa to Israel dipahhim lako Babel.
12 Puhai dipahhim lako Babel,
iya keänä'um Yekhonya undadiam Sealtiel,
keänä' Sealtiel undadiam Zerubabel,
13 keänä' Zerubabel undadiam Abihud,
keänä' Abihud undadiam Elyakim,
keänä' Elyakim undadiam Azor,
14 keänä' Azor undadiam Zadok,
keänä' Zadok undadiam Akhim,
keänä' Akhim undadiam Eliud,
15 keänä' Eliud undadiam Eleazar,
keänä' Eleazar undadiam Matan,
keänä' Matan undadiam Yakub,
16 keänä' Yakub undadiam Yusuf indo muanena Maria to undadiam Puang Yesus battu diua To dilanti' la mepasalama'. To dilanti' la mepasalama': illaam basa Yunani diuaam Kristus; illaam basa Ibrani diuaam Mesias.
17 Dadi, mengkalao dio Abraham sule lako tomahaja Daud, sapulo appa' lapi'na. Mengkalao dio Daud sule lako wattunna dipahhim to Israel napahhim to Babel, sapulo appa' lapi'na. Anna mengkalao dio wattunna dipahhim to Israel sule lako kadadianna To dilanti' la mepasalama', sapulo appa' oo duka' lapi'na.
Kadadianna Puang Yesus
1:18-25
Luk. 2:1-7
18 Susi inde tulasanna indo anna dikebättänganni Yesus Kristus sule lako disubungam: Puhai mekutana Yusuf la umpobaine Maria, iya kebättä hia. Moi anna tä'pi deem sola muane, sapo' kebättä aka kakuasaanna Penaba Maseho. 19 Indo Yusuf mesa to meada', dadi maelo' la ungkattui Maria. Sapo' la mengkamma'-kamma' ungkattui aka moka la umpakasihi'i dio olona tau buda.
20 Mane mahassam ma'pikki'-pikki' Yusuf la ungkattui Maria, iya napalosaim mesa malaika' nasua Debata illaam pangngimpi nauaam: “O Yusuf peampoanna tomahaja Daud, daa ummahea' umpobaine Maria, aka indo bättäna, kakuasaanna Penaba Maseho umpadadii. 21 La undadiam mesa änä' muane-ane anna la ussangai Yesus Yesus: kalembasanna, Debata mepasalama'. aka Ia la ullappasam umma'na dio mai dosana.”
22 Ia asanna ia too dadi anna mala sule lako indo kadanna Debata napalombum nabi naua: 23 “Patananniia' talinga, indo änä' daha la kebättä lambi' undadiam mesa änä' muane-ane anna la disangai Imanuel, kalembasanna ‘Puang Allataala muundu'kia'.’ ”§ Yes. 7:14.
24 Tappana milli' Yusuf, iya napalako siaham indo napahentaam malaika'na Debata lambi' umpobaine Maria. 25 Sapo' tä' deem moi podo la siampe'um metindo sule lako keänä' Maria. Tappana dadi, iya nasangaim Yusuf indo änä'-änä', Yesus.

*1:6: to mate Uria, 2Sam. 11:3-26.

1:16: To dilanti' la mepasalama': illaam basa Yunani diuaam Kristus; illaam basa Ibrani diuaam Mesias.

1:21: Yesus: kalembasanna, Debata mepasalama'.

§1:23: Yes. 7:14.