1 मिनु दाऊद पिप शुश बर्स दुम्‍शा, थम खूशो दुम्‍माक्‍त। मिनु वा फेक्‍सेनु, यो महोमाक्‍त। 2 मोपतीके मेको आ गेय पाइबपुकीम मेको कली “आंइ प्रभु पिप इन कली कोव़चा कली नु इन काल्‍गी पचा कली, गो कन्‍ने मीश आल का माल्‍नीकी। मिनु मेको आंइ प्रभु पिप, इन कली होपाइक्‍चा कली इन नु इप्‍ल” देंमा बाक्‍त। 3 मिनु मेकोपुकीम इस्राएल रागी नेल्‍लेम दारशो मीश आल का माल्‍मेनु, शुनेम सहर ङा अबीशाग, कन्‍ने मीश आल कली थित्‍मे बाक्‍त। मिनु मेको कली पिप आ बाक्‍तीक चाक्‍ग्‍मे बाक्‍त। 4 मेको थम दारशो मीश आल बाक्‍माक्‍त। मिनु मेकोमी पिप कली कोव़चा नु आ काल्‍गी पचा गोवा बाक्‍त। तन्‍न पिप मेको नु मबाक्‍माक्‍त।

5 मिनु हग्‍गीथ आ तौ अदोनीयाहम आंम कली ठेयब सेल्‍शा “गोन पिप दुम्‍नुङ” देंचा गोवा बाक्‍त। मोपतीके मेकोम बग्‍गीपुकी, शारा ङोइक्‍बपुकी नु आ ङोंइङोंइती दोरपाइक्‍चा कली ५० जना मुर ठीक पवा बाक्‍त। २सामुएल ३:४; २सामुएल १५:१ 6 मिनु मेको आ आफोम मेको कली “गे मारदे मोदेंशो पवी?” दे गेनायो महुइक्‍ता बाक्‍त। अदोनीयाह यो थम दारशो मुर का बाक्‍माक्‍त। मेको अब्‍सालोम क्‍येङा नोले जरमेशो बाक्‍माक्‍त। 7 मिनु मेकोमी सेरूयाह आ तौ योआब नु चढ़ेब अबीयाथार नु लोव़ गारपदा बाक्‍त। मिनु मेको निक्‍शीमी अदोनीयाह कली वारच पदसे बाक्‍त। १राजा २:२७ 8 तन्‍न चढ़ेब सादोक, येहो-यादा आ तौ बेनायाह, परमप्रभु यावे आ लोव़ पाइब नाथान, शिमेइ, रेइ नु दाऊद आ लडाइ पाइबपुकी चहिं अदोनीयाह नु मगारमा बाक्‍त।

9 मिनु अदोनीयाहमी एन-रोगेल आ नेक्‍था ङा सोहेलेथ देंशो फुल्‍लुम भेडा, ब्‍यफ नु दोम्‍शो बस्‍तु भाव चढ़ेवा बाक्‍त। मिनु मेकोमी आ लोक्‍ब नेल्‍ले, पिप आ तौ नेल्‍ले नु पिप आ ठेयब गेय पाइब यहूदा ङा मुर नेल्‍ल आन कली ब्रेत्‍तीमी बाक्‍त। यहोसु १५:७-८ 10 तन्‍न मेकोमी परमप्रभु यावे आ लोव़ पाइब नाथान, बेनायाह, लडाइ पाइबपुकी नु आ लोक्‍ब सोलोमन आन कली चहिं मब्रेत्‍ता बाक्‍त।

11 मिनु नाथानमी सोलोमन आ ममा बाथ्‍शेबा कली “मार गे हग्‍गीथ आ तौ अदोनीयाह आंइ प्रभु दाऊद आ मतुइक्‍थु पिप दुम्‍त देंशो लोव़ मनेंनी? 12 मोपतीके मुल नेनीन। आंम इन कली नु इन तौ सोलोमन कली दोपा प्रोंइने चाम्‍सीबा, मेको आ पर्बम गो इन कली सल्‍ला गेनुङ। 13 मुल रीब पा लशा, पिप दाऊद कली ग्रुमीन। मिनु मेको कली ‘आं प्रभु, मार, गे इन वाइलीम नु थमा पा इ तौ सोलोमन आं नोले पिप दुम्‍ब। मिनु मेको आं नित्‍तीकेम निप्‍ब देंशो मननी ङा? मिनु मुल मारदे अदोनीयाह कका पिप दुम्‍मे?’ देनीन। १इतिहास २८:५-१० 14 मिनु मोपा गे पिप नु लोव़ पना पन बाक्‍नीनु, गो जाक्‍नुङ। मिनु गो इन देंशो लोव़म लोव़ तेम्‍नुङ” देंमाक्‍त।

15 मिनु बाथ्‍शेबा पिप आ बाक्‍‍तीक कोठाम ओव़माक्‍त। पिप थम खूशो दुम्‍शो बाक्‍माक्‍त। मेना शुनेम सहर ङा अबीशागमी मेको आ काल्‍गी पना पन बाक्‍माक्‍त। 16 मिनु बाथ्‍शेबाम पिप आ ङोंइती बाप्‍शा आ पोक्‍च थेक्‍शा सेउ पवा बाक्‍त। मिनु पिपम “गे मार पुनी” दे मदा बाक्‍त। 17 मिनु मेकोमी पिप कली “आं प्रभु, गे इन वाइलीम, आं कली परमप्रभु यावे, इन परमप्रभु आ ङोंइती कसम जशा ‘इ तौ सोलोमन आं नोले पिप दुम्‍ब। मिनु आं नित्‍तीकेम निप्‍ब’ देंशो ननी। 18 तन्‍न मुल अदोनीयाह कका पिप दुम्‍‍त। एको लोव़ आं प्रभु पिपम मतुइश्‍शो बाक्‍नीनी। 19 मेकोमी शुश ब्‍यफ नु दोम्‍शो बस्‍तु भाव नु भेडा क्‍योरशा चढ़ेशो बाक्‍ब। मिनु पिप आ आल नेल्‍ले, चढ़ेब अबीयाथार नु लडाइ पाइब आन नेल्‍ल क्‍येङा ठेयब मुर योआब नेल्‍ल आन कली ब्रेश्‍शो बाक्‍ब। तन्‍न इन गेय पाइब सोलोमन कली चहिं मब्रेश्‍शो बाक्‍ब। 20 मिनु मुल आं प्रभु पिप, इन नोले सु पिप दुम्‍बा? मिनु इन नित्‍तीकेम सु निप्‍बा, दे तुइक्‍चा कली इस्राएल ङा मुर नेल्‍लेम इन लां कोव़शो बाक्‍नीम। 21 मो मदुम्‍‍त हना, नोले गे आं प्रभु पिप इन किकी पिपी नु इप्‍नीनी। मिनु गो नु आं तौ सोलोमन आंस कली मरिम्‍शो पाइब खोदेंशो सेल्‍नीम” दे बाथ्‍शेबाम देंमाक्‍त।

22 मिनु मेको पिप नु लोव़ पना पन बाक्‍मेनु, परमप्रभु यावे आ लोव़ पाइब नाथान जाक्‍माक्‍त। 23 मिनु पिप कली “परमप्रभु यावे आ लोव़ पाइब नाथान जाक्‍शो बाक्‍ब” देंशो लोव़ नेंपदमे बाक्‍त। मिनु नाथान जाक्‍शा, खप सम्‍मन बाप्‍शा, पिप कली सेउ पवा बाक्‍त। 24 मिनु नाथानम “आं प्रभु पिपमी ‘अदोनीयाह आं नोले पिप दुम्‍ब। मिनु आं नित्‍तीकेमी निप्‍ब’ देंशो ननी देय मननी? 25 मेको मुलाक्‍ती उइ ब्रुप्‍शा शुश ब्‍यफ, दोम्‍शो बस्‍तु भाव नु भेडा क्‍योरशा चढ़ेशो बाक्‍ब। मिनु मेकोम पिप इन आल नेल्‍ले, लडाइ पाइब आन ठेयब मुर योआब नु चढ़ेब अबीयाथार नेल्‍ल आन कली ब्रेश्‍शो बाक्‍ब। मिनु मुल मेको नेल्‍ल मेको आ ङोंइती जना जन, तूना तून ‘पिप अदोनीयाह गेना हना यो ब्रोंइशा बाक्‍ल’ देंना देंन बाक्‍नीम। 26 तन्‍न मेकोम इन गेय पाइब आं कली, चढ़ेब सादोक, येहो-यादा आ तौ बेनायाह नु इन गेय पाइब सोलोमन आंइ कली मब्रेत्‍तीकी। 27 मार, आं प्रभु पिप इन दें‍तीके मो पशो नमी? मिनु गो इन गेय पाइब आंइ कली चहिं इन नोले सु पिप दुम्‍ब, दे मशेंदीनी” देंमाक्‍त।

28 मिनु पिप दाऊदमी “बाथ्‍शेबा कली आं नेक्‍था ब्रेत्‍तीन” देंमाक्‍त। मिनु मेको पिप आ ङोंइती जाक्‍शा राम्‍माक्‍त। 29 मिनु पिपमी “गो आं कली आं श्‍येत नेल्‍ल रे प्रोंइब नु गेना हना यो बाक्‍ब परमप्रभु यावे ब्रोंइशा बाक्‍शो खोदेंशो पा गो कसम जाइनुङ। 30 ङोंइती गो परमप्रभु यावे, इस्राएली आन परमप्रभु आ नेंमी इ कली ‘इ तौ सोलोमन आं नोले पिप दुम्‍ब। मिनु आं नित्‍तीकेम निश्‍शा, आं पा ङा पिप दुम्‍ब’ देंती। मुलाक्‍त गो मेको कसम जशो खाप्‍नुङ” देंमाक्‍त। 31 मिनु बाथ्‍शेबा पिप आ ङोंइती आ पोक्‍च थेक्‍शा बाप्‍शा “आं प्रभु पिप दाऊद गेना हना यो ब्रोंइशा बाक्‍ल” देंमाक्‍त।

32 मिनु पिप दाऊदम “चढ़ेब सादोक, परमप्रभु यावे आ लोव़ पाइब नाथान नु येहो-यादा आ तौ बेनायाह आन कली ब्रेत्‍तीने” देंमाक्‍त। मिनु मेको पिप आ ङोंइती जाक्‍मा बाक्‍त। 33 मिनु पिपम मेको आन कली “गे इन प्रभु, आं ठेयब गेय पाइब आन कली ल‍तीन। मिनु आं तौ सोलोमन कली आं खच्‍चरम ङोइक्‍पाइश्‍शा गिहोन सम्‍म ल‍तीन। 34 मिनु मेकेर चढ़ेब सादोक नु परमप्रभु यावे आ लोव़ पाइब नाथानमी मेको कली तेल लुक्‍शा इस्राएल ङा पिप सेल्‍सेक्‍ल। मिनु तुराही ताप्‍शा ‘पिप सोलोमन गेना हना यो ब्रोंइशा बाक्‍ल’ देंमल। 35 मिनु मेको आ नोले खोतीन। मेको जाक्‍शा आं नित्‍तीकेम नित्‍चा माल्‍ब। मिनु मेकोम आं पा ङा सासन पचा माल्‍ब। मारदे हना गो मेको कली इस्राएल नु यहूदाम सासन पचा कली योव़ता” देंमाक्‍त। 36 मिनु येहो-यादा आ तौ बेनायाहम पिप कली “आमेन। परमप्रभु यावे, आं प्रभु पिप आ परमप्रभुमी मोदेंशोन पवल। 37 दोपा परमप्रभु यावे आं प्रभु पिप इन नु बाक्‍मे, मोपान सोलोमन नु यो बाक्‍ल। मिनु मेको आ राज्‍य आं प्रभु पिप दाऊद आ राज्‍य क्‍येङा यो सक्ति पाइश्‍शो सेलल” देंमाक्‍त।

38 मिनु चढ़ेब सादोक, परमप्रभु यावे आ लोव़ पाइब नाथान, येहो-यादा आ तौ बेनायाह नु केरेथी नु पेलेथी उइ ब्रुप्‍शा सोलोमन कली दाऊद पिप आ खच्‍चरम ङोइक्‍पाइश्‍शा गिहोन सम्‍म लदमे बाक्‍त। २सामुएल ८:१८ 39 मिनु चढ़ेब सादोकमी परमप्रभु यावे आ ताम्‍बु रे तेल वोइश्‍शो ग्रोव़ ग्रुंइशा सोलोमन कली लुक्‍शा पिप सेला बाक्‍त। मिनु मेकोपुकीम तुराही ताप्‍मे बाक्‍त। मिनु मुर नेल्‍लेम ठेयब सेंदा पा “पिप सोलोमन गेना हना यो ब्रोंइशा बाक्‍ल” देंमा बाक्‍त। १इतिहास २३:१; २सामुएल २९:२२ 40 मिनु मुर नेल्‍ल ठेयब सेंदा पा ग्‍येरशा बांसुरी ताप्‍शा, मेको आन नो‍नोले इर ङोइश्‍शा लमा बाक्‍त। मिनु मेको आन ग्‍येरशा रेयके पशोम रागी नेल्‍ल मुरदा बाक्‍त।

41 मिनु अदोनीयाह नु आ मुरपुकीम मेको रेयके नेन्‍मे बाक्‍त। मेना मेकोपुकीमी नक भोज जने ला थुम्‍शो बाक्‍मा बाक्‍त। मिनु योआबमी तुराही ग्रीशो नेंशा “सहरम मार रेयके पामे?” देंमाक्‍त। 42 मिनु मेकोमी मो देंन देंना चढ़ेब अबीयाथार आ तौ योनाथन जाक्‍माक्‍त। मिनु अदोनीयाहमी मेको कली “खिंङगा पिवो। गे रिम्‍शो मुर बाक्‍नेवे। मिनु गे थमा पा रिम्‍शो लोव़ चाक्‍गी माइ” देंमाक्‍त। २सामुएल १५:२७,३६ 43 मिनु योनाथनमी अदोनीयाह कली “ममाइ, इं प्रभु पिप दाऊदमी सोलोमन कली पिप सेल्‍तु। 44 पिपमी चढ़ेब सादोक, परमप्रभु यावे आ लोव़ पाइब नाथान, येहो-यादा आ तौ बेनायाह नु केरेथी नु पेलेथी आन कली मेको नु सोइक्‍ताक्‍व। मिनु मेकोपुकीम मेको कली पिप आ खच्‍चरम ङोइक्‍पाइश्‍शा लाइक्‍तेक्‍म। 45 मिनु चढ़ेब सादोक नु परमप्रभु यावे आ लोव़ पाइब नाथानमी मेको कली गिहोनमी तेल लुक्‍शा, पिप सेल्‍ताक्‍स। मिनु मुल मेकोपुकीम मेको कली ग्‍येरशा इर खिं लाइक्‍तेक्‍म। मोपतीके सहरम रेयके दुम्‍शो बाक्‍ब। गेपुकीम मेको रेयके नेंशो बाक्‍नीनी। 46 मुल सोलोमन पिप आ नित्‍तीकेम निप्‍ब। 47 मिनु पिप आ खिं ङा ठेयब गेय पाइब मुरपुकीमी इं प्रभु पिप दाऊद कली ‘इन परमप्रभुम इन तौ सोलोमन आ नें इन क्‍येङा यो सक्ति पाइश्‍शो सेलल। मिनु मेको आ नित्‍तीक इन नित्‍तीक क्‍येङा यो सक्ति पाइश्‍शो सेलल’ देंथ लशो बाक्‍नीम। मिनु पिपमी आ खाटमी बाप्‍शा 48 ‘परमप्रभु यावे, इस्राएली आन परमप्रभु ठेयब बाक्‍ब। मुलाक्‍ती मेकोमी आं सेस बाक्‍ना बाक्‍न, आं कली तपाइक्‍चा कली आं नित्‍तीकेम पिप का निप्‍पाइक्‍तु’ दें‍त” देंमाक्‍त।

49 मोपतीके अदोनीयाह आ मुरपुकी हिंशा छुल छाल बोक्‍शा आन लां खोदमे बाक्‍त। 50 मिनु अदोनीयाह आंमा यो सोलोमन क्‍येङा हिंशा लशा, चढ़ेतीक ङा ग्रोव़ ग्‍याइक्‍ता बाक्‍त। 51 मेको नोले सोलोमन कली “अदोनीयाह पिप क्‍‍येङा हिंशा, चढ़ेतीक ङा ग्रोव़ ग्‍याइश्‍शा ‘पिप सोलोमनम आ गेय पाइब आं कली मक्‍योरनुङ, दे कसम जवल’ देंशो बाक्‍ब” देंशो लोव़ नेंपदमे बाक्‍त। १राजा २:२८ 52 मिनु सोलोमनमी “मेकोमी गो ओदेंब पाइब मुर नङ, देंने चाप्‍तु हना, मेको के आ चां का यो महेम्‍ब। तन्‍न मेकोम मरिम्‍शो पशो थिंसाक्‍व हना, मेको थमा पा साइक्‍चा पुंइसीब” देंमाक्‍त। २सामुएल १४:११ 53 मिनु पिप सोलोमनम मुर आन कली सोइश्‍शा, मेको कली चढ़ेतीक रे उइ तोइक्‍पदा बाक्‍त। मिनु अदोनीयाह जाक्‍शा, पिप सोलोमन कली सेउ पवा बाक्‍त। मिनु सोलोमनम मेको कली “इ खिं लावो” दे मदा बाक्‍त।