हितोपदेस
ब्रेक्‍ब मुर: सोलोमनमी मुर आन देंशो लोव़ खुप्‍शा नु आं थुं ङा तुइक्‍तीक लोव़ एको किताबम ब्रेक्‍शो बाक्‍ब। गेना ब्रेक्‍शो: एको किताब सोलोमोन आ सासन पची ना ९६५-९२६ बि. सी.म ब्रेक्‍शो बाक्‍ब।
गेना ब्रेक्‍शो: एको किताब सोलोमन आ सासन पची ना ९६५-९२६ बि. सी. ब्रेक्‍शो बाक्ब।
मार ब्रेक्‍शो:
१. सोलोमनम “जोक्‍ब तुइक्‍ब थुं मालीन” हितोपदेस १:- ९:-
२. सोलोमोनम “हेंथे मगाक्‍कीन” हितोपदेस १०:-२४:३४
३. अरु जोक्‍ब तुइक्‍बम ब्रेक्‍‍शो रिम्‍शो पतीक लोव़ हितोपदेस २२:१७-२४:३४
४. सोलोमनम “मुर आन दातेमी रिम्‍शो बाक्‍कीन” हितोपदेस २५:-२९:-
५. आगुर नु लेमुएलम “खिं ङा मुर ग्‍येरसीशो दुम्‍चा माल्‍नीम” दे ब्रेक्‍शो बाक्‍ब। हितोपदेस ३०:-३१:-
हितोपदेस किताब ङा शेंसीचा माल्‍शो लोव़: परमप्रभु यावे कली मान पा हिंब मुर जोक्‍ब तुइक्‍ब दुम्‍शा, रिम्‍शो दुम्‍‍नीम।
1
एको किताब आ शेंशो लोव़
एको दाऊद आ तौ इस्राएली आन पिप सोलोमन आ देंशो लोव़ बाक्‍ब। १राजा ५:९-१२ एको किताबम तुइक्‍तीके नु अर्ती टिचा आ पर्बम शेंसीतीके लोव़ बाक्‍ब। मेको शेंसाक्‍नी हना, गे रुप्‍ब नु जोक्‍ब तुइक्‍ब दुम्‍नीनी। मिनु ब्रेक्‍ब मुर आ अर्ती सुमी टीबा, मेकोमी तुइश्‍शा गेय पने चाप्‍ब। ठीक पतीके, ठीक निसाफ पतीके नु कुल मकोव़थु रिम्‍शो पने चाप्‍ब। मारेइ मजोक्‍ब आन कली निप्‍स खाप्‍शा गेय पचा शेंब। ठिटा आन कली जोक्‍ब नु होस पाइब सेल्‍ब। जोक्‍ब तुइक्‍ब नेल्‍लेमी एको लोव़ रिम्‍शो पा नेंबमी तेम्‍शा शुश रुप्‍ब दुम्‍नीम। निप्‍स पाइश्‍शो मुर जोक्‍ब दुम्‍शा, एको देंतीक लोव़, कथा, जोक्‍ब तुइक्‍ब आन लोव़ नु ख्रुइश्‍शो लोव़ रुप्‍नीम। परमप्रभु यावे कली मान पा हिंचा तुइक्‍तीक दुम्‍चा कली गोतीक बाक्‍ब। मूर्खपुकीमी तुइक्‍‍तीके नु अर्ती मदाक्‍नीम। हितोपदेस ८:१३; हितोपदेस ९:१०; अय्‍युब २८:२८; भजन संग्रह १११:१०
मरिम्‍शो पाइब नु मगाक्‍को
आं तौ, इ आफ आ अर्ती नेनो। इम्‍मा आ शेंशो मप्रोनो। हितोपदेस ६:२०; ब्‍यवस्‍था २१:१८-२१ मारदे हना मेको इ पिया ङा ग्‍योम्‍तीके नु इ कली सुन के माला नस। 10 आं तौ, मरिम्‍शो पाइब मुरुम इ कली “हेंथे पय” दे लोव़ पाम्‍तेक्‍म हना, मेको आन लोव़ मबिस्‍सो। हितोपदेस १६:२९; ब्‍यवस्‍था १३:७-९ 11 मेकोपुकीमी “पिवो, मुर साइक्‍चा कली बाप्‍शा बाक्‍य। रिम्‍शो पाइब कली बाप्‍शा, 12 मेको कली बेक्‍शो मुर आन बाक्‍तीकेम सोइक्‍तय। गो मेको कली सेसीन तुरसुम सोइक्‍तय। 13 मिनु गोपुकीम आ बाक्‍शो शोंप नेल्‍ल रोइक्‍नय। मेको रोइश्‍शोमी आंम आंम खिं प्रिंनय। 14 गे, गोपुकी नु लते हना, नेल्‍ल गारशा योक्‍सय” देंतेक्‍म हना यो, 15 आं तौ, गे मेकोपुकी नु मलावो। मेकोपुकी नु मगाक्‍को। 16 मारदे हना मेकोपुकी मरिम्‍शो गेय पचा कली रीब पा दोरनीम। हुश ख्राक्‍श पोक्‍चा कली चुइक्‍नीम। 17 चिक्‍बीमी तचा ङा पा ब्‍वारद दाइश्‍शो शोर गाक्‍शो गेय बाक्‍‍ब। 18 मेको मुरपुकी साइक्‍चा पुंइसीचा कली बाप्‍शो बाक्‍नीम। आंमान खतम दुम्‍चा कली बाप्‍शा बाक्‍नीम। 19 मुर आन मार मार रोइश्‍शा, तेल्‍सीबपुकी मोदेंशो पा साइक्‍चा पुंइसीनीम।
तुइक्‍‍तीकेमी मुर आन कली अरेब
20 लां मेर तुइक्‍‍तीके लोव़ नेंसीब। सहर मेर आ सेंदा ग्रूब। हितोपदेस ८:१-३ 21 मेको शुश मुर आन देल्‍‍तीके मेर ब्रेन्‍ना ब्रेन्‍न बाक्‍ब। सहर ओव़तीक ठेयब लाप्‍चोमी आ लोव़ पाइब। 22 मार लोव़ पाइब देंशा हना “गे मारेइ मजोक्‍बपुकी, गेना सम्‍म मारेइ मजोक्‍ब दुम्‍चा दाक्‍नीनी? गे शुक्‍शी पाइबपुकी, गेना सम्‍म शुक्‍शी पचा दाक्‍नीनी? गे मूर्खपुकी, गेना सम्‍म तुइक्‍तीके कली काइ मदाक्‍‍नीनी? 23 गे आं हुइश्‍शो लोव़ नेनीन। आं मिम्‍शो इन कली देंनुङ। आं लोव़ इन कली तुइक्‍पाइक्‍नुङ। 24 मिनु गो इन कली ब्रेत्‍तुनु, गेपुकीम मनेंनी। गो आं गुइ हामुनु, सुइ मपिनी। यसैया ६५:२,१२ 25 आं अर्ती नेल्‍ल मटितीके, आं हुइश्‍शो नेंचा मदाक्‍तीके, 26 गो यो गे श्‍येत जनी ना, रिश्‍शा बाक्‍नुङ। मिनु गे शुश हिंनीना, गो शुक्‍शी पाइनुङ” दे लोव़ पाइब। ब्‍यवस्‍था २८:६३ 27 शुश हिंतीके ठेयब फश खोदेंशो पा इन तारी जाक्‍त हना, श्‍येत फश गिवार खोदेंशो पा इन तार जाक्‍त हना, श्‍येत नु हिंतीकेम इन कली सुम्‍तु हना, 28 मेना आं कली थोनीनु, गो इन कली लोव़ मलेत्‍नुङ। गेपुकीमी आं कली शुश माल्‍तीनी हना यो, मथित्‍नीनी। यसैया ५९:२; मीका ३:४ 29 मेकोपुकीम जोक्‍तीक कली काइ मदाक्‍तीके नु परमप्रभु यावे कली मान मपथु महिंतीके, 30 आं अर्ती मनें‍तीके, आं हुइश्‍शो नेंचा मदाक्‍तीके, 31 मेकोपुकीमी आन आन पशो मरिम्‍शो गेय आन इनाम तचा माल्‍नीम। मिनु आन आन मरिम्‍शो पतीकेमी ब्रीमल। 32 मारदे हना मारेइ मजोक्‍ब आन मटितीके साइक्‍चा पुंइसीनीम। मूर्ख आन मारेइ ममिम्‍तीके खतम दुम्‍नीम। 33 तन्‍न सु सुम आं लोव़ नेंनीमी, मेकोपुकी श्‍येत मजाइनीमी। महिंथु, रिम्‍शो दुम्‍शा बाक्‍नीमी।