1 Moó kári Mooseefa narí áiraamaku Yeetaroona Midianna máqannaa amaana máqaki aanáiqi kírafa máruna sipsípasaa faqa mimmísaa faqa rakísi márinau. Moó kári Mooseefa narí áiraamaku sipsípauqa faqa mimmíuqa faqa nífiqa máreenoo aadána máqa máaqa fíqareenoo Hooreeba náaquqara áaqanasaa múruqoofaqa ándanda néemarufanoo rakísi márinau. 2 Miqí márufanoo Ánutuna qangiroo Mooseena áfusaa tautúmma amaqáseenoo kooroomáfinoo saqári amimikíqari idáùru kambíqanau. Mooseefa miná qáfoofanoo idáuru firaafá qáidanoo sía mi saqári amimína qanau. 3 Mooseefa miná qáfamaseenoo moó áinainammifoo sáina aaqá óonuree qáfaa, nánaree saqári amimi sía qáidanoo fee qímasee aaqá finau.

4 Mooseefa quándakinoo aaqá óonu roofanóo Ánutufa minakíqari Mooseena áaraidanoo qinau. Moosee Moosee qinau. Mooseefa iriséenoo foó qímaseenoo qinau. Qinée máà máridaqa. 5 Miqí qímasoofanoo Ánutufa kafáa qímaminau Moosee sía anée adeedí ánia. Aneenná áiku ánaamu raipáqusee miqóo maría. Náaquqara maqa maaqa márinara aneenná áiku ánaamu màra áqua. 6 Miqí qímaseenoo Ánutufa kafáa qímaminau. Qinée aní ákoona Ánutusa máridaqa. Abarahaamána fáqa Isakeena fáqa Yakooboona fáqa Ánutusa máridaqa. Mooseefa mi ufána iriséenoo Ánutuna qáfaanoo qímaseenoo rufíaseenoo óorisaa ititánau.

7 Ánutufa kaifáa Mooseena qímaminoo qinau. Qiní faiqí ánaasee Isaraee máqannaasa Isipa máqasaa firaa aupurarana ními máriafaqa níndafaidaqa. Misá qiníara maasá afeeka rakísira rakísi máriasa nísaukukinaana rafía quqáannee qímasee qiní dáaree máriafaqa íridaqa. Qinée misá aiqáma áupurarana máree márianara íridaqa. 8 Qinée innaarúnaindari qumurée Isipa maqánnaasa nísaukukinaana maréeqee firaa máqa máaqa áinoo faqáa máqa aiqáma ainaina rairaá ímariqoo quqáanaura. Mi maqánasaa Kannaana máqannaasa fáqa Heeta máqannaasa faqa Amoora máqannaasa faqa Peerisita máqannaasa faqa Hifita máqannaasa faqa Yeebusa máqannaasa faqa misáuqa máriaqoo quqánnisaanaura. 9 Isipa máqannaa Heeburu máqannaa radámi máriafaqa misá qikí ráqee máriafa dóo qiní dáaqoosaa rifaqa níqafaidaqa. 10 Qinée aní Isipa máqannaa karaambáiqa Fáraoo finnai aiqáanana óonureenana qiní faiqí ánaasee indaarúnni kámma nímaqainaqa Fáraoona maqa máaqakiqari quqásee ániaqa.

11 Mooseefa mi ufána iriséenoo Ánutunara qáòo qídanoo qinau. Akasáa qinée maaqírausa náqimáseeqee Fáraoo finnai óonuree fee Isaraee máqannaasa Isipa máqa máaqaki máriana nífiqaanaúree. 12 Ánutufa iriséenoo qinau. Qinée anífaqa márianana anee Isaraee máqannaasa Isipa máqasaa qaraana nífiqamaree maa aaqannásaa anirée qiní qimoo qifáranoo. Miqínna oosanafa qinée aní aiqáafannanara kooroo íannoo.

13 Mooseefa iriséenoo kafáa Ánutuna qímaminoo qinau. Anée qiní diqiqáanáqa qinée Isaraee máqannaa ínnannai óonu réeqa maaqí qianáura. Ínni nísaifaqausa nínaakusa Ánutufa qiní diqiqaifaqá ínni qímannimirara ánidaqa. Miqí qíanaqa misá maaqí qímasee qiní ireefáranoo. Miná áuqu yáfee máridanoo fee qífaqa qinee náqifee qímasee qímannimianauree. 14 Ánutufa iriséenoo Mooseena qímaminoo qinau. Qinée qeeqá márunausa qídaqa. Anee maaqí qímasee qímannimia. Naríara qinée qeeqá márunausee qímarifa diqiqaifaqa ínnee iannai ánidaqa. 15 Maaqí qímasee kafáa moó fáqa qímannimia. Ínni níkausa Abarahaammána fáqa Isakeena fáqa Yakooboona fáqa Ánutusa Yáaweesa máridaqa aní Isaraee máqannaa iannái aní aqiqáidaqa. Qiní mi duqúfa náaruara máriannoo. Kásooaqee kambíqainausa qiní mi duqúna reefáranoo. 16 Ánutufa kaifáa Mooseena qímaminoo qinau. Anée óoquree Isaraee máqannaa úriqararausa súqusee maaqí qímasee qímannimia. Yáaweefa inni nínaakusa Abarahaammána fáqa Isakeena fáqa Yakooboona fáqa Ánutusa qiní qífusaa kooroo máfinoo qímaqiminoo. Misá qímannimia, qinée misá iannái anirée qáfaunaqa Isipa máqannaasa qumaara moómoo nímimariafaqa qáfaidaqa. 17 Qinée Isipa máqa máaqakinaana máraanauree qímasee íridaqa. Misá fíraa aupurarana kínaana nífieeqee áinoo faqaa máqasaa irairaa ída réemindéemiri máriqoo Kannaa máqasaa faqa Heeta máqasaa faqa Amoora máqasaa faqa Peerisita máqasaa faqa Hifita máqasaa faqa Yeebusa máqasaa faqa quqánnisaanaura.

18 Moosee anée Isaraee máqannaasa mi ufána qímanniminaqa írifara. Ánee Ísaraee maqannaa úriqararausa faqa nífiqamareenana Isipa máqannaa karaambáiqa márinnai óonuree maaqí qímasee qímamia. Maasá Heeburu máqannaasa Yáaweefa maasá Ánutufa maasá qífusaa kooroo máfinoo qímanniminoo. Maqee anée maasára eedóo qínaqa qaaramoó fáasaana aadána máqa máaqaki óonuree maasá Yáaweena maasá Ánutuna tatúfirana suqá ámianee qía. 19 Qinée íridaqa anée qímaminanoo Isipa máqannaa karaambáiqa fánnoo sía ínni niiqáinaqa fifáranoo. Qinée miná áidafirana ámiananoo miqóo ínni niiqáannoo. 20 Qinee qeeqá afeekannái Isipa máqannaasa óosana óosana náaquqara áinainannai fitíqnarana nímianaura. Nímiananóo Fáraoofa miqóo ínni idukúannoo.

21 Qinée Isipa máqannaasa ínniara náaquqarana nímianaqa ínnee Isipa máqasaaqari sía káqi fifáranoo. Aináina nímifaqa máree fifáranoo. 22 Ínnee fírarifaqa ínni nínaaqmaaka Isipa máqannaa ánaaseeuqa nári naaqá mária ánaaseesa faqa náriqa máaqaki máriasara faqa qífaqa qamunna faqa kóora faqa siruáa faqa nifaaqa áuqi maria ainaináusa faqa nímifaqa ínneeqa faiqi námu níraamuqmaaka Isipa máqannaa ámiqira qámunna ainainá kai afisúnnímaqaifaqa máree fuaqa. Miqínnanannai ínnee Isipa máqannaasa aináina máree fíara foorá ifáranoo.