15
Mooseena Idí.
1 Mi karí Mooseefa fáqa Isaraee máqannaa fáqa maaqí qímasee Yáaweena amooqíra idí raqau.
Qinée Yáaweenara idí raanáuranoo.
Mifa rákiranaki úriqàrainara miqíanaura.
Mifá qóosauqa fáqa qóosasaa márusa fáqa ooruku nammáriki mara áqinara idí raanáura. 2 Yáaweefa qiní afeeka ititárafa máridanoo.
Mifá qiní asumu maróofa máridanoo.
Mifa qini Ánutufa márifaqa qinee miná amooqianáura.
Qini qíkoona Ánutunafa márifaqa qínee miná afeekara idí raanáura. 3 Yáaweefa áfeeka rákira fasiqá máridanoo.
Miná áuqu Yáaweefa máridanoo. 4 Mifá Isipa máqanna súndiauqa faqa misá qóosa karauqa faqa rafúsu ooruku námmariki áqinoo.
Miná úriqarara súndiauqa Taatuqée Óoruku Námmariki ukúqneea. 5 Ooruku námmari farúma fánnoo misá rafáaqa fúsaifaqa misa óoniara foorá meemaqóo maqásaa óoqu máridaqa.
6 Óo Yáawee aní ásauku uqannai ásauku fánnoo náaquqara afeeka máridanoo.
Mi asaukúfa namuqáa naruséenoo utitíqeenoo. 7 Anéenna fíraa uriqararanannai aneenná namuqáa rafúsu áquananoo.
Ani áanoo qírafa idá dudáaqasaaqari qéera foora mánnimaqaananoo. 8 Anee óoruku námmari fuaqásáanánoo nammári mandi máreenoo áaqanara foorá óoru finoo.
Nammári dínni dínni innooqá maree safásara foora óoru finoo.
Nammári dínni dínni rainá fufanóo maqá meemáqoo afeekaiká minoo.
9 Namuqáauqa maaqí qiqau.
Maasá misá nífaqasee qumáraanauranoo.
Misá qumáraseeqa misá ámiqira áinaina maasá dídimarína aiqáma máraanaura.
Maasa qeeqá rákira páipanannai naruséeqa misá aiqáma áinaina mararee qia. 10 Miqí qiafaná anée Yáaweefa moodáannai áidoo fuaqásáanánoo Isipa máqannaasa ukúqneea.
Miqímma saifaqá misá óoniara foora firaa difukunakí óoqu fíà. 11 Yáawee, yáfee únna ánutusakiqari aní fooqáafa máridanoo fee. Sía moó fannoo.
Yáfee aní amana máridanoo káaqa náaquqara ándeeqarafa máridanoo fee.
Yáfee faiqí sía amana áuqaaqaa íra áinaina faqa áfeeka áinaina anée ímarianándee másee áuqaannoo fee. 12 Aneenná ásauku uqannannai uqéerá sáananoo maqá fánnoo namuqáa nambíqeenoo.
13 Anéenna qíma afeekaikíranasaa mapukúsee máridana faiqí ánaasee mandáinainaki máriusa nífiqa maree fímariananoo.
Aneenná afeekannóo misá indaarúnni kámma nímaqa maree aneenná náaquqara ándeeqara máqasaa quqánni séennaranoo. 14 Ánaamuru minára írifanoo náaquqéenoo náindiri ráannoo,
Firistia máqannaasa íriafanoo mapáraairafá misá qumáreenoo. 15 Idooma máqannaa karaambáiqauqa fáqa íriafanoo náaquqeenoo.
Mooapa máqannaa afeeka fasiqauqá faqa náindiri ráidanoo.
Kannaana máqannaasa afeeka faqa nammári kídanoo. 16 Máparaa írafa faqa firaa rufiarafa faqa misakí máridanoo.
Misá ani Yáaweena afeeka qáfamásee náaquqaifaqa káqi muqúríqa máriafaqa aní faiqí ánaasee karabúsakinaana idukú sáanausa misá nífusaa fíqaráidaqa. 17 Anee misá nífiqa maree aneenná áaqanasaa múnuséenana asumu ainainara foorá úmmaqu sáananoo.
Anee Yáaweefa aneennára utáaqamá qaanná maqusánaki múnusàanánoo.
Amaana máqa aneenná usakáqaanna maqusánaki múnusáanánoo. 18 Anée Yáaweefa náaru náaru úriqarara káraambaiqa márinnaránoo.
Miriamma námmarina idí.
19 Isaraee máqannaasa óoruku námmari qámbaana aadána máqasaa táqáqau. Fítaqafufaqá Isipa máqannaasa qóosa kára faqa nári qóosauqa faqa nárì daraiwáauqa faqa mi ooruku nammarínaki óoqu roofanóo Yáaweefa kaifáa nammáriara qufanóo qúminoo misá rafáaqa finau. 20 Áaroona ánasaafa Miriama námmarífa Ánutuna tamummáqara ánaasee márufa márinau.
Isipa máqannaasa nammáriki kúqutaiká fufanoo dukaanaá qumáreenoo áridanoo idí ranau.
Ánaasee aiqáma qáfamaseeqa nári dukaanaa maree miná faqa óonuree áridaqa niqoori ráqee máriqau. 21 Miriamma námmarifa maaqí qímasee idí ranau.
Yáaweenara idí ráaqa.
Mifá rákirana firaaqóo úraaqareenoo,
mifá qóosauqa faqa qóosasaa nímariasa faqa ooruku nammáriki rafúsu aqinoo.
Sukáqee marí nammarífa.
22 Mooseefa Isaraee máqannaa taatuqée óoruku námmarindaraana nífiqeenoo Suraa aadána máqa máaqaki quqánau. Qaaramoo fáasaanasaa aadána máqa máaqaki fídaqa sía nammári paqúriqau. 23 Misá Maraa máqa máaqaki óonureeqa nammári moó paqúrimasee noofanoo suká nárufaqa sía naqau. Minára mi maqa maaqána áuqu Maraa fée qiqau. Mi auqúna óosana sukáqee mári fee qiqau. 24 Isaraee máqannaasa Mooseena áanoo qímamaqáidaqa qiqau. Maasá nána námmari fee naanáuree.
25 Mooseefa iriséenoo afeekaiká máseenoo Yáaweenara innaaru qinau. Innaaru qufanóo Yáaweefa Mooseena saqári moo uqafíqóofanoo Mooseefa mi saqarína nammáriki áqusoofanoo nammári ámiqinau. Miqóo Yáaweefa narí sánda ufa mi mau fuaqéera nimiséenoo miqóo misa nimana másee qáfanau. 26 Yáaweefa qímanniminoo qinau. Ínnee qiní ufa qaidúsiqa qinée andeeqára áinainee qímarunnana áuqeeqa kafáa qiní sánda ufa mau fífaqa qinee sía mandá áupurarana Isipa máqannaa nímiafánnandee íqa ínni nímianaura. Qinée Yáaweesa ínni aurírana taikánnisée márunausa máridaqa.
27 Miqóoqari Isaraee máqannaasa fífiiufaqa Eerimma máqa máaqaki óonuraqau. Miqóo qísaukuqara taikásee qíkunni ooqu qaara marasée 12 nammari maqákiqari ururée máruna faqa fásaafana fooqáa íra saqari moómoo 70 márinau. Miqóo nammári áfainni misa úiqaana máqa usakásee máriqau.