1 Mi fasannái Amarafeerafa Babiroonia máqannaa káraambaiqa márinau. Mi aukuannai Eerasaa máqannaa karaambáiqa Ariookafa fáqa Eeramma máqannaa karaambáiqa Keedooraoomáfa fáqa Kooimma máqannaasa karaambáiqa Tidarafa fáqa minamúsa aiqáma nárì sundíauqa moodáanakí nífiqeeqa Soodooma máqannaasa nárirara fiqau. 2 Misa moodáannai qísauku káraambaiqauqa faqa rákiraree qímaseeqa fiqau. Soodooma máqannaa karaambáiqa Beerana fáqa Koomoora máqannaa karaambáiqa Birasana fáqa Adama máqannaasa karaambáiqa Sinabana fáqa Seeboyima máqusanaasa karaambáiqa Seemeebeerana fáqa Beeraa moo áuqu Sooara máqanna karaambáiqa faqa mi moodaannai qisauku karaambaiqáusa faqa rákiraree qímasee qúmiqau. 3 Mi moodaannai qisauku karaambaiqáusa rufíasee Sidimma nóopunduki suqíqau. Maqee mi noopundúnaki ooruku námmari rafáaqa fínoo márifaqa miná áuqu ráidaqa Kúqira Námmari fee qídaqa. 4 Qísaukuqara taikásee qíkunni óoqu qaara marasée 12 áukuanaki Keedooraoomana ásauku ameemaanai máriqau. Qísaukuqara taikásee qíkunni óoqu qaaramoó marasée 13 áukuanaki miná ufa rukíee máriqau.

5 14 áukuannasaa Keedooraoomafa fíndifinoo aqoónna káraambáiqauqa fáqa nári rákira fásiqauqa faqa fíndifiqa óoqu fíqau. Óoqu fíù faqá moó máqannaasa óoqi naru máree fiqau. Reefaimma máqannaasa Aseetaroota Karanaimma máqusaki náriqau. 6 Naruséeqa Susima máqusanaasa Qamma máqa máaqaki faqa náriqau. Naruséeqa Eemimma máqannaa fáqa Kiriataimma afaasá máqa máaqaki márusa náriqau. Miqóoqari óoquree Qoora máqannaasa Eedoona áaqanasaa márusa náriqau. Misá naru máreeqa Eeraparanna aadána máqa máaqa átinni munu quqáqau. 7 Miqóoqari óonu randéeqa Kadeeasa máqusai óoqeenaa áuqu Eenamisapateé qímaru maqusánaasa faqa náriqau. Amareekána áiku ásauku misaqá máru maqusáusa aiqáma rafáaqa fiqau. Rafáaqafusee Amoorana áiku ásauku Qasasoona Tamara máqusaki márusa faqa rafáaqafu nímaqaqau.

8 Miqímmasoofaqa Soodooma máqannaa káraambaiqa fáqa Koomoora máqannaa káraambaiqa fáqa Adamma máqannaa káraambaiqa fáqa Seebooyima máqannaa káraambaiqa fáqa Beera moó áuqu Sooaa máqannaa káraambaiqa faqa mi maqusa namúsa karaambáiqauqa fáqa nárì rákira fásiqauqa fáqa moodáaqoo Sidima nóopunduki suqíqau. 9 Suqúfufaqa Eeramma máqannaa káraambaiqa faqa Kooimma maqannaa káraambaiqa faqa Babiroonia máqannaa káraambaiqa faqa Eerasara máqanna káraambaiqa faqa rákirara deedaqiqau. Moodáanai qísauku káraambaiqauqa qaara fáqa qaara fáqa káraambaiqauqa faqa rákirara deedaqiqau. 10 Sidima nóopunduki koorootáqa mádika mòómoo márinau. Soodooma fáqa Koomoora máqannaa káraambaiqauqa rákiranakiqari quqásee sandáani quná mi madikáusaki áqufiqau. Qaaramoó káraambaiqauqa sandá máqaraasiqa áaqanai akaraqau. 11 Qaara fáqa qaarafáqa káraambaiqauqa Soodoomma máqannaasa faqa Koomoora máqannaasa faqa aiqáma áinaina uqanná máraqau. Áfuqakinaa nára áinaina faqa máree fiqau. 12 Róotafa Abarammana ákaqa ámaaku fannoo Soodooma máqusai márufaqa miná faqa miná qumíasana faqa máraqau. 13 Faiqí moó fánnoo rákiranakiqari sandéenoo Abarammafa Qeeburu máqannaa fásiqa fánnoo Amoora máqannaa fásiqa Mámareena saqáriuqa atukaki márufanoo óoru qímaminau. Mámareefa narí ákaqaqara Eesakoorana faqa Aneerana faqa minamúsa Abarammana áqoondi máriqau. 14 Abarammafa Róotana mara máree funára iriséenoo narí aináinira faiqiuqaki nímudaanáì qímarusa narí úiqaana máqusakinaasa 318 fásiqa nífiqanau. Nífiqáseenoo qímannimufaqa qaara fáqa qaara fáqa káraambaíqauqa nífaqamaree Dannaa máqa máaqai níanai fiqau. 15 Óoruree namuqáa nindáfamaséenoo narí faqa fusá raináseenoo eendáki namuqáa máruqoo óonureeqa nárú níndaqáaqa qiqau. Mifa misá nífáqa máree súani áfu dínni ataaqeenni Damasakusa máqusa fíaaqaree Hoobaa máqusaki múnusaqau. 16 Óoru randée qumuréeqa Abarammafa Róotana faqa miná qúmiasana faqa aiqáma ánaaseeuqa faqa rumbée fusáuqa faqa aiqáma nífiqee aniqau.

17 Abarammafa Keedooraoommana faqa miná aqoónna káraambaiqauqa faqa naruséenoo aniroofanoo Soodooma máqanna káraambáiqa fánnoo miná qáfarara Saavee nóopunduki moó áuqu Kínna nóopunduki fée qímarúqoo paqúrinau.

18 Sareema máqannaasa karaambáiqa áuqu Meerakiseedeekáfa úriqarara Anutuna aanáiqikirafa márufa féemu faqa uáinna námmari faqa Abarammana míni áminau. 19 Meerakiseedeekáfa amiséenoo maaqí qímaseenoo ámiqi ámiqira úfa qímamaqanau.

21 Amisoofanóo Soodooma máqannaa káraambaiqa Abarammana qímaminoo qinau. Aneé rákiranaki máraanna áinainausa aneennára máreenana qiní faiqí anaasee kaí qímia.

22 Miqí qufanóo Abarammafa ásauku uqéeraseenoo qinau. Qeeqá qísauku uqéereeqa, káaqa úriqarara Ánutuna innaarúna faqa maqá faqa áuquna áfusaa uqéerasee qímamidaqa. 23 Sía uqanná aní aináina káqikaa áinaina máraanaura tiríta faqa níku ánaamu sanda faqa rirímma sía máraanaura. Anée qiníara maasá aináina maraséenoo moómoo áinaina faqáasee qídanoo mifoo qinóora. Sía uqanná máraanaura. 24 Qinee sía uqanná moó áinaina qeeqára máraanaura. Qiní faqa rákiranaki fuasá misá námasaa áinainnara kai dóo máree fee qídaqa. Qiní qíqoodi námu Aneerafa faqa Eesakoorafa faqa Mámareefa faqa misá kai nárì nimanasáa máraaqa.