ROOMMA
Pauroofa Roomma maqanna ákaranímaqoo ufafa.
1
Qinée Pauroosa Ánutuna ásauku mundírana Yísufa mara firiqai fáiqisa máridaqa miná aináina dadaaqímaruna faiqisa máridaqa. Ánutufa qiní maqásaa fasiqa Ánutufa faiqí ánaaseekinaana rusandeesámumasee narí ámiqira fasaasa ufara qímannimiannee qímaqoosa máridaqa.
Mi-amiqira fasaasa ufána náaru kambíqaaninnanara Ánutufa óoqai uqanna narí tamummáqara fasiqauqa narí óokiqari qímannimisoofaqa quandáfiqa faiqí ánaasee qímannimisee quándakiqa náaquqara ákaraki quqáqoofa máridanoo. 3-4 Mi-amiqira fasaasa ufána narí ámaaku narí ásauku mundírana Yísunara maasá karaambáiqara qídanoo. Mifá Dafidinakíqari kambíqoonara maasá maqásaa fasiqee qídaqa. Ánutufa narí firaa afeekannái kúqiranakinaana Yísuna mara fíndifumáseenoo minánnai uqannífiqasoofaqa iriséeqa misá minára Ánutuna ámaaku innaarúnaindaraafa náaquqarafée qídaqa. Yísuna minánnai Ánutufa qiní ámiqi ámiqinoo qímannimira fasiqaikámambi máridana aiqáma máqannaa náarama mínisee Yísuna ámiqira fasaasa ufa qímannimisáinaqa iriséeqa mi-maú fíqa Yísuna áuqu uqéeraaqeera qiníara qímaqoosa máridaqa. Aiqáma máqannaasara qídaqa ínni Roomma máqannaasara faqa qídaqa Ánutufa ínniara narí ásauku mundírana Yísunaindi kiaqéera qímaqoofa máridanoo.
Ánutufa ínni Roomma máqannaasa faqa náarameeqeenoo qiní qíku qísauku kiaqéera qímaqoosa máriafaqa. Qinée Pauroosa minára iriséeqa ínni ákara rúmannimaqaunafa máridanoo. Ánutufa maasá qíkoofa faqa narí ásauku mundírana Yísuna maasá karaambáiqa faqa narí ámiqi ámiqira oosana faqa narí aundurá asooárana faqa ínni nímiani.
Pauroofa Roomma máqannaasara Ánutu finnái dúfi dúfi qídanoo.
Maa-ufánannai ínni qímannimiranara qianáura Ánutuna ásauku mundírana minánnai qinée Pauroosa ínni Roomma máqannaasara Ánutu finnái dúfi dúfi qímamaqaidaqa. Aiqáma máqannaasa ínnee Yísuna saqárikiranara írimarifaqa minára qinée Pauroosa innaaru qímamaqaidaqa dúfi dúfi qídaqa. Qinée aiqáma kari maqee maqee ínni Roomma máqannaasara íridaqa Ánutufinnai maqee maqee innaaru qímarunnanara minára Ánutufa íridanoo. Qinée qeeqá qímuqusa óokiqari qeeqá íriranannai Ánutunara eedóo qíra dadaaqíra ainainiranakina máridaqa. Máridaqa narí ámaaku ámiqira fasaasa ufa faiqí ánaasee qímannimidaqa. Qinée ínniara Roomma máqannaa faiqí ánaaseera innaaru qídee qúnanoo Ánutufa kúqaa fee qíannoo. 10 Qinée óoqaindari ínni maqúsai óonuree ínni níndafarara írida márunnanara maqee Ánutufa qiní dadaaqínaqa ínni maqúsai óonu maríannanara minára faqa innaaru qídaqa.
11 Qinée firaaqóo ínni níndafarara qídaqa innaarúnaindaraa ámiqi ámiqirana moó ínni náida nímianaqa ínnee Ánutunaki afeekaikámáfi máriaqeera íridaqa. 12 Qinée minára maaqí qídaqa qinée faqa ínnee faqa narí dadaaqí narí dadaaqírara ínnee Yísuna saqárikírana faqa qinée faqa Yísuna saqárikírana faqa narí dadaaqí narí dadaaqíaqa.
13 Ínnee Roomma máqannaasa maa-ufána íriaqa. Qinée ínni maqúsai moómoo kari fírari máriafananoo moo áinaina rafáaqafinau. Qinée moómoo maqusanaasaki sía Yuda máqannaasaki nímariafanausa miqídaqa misákinaana óonu rarisámeeqee Yísunaki quqéemarunausa ínniki faqa óoqaindari miqíanee qídaqa. 14 Aamína máqannaa faqa írirana faqaasa faqa áikara foora daruqoofanoo máridanoo. Misá aiqáma Yísunufa qímannimianaqa írifanoo mi-aikána dárirafa tatínoo qifaaqa aufadáannoo. 15 Mi-aikána tatíranara irisée qinée ínni Roomma máqannaasa faqa Ánutuna ámiqira fasaasa ufa qímannimiraree qídaqa.
Ánutuna afeeka ufa asumu máriranaki quqánnisée marífa.
16 Ánutuna ámiqira fasaasa ufa Ánutufa faiqí maréeqee asumu máriranaki quqéemari afeekafa máridanoo minánnai Yuda máqannaa naaree ánaamuru máriasa ínnaaqiana irisée mi-maú fínausa Ánutufa asumu maréeqee quqáannoo. Minára qinée mi-amiqira fasaasa ufánaki qeeqá daundurá firaaqóo mara quqáidaqa. 17 Ánutufa faiqí ánaasee áaqeemaríasa narí namuqáaki máriasa sía naruséenoo maréeqeenoo narí áqoondikidanoo narí ámiqira fasaasa ufa minára kooroo ídanoo. Maasá Yísuna saqárikirana mifá kai Ánutunara áqoondikirana nímidanoo. Óoqeenáa tamummaqara fasiqauqa ákara minára maaqí qinoo máridanoo. Faiqí ánaasee Ánutuna saqárikiranannai miná áqoondikinausa misá kai náaru náaru márirana máreefaranoo.
Faiqí faiqi mandóosana fannoo Ánutufa náriranaki quqánnisáidanoo.
18 Faiqí ánaasee mandáinaina faqa kudimakírana faqa miqandá Ánutuna ánoona ufa rafáaqafifaqa sía írida máridaqa, minára Ánutuna áanoo qirana nárirafa inaarúnaindari akooqóo misásaa qumu máridanoo. 19 Maanára Ánutufa misá náridanoo. Faiqí faiqi Ánutunara írimari ainaináfa akooqóo máridanoo. Ánutufa narí kai uqannífiqasoofanoo márifaqa sía írimariafanoo.
20 Óoqai Ánutufa maa-maqa maaqána áuquqooqari miná kukéeqarana idaaqírana faqa miná náaru náaru márira afeeka faqa innaarúnaindaraa andeeqára márirana faqa narí áuqu quqóo ainaináki akooqóo márufa máridanoo. Faiqí faiqi Ánutufa áuqu quqóo ainaináki qáfamasee sía Ánutunara írida fee qifáranoo. Miqí qímasaidaqa únna qímarifanoo Ánutufa mi-ufána sía íriannoo káqi náruannoo. 21 Misá Ánutunara íridaqa sía minára dúfi dúfi qídaqa, kafáa sía miná áuqu uqéeraidaqa. Misá quándaki nári írirafa firaaqóo fúrufariranakí kai máridaqa misá nitikúra fífau máridanoo asukuna kái qumbiqánoo máridanoo. 22 Misá náriara írirana faqaasee qímasaida únna qímasaidaqa fúrufariranaki máridaqa. 23 Misá Ánutuna náaru náaru márira areenarana máfi quqásee Ánutuna innaaruqírana faqa amooqírana faqa máfi quqásee fífau faiqí faiqi amanáuqirana faqa ufini amanáuqirana faqa aandáu̱ amanáuqirana faqa ámuaqundari maqámau nímarina amanáuqirana faqa marasée maasá Ánutu fee qímasee minára innaaru qídaqa amooqídaqa.
24 Faiqí misá nári fúrufarirafa miqínoo firaafá márifanoo Ánutufa misá maréeqeenoo náriqa nímuqusimari mandainainaki quqásaifaqa faiqí narínni narínni ira ainainara nisauríra ainaina kai máraidaqa. 25 Misá Ánutuna ánoona ufa maréeqee káqinni quqáseeqa únna ufa maréeqee nífusaa quqásee minára kúqaa fee qídaqa. Náaru náaru amooqímaria Ánutuna aiqáma ainaina áuqu quqóo Ánutunara minnísee quándaki Ánutufa áuqu quqóo ainainára fífau ainainara innaaru qímasee maasá Ánutu fee qímasee mi-maú fídaqa.
26 Ánutufa faiqí ánaasee nári mandá níranara qáfamásaifanoo ákooqaifanoo káqi minakí nifeeqáidanoo. Minára ánaaseeuqa faqa nári nifaaqmaaka minnísee andeeqára oosana minnísee narínni narínni óosana óosana mandá márirana máraidaqa. 27 Faiqí miqí kai íqa nári nínaaqmaaka faqa ámiqira oosana minnísee naríara naríara rídaqa idára foo qíara nítakuqidanoo. Faiqí misá narínni narínni nisaúrira ainaina maraséeqa miná ákiaqara nári nifaaqasáa aurírana áidafirana marasée aupúraidaqa.
28-31 Faiqí ánaasee Ánutuna ánoona ufara níkooqaifanoo Ánutufa misá maréeqeenoo mandáinainakina sía fúaqaa ira mandainainakina quqásaifaqa minakí fídaqa. Miqíanara maa-manda ainaina oosana oosanáfa qumbíqaidanoo, mandá óosana faqa, káaqa aináinara rímarina faqa naríara naríara fídiaqaa ímariana faqa naríara naríara rairai qírana faqa faiqí kuqánnarirana faqa narí áfumau narí áfumau irafa faqa nári ueeqée narí ueeqée ímariana faqa mandá óosana óosana faqa naríara naríara múnuqi míniqi ímariana faqa misá Ánutunara fídiaqaa ímariana faqa kaukaata qímariana faqa nári nifaaqa nimooqírana faqa naríara kai firaaqóo ufaqí márina faqa maqee maqee mandóosanara randéemariana faqa nári nínaukoo ufa rukíee máriana faqa sía nári andeeqáramau fíranara úriqararanee qímariasa, faqa náriqa qímannimira ufa rukíee máriana faqa sía nári níkaqaafasaara ámuqusirana faqa mi-manda ainainnáusaki fímariasa máridaqa. 32 Ánutufa minakí fímariasara kúqiranaki fímariaa foo qída qifaqa íridaqa káqi minakí fídaqa. Sía minákaifau miqídau firaa manda oosana marasée akaqáusa mi-mandainaináki dadaaqímariasara misára faqa eedóo qímaseeqa asasídaqa.