Pablo Nu Chada Degaba Kwian Chubenu Nga Kweri Galaciamu Alin
Carta de Pablo a los Gálatas
Pablo chada ai degangu kwian Jesucristo gerua ganga toinga una kaire kairege nga kweri kada Galaciage alin, kwian nga Galaciamu me israelita. Pablo nu chageba una tanrege nga Galaciage Chube gerua Jesucristo giti kete kwian nga emu ulitage Pablo kwian e ulita tku tangle Jesucristo gai ulia mo tale giti kwian chege no trate me jiske Chube gwa giti. Pablo kwian tku tangle ene gire kwian nga Galaciamu tanre geru Jesucristo giti gau ulia mo tale Pablo giti.
Agwa Pablo jo nga nage gire kwian israelita na gweale jo chke Pablo nate kwian nga Galaciamu tke tangle geru ngwalege, ama gerudu kwian nga Galaciamu kwian israelita suia jwandale agedale ulita Moisés chadalla unsuialin gerule kare, ene ama chege no trate me jiske Chube gwa giti. Kwian gerudu ene ngwale kwian nga Galaciamu ole.
Pabloge geru e ulita chku uñale kwian na kle kwian Chubenu nga Galaciamu anblite geru ngwalege gire Pablo chada ai degangu kwian Chubenu ulita nga Galaciamu ta gbagda me mo chuge ngwadi mo anblitange geru ngwalege.
1
Pablo gbi kage chada giti kwian nga Galaciamu alin
1-2 Cha Pablo chada ai degange ba ulita nga kweri Galaciage Jesucristo gaba ulia alin:
Cha Jesucristo gerua ketanga, che salengwli me cha gau, che salengwli me cha gbu Jesucristo gerua ketangale. Chube che Ñenua Jesucristo jaba gbuni gwade, Jesucristo e amaña ule Chube ole cha gbu geru amanu ketadale kwiange. Daba Jesucristo gaba ngle kle aini cha ole, cha ule ama ulita ole gbi kage ba Jesucristo gaba ulita alin bai kle toi una kaire kairege kle mo lite Jesucristo geruadi nga kweri Galaciage. Cha ulita takalin Chube che Ñenua kaire Jesucristo che Chugagwalla age no no ba ulita alin kle toi una kaire kairege nga Galaciage, kaire ama ba ulita ta gbe suga no. Jesucristo mo ketu gwaleda che agedu me no giti, ene che me ji chuge che agedu me no gdale. Nege che Chubenu, che Chube uñe, che me chegedale age me no dare kwian me Chube uñeske kwian ulita me Chube uñe kle age kare. Jesucristo agedu che alin Chube che Ñenua takalin kare. Che ulita gerudale no Chube giti chui tangle. Ene nobi Chube alin.
Pablo kwian Cristo gaba ta gbe tachke naskuni
geru ulia Cristo giti
Me suge chage mineade ba ulita kle mo ta gbe joge siere blike Chubege, Chube ba gau mau alin Cristo giti, Cristo agedu no ba ulita alin. Cristo alin giti ba ñage tien gitiru ji chugege ba agedu me no gdale, ¿mineade ba kle mo ta gbe geru na nganake Cristo gitige gai? 7-8 Cha gerudu ulia ba ulita ole no Cristo giti, geru ulia na me. Kwian gweale na kle ba tke tangle me cha ba tku tangle kare Cristo giti, kwian ene kle ba ulita ta gbe tañachuge nganake geru ulia Cristo gitige, ama ta geru ulia Cristo giti blitakalin nganake. Kwian na gweale geru Cristo giti trage nganake ba ole cha gerudu giti ba ole, kwian ene ulita chege ji chugadale sugekare Chubege. Cha agali o lle boanga Chube alin nga ngaña giti geru Cristo giti ulia blite nganake kwian ole kaire be chege ji chugadale sugekare Chubege. Ba ulita geru ulia Jesucristo giti keruchugu, ba geru e gau ulia. Cha gerudu kare ba ole ngeru nege cha gerule nakwaite, kwian bai kaire kle geru na me ulia Jesucristo giti trage ba ole ama be chege ji chugadale sugekare Chubege.
10 Cha me kle kwian kerua manade gerule no cha age no giti, cha ta agekalin Chube takalin kare. Cha mo ta gbe age kwian takalin kare ene cha me kle age Chube takalin kare, ene cha me lle boanga no Cristo alin ulia.
Pablo chada degange mau giti Chube Pablo gbu Jesucristo gerua ketangale
11 Cha takalin chke uñale ba ulita cha daballa cha ibotea Jesucristo gitige, geru ulia Jesucristo giti cha kle trage kwian ole geru e me kwian talla ni kwian tañachuge kare, geru e me chiu kwian gweale tale. 12 Kwian gweale me geru e ketu chage dbale kwian nage ni cha geru e jun kwian gwealege, Jesucristo agali cha ta gbu geru ulia amanuge, ama cha ta gbu geru amanu uñe. 13 Ba geru keruchugu cha giti ngeru cha bebi Cristo gai ulia cha kwian mine, ngeru cha chagedu cha bitalla israelita kle age kare suiage, e suiale cha mo ta gbu chage me no kwian ulita Cristo gerua gaba ulia dollale, cha tadu kwian ulita Cristo gerua gaba gwakalinda ene geru Jesucristo giti me chage dare. 14 Cha bitalla israelita suia giti cha geru e uñu ma no trate cha tigemanalla ulitage, cha mo ta gbu diali cha enusulian unsuialin suia ulita manade no, cha tañachugu geru e alin giti diali, cha tañachugu geru e ma no geru na ulitage. 15 Cha bebi menga cha chebia kote gire ngeru Chube cha gau mau alin, Chube mo ta gbu no cha ole ngeru, malen ama cha gau geru Jesucristo giti tragadale kwian ole. Cha tigedu cha tañachugu cha enusulian israelita alin suia giti, 16 agwa Chube tadukalin cha ama uñe ulia gire ama cha ta gbu ama Kirolla uñe ene cha geru ama Kirolla giti tragadale ba kwian me israelita ulita ole. Chube cha ta gbu ene ulita no ama Kirolla giti gire cha me jo geru kade Jesucristo giti kwian gwealege, 17 ni cha jo una Jerusalénge blike geru kade kwian Jesucristo gerua ketanga ngeruge, cha cheguda una Damascoge sugeti alin tañachuge ulita Jesucristo gerudu giti cha ole gire cha jo nga kweri Arabiage gire cha chiuni una Damascoge. 18 Cha Jesucristo uñu chura gdamaige gire cha jo una Jerusalénge tienda Pedrodi, cha chegu Pedro ole semana boke. 19 Cha kledu una Jerusalénge Pedro ole gire cha gwagedu Santiago che Chugagwalla Jesucristo daballa alindi, agwa cha me su gwage kwian Jesucristo gerua ketanga nadi. 20 Cha kle chada ai degange kare ba alin cha me kle sole, uñale Chubege cha kle gerule ulia ba ulita ole.
21 Cha kledu una Jerusalénge, gire cha jo geru Jesucristo giti dbe nga kweri Siriage kaire nga kweri Ciliciage. 22 Kwian Cristo gerua ganga nga ege gwagedu chadi mo gwagwa giti, agwa kwian Cristo gerua ganga kle mo lite Jesucristo geruadi una kaire kaire nga kweri Judeage me gwagedu chadi mo gwagwa giti, 23 ama ulita geru cha giti keruchugu alin allabi, geru ai chku ama ulita ologe: “Ngeru ama chagedu che kwian Cristo gerua ganga nate che gadale gwadaleda Jesucristo gerua gdale, ene ama tañachugu geru Jesucristo giti me jriennga dare, ama agenga ene ngeru, nege ama kle gerule kwian ulita ole kwian mo ta gbale Jesucristo gerua gai ulia.” 24 Kwian Cristo gerua ganga ulita nga Judeage geru e keruchugu cha giti gire nga sugedu no amadi, ama ulita gerudu no Chube giti Chube agedu giti cha ole.