Kwian Hebreo Chubenu Alin Chada Degaba
Carta a los Hebreos
Chada ai jo degaba kwian israelita alin bai kaire nu Jesucristo gerua gaba alin. Sugedale chege kwian israelita e amaña kwian hebreo kaire amaña kwian judío, kwian e chudalla gdaitre alin agwa ama kalla gdamai. Me chke uñale chege chema chada ai degu kwian israelita Jesucristo gerua ganga alin, kwian chada deganga me mo ka degu chada ai giti, suge chege kwian chada deganga kwian israelita, agwa me uñale ama kada mine.
Kwian israelita Jesucristo gerua ganga ama kledu boi daga ngwale Jesucristo gerua gai gdale malen gweale tañachugu ma no ama alin joge siere Jesucristo geruage me Jesucristo gerua gai ulia dare, ama tañachugu ma no ama Moisés nu Chube gerua degaba unsuialin tangle gai ma kweri Chube gerua Jesucristo gitige. Kwian israelita Chubenu gweale kledu tañachuge ene, e chku uñale kwian chada ai degangage malen ama chada ai degu kwian e ta gbagda Jesucristo giti Jesucristo ma kweri ma kiraske lle ulitage kwian ulitage kaire Chube gerua Jesucristo giti ma kweri kiraske Moisés nu geru degabage kwian alin.
1
Chube mo Kirolla Jesucristo gbe geru amanu
kete chke gda uñale kwian ulitage
Cha chada ai dege ba cha bitalla israelita ulita Chubenu alin:
Unsuialin tangle Jesucristo bebi menga nga dba ai giti gire Chube kwian ama gerua ketanga ulita gbu Chube gerua kete che enusulian oña ulitage, Chube gerudu diali kwian ama gerua ketanga ole bedre bedre, me geru ulita gbu chke uñale amage chui gbaitre alinge, Chube gerudu kwian ama gerua ketanga ole gbire kaire ama lle boanga nga ngaña giti kagu ama gerua kete kwian ama gerua ketangage kaire ama mo kerua gbu suge kwian ama gerua ketangage. Ai kare ene Chube gerudu kwian ama gerua ketanga ole Chube gerua gbe chke uñale che enusulian oña ulitage. Agwa nege tangle chui ai che kle toige Chube nu gerubabi che ole ama Kirolla Jesucristo giti. Chube mo Kirolla Jesucristo kagu nga dba ai giti geru amanu gbe chke gda uñale chege. Chube nga ulita kwian ulita lle ulita dodadu Jesucristo giti kaire Chube nu lle ulita dodaba ama lle e ulita jigu ama Kirolla Jesucristo kote, Jesucristo chege lle ulita mauñale kwian ulita Chugagwalla kweri. Jesucristo kle lle ulita manade, ama kiraske, ama kle gerule alin allabi gire lle ulita kle chege no. Jesucristo Chube Kirolla amaña Chube, Jesucristo giti che ñage ama Ñenua Chube uñe, che Jesucristo uñe, e salengwli che Chube uñe kare. Jesucristo Chube Kirolla kle Chube noare kiraske kaite nate chege. Jesucristo agedu ulita nga dba ai giti kwian ulita alin kwian jwanle siere ji chugege age me no gdale kwian gbagda trate no Chube gwa giti. Jesucristo agedu ene ulita nga dba ai giti gire ama joni nga ngaña giti ama toidu dba Chube ngena Chube ko taingwli giti kwian ulita Chugagwallale.
Chube Kirolla Jesucristo chege ma kweri lle boanga Chubenu ulita nga ngaña gitige
Chube mo Kirolla Jesucristo gbu lle ulita Chugagwallale ma kiraske lle ulitage. Jesucristo Chube Kirolla, e giti Jesucristo chege ma kweri ma kiraske lle boanga Chube alin nga ngaña giti ulitage. Ulia ni bitaite Chube gerudu lle boanga amanu gdaite ole ama gerudu mo Kirolla ole kare, Chube gerudu:
“Ba cha Kirolla, nege cha ba kaite nate kwian ulitage cha Kirollale, ene chke uñale kwiange ulia ba cha Kirolla cha ba Ñenua.”
Chube me gerudu ene dale ni lle boanga amanu gdaite ole agwa ama Kirolla Jesucristo ole ima ama gerudu ene. Ni kaire agwe Chube gerudu lle boanga ama alin gdaite giti ene:
“Cha takalin chke uñale kwian ulitage cha ama Ñenua, kaire ama cha Kirolla.”
Ni Chube gerudu ene bitaite ai kare lle boanga ama alin giti agwa Jesucristo giti ima ama gerudu ene. Geru e giti chke uñale chege ulia Jesucristo ma kweri ma kiraske lle boanga Chube alin ulitage. Chube mo Kirolla gdaitre alin Jesucristo kagu nga dba ai giti gire Chube gerudu mo Kirolla giti ene:
“Cha takalin lle boanga ulita cha alin nga ngaña giti cha Kirolla gai dage mo Chugagwallale gerule no ama giti.”
Chube gerudu ene mo Kirolla giti. Kaire Chube gerudu lle boanga amanu giti ene:
“Cha Chube kle lle boanga chanu nga ngaña giti ulita kage salengwli mleuda kare nga ulitage, kaire cha ama gbe salengwli jita gwade kare age gweale kwian ole cha kiralla giti.”
Chube gerudu ene lle boanga amanu giti. Agwa mo Kirolla Jesucristo ole Chube gerudu ai kare:
“Ba Chube salengwli cha amaña Chube kare, ba be chege kwian Chugagwalla kweri diali dale alin, ba kle age ulita no trate kwian ole, diali ba kle age ulita ba kle gerule kare.
Kwian age no trate, e skwen no no ba gwage, agwa kaire agwe kwian age me no sugaska ba gwa giti, e skwen me no me no bage, malen e giti cha ba Ñenua ba gau ba gbu kwian Chugagwalla kweri, cha ba gbu ma kweri ma kiraske lle boanga chanu ulita nga ngaña gitige ene badi nga suga noare ulita diali.”
10 Kaire Chube gerudu mo Kirolla Jesucristo ole ene:
“Ba kwian Chugagwalla kweri, gwangeabi ba nga ulita dodadu no biale nga dba giti, kaire ba amaña nga ngaña dodadu ulita no trate.
11-12 Ba nga ulita dodadu nga ngaña giti nga dba giti nga e ulita lle e ulita be jogenga ngwale salengwli ñometra jagere kle joge juda me no kare.
Ñometra kle joge juda ñometra kle drete gire kwian ñometra juda blite ñometra na jageredi.
E kare ene ba be nga gbe jagere nganake ulita, agwa ba mi jwlite dale, ba be chege kwian Chugagwalla kweri diali, ba be kle toi diali dale chui tangle.”
Chube gerudu ene mo Kirolla gdaitre alin Jesucristo ole. 13 Ni bitaite Chube gerudu lle boanga amanu gdaitege ene:
“Toi dba cha ngena cha ko taingwli giti, chui be chke gire cha be ba gbe kirachke ba dolla ulitadi, ba be chege dolla ulita Chugagwalla kweri.”
Chube gerudu ene mo Kirolla Jesucristo ole agwa Chube me gerudu ene ni bitaite lle boanga ama alin nga ngaña giti ole. 14 Ulia lle boanga Chube alin nga ngaña giti ama kle lle boi Chube alin Chube kle ama kage kare, Chube kle ama kage kwian ulita bai kaire Jesucristo gerua gaba manade no kaire kwian e chudaboi, lle e kare alin allabi Chube kle lle boanga amanu nga ngaña giti gbe age, lle boanga Chube alin me kweri kiraske Chube Kirolla Jesucristo kare.