Geru Jesucristo Giti Marcos Nu Chada Degaba
San Marcos
Kwian onbre chada ai deganga kadakle Marcos amaña kadakle Juan-Marcos. Marcos me chagedu ule Jesu ole kwian geru jwannga gdataboko giti gdaboke kare, agwa amage geru chku uñale Jesu giti. Ama tigedu una Jerusalénge nga Judeage malen geru chku uñale amage Jesu kledu age giti kledu gerule giti. Ma bdagli Marcos kwian Jesu gerua dbanga gweale chudabo Jesu gerua dbe kwian nga namuge.
Marcos chada ai degu kwian me israelita nga Romamu alin, ama tadukalin kwian e ulita Jesu gerua uñe. Marcos toidu suiale kwian nga Romamu chegu kwian nga namu tanre chugagwallale.
Chada ai giti Marcos kwian ta gbu ulia Jesu Chube Kirolla chku nga dba ai giti kwian kare, ama no trate ulita. Jesu agedu ulita Jesu Ñenua Chube ama gbu age kare nga dba ai giti, ama lle daga ngwale no tanre dodadu Chube kiralla giti kwian tanre gwa giti. Chada ai giti Marcos kwian ta gbu suge Jesu ma kiraske ma kweri che dollage kaire Jesu kwian ulita chudaboanga.
1
Chube Juan-Bautista kage geru Jesucristo giti kete kwiange
1 Jesucristo Chube Kirolla, Chube gerua no ama giti kle degaba chada ai ulita giti. 2 Ngeru Jesucristo bebi chie nga dba ai giti Chube gerudu ama be kwian gdaite Jesucristo gerua dbanga kage kwianske gerule gwangea kwian ole Jesucristo giti, e suiale kwian Chube gerua ketanga kadakle Isaías Chube ama gbu chada dege kwian Jesucristo gerua dbanga be chie giti, chada e gerule, Chube gerudu:
“Cha be kwian gdaite cha gerua dbanga kage ba ngeru, kwian geru dbanga e be kwian na ta gbe biale ulita ba ngwange.
3 Nga gballage kwian gdaite e be gerule kwian ole ene: ‘Che Chugagwalla be chie baske, ba ulita kledale biale ama ngwange, ba mo ta gbadale biale no trate ama ngwange kwian kle jon lite trate biale chugagwalla ngwange kare.’ ”
Isaías chada jigu degaba unsuialin gerule ene kwian geru dbanga be chie giti, 4-6 kwian geru dbanga e kada Juan-Bautista, ama chku Isaías chada degu kare. Juan-Bautista suiage tangle boidu ene ulia Chube Isaías ta gbu chada dege kare. Juan-Bautista toidu nga gballage, bda kada camello boli dodaba ñometraleske Juan-Bautista mo ngama tku, kaire ama mo ñometralla mo bonga tangle luguda chbi kwara dodaba drega giti. Juan-Bautista sri kweri kweri gutu, kaire ama likin jau. Juan-Bautista toidu nga gballage, nga ege kwian tanre kledu joge chke Juan-Bautistadi Juan-Bautista keruchuge gerule Chube gerua giti. Kwian tanre nga Judeamu kaire kwian tanre una Jerusalénmu jo chke Juan-Bautista kle ngwadi, kwian e ulita bai kaire kledu joge chke Juan-Bautista kle ngwadi Juan-Bautista gerudu ai kare ama ole: “Ba ulita mo ta blitadale Chube ole, ba age me no chuge ngwadi me chage age me no dare, kaire ba mo chugadale ngwadi mo ñeange chiske kwian na gwa giti ene ba kle mo kaite nate kwian nage ba mi chage age me no ba chagedu ngeru kare. Ba age ene gire ba agedu me no ulita Chube be talla mlienga, ama mi tañachuge dare ba agedu me no giti.” Kwian ulita Juan-Bautista keruchugu gerule ene gire ama gweale mo ta blitu Chube ole, kwian ene ulita gerudu ai kare Chube ole kwian na ulita gwa giti: “Chube, cha agedu me no tanre ba dollale, cha me ta agekalin me no ene dare, nege cha ba gakalin ulia mo Chugagwallale.” Kwian mo ta gbu no ene Chube ole gire Juan-Bautista ama ulita ñeu chiske gau ngaña chigage chi kada Jordánge. 7-8 Kaire Juan-Bautista gerudu kwian ulita ole Jesu giti, ama gerudu: “Ulia kwian gdaite be chie cha nate, ama ma kira molen chage, ama be ñage age ma no kwian alin chage, ama be Chube Oña gbe kwian tale. Cha ñage kwian ñe chiske alin agwa cha me ñage Chube Oña gbe kwian tale. Ulia kwian gdaite be chie cha nate ama ma no ma kweri ulita chage, cha me ñanaske ama chudaboangale ni ama zapatolla jwennga ama serage.” Juan-Bautista chagedu gerule ene kwian ole Jesu giti.
Juan-Bautista Jesu ñe chiske
9 Jesu kledu toi una Nazarege nga kweri Galileage gire ama jo chke Juan-Bautista kle kwian ñe chiske ngwadi chi Jordánge, ne ngwadi Juan-Bautista Jesu ñeu chiske. 10 Jesu joni keda chi kagdage gire ama tienduda nga ngaña giti, ama gwagedu nga tigedunga nga ngaña giti, ama gwagedu Chube Oñadi beusi kare chie gwadbiguda ama giti. 11 Gire Chube kerua sugedu Jesuge gerule nga ngaña giti, Chube gerudu Jesu ole: “Ba cha Kirolla, cha no no ba ole, nga suga noare chadi ba giti.” Chube kerua sugedu ene gerule mo Kirolla Jesu ole.
Che dolla chugagwalla kada Satanás mo chuge Jesu ole
12 Boidu ene Jesu ole chi Jordánge gire Chube Oña Jesu ta gbu joge toi nga gballage, 13 lle ngaske chudalla daga ngwale kledu ne ngwadi. Jesu toidu gballa nga ege chui ngle cuarenta, Jesu kle toi ne ngwadi gire che dolla Satanás mo chugu tanre Jesu ole, Satanás tadu Jesu ta blitakalin age me no Chube dollale, agwa Jesu me agedu Satanás tadukalin kare. Nga ege lle boanga Chube alin nga ngaña giti tanre chku Jesudi Jesu chudaboi Jesu kira gbe.
Jesu kwian ngwe jwannga gdabaga kade
chage ama ole geru jwen amage
14 Juan-Bautista kle skage suiale Jesu joni nga Galileage Chube gerua kete kwian ulitage. 15 Jesu gerudu kwian ole ene: “Me sbali gire kwian ulitage be suge Chube kwian Chugagwalla kweri kiraske, Chube cha kagu ba ulita jwen siere ji chugege ba agedu me no gdale, malen cha gerule ba ole, ba ulita mo ta blitadale Chube ole age no ama takalin kare, ba age me no chuge ngwadi me chage age me no dare, ba ulita mo ta gbadale Chube gerua gai ulia age no Chube takalin kare.” Jesu chagedu gerule ene kwian ole nga Galileage.
16 Chui gbaite Jesu jo chage chibita kada Galilea kagdage, ne ngwadi Jesu gwagedu kwian onbre gdabokedi, ama gdaite kada Simón kaire Simón daballa kada Andrés. Kwian gdaboke e ngwe jwannga ama kledu gdeba tke chiske ngwe gagda, 17 gire Jesu gerudu kwian ngwe jwannga boke e ole:
—Bai chage cha ole geru jwen chage, nege ba kwian ngwe jwannga, agwa chui negege gwangerugu cha be ba gbe kwian na tke tangle cha gerua giti, ene ba giti kwian ngle be cha gerua gai ulia, ba kle ngwe gai ngle gdebage kare ene ba be kwian gai cha alin cha gerua giti.
18 Jesu gerudu ene Simón ole kaire Andrés ole gire sugeti ama gdabonate gdeba chugu ngwadi, jo chage Jesu ole. 19 Jesu jo chage na sugeti onbre e boke ole gire Jesu tendu Santiago ngwange kaire Santiago daballa kada Juan ngwange, Santiago kaire Juan kledu ule ñenua kadakle Zebedeo ole gdeba ugachuge du toli chiga. 20 Gire Jesu gerudu Santiago ole kaire Juan ole:
—Bai chage cha ole geru jwen chage.
Jesu gerudu ene gire onbre gdabonate e ñenua Zebedeo jigu du toli chiga kwian na ñenua chudaboanga ulita ole, gire ama gdabonate jo chage Jesu ole.
Jesu dolla kage siere kwian onbre gdaitege
21 Jesu ule kwian geru jwannga amage ulita ole jo chke una Capernaumge gire chui e ama jo chkege chui e undege chuia kwian israelita alin, chui ege Jesu jo u mo litangwa Chube gerua jwanngwage, u ege Jesu kwian tku tangle Chube gerua giti. 22 Kwian ulita kledu eni Jesu keruchuge ama ulita chegu tañachuge tanre Jesu gerudu giti, kwian tañachugu mo tale: “¿Mineade ama ñage che tke tangle ene trate? Ama kle che tke tangle ma no ma kiraske kwian che tkanga tangle Moisés chadalla giti ulitage, ama kle che tke tangle kwian geru mauña kweri kare.” Kwian ulita tañachugu ene mo tale Jesu giti. 23 Jesu kledu kwian tke tangle ene gwa u mo litangwa Chube gerua jwanngwage, kwian onbre gdaite jwligebanga che dolla kote kledu eni, 24 dolla onbre e gbu ngaute Jesuge:
—¡Jesu una Nazaremu, cha ulita chugene toi no! Chage uñale ba chema, ba Chube Kirolla no trate, uñale chage ba chiu nga dba ai giti cha ulita gbe ji chuge. Cha me takalin ba cha gbe boi daga ngwale, ba cha ulita chuge ngwadi ngwedi.
25 Jesu ka bo dolla e ole:
—¡Chegede kamne, joga siere onbre ege!
26 Jesu gerudu kiraske ene dollage gire dolla kledu kwian edi nga kagunga onbre e giti onbre gbu trateda dba tangle, dolla e onbre gbu ngaute kiraske kweri gire dolla e jo siere onbre ege. 27 Boidu ene kwian ulita gwa giti gire kwian chegu tañachuge tanre, kwian geru kadu moge ongoru ongoru:
—¿Kle boi mine aini cheske? Ulia Jesu kle che tke tangle geru jagere giti, kaire ama kle age kiraske che gwa giti. Ama kle gerule dolla ole dolla jogedale siere kwian jwligebangage gire dolla kle ama kerua gai dage kle age Jesu kle ama kage kare.
28 Ai ulita kledu boi ene Jesu ole, gire nga ulita nga Galileage geru chagedu kwianske, chku uñale kwiange Jesu kledu age kiraske tanre kwian gwa giti kwian ngwale me ñage age kare.
Jesu Simón ñemaña oga dodade
kaire kwian na tanre oga dodade
29 Jesu jo siere u mo litangwa Chube gerua jwanngwage gire Jesu jo chage Santiago ole kaire Juan ole, kaire kwian geru jwannga Jesuge na jo ama ole ule. Ama ulita jo chke Simón kaire Andrés ullage. 30 Jo chke ne ngwadi gire kwian geru ketu Jesuge Simón ñemaña giti ama kledu gwa ankwa giti oga nganagda ole. 31 Jesu geru e keruchugu gire Jesu jo Simón ñemaña kledu gbeba dba ngwadige, Jesu muinga e ko gau kote ama gau bdugu. Gire sugetibi allabi nganagda jo siere muingage muinga jo chkeni noni, gire muinga e mo gbubi bli jinade Jesu alin kaire kwian na ulita kledu eni alin, ama bligda dodadu gutadale.
32-33 Chui amañage ngabi nga jo jere gire kwian tanre una ege jo chke u Jesu kle ngwadige daba oga dbe Jesuge dodadale. Kwian ngle oga jingme tanre ole dule Jesu kle ngwadi, kaire kwian ngle jwligebanga dolla kote dule Jesu kle ngwadi dodadale. 34 Gire Jesu kwian oga jingme ole tanre ulita dodadu kaire dolla kwian gbaba jwligebanga ulita Jesu kagu siere kwian jwligebangage, kwian ulita cheguni no naskuni. Jesu dolla ulita kagu siere kwiange, dolla e ulitage uñadu Jesu Chube Kirolla, Jesu me tadukalin dolla geru e kete kwiange malen Jesu me dolla chugu ngwadi gerule, dolla ulita chegu kamne.
35 Nga ju ngwange nga bebi chra chke dba no gire Jesu chku bduge jo siere unage ama jo nga gballage kwian me ngwadi gerule Chube ole. 36-37 Nga chku ju ni uñadu Simónge ni uñadu geru jwannga na ulitage Jesu kle baini. Simón kwian geru jwannga na ulita ole jo Jesu jinade nate, gire Jesu skwendu amage nga gballage. Simón gerudu Jesu ole:
—Kwian ulita kle ba jinade nate.
38 Jesu jaindunga Simón kalen:
—Ale una nage kodi che kle ngwadige Chube gerua no kete kwiange. Ulia Chube cha kagu nga dba ai giti ama gerua gbadale chke uñale kwian nage kaire.
39 Jesu chagedu una ulitage nga Galileage kwian tke tangle Chube gerua giti, diali ama jo u mo litangwa Chube gerua jwanngwage una kaire kairege Chube gerua trage kwian ole, kaire ama dolla tanre kagu siere kwiange, diali Jesu kwian chudabo no ulita.
Jesu kwian gdaite oga kwara tuge jingmea
kada lepra ole dodade
40 Kwian onbre gdaite oga jingme kwian kwara gbe tuge ole, kwian e jo Jesu gitigu. Kwian ege sugedu Jesu kira molen ngle malen ama jongnagwa skutu dba Jesu gwangnagu gire gerudu Jesu ole:
—Ba takalin cha dodade, uñale chage ba ñage jingme ai jwen siere chage ene cha chege no trate jingme aige.
41 Kwian gerudu ene Jesu ole gire Jesu taidu dage amage, Jesu ko gbu onbre e giti gire Jesu gerudu:
—Cha takalin ba jingmea jwen siere bage, nege nege ba chege no trate.
42 Jesu gerudu ene gire sugeti jingme jongwa onbredi, ama chegu noni. 43-44 Gire Jesu gerudu onbre jo chke noni ole:
—Ba me gerule ni kwian gdaite ole cha ba dodadu giti agwa ba agedale Chube nu geru gbaba unsuialin kwian alin Moisés giti gerule kare, chada e gerule ba agedale ai kare: Joga u gerungwa Chube olege mo kaite kwian gerunga Chube ole daba alinge, ba bdada gbaboke dbadale ule gugadale Chube gwa giti u ege ba chegu no trate ñanale, joga age ene ulita gire be chke uñale kwian ulitage ba jo chkeni no ba jingmeage.
45 Jesu gerudu kwian onbre e ole onbre me geru ketadale kwian nage Jesu ama dodadu giti, agwa onbre me geru e gatu mo tale Jesu gerudu kare, onbre chagedu geru e trage kwian ulitage Jesu agedu ama alin giti, onbre e giti kwian tanrege chku uñale Jesu giti, malen Jesu me chegu ñage joge unaske, ama chegu nga gballage kwian me kle toi ngle ngwadige agwa kwian nga tanremu chiu kaire Jesu nate Jesu kledu ngwadige mo chudaboi kade Jesuge.