1 Samuwela
Samuwela Dedena Bukana Bwaꞌibwaꞌina
Liba Famahata
Buka fati ganahewadi yai mate, buka itete bwaꞌibwaꞌina, Isalaela yo Diuda nuꞌudi dededi ya liba bwaꞌiyen. Buka te hesadi mate: 1 Samuwela, 2 Samuwela, 1 Kin yo 2 Kin. Samuwela mate doga fafahesana buka bwaꞌibwaꞌina te ganahewana yai. In mate Isalaela edi Diyadi ofiꞌofina yo in logena Isalaela edi kin luwaga, Saulo yo Deiwidi ya fasinabodi be bukana sa tole falifali hesaen. Buka te, Isalaela dedena ya lau ee–, Saulo ena peꞌi dedena ya libaen.
1
Samuwela ena Fuya Tubu
1 Samuwela 1:1-20
Sulu Efalaim dogana hesa hesana Elikana, ena nuꞌu mate Lamataim-Sofi nuꞌuna ganahewana yai.* Hesa lofalofa te: Lamataim-Sofi mate sa fatupo be tiye, “Lama.” Efalaim piudi yai, ya miyamiya.
In mate Diyeloham natuna.
Diyeloham, Elihu natuna.
Elihu, Tohu natuna
na Tohu mate Sufi natuna.
Lalahuna luwaga. Hesa hesana Hana, na hesa Penina. Penina ya fanatu na Hana ya agali.
Bolima ouꞌouli taumoho te ena nuꞌu yai ya hasahasai Silo bena Guyau Gigibwali Mahudoꞌidi Tanuwagadi ya fadebasae yo antalasam ya ginaginaulidi lebena yai. Fuyanna yai, Tau antalasam Baꞌisana hesana Eli. Eli nanatuna tatau luwaga, Hofini yo Fineyasi mate, Guyau ena anꞌantalasam paisowana sa ginaginauli nuꞌuna yai.
Yena antalasam lahaina ya mahano Elikana haba antalasam suisuidi ya nigohidi be lahuna Penina yo nanatuna tatau yo wawahin adi yopeyope ya feledi.
Guyau, Hana ya faꞌagali be hige nanatuna. In moho Elikana ya fanuha wananahai be ana yopeyope laꞌilaꞌi ya felen. Guyau Hana ya faꞌagali. Logena, fuya ouꞌouli Penina haba Hana ya anꞌan kibiyen bena ya eli famanabala.
Laulauna te bolima ouꞌouli ya laulawen. Na yena Hana ya hasai Guyau ena luma mate Penina haba ya lululu felen yo ya eli fatantan be ibege i anꞌan. Elikana, Lahuna ya faliba komakomaniꞌi iyen,
Hidagu! Paꞌana somo be wa tan? Sidohana hige u kalahe? Nuwam ya heyaya be? Wananaha hige natum. Nuwagu yai yawa, “Wa fanuha wananahaigu! In moho Ibe nanatum boludi haba wa fanuha wananahaigu, habahim itete.”
 
9-10 Silo yai sa kalahe maꞌuda mate Hana ya obiyo. Nuwa kalapi ya lau fafamohafu be ya lau ya tan heyaheyaya Guyau lisina yai. Maihalana yai Guyau ena luma edaꞌedana duhuna sadaina yai mate tau antalasam, Eli aba taꞌai yai ya taꞌataꞌai.
11 Hana ya angwala iyen,
Hewa Wananaha Guyauna, u itagu! Yau em tau paisowa, na egu nuwa kalapi wa ita mate, tabu u nuwa afulegu, u nuwatuhuigu! Yena natugu taumoho wa felegu haba E fele fuyoiyawa lisim be em ya paisowa ena mwahuli mahudoꞌina yai. Angwala fafaꞌilalana mate kuluna ibege i ibo.
 
12 Hana ya laulauꞌuꞌula lau Guyau lisina, na Eli mate, Hana moꞌana yo sopana ya kinokinoꞌidi. 13 Eli ena nuwatuhu bena haga ya nom, paꞌana hige alinana i atahi, 14 be ya faliba iyen,
Maihala somo nom haba wa fatautau? Am wain u lawe hudoꞌiyen.
 
15 Hana alinana ya bui iyen,
Baꞌisa, hige ya nom, egu nuwa kalapi Guyau E faliba. 16 E lauꞌuꞌula doha ite paꞌana nuwagu hige i loholoho be tabu u nuwatuhui uwen, “waihin heyayana.”
 
17 Eli alinana ya bui iyen,
U nuwa talu, na u lau! Somo wa anꞌanꞌetai Isalaela eda Yaubada lisina yai i felem.
 
18 Hana ya liba iyen,
Baꞌisa, agutoꞌi, u mata amnaꞌegu.
Habahim ya lau ya anꞌan be hige i nuwa heyaya fuyo.
 
19 Bobonna ma hwalahwalalana, Elikana maꞌana boga sa eno obiyo be Guyau sa fadebasae. Habahim sa fuyo edi luma Lama. Elikana ma lahuna sa luma gwaꞌu be ena anꞌeta Guyau lisina yai sa fawananaha. 20 Habahim, Hana ya boga be natuna taumoho ya yosi. Hesana ya tole Samuwela, iyebom,
Guyau lisina yai E anꞌetai, be ya felegu. Hebelu Alinana yai Samuwela hesana ataꞌatahina mate 1. “Hana ena anꞌeta Yaubada lebena yai” e 2. “Hana ena anꞌeta buina Yaubada lisina yai ya abi.”
Hana, Samuwela ya Fele Afulen Guyau lisina.
1 Samuwela 1:21-28
21 Fuyana Elikana yo ana boga mahudoꞌidi sa hasai Silo bena bolima esega esega antalasamna sa ginauli Guyau ai lisina yo bena ena angwala ya fawananaha, 22 Hana hige i lau. Ya libalau Elikana lisina iyebom,
Gwama nom E fadabu, ai mulina haba E lawen Guyau ena ai luma. E fele afulen ai lisina haba ainiya ya miya, ena fuya mahudoꞌidi yai.
 
23 Elikana alinana ya bui iyen,
Somo wa nuwatuhui ya dudulai, u lau watan yo au miya ee–, nom ya dabu. Guyau ena liba fasunuma moho i fawananaha.
 
Na waihin luma yai ya miya na natuna ya ita watan ee–, nom ya dabu. Isalaela edi laulau mate, boliman faihona ganahewana yai nanatudi hige nom ti fadabu.
24 Samuwela, ma kiukiuna, nom ya dabu mulina yai, mate tinana ya hasaen Guyau ena luma, Silo yai. Bulubulumakauna ena bolima faihona yo fwalawa laꞌina kilogram safuhudohudoꞌi yo wain ilena hinaga ya abi hasaedi.
25 Bulumakau sa wunui, mulina yai mate gwama sa lawen Eli lebena. 26 Be tinana iyen,
Baꞌisa, wananaha, yau waihinigu, logegu, E obiꞌobiyo sadaim yai, na E laulauꞌuꞌula lau Guyau lisina. 27 Gwama te egu anꞌeta yai, be egu anꞌetana debana yai Guyau ya felegu. 28 Be aho te E fele afulen haba Guyau ena ya paisowa fuya ouꞌouli.
 
Be ainiya Guyau sa fadebasae.

*1:1 Hesa lofalofa te: Lamataim-Sofi mate sa fatupo be tiye, “Lama.”

1:20 Hebelu Alinana yai Samuwela hesana ataꞌatahina mate 1. “Hana ena anꞌeta Yaubada lebena yai” e 2. “Hana ena anꞌeta buina Yaubada lisina yai ya abi.”

1:23 Isalaela edi laulau mate, boliman faihona ganahewana yai nanatudi hige nom ti fadabu.