2 Koloniko
Kolonikolo Dededi Buka Fafaluwagana
Dedede eseꞌesegadi 1 yo 2 Kolonikolo yai sa ulidi mate Samuwela yo Kin bukadi yai hinaga sa uli. Kolonikolo buka bwaꞌibwaꞌina yai mate Kin Deiwidi yo ena nuwatuhu mate Guyau ena Dubu Tabuna ai Yelusalem taonina yai dededi ya uli. Deiwidi tau antalasam ya fatalaha komakomanidi. Ya fanuha bena Isalaela dodogadi mahudoꞌidi Yaubada enehena sa fadebasae. Kolonikolo fafaluwagana mate Isalaela edi kin dededi ya uli. Solomon ena tau paisowa Guyau ena Dubu Tabuna Yelusalem yai sidohana edi ginaginaulina yo ya peꞌi mulina yai, ena nuꞌu ya daili ya famala nuꞌu luwaga mate buka yai ni, sa uli. Nuꞌudi edi Kin yo adi paisowa buka te, hinaga ya dedei. Kin hahaisa edi laulau sa loholoho, Yaubada ena nuwatuhu sa lau watan na kin boludi mate heyaya sa ginauli, Yaubada ena laugagayo hige ti famuli watanidi. Yaubada bwalabwaladi sa fafamuli watanidi. Kin ni, edi heyaya yai dodoga sa fafapilipilidi be Yaubada ena gigibwali yai, waiyunu nuꞌudi ni, ya tulufidi. Ya anfaheyayanidi luwaluwagaidi. Dedede mahudoꞌidi buka yai ni hinaga, sa ulidi. Yelusalem yai.
36
Yelusalem Dodogadi, Guyau sa Awayagalaʼen
2 Koloniko 36:14
14 Tau antalasam babaꞌisadi mahudoꞌidi yo dodoga mate Yaubada hige ti sunusunumaꞌen. Nuꞌu hahaisa dodogadi edi laulau heyaheyayadi sa laulauwedi yo Guyau ena Dubu Yelusalem yai haꞌa ya fatabu, edi abiꞌabina doha luma gaibu.
Waiyunu Yelusalem Taonna sa Faheyaya
2 Koloniko 36:15-23
15 Afa wahawahadi edi Guyau yo edi Yaubada, fuya ouꞌouli ya liba fanuwa tagudi ena wasa tau lawendi lebedi yai, paꞌana ena dodoga yo ena Aba Miya, Dubu Tabuna, ya nuwatohatohaedi. 16 In moho Yaubada ena liba sa ꞌwaiyoꞌoꞌen, ena wasa tau lawendi, sa ala liuliuhwaꞌedi, yo ena peloweta sa ita lidilidiyedi ee–, Yaubada ya manabalaꞌedi, be hige aba famamayona.
17 Habahim Guyau, Babilon edi Kin, Nebukanesa, nuwana ya lafei, be edi tau hiyala Yelusalem taonna sa tulufi, be Diuda hewahewalidi Dubu Tabuna ganahewana yai, sa wunuidi baineti yai. Hige hewali, hasala e tautaulaꞌi hesa i mwahuli. Yaubada, mahudoꞌidi ya tole afuledi Nebukanesa nimana yai. 18 Ginaulidi mahudoꞌidi, lalalaꞌi yo kikiluka, maisadi lalaꞌi Yaubada ena Dubu Tabuna yai, yo Kin maꞌena tau paisowa edi ginauli mahudoꞌidi sa lawedi Babilon. 19 Yaubada ena Dubu Tabuna sa gabu yo Yelusalem ganana sa dem lopalopa, luma lalaꞌi mahudoꞌidi sa gabudi yo ginauli maisadi lalaꞌi, amainiya sa faheyayadi.
20 Diuda dodogadi salumadi hige ti wunuidi na sa mwahuli mate sa lawedi Babilon be Kin ma nanatuna edi tau lau fayofayo ee–, Pesia, Babilon Nuꞌuna sa lei hafihafitidi, habahim, sa lau fayofayo tauwendi. 21 Fuyanna Diuda edi tanohi yai sa miyamiya, mate bolima faligigi-luwaga ganahewana yai tanohina hige ti faꞌanyawasi. Na fuyana sa lawe hudoꞌiyedi Babilon yai mate tanohina sa ita afulen bee–, bolima 70. Be Guyau ena liba fasunuma peloweta Delamaiya lisina yai wa, ya fawananaha. (Delamaiya 25:11, Lewitikusi 26:40-45)
22 Boliman bwaꞌibwaꞌina yai Sailusi ena fuya kin Pesia nuꞌuna yai, Guyau liba fasunuma peloweta Delamaiya haꞌa ya faliba mate ya fawananaha be Kin Sailusi nuwa ya lafei bena ya libalibaen yo ya uli.
23 Somo Kin Sailusi ya libaen mate itete,
Guyau, Galewa Yaubadana,
mate nuꞌu mahudoꞌina tanoꞌubu yai ya felegu
yo ya fasinabogu bena ena Dubu Tabuna
ai Yelusalem E ginauli, Diuda Nuꞌuna yai.
Salumadi Yaubada enehena
mate Guyau emi Yaubada
haba maꞌemiu, mate au leu niya.”