Tau Guguya
(Ekelesiyasiti)
1
Ginauli Mahudoꞌina Hige Aniyodi
Tau Guguya 1:1-11
Tanuwaga hesa Deiwidi natuna in Yelusalem edi kin ena gaimumu.
Iyen,
Hige aniyona!
Wananaha hige aniyona!
Ginauli mahudoꞌina hige aniyona.
Taumoho paisowa mahudoꞌina ya ginauli tanohi yai,
mate lisina yai somo ya lobahi?
Hitina ya laoma yo ya lau
in moho tanoꞌubu otaꞌotana.
Maihala ya kepa na ya sina ee–, ya bulu
na feula ya fuyo ena aba kepama yai
be haba bobon ya sina boda.
Hwayahwayau ya towa hasa
na ya bui be ya towa lidi,
ya taꞌitaꞌiꞌili be ya fuyo ena aba towa bwaꞌibwaꞌina yai.
Hoꞌowa mahudoꞌidi sa didi lidi be gabogabo yai sa pei taluhidi.
In moho gabogabo hige i mohafu. Haba sa fuyo ai ulu
be ainiya sa didi fuyo lidi gabogabo.
Haba sai somo ya libaen?
Ginauli mahudoꞌidi tanoꞌubu yai nenedi eseꞌesegadi,
hige ti buidi,
yo sa fakamna heyaheyaya.
Ginauli boludi te itadi yo liba hudohudoꞌi te atahiyedi
in moho hige gonogonowada.
Te gado bena te itaꞌita,
yo te ataꞌatahi ya laulaui moho.
Beyabeyana somo sa tubu
haba sa lau boda fuyo.
Dodoga somo beyabeyana sa ginaulidi
haba sa ginauli fuyoꞌidi.
Tanohi yai hige ginauli hesa falifalihuna.
10 Doga haba sidohana iyen,
“Hola au ita! Ite ginauli falifalihuna.”
Higeꞌe! Ginauli te, haꞌa beyabeyana amaiteꞌi;
ita hola hige ta tubu. In, haꞌa amaiteꞌi.
11 Hige gonowana sai laꞌi hiti halo dodogadi i nuwatuhuidi,
yo hiti hesa ai mulida sa tubu,
ibege hiti ai mulidi sa tubu,
ti nuwatuhuidi hinaga.
Sibasiba Hige Aniyona
Tau Guguya 1:12-18
12 Yau tanuwaga yo yau beyabeyana Isalaela edi kin, Yelusalem yai.
13 Sibasiba yoꞌoyoꞌoina yai egu fuya E pei, bena sidohana ginauli mahudoꞌidi tanoꞌubu yai sa tubu te, paꞌana wananahana E yoꞌoi be E sibai. Yaubada mwahu laꞌilaꞌi dodoga lisidi yai ya tole.
14 Ginauli mahudoꞌidi sa ginaulidi maihala yai haꞌa E itadi, mahudoꞌidi hige aniyodi. E tafotafo watanidi, mate hige aniyodi, doha hwayau E tafotafo watan.
15 Somo haꞌa sa filisi hige gonowana ti fadudulai fuyoi.
Somo hige amainiya, hige gonowana ti fatili.
16 Nuwagu yai yawa, “Yau E sibasiba wananaha, habahim kin hahaisa beyabeyana haꞌa Yelusalem yai. Ami ita! Yau sibasiba yo sonoga haꞌa E abidi.”
 
17 Sibasibana ena aba laoma somo yai, yo laulau yauyauledi E anpate bena E yoꞌoidi. In moho, E lobahi mate doha hwayahwayau E weꞌaweꞌai.
18 Sibasiba ya ouli, mate nuwa dubu hinaga ya laꞌi wananaha. Sibasiba ya laꞌi wananaha, mate nuwa heyaya hinaga doha.