Wasa Loholohona
Maleko
ya Uli
1
Diyon Babasito ena Lauguguya
Maleko 1:1-8
(Matiu 3:1-12; Luka 3:1-18; Diyon 1:19-28)
Itete Yesu Keliso wasana loholohona. In mate Yaubada Natuna. Ena fatufatubu mate haꞌa peloweta Isaiya ya uli doha ite:
Yaubada iyen, “Egu wasa tau lawenina haba E dui bwaꞌiyen,
be em edaꞌeda ya faꞌaꞌa nonohai.” (Malakai 3:1)
Doga hesa nuꞌu pitapitalina yai ya yogayoga iyebom,
“Guyau ena edaꞌeda au abi nonohai;
ena aba lau au fadudulai haba ya lau watan!” (Isaiya 40:3)
 
4-5 Yo fede Diyon ya laoma nuꞌu pitapitalina yai be ya lauguguya. Dodoga boludi Yelusalem taonna yai yo Diudeya Nuꞌuna yai sa lau lisina be ya falibadi iyen,
Au nuwabui na au babasito. Haba emi heyaheyaya ni Yaubada ya nuwa afuledi.
 
Yo fede edi heyaheyaya sa liba famahatadi be Diyodan Hoꞌowana yai ya fafababasitodi.
Diyon ena leli ya liꞌodi mate kamela olodi yai ya ginaulidi na ana bwaꞌulu mate yosiyosi ꞌwapina na ana kalahe mate digolele yo amoꞌamo.
Dodoga ya falibadi iyen,
Doga muligu yai ya laoma mate in ya hasai wananaha, habahim yau. Yau hige ya loholoho haba ya dulu lidi be ana sendolo mahinadi ya tatadi. Yau haba E fababasitomiu hoꞌowa yai na In haba ai Yaluwa Tabuna ya fababasitomiu.
Fababasito yo Yesu ana Lauꞌita
Maleko 1:9-13
(Matiu 3:13-4:11; Luka 3:21-22; 4:1-13)
Lahaidi yai ni Yesu, taon hesa hesana Nasaleta, Galili nuꞌuna yai ya laoma be Diyon wa Yesu ya fababasito Diyodan Hoꞌowana yai. 10 Yesu hoꞌowa yai ya pohema. Galewa ya tasoꞌe ya ita na Yaluwa Tabuna doha waliliya ya lidima hewana yai. 11 Na alina Galewa yai ya libama iyen,
Um mate Natu Eseꞌesegagu. E fanuha wananahaim.
 
12 Yo fede Yaluwa Tabuna ya foyahi lawen nuꞌu pitapitalina yai. 13 Amainiya ya miya lahai 40 na Diyabolo ya lauꞌita. Suisui yekoyekodi amainiya hinaga. In moho anelu sa laoma be sa saguhi.
Tau Hamahama Fati, Yesu ya Yogaidi
Maleko 1:14-20
(Matiu 4:12-22; Luka 4:14-15; 5:1-11)
14 Diyon sa falau deli na mulina yai Yesu ya lau Galili be Yaubada wasana loholohona ya lauguguyaꞌen iyen,
15 Yaubada ena lahai peloweta sa libalibaen mate ya fawananaha yo Yaubada Aba Baꞌisa haꞌa ya sigima! Nuwamiu au buidi yo wasa loholohona au kawawananahaꞌen!
 
16 Galili gelegelena yai Yesu ya laulau na tau hamahama luwaga ya itadi. Saimon ma hidana Endulu, edi hagida sa peipeiꞌidi gabogabo yai.
17 Yesu ya falibadi iyen,
Au lau watanigu. Haba dodoga sidohana onaꞌonadi E fatalahamiu.
 
18 Makai ma luwaga, edi hagida sa lau afuledi na maꞌedi sa lau.
19 Ya aulaha boda yo fede Diyemsi ma hidana Diyon ya itadi. Iti mate Sebedi nanatuna. Waga yai edi hagida sa abiꞌabi nonohaidi. 20 Yesu ya itaꞌita lau be ya itadi yo fede ya fayogadi. Tamadi Sebedi, sa luhu afulen waga yai, maidana edi tau paisowa na Yesu maꞌedi sa lau.
Doga Hesa, Yaluwa Heyaheyayana Ganahewana yai
Maleko 1:21-28
(Luka 4:31-37)
21 Yesu yo tau famuli watanina sa mahano lau Kapanayum taonna yai na Sabati hudoꞌi yai Yesu ya lau aba oiꞌoigogo lumana yai be ya fatubu ya lau faꞌata. 22 Yo fede ena lau faꞌata sa noꞌoꞌen paꞌana In maꞌena dudulai yo gigibwali yai ya lau faꞌata. Hige doha laugagayo tau lau faꞌataendi. 23 Hige walolona doga hesa ya luhulau aba oiꞌoigogo lumana yai. Doga te, yaluwa heyaheyayana ganahewana yai. Ya ꞌwalaꞌui iyebom,
24 Yesu, Um mate Nasaleta dogana. Somo wa fanuha lisimai yai? Wa laoma te bena wa lau funuhimai? Haꞌa E sibaim! Um mate Yaubada ena Wasa Tau Leyamana Fafatabuna!
 
25 Yesu ya libalau yaluwa heyaheyayana lisina iyen,
U famakano na doga ni u lau afulen!
 
26 Yaluwa heyaheyayana doga te ya kamfafatabubu na ya halabo yo fede ya kalamahano.
27 Dodoga sa noꞌo. Yo fede sa famoꞌa libaliba tiyen,
Mate somo? Nuwana lau faꞌata fwaufwaudi haisa? Doga te, gigibwali lisina yai logena yaluwa heyaheyayadi ya falibadi be alinana sa lau watan!
 
28 Na Yesu wasana ya tadada feula Galili tefa mahudoꞌina yai.
Dodoga Boludi, Yesu ya Faloholohodi
Maleko 1:29-34
(Matiu 8:14-17; Luka 4:38-41)
29 Yesu yo tau famuli watanina maꞌedi Diyemsi yo Diyon aba oiꞌoigogo lumana sa lau afulen be sa dudulai sa lau Saimon yo Endulu edi luma. 30 Saimon botiyana waiwaihin tauna sa gigibwali be ya laulau eno na wasana Yesu ena sa liba. 31 Yo fede ya lau ya ita. Ya abilau nimana yai be ya abi famwaito. Yo fede tauna gigibwalidi sa talu mwalugulugu be ya paulaidi.
32 Maihala ya bulu mulina yai dodoga tau asiꞌasiyebo yo salumadi yaluwa heyaheyayadi ganahewadi yai, mahudoꞌidi sa ledima Yesu lebena. 33 Taon dodogadi mahudoꞌidi sa faꞌoigogoma luma hafohafona yai. 34 Salumadi asiyebo hudoꞌi - hudoꞌi sa abidi mate Yesu ya faloholohodi yo yaluwa heyaheyayadi ganahewadi yai ya liba afuledi. Yaluwa heyaheyayadi mate hige gonowana somo ti libaen paꞌana iti sa sibai mate, in sai.
Yesu ya Lauguguya Galili yai
Maleko 1:35-39
(Luka 4:42-44)
35 Hwalahwalala ma kamukamumuna Yesu ya obiyo be ya lau mala tupwam yai. Amainiya ya lauꞌuꞌula. 36 Saimon ma afa haidana sa lau sa yoꞌoi yee–, 37 sa lobahi. Sa faliba tiyen,
Dodoga boludi mate sa yoꞌoyoꞌoim.
 
38 Yo fede Yesu alinadi ya bui iyebom,
Nuꞌu hahaisa sadasadai yai bena te laufidi be haba ainiya E lauguguya hinaga. Logena E laoma.
 
39 Na Galili mahudoꞌina ya fataꞌiꞌili be aba oiꞌoigogo lumadi yai ya lauguguya yo yaluwa heyaheyayadi ya liba duidi.
Yesu, Taumoho Hesa ya Faloholoho
Maleko 1:40-45
(Matiu 8:1-4; Luka 5:12-16)
40 Taumoho lepela ya abi ya laoma ya tulibono Yesu nuwanuwana yai, na ya anꞌetai iyen,
Yena wa fanuha, um gonowana wa faloholohogu.
 
41 Yesu ya nuwatohatohaen be ya abilau tauna yai na iyen,
E fanuha. U loholoho!
 
42 Yo fede lepela asiyebona ya ofi na ya loholoho.
43-44 Habahim Yesu, doga ni ya falaugagayo iyen,
Tabu u fatala libalibaen, na u lau tau antalasam lisina be i ita sipoim. Haba ya fawananaha dodoga ai lisidi mate am asiyebo haꞌa ya ofi. Ai mulina habahim Mose antalasam somo ya libaen u ginauli watan.
 
Yo fede ya dui be ya lau.
45 Taumoho wa ya lau be ya fatala libalibaen nuꞌu ouꞌouli yai be Yesu hige gonowana i lau mahamahata ai taon. Logena ya miya tauduma mala tupwam yai, na dodoga tefa hesa - hesa yai sa laoma lisina.