SAGIKUK ULI PAS POL NENEKAS SANAMU TIMOTI ULI
Banenyi balan umu enyudak balan Pol nagikuk neneken nyanamu Timoti uli
1:1-2 Pol nenekumanu balan Timoti nakli God nunu Krais Jisas hugakomanu
1:3–2:26 Pol naklipu Timoti umu nunubu nunek God ananin moul kalbu
3:1-17 Echech Kristen imas chiyotu dadag chusah hevi ababuk nyultab hugikuk uli nyumnah hukli hutoglu abali. Abudak nyultab wolobaichi elpech eke chichogeik God ananin balan
4:1-8 Pol dodogowinu atunu naklipu Timoti umu nuklipech God ananin balan kalbu ali nichuhul umu chunek yopinyi pasin. Enen balan umu Pol nenek kot umu nyanu nyatuh uli balan
1
1-2 O Timoti, yek Pol yet yenek-umenyagu asudak pas nyak. Yek douk ulkum manubu manohwenyu. Ali nyak nyasuh God ananin balan nyagipechen ali yek dakio yohwalenyu nuganinu. Yek douk God nagipech ananin atin laik ali Krais Jisas natalihemu ipe ananiwe aposel ali inak iklipech God ananin adulin balan. Enyudak balan umu apak monek pas Krais Jisas uli amalau agundak umu mupe kalbu eheh nyumneh umu.
Ali yek yakli Aninu God nunu apakinu Diginali Krais Jisas hugakomenyu meyoh ali nyakihw apahw hwulu kalbu.
Apak Kobi Munenek Ablan Umu Muklipech God Ananin Balan Kipaichi Elpech Umu
Yek yenek tenkyumu God. Anan douk yek yenek ananin moul kalbaluli. Yek yenek ananin moul umu, yek ulkum molu duldul ali wo ulkum mulomu ikli yek ayenek enen yowenyi e, wak. Yek yeneken kalbu kobi seiwak yekim ahlim bahlohim heneken umu. Ali wihlu wehlu yek yenek beten umu God umu, yek yenek tin umu nyak ali yalikanu nyumnah wab umu nugakomenyu. Likuk ohwak douk wape atugun. Ali nameitu yek yenek tin umu ahabuk nyumnah yek yatuke-menyaguk yanaki ahi, ohwak wonek sigal ali nyak nyeleh nyapeik ali yek yanaki. Douk namudak ali yek yanubu yakli wata chopuk itulinyu ali wata inehilau-menyu. Ali chopuk, yenek tin umu agundak nyak nyanubu nyasuh God ananin balan dadag nyagipechen umu. Seiwak nyakik babeik Lois kwalik kwasuh God ananin balan kwagipechen. Ali nyakik mamakik Yunis chopuk kwahwen dadag kwagipechen. Douk namudak ali yek yanubu yadukemech umu nyak alagun douk nyahwen nyagipechen kobi owo umu. Namudak ali yek yakli iklipenyu enyudak balan ali nyak kobi ulkum mukenyoguk. Balan enyudak. Likuk yek yowemu wis nyakim boglom ali God nekenyu enyudak presen umu nunekenyu nyunubu dodogowinyu atinyamu nyunek ananin moul umu. Douk namudak ali nyak imas nyunek tin umu enyudak presen anan nekenyeyen uli ali nyunubu nyupe dodogowinyu atinyu nyunek ananin moul. Umu moneken, God ananin Michin douk nyape apak ananipaluli douk wo nyenekapu elgeipu e, wak. Enyen douk nyenekapu malau enyenyin strong matoglu dodogowipu ali apak ulkwip panosuh wolobaichi elpech magakomech. Ali chopuk douk ananin Michin atin nyenekapu monek bos umu apak yet kalbu.
Douk namudak ali nyak kobi nyunenek ablan umu agundak yek yaklipech God ananin balan ali dakio yenek kalabus umu, wak. Ali chopuk, kobi nyunenek ablan umu nyuklipech apakinu Diginali ananin balan umu. Nyak imas nyutanuh yek umu wuklipech God ananin balan. Ohwak kobi elgeihwamu agundak elpech chukli wak umu wuklipech God ananin balan umu ali chohwu wumnek nyih umu, wak. Anan eke nugakomenyu nunekenyu nyiyotu dadag. God douk ananalawapu matanamali mape kalbu ali anohwalapamu munubu mupe ananipu atupu ali mupe duldulipali. Anan douk wo nutik enen yopinyi pasin apak moneken uli ali dakio nuhwalapu e, wak. Anan nagipech ananin atin laik ali nohwalapu meyoh. Umu moneken, seiwak bawagas umu, God ulkum molomu apak ali nakagasi Krais Jisas nanaki nagakomapu nanalawapu meyoh. 10 Ali nameitu enyudak seiwak God naklien uli douk anyatoglu. Krais Jisas douk ananaki ali nanalau apak matanamali mape kalbu. Ali nabo agundak umu apak munubu mugak munak muwichuk umu gnabihuk. Namudak ali apak eke kobi munubu mugak munak muwichuk, wak. Apak eke mupe kalbu eheh nyumneh kobi God ananin balan nyaklipapamu. 11 Ali God natalih yek ali nekegemu inak iklipu elpech umu enyudak ananin balan. Douk namudak ali yek dakio yanak yenek skulumu wolobaichi elpech. 12 Douk yenek skulumech ali nameitu yek dakio yape yemnek nebehi nyih. Wakuli yek wo inenek ablan e, wak. Umu moneken, yek yanubu yadukmanu kalbu anudak yek yenek bilip-umanaluli ali yanubu yakanu yek yet yanu yekin moul yolu ananis wis. Ali yek yanubu yadukemech umu anan eke nugakome nunek banisume ipe kalbu ali inek enyudak atin moul aliga inak itoglomu ahudak nyumnah anan nutanamali ahi.
13 Enyudak yopinyi balan douk likuk yek yakli-penyeyen uli nyak imas nyuhweh nyugipechen ali nyuklipech enyebuk atin kipaichi elpech. Ali nyak nyuklipech God ananin balan abali, nyak imas nyugipech enyudak pasin umu nyusuh ananin balan dadag nyugipechen umu, nyunu enyudak umu nyak ulkum munosuh anan nunu chunatimaguk elpech umu. Enyudak bien pasin, enyen douk God noku apak douk monek pas Krais Jisas uli. 14 Ali nyak imas nyunek lukautumen kalbu God ananin balan douk anan nakli nyak nyanokwnumu nyuklipechen uli. Ali God ananin Michin douk nyape apak uli eke nyugako-menyamu nyunek lukautumen kalbu God ananin balan. 15 Nyak nyadukemech echudak chanatimaguk elpech chape enyudak bien provins Esia uli chanu amudak biam Fiselas uli Hemosenis. Echech douk chakli wakeik ali chatukemeik. 16 Wakuli Onesiforas atunu nagakome. Wolobaihi nyumneh anan nanaki nagakome ali neneke yekihw apahw hwolu kalbu. Yek chowechike senab yenek kalabus yape wakuli anan wo nunenek ablan umu agundak yek yenek kalabus yapemu e, wak. Wolobaihi nyumneh anan nanaki nagakome ali neneke yatoglu dodogowiwe. Namudak ali yek yakli apakinu Diginali nukli mapilich Onesiforas nunu ananigu nyulgu ali nugakomech. 17 Ali nubuwakih susubati anan nanaki abludak nebebuli wabul Rom umu, anan nenek tin umu yek ali naulime nanak aliga nanaki nogwate. 18 Ali nyak nyadukemech umu anan nenek wolobainyi God ananin yopinyi moul gani Efesas umu nagakomu wolobaichi elpech ali nagakome yek alagun. Douk namudak ali yek yakli enyudak. Ahabuk nyumnah apakinu Diginali Jisas nunaki ahi, anan eke nunelekanu ali nugakomanu.