NAMBA TRI PAS DOUK JON NENEKAS ULI
Banenyi balan umu enyudak namba 3 balan Jon neneken uli
ves 1-4 Jon nenehilaumu Gaias ali naklipanu God ananin yopinyi balan umu nugakomanu
ves 5-8 Jon nenek tenkyumu Gaias umu nenek yopinyi pasin
ves 9-10 Daiotrefis nenek yowenyi
ves 11-12 Demitrias nenek yopinyi pasin
ves 13-15 Tukanin umu nyatuh uli balan
1
Yek nebewelimu God ananich elpech uli yeneku-menyagu asundak pas nyak nyanubu yekinyu elpen Gaias. Nyak douk adul yekim ulkum manubu manohwenyu uli.
Yekinyu elpen, yek yenek beten yasolik God umu ihenyumali nyak nyuneken uli imas nyunubu nyutoglu kalbu. Ali chopuk yenek beten-umenyamu sig kobi anagu genyu ali nyunubu nyupe kalbu. Kobi yadukemech umu nyakin michin nyolu kalbu ali nyanubu nyenehilawamu God umu. Nubuwakih anam yekim elpechim hanaki hatoglomali yek. Hanaki ali haklipe hakli nyak nyanubu nyagipech adulin atinyi balan ali nyenek adulin atinyi pasin. Douk yemnek namudak ali yanubu yenehilau. Sapos yek imnek balan umu agundak yekipu elpech pugipech adulin atinyi balan umu, yek douk isave yenehilau yalikuk yechalakuk agundak yenehilaumu kipaichi echudak umu.
Gaias Nenek Yopinyi Moul
Yekinyu elpen Gaias, nyak nyanubu nyakli adulin atin ali nyenek ihenyumali moul umu nyagakomu amam apakimi almam umu. Amam douk kipahemi wak nyudukemom uli e, wakuli nyenekumom enyudak atin yopinyi pasin. Amam hanaki agundak ali haklipu chanatimaguk God ananich elpech umu agunak nyakim ulkum manosuh amam ali nyagakomom umu. Ali yasolikenyamu nyugakomom umu utabal o enechi enech echudak umu amam hunak ahudak louhi yah hunek God ananin moul umu. Nyugipech kobi God naklimu ali nyugakomom. Enyudak hanamen uli moul douk hanak umu huneken umu hutuk Krais ananin yeul nyukih. Ali amam douk wo hunatulich enech echudak echech wo chudukemu God uli e, kobi utabalami umu. Hanubu wak. Namudak ali apak imas mugakomu amudakmali almam. Munek namudak umu, apak eke munam munechlepu munek enyudakmali atin umu mugakomom muklipech adulin atinyi balan.
Daiotrefis Nenek Yowenyi Pasin
Yek douk ayenekumepagu anas banasi pas ipak God ananipu elpech. Wakuli Daiotrefis douk nakli nunubu nupe nulik nupe nebenali. Anan douk wo kwalowi numneken ati e apakin balan, wak. 10 Namudak ali abudak nyultab ikli inak itoglogu abali, yek wosik eke ineyagamu ihenyumali anan neneken uli pasin. Anan neyagwleh-umapu enenyi enen yowenyi balan. Ali neyagwleh-umapu meyaluhin balan naklipu wolobaichi elpech. Ali douk wo nunek enyudak atin e, wak. Wakuli amudak apakim douk hanak umu hunek Krais ananin moul uli, anan douk wo nuklimu nulawam huwich hupe ananitu wilpat e, wak. Elpech douk chaklimu chulawam umu echechig wilag uli douk chopuk nenek pasimumech nakli wak. Ali echudak elpech chakli chulau amudak alman uli douk nenek rausumech nakli kobi chutanuh God ananich elpech, wak.
Demitrias Nenek Yopinyi Pasin
11 Yekinyu elpen, nyak kobi nyugipech yowenyi pasin, wak. Nyunubu nyugipech yopinyi atin. Meinyi elpen douk nyunek yopinyi pasin uli, enyen douk God ananin elpen. Ali elpen nyenek yowenyi atin uli, enyen douk wo nyudukemu God e, wak.
12 Chanatimaguk elpech chakli Demitrias anan douk yopinyi elpen. Ali God ananin aduligeinyi balan enyen yet douk chopuk nyowoleh umu agundak anan douk yopunali alman umu. Yek chopuk yakli anan douk nanubu yopinyi elpen. Nyak douk nyadukemech, umu yekin balan douk adulin.
Nyagikuk Uli Balan
13 Yek yakli iklipenyu wolobainyi balan, wakuli yakli wak umu inyemagu pas meyoh, wak. 14 Halakatimu yakli inaku itulinyu ali wupe atugun wuneyagwleh.
15 Yek yakli nyakin michin wosik nyulu kalbu ali nyunehilau. Apakichi elpech chape agundak uli douk cheneku-menyagu gude nyak. Wosik yek yakli nyak nyunek gudemu chanatimaguk apakich elpech atin ati douk chape agnabuk uli.