PAS CHENEKAS SANAMU ECHECH HIBRU ULI
Banenyi balan umu enyudak balan chenyemu nyanamu echech Hibru
1:1-3 God ananin balan nyatoglu nyonowoleh yopugunmu, umu God ananinu atunu nuganinu Jisas Krais douk nanubu nape namudak ati kobi Aninu God umu
1:4–2:18 Jisas nanubu nechalakuk chanatimaguk enselahas
3:1–4:13 Jisas nanubu nechalakuk Moses
4:14–6:20 Jisas anan douk apakinu Diginali pris douk nenek ofamu anan yet umu God
7:1-28 Jisas anan douk nape nanubu nebenali pris nechalakuk Melkisedek.
8:1–9:28 Jisas anan Nebenali pris douk nenek bos umu enyudak God ananin nupolein balan kontrak. Ali ananig butog douk gwonek enyudak kontrak nyanubu nyatoglu dodogowin
11:1–12:29 Wolobaichi seiwak chenek bilip umu God uli douk chagilapapu yopinyi pasin umu apak mugipechen
13:1-25 Yopinyi pasin apak imas mugipechen umu munek God nunehilaumapu
1
God Ananinu Nuganinu Nanaki Naklipapu God Ananin Balan
Seiwak wolobaibali nyultab, God naklipu amam profet douk haklipech ananin balan uli ali hanaki haklipu apakich popech yamech ananin balan. Haklipechen wolobaihi silisilih yegwih. Wakuli nameitu ehudak hagikuk uli nyumneh, ananin balan douk anaklipali ananinu Nuganinu meyoh nanaki naklipapeyen. Ali nameitu, God douk anatalih-anamu eke nuglemu ihechumali enechi enech echudak chunu elpech alagun. Seiwak bawagas umu, God naklipu ananinu Nuganinu ali nenek iluh uli atap panu ihechumali enechi enech echudak. Anan douk nanubu nagilapapamu agundak God nanubu dodogowinu atunu ali nehiyatik umu. Anan douk nanubu naduk God. Mutik anan abali douk manubu matik God. Anan douk napemu neyagwleh dodogowinyi balan ali agudak nohobigu ganu iluh utagaluli ihechumali enechi enech echudak chape dadag. Anan douk chanu butog gwakwlupaguk apakin yowenyi matoglu yopupu. Douk nagako-mapaguk namudak ali nalto heven nakih yeul nyakihanu nape anunamu Anudak Nanubu Dodogowinu Atunali God.
Jisas Douk Nanubu Yeul Nyakihanu Nechalakuk God Ananich Enselahas
God ananinu Nuganinu douk anatoglu nebebenu atunu nechalakuk echech ensel douk chalahemu God ananin balan uli. Umu moneken, agundak God nohwalanu Nuganinamu douk gnanubu gnechalakuk agundak nohwalu echech enselahas umu. Seiwak, God wo kwalowi nuklipu enen atin ensel namudak e, wak. Naklipu ananinu Nuganinu atunu. Naklipanu namudak, nakli,
“Nyak douk yekinyu Nuganinu. Doumeih yek douk ayowoleh balan umu agundak Yek yape nyakiwe Aninamu.”
Chopuk anagun douk naklipanu nakli,
“Yek eke itoglu ananiwe Aninu, ali Anan eke natoglu yekinu Nuganinu.”
Ali chopuk, abudak nyultab God nakli nukagasi ananinu nalikili Nuganinu nubihi apudak atap abali, Anan douk nakli,
“Chanatimaguk yekich ensel imas chunek lotumanu chutuk ananin yeul nyukih.” Wakuli echech ensel, God douk neyagwleh-umech enyudak, nakli,
“Yek yenek enselahas umu chuneme moul chunaki chunak kobi wihun nalumu o kobi nyih puleleh hanu halto dodogowih atih umu.”
Wakuli Ananinu Nuganinu God douk naklipanu namudak, nakli,
“God, Nyak eke nyupemu nyupe Nebenyali namudak ati eheh nyumneh. Nyasuh duldulin pasin ali eke nyupe Nebenyalimu ihechumali enechi enech echudak chunu elpech chupe kalbu. Nyak nyanubu ulkum manosuh duldulinyi pasin ali yowenyi douk nyanubu nyakli waken. Namudak ali yek nyakiwe God yautinyu nyanubu nyape Nebenyalimu chanatimaguk echebuk douk nyak nyanech penechle-paluli. Yek douk yagimeh-umenyu namudak ali yenekenyu nyanubu nyenehilau nyalikuk.”
10 Chopuk God naklipanu nakli,
“Diginyali, seiwak wata bawagas umu nyak yet nyokwalmu apudak atap. Iluh utagu douk chopuk nyakwu nyakis wis nyenekagu. 11 Iluh atap uli enechi enech echudak eke bulkwolech chunak chuwichuk, wakuli nyak wak. Eke nyunubu nyupe namudak ati. Iluh atap uli ihechumali enechi enech echudak eke alich kobi luseh alih umu. 12 Alich ali Nyak eke nyudale-chechuk kobi chadalechuk anah nebehi lupah umu. Eke chunak chuwichuk kobi chowaluk alihi luseh ali cholu namihimu. Wakuli nyak yet eke nyunubu nyupe namudak ati eheh nyumneh.”
13 Chopuk naklipu ananinu Nuganinu nakli,
“Nyak pe agundak anuwemu aliga yek ibo nyakich birua chubihuk chupe chakamomu nyak.”
Enyudakmali balan, God douk wo kwalowi nuklipech ati e echech ensel, wak. 14 Namudak ali echech enselahas douk amonekech? Echech douk michich meyoh douk chenemanu moul God uli. Anan isave nakagech chanaki chagakomu echebuk elpech douk eke nunolawech ali chutanamali chunanu chupe kalbaluli.